| Library / Tipiṭaka / तिपिटक • Tipiṭaka / महाविभङ्ग-अट्ठकथा • Mahāvibhaṅga-aṭṭhakathā |
१०. सप्पाणकसिक्खापदवण्णना
10. Sappāṇakasikkhāpadavaṇṇanā
१४०. दसमसिक्खापदे – जानं सप्पाणकन्ति सप्पाणकं एतन्ति यथा तथा वा जानन्तो। सिञ्चेय्य वा सिञ्चापेय्य वाति तेन उदकेन सयं वा सिञ्चेय्य, अञ्ञं वा आणापेत्वा सिञ्चापेय्य। पाळियं पन ‘‘सिञ्चेय्याति सयं सिञ्चती’’ति ईदिसानं वचनानं अत्थो पुब्बे वुत्तनयेनेव वेदितब्बो।
140. Dasamasikkhāpade – jānaṃ sappāṇakanti sappāṇakaṃ etanti yathā tathā vā jānanto. Siñceyya vā siñcāpeyya vāti tena udakena sayaṃ vā siñceyya, aññaṃ vā āṇāpetvā siñcāpeyya. Pāḷiyaṃ pana ‘‘siñceyyāti sayaṃ siñcatī’’ti īdisānaṃ vacanānaṃ attho pubbe vuttanayeneva veditabbo.
तत्थ धारं अविच्छिन्दित्वा सिञ्चन्तस्स एकस्मिं उदकघटे एकाव आपत्ति। एस नयो सब्बभाजनेसु। धारं विच्छिन्दन्तस्स पन पयोगे पयोगे आपत्ति । मातिकं सम्मुखं करोति, दिवसम्पि सन्दतु, एकाव आपत्ति। सचे तत्थ तत्थ बन्धित्वा अञ्ञतो अञ्ञतो नेति, पयोगे पयोगे आपत्ति। सकटभारमत्तञ्चेपि तिणं एकपयोगेन उदके पक्खिपति, एकाव आपत्ति। एकेकं तिणं वा पण्णं वा पक्खिपन्तस्स पयोगे पयोगे आपत्ति। मत्तिकायपि अञ्ञेसुपि कट्ठगोमयादीसु एसेव नयो। इदं पन महाउदकं सन्धाय न वुत्तं, यं तिणे वा मत्तिकाय वा पक्खित्ताय परियादानं गच्छति, आविलं वा होति, यत्थ पाणका मरन्ति, तादिसं उदकं सन्धाय वुत्तन्ति वेदितब्बं। सेसमेत्थ उत्तानमेवाति।
Tattha dhāraṃ avicchinditvā siñcantassa ekasmiṃ udakaghaṭe ekāva āpatti. Esa nayo sabbabhājanesu. Dhāraṃ vicchindantassa pana payoge payoge āpatti . Mātikaṃ sammukhaṃ karoti, divasampi sandatu, ekāva āpatti. Sace tattha tattha bandhitvā aññato aññato neti, payoge payoge āpatti. Sakaṭabhāramattañcepi tiṇaṃ ekapayogena udake pakkhipati, ekāva āpatti. Ekekaṃ tiṇaṃ vā paṇṇaṃ vā pakkhipantassa payoge payoge āpatti. Mattikāyapi aññesupi kaṭṭhagomayādīsu eseva nayo. Idaṃ pana mahāudakaṃ sandhāya na vuttaṃ, yaṃ tiṇe vā mattikāya vā pakkhittāya pariyādānaṃ gacchati, āvilaṃ vā hoti, yattha pāṇakā maranti, tādisaṃ udakaṃ sandhāya vuttanti veditabbaṃ. Sesamettha uttānamevāti.
तिसमुट्ठानं – कायचित्ततो वाचाचित्ततो कायवाचाचित्ततो च समुट्ठाति, किरियं, सञ्ञाविमोक्खं, सचित्तकं, पण्णत्तिवज्जं, कायकम्मं, वचीकम्मं, तिचित्तं तिवेदनन्ति।
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ tivedananti.
सप्पाणकसिक्खापदं दसमं।
Sappāṇakasikkhāpadaṃ dasamaṃ.
समत्तो वण्णनाक्कमेन सेनासनवग्गो दुतियो।
Samatto vaṇṇanākkamena senāsanavaggo dutiyo.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / २. भूतगामवग्गो • 2. Bhūtagāmavaggo
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / १०. सप्पाणकसिक्खापदवण्णना • 10. Sappāṇakasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / १०. सप्पाणकसिक्खापदवण्णना • 10. Sappāṇakasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / १०. सप्पाणकसिक्खापदवण्णना • 10. Sappāṇakasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / १०. सप्पाणकसिक्खापदं • 10. Sappāṇakasikkhāpadaṃ
