| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၆. သပရိဝာရာသနတ္ထေရအပဒာနဝဏ္ဏနာ
6. Saparivārāsanattheraapadānavaṇṇanā
ပဒုမုတ္တရဗုဒ္ဓသ္သာတိအာဒိကံ အာယသ္မတော သပရိဝာရာသနတ္ထေရသ္သ အပဒာနံ။ သောပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေသု ဝိဝဋ္ဋူပနိသ္သယာနိ ပုညာနိ ဥပစိနန္တော ပဒုမုတ္တရသ္သ ဘဂဝတော ကာလေ ဝိဘဝသမ္ပန္နေ ကုလဂေဟေ နိဗ္ဗတ္တော ဝုဒ္ဓိပ္ပတ္တော သဒ္ဓာဇာတော သာသနေ ပသန္နော ဒာနဖလံ သဒ္ဒဟန္တော နာနဂ္ဂရသဘောဇနေန ဘဂဝတော ပိဏ္ဍပာတံ အဒာသိ, ဒတ္ဝာ စ ပန ဘောဇနသာလာယံ ဘောဇနတ္ထာယ နိသိန္နာသနံ ဇာတိသုမနမလ္လိကာဒီဟိ အလင္ကရိ။ ဘဂဝာ စ ဘတ္တာနုမောဒနမကာသိ။ သော တေန ပုညကမ္မေန ဒေဝမနုသ္သေသု သံသရန္တော အနေကဝိဓံ သမ္ပတ္တိံ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဝိဘဝသမ္ပန္နေ ကုလဂေဟေ နိဗ္ဗတ္တော ဝုဒ္ဓိမန္ဝာယ သဒ္ဓော ပသန္နော ပဗ္ဗဇိတ္ဝာ န စိရသ္သေဝ အရဟာ အဟောသိ။
Padumuttarabuddhassātiādikaṃ āyasmato saparivārāsanattherassa apadānaṃ. Sopi purimabuddhesu katādhikāro tattha tattha bhavesu vivaṭṭūpanissayāni puññāni upacinanto padumuttarassa bhagavato kāle vibhavasampanne kulagehe nibbatto vuddhippatto saddhājāto sāsane pasanno dānaphalaṃ saddahanto nānaggarasabhojanena bhagavato piṇḍapātaṃ adāsi, datvā ca pana bhojanasālāyaṃ bhojanatthāya nisinnāsanaṃ jātisumanamallikādīhi alaṅkari. Bhagavā ca bhattānumodanamakāsi. So tena puññakammena devamanussesu saṃsaranto anekavidhaṃ sampattiṃ anubhavitvā imasmiṃ buddhuppāde vibhavasampanne kulagehe nibbatto vuddhimanvāya saddho pasanno pabbajitvā na cirasseva arahā ahosi.
၄၃. သော ဧဝံ ပတ္တသန္တိပဒော ‘‘ကေန နု ခော ပုညေန ဣဒံ သန္တိပဒံ အနုပ္ပတ္တ’’န္တိ ဉာဏေန ဥပဓာရေန္တော ပုဗ္ဗကမ္မံ ဒိသ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ပဒုမုတ္တရဗုဒ္ဓသ္သာတိအာဒိမာဟ။ တံ ဝုတ္တတ္ထမေဝ။ ပိဏ္ဍပာတံ အဒာသဟန္တိ တတ္ထ တတ္ထ လဒ္ဓာနံ ပိဏ္ဍာနံ ကဗဠံ ကဗဠံ ကတ္ဝာ ပာတဗ္ဗတော ခာဒိတဗ္ဗတော အာဟာရော ပိဏ္ဍပာတော, တံ ပိဏ္ဍပာတံ ဘဂဝတော အဒာသိံ, ဘဂဝန္တံ ဘောဇေသိန္တိ အတ္ထော။
43. So evaṃ pattasantipado ‘‘kena nu kho puññena idaṃ santipadaṃ anuppatta’’nti ñāṇena upadhārento pubbakammaṃ disvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Piṇḍapātaṃ adāsahanti tattha tattha laddhānaṃ piṇḍānaṃ kabaḷaṃ kabaḷaṃ katvā pātabbato khāditabbato āhāro piṇḍapāto, taṃ piṇḍapātaṃ bhagavato adāsiṃ, bhagavantaṃ bhojesinti attho.
၄၄. အကိတ္တယိ ပိဏ္ဍပာတန္တိ မယာ ဒိန္နပိဏ္ဍပာတသ္သ ဂုဏံ အာနိသံသံ ပကာသေသီတိ အတ္ထော။
44.Akittayipiṇḍapātanti mayā dinnapiṇḍapātassa guṇaṃ ānisaṃsaṃ pakāsesīti attho.
၄၈. သံဝုတော ပာတိမောက္ခသ္မိန္တိ ပာတိမောက္ခသံဝရသီလေန သံဝုတော ပိဟိတော ပဋိစ္ဆန္နောတိ အတ္ထော။ ဣန္ဒ္ရိယေသု စ ပဉ္စသူတိ စက္ခုန္ဒ္ရိယာဒီသု ပဉ္စသု ဣန္ဒ္ရိယေသု ရူပာဒီဟိ ဂောပိတော ဣန္ဒ္ရိယသံဝရသီလဉ္စ ဂောပိတောတိ အတ္ထော။ သေသံ သုဝိညေယ္ယမေဝာတိ။
48.Saṃvuto pātimokkhasminti pātimokkhasaṃvarasīlena saṃvuto pihito paṭicchannoti attho. Indriyesu ca pañcasūti cakkhundriyādīsu pañcasu indriyesu rūpādīhi gopito indriyasaṃvarasīlañca gopitoti attho. Sesaṃ suviññeyyamevāti.
သပရိဝာရာသနတ္ထေရအပဒာနဝဏ္ဏနာ သမတ္တာ။
Saparivārāsanattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၆. သပရိဝာရာသနတ္ထေရအပဒာနံ • 6. Saparivārāsanattheraapadānaṃ
