| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೬. ಸಪರಿವಾರಾಸನತ್ಥೇರಅಪದಾನವಣ್ಣನಾ
6. Saparivārāsanattheraapadānavaṇṇanā
ಪದುಮುತ್ತರಬುದ್ಧಸ್ಸಾತಿಆದಿಕಂ ಆಯಸ್ಮತೋ ಸಪರಿವಾರಾಸನತ್ಥೇರಸ್ಸ ಅಪದಾನಂ। ಸೋಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇಸು ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ವಿಭವಸಮ್ಪನ್ನೇ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಸದ್ಧಾಜಾತೋ ಸಾಸನೇ ಪಸನ್ನೋ ದಾನಫಲಂ ಸದ್ದಹನ್ತೋ ನಾನಗ್ಗರಸಭೋಜನೇನ ಭಗವತೋ ಪಿಣ್ಡಪಾತಂ ಅದಾಸಿ, ದತ್ವಾ ಚ ಪನ ಭೋಜನಸಾಲಾಯಂ ಭೋಜನತ್ಥಾಯ ನಿಸಿನ್ನಾಸನಂ ಜಾತಿಸುಮನಮಲ್ಲಿಕಾದೀಹಿ ಅಲಙ್ಕರಿ। ಭಗವಾ ಚ ಭತ್ತಾನುಮೋದನಮಕಾಸಿ। ಸೋ ತೇನ ಪುಞ್ಞಕಮ್ಮೇನ ದೇವಮನುಸ್ಸೇಸು ಸಂಸರನ್ತೋ ಅನೇಕವಿಧಂ ಸಮ್ಪತ್ತಿಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ವಿಭವಸಮ್ಪನ್ನೇ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸದ್ಧೋ ಪಸನ್ನೋ ಪಬ್ಬಜಿತ್ವಾ ನ ಚಿರಸ್ಸೇವ ಅರಹಾ ಅಹೋಸಿ।
Padumuttarabuddhassātiādikaṃ āyasmato saparivārāsanattherassa apadānaṃ. Sopi purimabuddhesu katādhikāro tattha tattha bhavesu vivaṭṭūpanissayāni puññāni upacinanto padumuttarassa bhagavato kāle vibhavasampanne kulagehe nibbatto vuddhippatto saddhājāto sāsane pasanno dānaphalaṃ saddahanto nānaggarasabhojanena bhagavato piṇḍapātaṃ adāsi, datvā ca pana bhojanasālāyaṃ bhojanatthāya nisinnāsanaṃ jātisumanamallikādīhi alaṅkari. Bhagavā ca bhattānumodanamakāsi. So tena puññakammena devamanussesu saṃsaranto anekavidhaṃ sampattiṃ anubhavitvā imasmiṃ buddhuppāde vibhavasampanne kulagehe nibbatto vuddhimanvāya saddho pasanno pabbajitvā na cirasseva arahā ahosi.
೪೩. ಸೋ ಏವಂ ಪತ್ತಸನ್ತಿಪದೋ ‘‘ಕೇನ ನು ಖೋ ಪುಞ್ಞೇನ ಇದಂ ಸನ್ತಿಪದಂ ಅನುಪ್ಪತ್ತ’’ನ್ತಿ ಞಾಣೇನ ಉಪಧಾರೇನ್ತೋ ಪುಬ್ಬಕಮ್ಮಂ ದಿಸ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪದುಮುತ್ತರಬುದ್ಧಸ್ಸಾತಿಆದಿಮಾಹ। ತಂ ವುತ್ತತ್ಥಮೇವ। ಪಿಣ್ಡಪಾತಂ ಅದಾಸಹನ್ತಿ ತತ್ಥ ತತ್ಥ ಲದ್ಧಾನಂ ಪಿಣ್ಡಾನಂ ಕಬಳಂ ಕಬಳಂ ಕತ್ವಾ ಪಾತಬ್ಬತೋ ಖಾದಿತಬ್ಬತೋ ಆಹಾರೋ ಪಿಣ್ಡಪಾತೋ, ತಂ ಪಿಣ್ಡಪಾತಂ ಭಗವತೋ ಅದಾಸಿಂ, ಭಗವನ್ತಂ ಭೋಜೇಸಿನ್ತಿ ಅತ್ಥೋ।
43. So evaṃ pattasantipado ‘‘kena nu kho puññena idaṃ santipadaṃ anuppatta’’nti ñāṇena upadhārento pubbakammaṃ disvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Piṇḍapātaṃ adāsahanti tattha tattha laddhānaṃ piṇḍānaṃ kabaḷaṃ kabaḷaṃ katvā pātabbato khāditabbato āhāro piṇḍapāto, taṃ piṇḍapātaṃ bhagavato adāsiṃ, bhagavantaṃ bhojesinti attho.
೪೪. ಅಕಿತ್ತಯಿ ಪಿಣ್ಡಪಾತನ್ತಿ ಮಯಾ ದಿನ್ನಪಿಣ್ಡಪಾತಸ್ಸ ಗುಣಂ ಆನಿಸಂಸಂ ಪಕಾಸೇಸೀತಿ ಅತ್ಥೋ।
44.Akittayipiṇḍapātanti mayā dinnapiṇḍapātassa guṇaṃ ānisaṃsaṃ pakāsesīti attho.
೪೮. ಸಂವುತೋ ಪಾತಿಮೋಕ್ಖಸ್ಮಿನ್ತಿ ಪಾತಿಮೋಕ್ಖಸಂವರಸೀಲೇನ ಸಂವುತೋ ಪಿಹಿತೋ ಪಟಿಚ್ಛನ್ನೋತಿ ಅತ್ಥೋ। ಇನ್ದ್ರಿಯೇಸು ಚ ಪಞ್ಚಸೂತಿ ಚಕ್ಖುನ್ದ್ರಿಯಾದೀಸು ಪಞ್ಚಸು ಇನ್ದ್ರಿಯೇಸು ರೂಪಾದೀಹಿ ಗೋಪಿತೋ ಇನ್ದ್ರಿಯಸಂವರಸೀಲಞ್ಚ ಗೋಪಿತೋತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
48.Saṃvuto pātimokkhasminti pātimokkhasaṃvarasīlena saṃvuto pihito paṭicchannoti attho. Indriyesu ca pañcasūti cakkhundriyādīsu pañcasu indriyesu rūpādīhi gopito indriyasaṃvarasīlañca gopitoti attho. Sesaṃ suviññeyyamevāti.
ಸಪರಿವಾರಾಸನತ್ಥೇರಅಪದಾನವಣ್ಣನಾ ಸಮತ್ತಾ।
Saparivārāsanattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೬. ಸಪರಿವಾರಾಸನತ್ಥೇರಅಪದಾನಂ • 6. Saparivārāsanattheraapadānaṃ
