| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
10. සප්‌පාණකසික්‌ඛාපදවණ්‌ණනා
10. Sappāṇakasikkhāpadavaṇṇanā
එකස්‌මිං ඝටෙ එකාව ආපත්‌තීති එකස්‌මිං උදකඝටෙ එකාව ආපත්‌ති. එස නයො සබ්‌බභාජනෙසු . විච්‌ඡින්‌දන්‌තස්‌සාති ධාරං විච්‌ඡින්‌දන්‌තස්‌ස. එකෙකං පක්‌ඛිපන්‌තස්‌සාති එකෙකං තිණං වා පණ්‌ණං වා මත්‌තිකං වා අඤ්‌ඤං වා කට්‌ඨගොමයාදිං පක්‌ඛිපන්‌තස්‌ස. පරියාදානන්‌ති ඛයං.
Ekasmiṃ ghaṭe ekāva āpattīti ekasmiṃ udakaghaṭe ekāva āpatti. Esa nayo sabbabhājanesu . Vicchindantassāti dhāraṃ vicchindantassa. Ekekaṃ pakkhipantassāti ekekaṃ tiṇaṃ vā paṇṇaṃ vā mattikaṃ vā aññaṃ vā kaṭṭhagomayādiṃ pakkhipantassa. Pariyādānanti khayaṃ.
‘‘පදීපෙ (සාරත්‌ථ. ටී. පාචිත්‌තිය 3.140) පතිත්‌වා පටඞ්‌ගාදිපාණකා මරිස්‌සන්‌තී’’ති ජානන්‌තස්‌සාපි කුසලචිත්‌තෙන පදීපුජ්‌ජලනං විය ‘‘සිඤ්‌චනෙන පාණකා මරිස්‌සන්‌තී’’ති පුබ්‌බභාගෙ ජානන්‌තස්‌සාපි ‘‘ඉදං ජලං සිඤ්‌චාමී’’ති සිඤ්‌චන්‌තස්‌ස වධකචිත්‌තං න හොතීති ආහ ‘‘විනා වධකචෙතනායා’’තිආදි. එවඤ්‌ච කත්‌වා ‘‘පණ්‌ණත්‌තිවජ්‌ජ’’න්‌ති ඉදම්‌පි සමත්‌ථිතං හොති. තිචිත්‌තන්‌ති කුසලාකුසලාබ්‍යාකතවසෙන තිචිත්‌තං. තථා හි පණ්‌ණත්‌තිං මද්‌දිත්‌වා සිඤ්‌චන්‌තස්‌ස වා සිඤ්‌චාපෙන්‌තස්‌ස වා අකුසලචිත්‌තෙන හොති, ‘‘ආසනං ධොවිස්‌සාමී’’ති චිත්‌තෙන ධොවනත්‌ථං සිඤ්‌චන්‌තස්‌ස වා සිඤ්‌චාපෙන්‌තස්‌ස වා කුසලචිත්‌තෙන හොති, පණ්‌ණත්‌තිං අජානතා අරහතා සිඤ්‌චනාදිකරණෙ අබ්‍යාකතචිත්‌තෙන හොතීති කුසලාකුසලාබ්‍යාකතචිත්‌තවසෙන තිචිත්‌තං හොති.
‘‘Padīpe (sārattha. ṭī. pācittiya 3.140) patitvā paṭaṅgādipāṇakā marissantī’’ti jānantassāpi kusalacittena padīpujjalanaṃ viya ‘‘siñcanena pāṇakā marissantī’’ti pubbabhāge jānantassāpi ‘‘idaṃ jalaṃ siñcāmī’’ti siñcantassa vadhakacittaṃ na hotīti āha ‘‘vinā vadhakacetanāyā’’tiādi. Evañca katvā ‘‘paṇṇattivajja’’nti idampi samatthitaṃ hoti. Ticittanti kusalākusalābyākatavasena ticittaṃ. Tathā hi paṇṇattiṃ madditvā siñcantassa vā siñcāpentassa vā akusalacittena hoti, ‘‘āsanaṃ dhovissāmī’’ti cittena dhovanatthaṃ siñcantassa vā siñcāpentassa vā kusalacittena hoti, paṇṇattiṃ ajānatā arahatā siñcanādikaraṇe abyākatacittena hotīti kusalākusalābyākatacittavasena ticittaṃ hoti.
සප්‌පාණකසික්‌ඛාපදවණ්‌ණනා නිට්‌ඨිතා.
Sappāṇakasikkhāpadavaṇṇanā niṭṭhitā.
භූතගාමවග්‌ගො දුතියො.
Bhūtagāmavaggo dutiyo.
