| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
10. සප්‌පාණකසික්‌ඛාපදවණ්‌ණනා
10. Sappāṇakasikkhāpadavaṇṇanā
140. දසමසික්‌ඛාපදෙ – ජානං සප්‌පාණකන්‌ති සප්‌පාණකං එතන්‌ති යථා තථා වා ජානන්‌තො. සිඤ්‌චෙය්‍ය වා සිඤ්‌චාපෙය්‍ය වාති තෙන උදකෙන සයං වා සිඤ්‌චෙය්‍ය, අඤ්‌ඤං වා ආණාපෙත්‌වා සිඤ්‌චාපෙය්‍ය. පාළියං පන ‘‘සිඤ්‌චෙය්‍යාති සයං සිඤ්‌චතී’’ති ඊදිසානං වචනානං අත්‌ථො පුබ්‌බෙ වුත්‌තනයෙනෙව වෙදිතබ්‌බො.
140. Dasamasikkhāpade – jānaṃ sappāṇakanti sappāṇakaṃ etanti yathā tathā vā jānanto. Siñceyya vā siñcāpeyya vāti tena udakena sayaṃ vā siñceyya, aññaṃ vā āṇāpetvā siñcāpeyya. Pāḷiyaṃ pana ‘‘siñceyyāti sayaṃ siñcatī’’ti īdisānaṃ vacanānaṃ attho pubbe vuttanayeneva veditabbo.
තත්‌ථ ධාරං අවිච්‌ඡින්‌දිත්‌වා සිඤ්‌චන්‌තස්‌ස එකස්‌මිං උදකඝටෙ එකාව ආපත්‌ති. එස නයො සබ්‌බභාජනෙසු. ධාරං විච්‌ඡින්‌දන්‌තස්‌ස පන පයොගෙ පයොගෙ ආපත්‌ති . මාතිකං සම්‌මුඛං කරොති, දිවසම්‌පි සන්‌දතු, එකාව ආපත්‌ති. සචෙ තත්‌ථ තත්‌ථ බන්‌ධිත්‌වා අඤ්‌ඤතො අඤ්‌ඤතො නෙති, පයොගෙ පයොගෙ ආපත්‌ති. සකටභාරමත්‌තඤ්‌චෙපි තිණං එකපයොගෙන උදකෙ පක්‌ඛිපති, එකාව ආපත්‌ති. එකෙකං තිණං වා පණ්‌ණං වා පක්‌ඛිපන්‌තස්‌ස පයොගෙ පයොගෙ ආපත්‌ති. මත්‌තිකායපි අඤ්‌ඤෙසුපි කට්‌ඨගොමයාදීසු එසෙව නයො. ඉදං පන මහාඋදකං සන්‌ධාය න වුත්‌තං, යං තිණෙ වා මත්‌තිකාය වා පක්‌ඛිත්‌තාය පරියාදානං ගච්‌ඡති, ආවිලං වා හොති, යත්‌ථ පාණකා මරන්‌ති, තාදිසං උදකං සන්‌ධාය වුත්‌තන්‌ති වෙදිතබ්‌බං. සෙසමෙත්‌ථ උත්‌තානමෙවාති.
Tattha dhāraṃ avicchinditvā siñcantassa ekasmiṃ udakaghaṭe ekāva āpatti. Esa nayo sabbabhājanesu. Dhāraṃ vicchindantassa pana payoge payoge āpatti . Mātikaṃ sammukhaṃ karoti, divasampi sandatu, ekāva āpatti. Sace tattha tattha bandhitvā aññato aññato neti, payoge payoge āpatti. Sakaṭabhāramattañcepi tiṇaṃ ekapayogena udake pakkhipati, ekāva āpatti. Ekekaṃ tiṇaṃ vā paṇṇaṃ vā pakkhipantassa payoge payoge āpatti. Mattikāyapi aññesupi kaṭṭhagomayādīsu eseva nayo. Idaṃ pana mahāudakaṃ sandhāya na vuttaṃ, yaṃ tiṇe vā mattikāya vā pakkhittāya pariyādānaṃ gacchati, āvilaṃ vā hoti, yattha pāṇakā maranti, tādisaṃ udakaṃ sandhāya vuttanti veditabbaṃ. Sesamettha uttānamevāti.
තිසමුට්‌ඨානං – කායචිත්‌තතො වාචාචිත්‌තතො කායවාචාචිත්‌තතො ච සමුට්‌ඨාති, කිරියං, සඤ්‌ඤාවිමොක්‌ඛං, සචිත්‌තකං, පණ්‌ණත්‌තිවජ්‌ජං, කායකම්‌මං, වචීකම්‌මං, තිචිත්‌තං තිවෙදනන්‌ති.
Tisamuṭṭhānaṃ – kāyacittato vācācittato kāyavācācittato ca samuṭṭhāti, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ tivedananti.
සප්‌පාණකසික්‌ඛාපදං දසමං.
Sappāṇakasikkhāpadaṃ dasamaṃ.
සමත්‌තො වණ්‌ණනාක්‌කමෙන සෙනාසනවග්‌ගො දුතියො.
Samatto vaṇṇanākkamena senāsanavaggo dutiyo.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 2. භූතගාමවග්‌ගො • 2. Bhūtagāmavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 10. සප්‌පාණකසික්‌ඛාපදවණ්‌ණනා • 10. Sappāṇakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 10. සප්‌පාණකසික්‌ඛාපදවණ්‌ණනා • 10. Sappāṇakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 10. සප්‌පාණකසික්‌ඛාපදවණ්‌ණනා • 10. Sappāṇakasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 10. සප්‌පාණකසික්‌ඛාපදං • 10. Sappāṇakasikkhāpadaṃ
