| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
6. සපරිවාරාසනත්‌ථෙරඅපදානවණ්‌ණනා
6. Saparivārāsanattheraapadānavaṇṇanā
පදුමුත්‌තරබුද්‌ධස්‌සාතිආදිකං ආයස්‌මතො සපරිවාරාසනත්‌ථෙරස්‌ස අපදානං. සොපි පුරිමබුද්‌ධෙසු කතාධිකාරො තත්‌ථ තත්‌ථ භවෙසු විවට්‌ටූපනිස්‌සයානි පුඤ්‌ඤානි උපචිනන්‌තො පදුමුත්‌තරස්‌ස භගවතො කාලෙ විභවසම්‌පන්‌නෙ කුලගෙහෙ නිබ්‌බත්‌තො වුද්‌ධිප්‌පත්‌තො සද්‌ධාජාතො සාසනෙ පසන්‌නො දානඵලං සද්‌දහන්‌තො නානග්‌ගරසභොජනෙන භගවතො පිණ්‌ඩපාතං අදාසි, දත්‌වා ච පන භොජනසාලායං භොජනත්‌ථාය නිසින්‌නාසනං ජාතිසුමනමල්‌ලිකාදීහි අලඞ්‌කරි. භගවා ච භත්‌තානුමොදනමකාසි. සො තෙන පුඤ්‌ඤකම්‌මෙන දෙවමනුස්‌සෙසු සංසරන්‌තො අනෙකවිධං සම්‌පත්‌තිං අනුභවිත්‌වා ඉමස්‌මිං බුද්‌ධුප්‌පාදෙ විභවසම්‌පන්‌නෙ කුලගෙහෙ නිබ්‌බත්‌තො වුද්‌ධිමන්‌වාය සද්‌ධො පසන්‌නො පබ්‌බජිත්‌වා න චිරස්‌සෙව අරහා අහොසි.
Padumuttarabuddhassātiādikaṃ āyasmato saparivārāsanattherassa apadānaṃ. Sopi purimabuddhesu katādhikāro tattha tattha bhavesu vivaṭṭūpanissayāni puññāni upacinanto padumuttarassa bhagavato kāle vibhavasampanne kulagehe nibbatto vuddhippatto saddhājāto sāsane pasanno dānaphalaṃ saddahanto nānaggarasabhojanena bhagavato piṇḍapātaṃ adāsi, datvā ca pana bhojanasālāyaṃ bhojanatthāya nisinnāsanaṃ jātisumanamallikādīhi alaṅkari. Bhagavā ca bhattānumodanamakāsi. So tena puññakammena devamanussesu saṃsaranto anekavidhaṃ sampattiṃ anubhavitvā imasmiṃ buddhuppāde vibhavasampanne kulagehe nibbatto vuddhimanvāya saddho pasanno pabbajitvā na cirasseva arahā ahosi.
43. සො එවං පත්‌තසන්‌තිපදො ‘‘කෙන නු ඛො පුඤ්‌ඤෙන ඉදං සන්‌තිපදං අනුප්‌පත්‌ත’’න්‌ති ඤාණෙන උපධාරෙන්‌තො පුබ්‌බකම්‌මං දිස්‌වා සොමනස්‌සජාතො පුබ්‌බචරිතාපදානං පකාසෙන්‌තො පදුමුත්‌තරබුද්‌ධස්‌සාතිආදිමාහ. තං වුත්‌තත්‌ථමෙව. පිණ්‌ඩපාතං අදාසහන්‌ති තත්‌ථ තත්‌ථ ලද්‌ධානං පිණ්‌ඩානං කබළං කබළං කත්‌වා පාතබ්‌බතො ඛාදිතබ්‌බතො ආහාරො පිණ්‌ඩපාතො, තං පිණ්‌ඩපාතං භගවතො අදාසිං, භගවන්‌තං භොජෙසින්‌ති අත්‌ථො.
43. So evaṃ pattasantipado ‘‘kena nu kho puññena idaṃ santipadaṃ anuppatta’’nti ñāṇena upadhārento pubbakammaṃ disvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Piṇḍapātaṃ adāsahanti tattha tattha laddhānaṃ piṇḍānaṃ kabaḷaṃ kabaḷaṃ katvā pātabbato khāditabbato āhāro piṇḍapāto, taṃ piṇḍapātaṃ bhagavato adāsiṃ, bhagavantaṃ bhojesinti attho.
44. අකිත්‌තයි පිණ්‌ඩපාතන්‌ති මයා දින්‌නපිණ්‌ඩපාතස්‌ස ගුණං ආනිසංසං පකාසෙසීති අත්‌ථො.
44.Akittayipiṇḍapātanti mayā dinnapiṇḍapātassa guṇaṃ ānisaṃsaṃ pakāsesīti attho.
48. සංවුතො පාතිමොක්‌ඛස්‌මින්‌ති පාතිමොක්‌ඛසංවරසීලෙන සංවුතො පිහිතො පටිච්‌ඡන්‌නොති අත්‌ථො. ඉන්‌ද්‍රියෙසු ච පඤ්‌චසූති චක්‌ඛුන්‌ද්‍රියාදීසු පඤ්‌චසු ඉන්‌ද්‍රියෙසු රූපාදීහි ගොපිතො ඉන්‌ද්‍රියසංවරසීලඤ්‌ච ගොපිතොති අත්‌ථො. සෙසං සුවිඤ්‌ඤෙය්‍යමෙවාති.
48.Saṃvuto pātimokkhasminti pātimokkhasaṃvarasīlena saṃvuto pihito paṭicchannoti attho. Indriyesu ca pañcasūti cakkhundriyādīsu pañcasu indriyesu rūpādīhi gopito indriyasaṃvarasīlañca gopitoti attho. Sesaṃ suviññeyyamevāti.
සපරිවාරාසනත්‌ථෙරඅපදානවණ්‌ණනා සමත්‌තා.
Saparivārāsanattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 6. සපරිවාරාසනත්‌ථෙරඅපදානං • 6. Saparivārāsanattheraapadānaṃ
