| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
10. ஸப்பாணகஸிக்கா²பத³வண்ணனா
10. Sappāṇakasikkhāpadavaṇṇanā
ஏகஸ்மிங் க⁴டே ஏகாவ ஆபத்தீதி ஏகஸ்மிங் உத³கக⁴டே ஏகாவ ஆபத்தி. ஏஸ நயோ ஸப்³ப³பா⁴ஜனேஸு . விச்சி²ந்த³ந்தஸ்ஸாதி தா⁴ரங் விச்சி²ந்த³ந்தஸ்ஸ. ஏகேகங் பக்கி²பந்தஸ்ஸாதி ஏகேகங் திணங் வா பண்ணங் வா மத்திகங் வா அஞ்ஞங் வா கட்ட²கோ³மயாதி³ங் பக்கி²பந்தஸ்ஸ. பரியாதா³னந்தி க²யங்.
Ekasmiṃ ghaṭe ekāva āpattīti ekasmiṃ udakaghaṭe ekāva āpatti. Esa nayo sabbabhājanesu . Vicchindantassāti dhāraṃ vicchindantassa. Ekekaṃ pakkhipantassāti ekekaṃ tiṇaṃ vā paṇṇaṃ vā mattikaṃ vā aññaṃ vā kaṭṭhagomayādiṃ pakkhipantassa. Pariyādānanti khayaṃ.
‘‘பதீ³பே (ஸாரத்த²॰ டீ॰ பாசித்திய 3.140) பதித்வா படங்கா³தி³பாணகா மரிஸ்ஸந்தீ’’தி ஜானந்தஸ்ஸாபி குஸலசித்தேன பதீ³புஜ்ஜலனங் விய ‘‘ஸிஞ்சனேன பாணகா மரிஸ்ஸந்தீ’’தி புப்³ப³பா⁴கே³ ஜானந்தஸ்ஸாபி ‘‘இத³ங் ஜலங் ஸிஞ்சாமீ’’தி ஸிஞ்சந்தஸ்ஸ வத⁴கசித்தங் ந ஹோதீதி ஆஹ ‘‘வினா வத⁴கசேதனாயா’’திஆதி³. ஏவஞ்ச கத்வா ‘‘பண்ணத்திவஜ்ஜ’’ந்தி இத³ம்பி ஸமத்தி²தங் ஹோதி. திசித்தந்தி குஸலாகுஸலாப்³யாகதவஸேன திசித்தங். ததா² ஹி பண்ணத்திங் மத்³தி³த்வா ஸிஞ்சந்தஸ்ஸ வா ஸிஞ்சாபெந்தஸ்ஸ வா அகுஸலசித்தேன ஹோதி, ‘‘ஆஸனங் தோ⁴விஸ்ஸாமீ’’தி சித்தேன தோ⁴வனத்த²ங் ஸிஞ்சந்தஸ்ஸ வா ஸிஞ்சாபெந்தஸ்ஸ வா குஸலசித்தேன ஹோதி, பண்ணத்திங் அஜானதா அரஹதா ஸிஞ்சனாதி³கரணே அப்³யாகதசித்தேன ஹோதீதி குஸலாகுஸலாப்³யாகதசித்தவஸேன திசித்தங் ஹோதி.
‘‘Padīpe (sārattha. ṭī. pācittiya 3.140) patitvā paṭaṅgādipāṇakā marissantī’’ti jānantassāpi kusalacittena padīpujjalanaṃ viya ‘‘siñcanena pāṇakā marissantī’’ti pubbabhāge jānantassāpi ‘‘idaṃ jalaṃ siñcāmī’’ti siñcantassa vadhakacittaṃ na hotīti āha ‘‘vinā vadhakacetanāyā’’tiādi. Evañca katvā ‘‘paṇṇattivajja’’nti idampi samatthitaṃ hoti. Ticittanti kusalākusalābyākatavasena ticittaṃ. Tathā hi paṇṇattiṃ madditvā siñcantassa vā siñcāpentassa vā akusalacittena hoti, ‘‘āsanaṃ dhovissāmī’’ti cittena dhovanatthaṃ siñcantassa vā siñcāpentassa vā kusalacittena hoti, paṇṇattiṃ ajānatā arahatā siñcanādikaraṇe abyākatacittena hotīti kusalākusalābyākatacittavasena ticittaṃ hoti.
ஸப்பாணகஸிக்கா²பத³வண்ணனா நிட்டி²தா.
Sappāṇakasikkhāpadavaṇṇanā niṭṭhitā.
பூ⁴தகா³மவக்³கோ³ து³தியோ.
Bhūtagāmavaggo dutiyo.
