| Library / Tipiṭaka / တိပိဋက • Tipiṭaka / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā |
၂. သပ္ပာဏကသိက္ခာပဒဝဏ္ဏနာ
2. Sappāṇakasikkhāpadavaṇṇanā
၃၈၇. ဒုတိယေ – သပ္ပာဏကန္တိ ယေ ပာဏကာ ပရိဘောဂေန မရန္တိ, တေဟိ ပာဏကေဟိ သပ္ပာဏကံ, တာဒိသဉ္ဟိ ဇာနံ ပရိဘုဉ္ဇတော ပယောဂေ ပယောဂေ ပာစိတ္တိယံ။ ပတ္တပူရမ္ပိ အဝိစ္ဆိန္ဒိတ္ဝာ ဧကပယောဂေန ပိဝတော ဧကာ အာပတ္တိ။ တာဒိသေန ဥဒကေန သာမိသံ ပတ္တံ အာဝိဉ္ဆိတ္ဝာ ဓောဝတောပိ တာဒိသေ ဥဒကေ ဥဏ္ဟယာဂုပတ္တံ နိဗ္ဗာပယတောပိ တံ ဥဒကံ ဟတ္ထေန ဝာ ဥဠုင္ကေန ဝာ ဂဟေတ္ဝာ န္ဟာယတောပိ ပယောဂေ ပယောဂေ ပာစိတ္တိယံ။ ဥဒကသောဏ္ဍိံ ဝာ ပောက္ခရဏိံ ဝာ ပဝိသိတ္ဝာ ဗဟိနိက္ခမနတ္ထာယ ဝီစိံ ဥဋ္ဌာပယတောပိ။ သောဏ္ဍိံ ဝာ ပောက္ခရဏိံ ဝာ သောဓေန္တေဟိ တတော ဂဟိတဥဒကံ ဥဒကေယေဝ အာသိဉ္စိတဗ္ဗံ။ သမီပမ္ဟိ ဥဒကေ အသတိ ကပ္ပိယဥဒကသ္သ အဋ္ဌ ဝာ ဒသ ဝာ ဃဋေ ဥဒကသဏ္ဌာနကပ္ပဒေသေ အာသိဉ္စိတ္ဝာ တတ္ထ အာသိဉ္စိတဗ္ဗံ။ ‘‘ပဝဋ္ဋိတ္ဝာ ဥဒကေ ပတိသ္သတီ’’တိ ဥဏ္ဟပာသာဏေ ဥဒကံ နာသိဉ္စိတဗ္ဗံ။ ကပ္ပိယဥဒကေန ပန ပာသာဏံ နိဗ္ဗာပေတ္ဝာ အာသိဉ္စိတုံ ဝဋ္ဋတိ။ သေသမေတ္ထ ဥတ္တာနမေဝ။
387. Dutiye – sappāṇakanti ye pāṇakā paribhogena maranti, tehi pāṇakehi sappāṇakaṃ, tādisañhi jānaṃ paribhuñjato payoge payoge pācittiyaṃ. Pattapūrampi avicchinditvā ekapayogena pivato ekā āpatti. Tādisena udakena sāmisaṃ pattaṃ āviñchitvā dhovatopi tādise udake uṇhayāgupattaṃ nibbāpayatopi taṃ udakaṃ hatthena vā uḷuṅkena vā gahetvā nhāyatopi payoge payoge pācittiyaṃ. Udakasoṇḍiṃ vā pokkharaṇiṃ vā pavisitvā bahinikkhamanatthāya vīciṃ uṭṭhāpayatopi. Soṇḍiṃ vā pokkharaṇiṃ vā sodhentehi tato gahitaudakaṃ udakeyeva āsiñcitabbaṃ. Samīpamhi udake asati kappiyaudakassa aṭṭha vā dasa vā ghaṭe udakasaṇṭhānakappadese āsiñcitvā tattha āsiñcitabbaṃ. ‘‘Pavaṭṭitvā udake patissatī’’ti uṇhapāsāṇe udakaṃ nāsiñcitabbaṃ. Kappiyaudakena pana pāsāṇaṃ nibbāpetvā āsiñcituṃ vaṭṭati. Sesamettha uttānameva.
တိသမုဋ္ဌာနံ – ကိရိယံ, သညာဝိမောက္ခံ, သစိတ္တကံ, ပဏ္ဏတ္တိဝဇ္ဇံ, ကာယကမ္မံ,
Tisamuṭṭhānaṃ – kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ,
ဝစီကမ္မံ, တိစိတ္တံ, တိဝေဒနန္တိ။ ဧတ္ထ စ ပဋင္ဂပာဏကာနံ ပတနံ ဉတ္ဝာပိ သုဒ္ဓစိတ္တတာယ ဒီပဇာလနေ ဝိယ သပ္ပာဏကဘာဝံ ဉတ္ဝာပိ ဥဒကသညာယ ပရိဘုဉ္ဇိတဗ္ဗတော ပဏ္ဏတ္တိဝဇ္ဇတာ ဝေဒိတဗ္ဗာတိ။
Vacīkammaṃ, ticittaṃ, tivedananti. Ettha ca paṭaṅgapāṇakānaṃ patanaṃ ñatvāpi suddhacittatāya dīpajālane viya sappāṇakabhāvaṃ ñatvāpi udakasaññāya paribhuñjitabbato paṇṇattivajjatā veditabbāti.
သပ္ပာဏကသိက္ခာပဒံ ဒုတိယံ။
Sappāṇakasikkhāpadaṃ dutiyaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၇. သပ္ပာဏကဝဂ္ဂော • 7. Sappāṇakavaggo
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၂. သပ္ပာဏကသိက္ခာပဒဝဏ္ဏနာ • 2. Sappāṇakasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၂. သပ္ပာဏကသိက္ခာပဒဝဏ္ဏနာ • 2. Sappāṇakasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. သပ္ပာဏကသိက္ခာပဒဝဏ္ဏနာ • 2. Sappāṇakasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂. သပ္ပာဏကသိက္ခာပဒံ • 2. Sappāṇakasikkhāpadaṃ
