| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
10. ஸப்பாணகஸிக்கா²பத³வண்ணனா
10. Sappāṇakasikkhāpadavaṇṇanā
140. த³ஸமஸிக்கா²பதே³ – ஜானங் ஸப்பாணகந்தி ஸப்பாணகங் ஏதந்தி யதா² ததா² வா ஜானந்தோ. ஸிஞ்செய்ய வா ஸிஞ்சாபெய்ய வாதி தேன உத³கேன ஸயங் வா ஸிஞ்செய்ய, அஞ்ஞங் வா ஆணாபெத்வா ஸிஞ்சாபெய்ய. பாளியங் பன ‘‘ஸிஞ்செய்யாதி ஸயங் ஸிஞ்சதீ’’தி ஈதி³ஸானங் வசனானங் அத்தோ² புப்³பே³ வுத்தனயேனேவ வேதி³தப்³போ³.
140. Dasamasikkhāpade – jānaṃ sappāṇakanti sappāṇakaṃ etanti yathā tathā vā jānanto. Siñceyya vā siñcāpeyya vāti tena udakena sayaṃ vā siñceyya, aññaṃ vā āṇāpetvā siñcāpeyya. Pāḷiyaṃ pana ‘‘siñceyyāti sayaṃ siñcatī’’ti īdisānaṃ vacanānaṃ attho pubbe vuttanayeneva veditabbo.
தத்த² தா⁴ரங் அவிச்சி²ந்தி³த்வா ஸிஞ்சந்தஸ்ஸ ஏகஸ்மிங் உத³கக⁴டே ஏகாவ ஆபத்தி. ஏஸ நயோ ஸப்³ப³பா⁴ஜனேஸு. தா⁴ரங் விச்சி²ந்த³ந்தஸ்ஸ பன பயோகே³ பயோகே³ ஆபத்தி . மாதிகங் ஸம்முக²ங் கரோதி, தி³வஸம்பி ஸந்த³து, ஏகாவ ஆபத்தி. ஸசே தத்த² தத்த² ப³ந்தி⁴த்வா அஞ்ஞதோ அஞ்ஞதோ நேதி, பயோகே³ பயோகே³ ஆபத்தி. ஸகடபா⁴ரமத்தஞ்சேபி திணங் ஏகபயோகே³ன உத³கே பக்கி²பதி, ஏகாவ ஆபத்தி. ஏகேகங் திணங் வா பண்ணங் வா பக்கி²பந்தஸ்ஸ பயோகே³ பயோகே³ ஆபத்தி. மத்திகாயபி அஞ்ஞேஸுபி கட்ட²கோ³மயாதீ³ஸு ஏஸேவ நயோ. இத³ங் பன மஹாஉத³கங் ஸந்தா⁴ய ந வுத்தங், யங் திணே வா மத்திகாய வா பக்கி²த்தாய பரியாதா³னங் க³ச்ச²தி, ஆவிலங் வா ஹோதி, யத்த² பாணகா மரந்தி, தாதி³ஸங் உத³கங் ஸந்தா⁴ய வுத்தந்தி வேதி³தப்³ப³ங். ஸேஸமெத்த² உத்தானமேவாதி.
Tattha dhāraṃ avicchinditvā siñcantassa ekasmiṃ udakaghaṭe ekāva āpatti. Esa nayo sabbabhājanesu. Dhāraṃ vicchindantassa pana payoge payoge āpatti . Mātikaṃ sammukhaṃ karoti, divasampi sandatu, ekāva āpatti. Sace tattha tattha bandhitvā aññato aññato neti, payoge payoge āpatti. Sakaṭabhāramattañcepi tiṇaṃ ekapayogena udake pakkhipati, ekāva āpatti. Ekekaṃ tiṇaṃ vā paṇṇaṃ vā pakkhipantassa payoge payoge āpatti. Mattikāyapi aññesupi kaṭṭhagomayādīsu eseva nayo. Idaṃ pana mahāudakaṃ sandhāya na vuttaṃ, yaṃ tiṇe vā mattikāya vā pakkhittāya pariyādānaṃ gacchati, āvilaṃ vā hoti, yattha pāṇakā maranti, tādisaṃ udakaṃ sandhāya vuttanti veditabbaṃ. Sesamettha uttānamevāti.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், பண்ணத்திவஜ்ஜங், காயகம்மங், வசீகம்மங், திசித்தங் திவேத³னந்தி.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ tivedananti.
ஸப்பாணகஸிக்கா²பத³ங் த³ஸமங்.
Sappāṇakasikkhāpadaṃ dasamaṃ.
ஸமத்தோ வண்ணனாக்கமேன ஸேனாஸனவக்³கோ³ து³தியோ.
Samatto vaṇṇanākkamena senāsanavaggo dutiyo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. ஸப்பாணகஸிக்கா²பத³வண்ணனா • 10. Sappāṇakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. ஸப்பாணகஸிக்கா²பத³வண்ணனா • 10. Sappāṇakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. ஸப்பாணகஸிக்கா²பத³வண்ணனா • 10. Sappāṇakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. ஸப்பாணகஸிக்கா²பத³ங் • 10. Sappāṇakasikkhāpadaṃ
