| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೪. ಸಪರಿವಾರಿಯತ್ಥೇರಅಪದಾನವಣ್ಣನಾ
4. Saparivāriyattheraapadānavaṇṇanā
ಪದುಮುತ್ತರೋ ನಾಮ ಜಿನೋತಿಆದಿಕಂ ಆಯಸ್ಮತೋ ಸಪರಿವಾರಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಅನೇಕಾಸು ಜಾತೀಸು ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಮಹದ್ಧನೋ ಮಹಾಭೋಗೋ ಅಹೋಸಿ। ಅಥ ಪದುಮುತ್ತರೇ ಭಗವತಿ ಪರಿನಿಬ್ಬುತೇ ಮಹಾಜನೋ ತಸ್ಸ ಧಾತುಂ ನಿದಹಿತ್ವಾ ಮಹನ್ತಂ ಚೇತಿಯಂ ಕಾರೇತ್ವಾ ಪೂಜೇಸಿ। ತಸ್ಮಿಂ ಕಾಲೇ ಅಯಂ ಉಪಾಸಕೋ ತಸ್ಸುಪರಿ ಚನ್ದನಸಾರೇನ ಚೇತಿಯಘರಂ ಕರಿತ್ವಾ ಮಹಾಪೂಜಂ ಅಕಾಸಿ। ಸೋ ತೇನೇವ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಕುಸಲಂ ಕತ್ವಾ ಸದ್ಧಾಯ ಸಾಸನೇ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Padumuttaro nāma jinotiādikaṃ āyasmato saparivāriyattherassa apadānaṃ. Ayampi purimabuddhesu katādhikāro anekāsu jātīsu vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto mahaddhano mahābhogo ahosi. Atha padumuttare bhagavati parinibbute mahājano tassa dhātuṃ nidahitvā mahantaṃ cetiyaṃ kāretvā pūjesi. Tasmiṃ kāle ayaṃ upāsako tassupari candanasārena cetiyagharaṃ karitvā mahāpūjaṃ akāsi. So teneva puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto vuddhimanvāya kusalaṃ katvā saddhāya sāsane pabbajitvā nacirasseva arahā ahosi.
೧೫-೮. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪದುಮುತ್ತರೋ ನಾಮ ಜಿನೋತಿಆದಿಮಾಹ। ತತ್ಥ ಓಮತ್ತನ್ತಿ ಲಾಮಕಭಾವಂ ನೀಚಭಾವಂ ದುಕ್ಖಿತಭಾವಂ ವಾ ನ ಪಸ್ಸಾಮಿ ನ ಜಾನಾಮಿ, ನ ದಿಟ್ಠಪುಬ್ಬೋ ಮಯಾ ನೀಚಭಾವೋತಿ ಅತ್ಥೋ। ಸೇಸಂ ಪಾಕಟಮೇವಾತಿ।
15-8. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttaro nāma jinotiādimāha. Tattha omattanti lāmakabhāvaṃ nīcabhāvaṃ dukkhitabhāvaṃ vā na passāmi na jānāmi, na diṭṭhapubbo mayā nīcabhāvoti attho. Sesaṃ pākaṭamevāti.
ಸಪರಿವಾರಿಯತ್ಥೇರಅಪದಾನವಣ್ಣನಾ ಸಮತ್ತಾ।
Saparivāriyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೪. ಸಪರಿವಾರಿಯತ್ಥೇರಅಪದಾನಂ • 4. Saparivāriyattheraapadānaṃ
