| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༡༠. སཔྤཱཎཀསིཀྑཱཔདཝཎྞནཱ
10. Sappāṇakasikkhāpadavaṇṇanā
ཨེཀསྨིཾ གྷཊེ ཨེཀཱཝ ཨཱཔཏྟཱིཏི ཨེཀསྨིཾ ཨུདཀགྷཊེ ཨེཀཱཝ ཨཱཔཏྟི། ཨེས ནཡོ སབྦབྷཱཛནེསུ ། ཝིཙྪིནྡནྟསྶཱཏི དྷཱརཾ ཝིཙྪིནྡནྟསྶ། ཨེཀེཀཾ པཀྑིཔནྟསྶཱཏི ཨེཀེཀཾ ཏིཎཾ ཝཱ པཎྞཾ ཝཱ མཏྟིཀཾ ཝཱ ཨཉྙཾ ཝཱ ཀཊྛགོམཡཱདིཾ པཀྑིཔནྟསྶ། པརིཡཱདཱནནྟི ཁཡཾ།
Ekasmiṃ ghaṭe ekāva āpattīti ekasmiṃ udakaghaṭe ekāva āpatti. Esa nayo sabbabhājanesu . Vicchindantassāti dhāraṃ vicchindantassa. Ekekaṃ pakkhipantassāti ekekaṃ tiṇaṃ vā paṇṇaṃ vā mattikaṃ vā aññaṃ vā kaṭṭhagomayādiṃ pakkhipantassa. Pariyādānanti khayaṃ.
‘‘པདཱིཔེ (སཱརཏྠ॰ ཊཱི॰ པཱཙིཏྟིཡ ༣.༡༤༠) པཏིཏྭཱ པཊངྒཱདིཔཱཎཀཱ མརིསྶནྟཱི’’ཏི ཛཱནནྟསྶཱཔི ཀུསལཙིཏྟེན པདཱིཔུཛྫལནཾ ཝིཡ ‘‘སིཉྩནེན པཱཎཀཱ མརིསྶནྟཱི’’ཏི པུབྦབྷཱགེ ཛཱནནྟསྶཱཔི ‘‘ཨིདཾ ཛལཾ སིཉྩཱམཱི’’ཏི སིཉྩནྟསྶ ཝདྷཀཙིཏྟཾ ན ཧོཏཱིཏི ཨཱཧ ‘‘ཝིནཱ ཝདྷཀཙེཏནཱཡཱ’’ཏིཨཱདི། ཨེཝཉྩ ཀཏྭཱ ‘‘པཎྞཏྟིཝཛྫ’’ནྟི ཨིདམྤི སམཏྠིཏཾ ཧོཏི། ཏིཙིཏྟནྟི ཀུསལཱཀུསལཱབྱཱཀཏཝསེན ཏིཙིཏྟཾ། ཏཐཱ ཧི པཎྞཏྟིཾ མདྡིཏྭཱ སིཉྩནྟསྶ ཝཱ སིཉྩཱཔེནྟསྶ ཝཱ ཨཀུསལཙིཏྟེན ཧོཏི, ‘‘ཨཱསནཾ དྷོཝིསྶཱམཱི’’ཏི ཙིཏྟེན དྷོཝནཏྠཾ སིཉྩནྟསྶ ཝཱ སིཉྩཱཔེནྟསྶ ཝཱ ཀུསལཙིཏྟེན ཧོཏི, པཎྞཏྟིཾ ཨཛཱནཏཱ ཨརཧཏཱ སིཉྩནཱདིཀརཎེ ཨབྱཱཀཏཙིཏྟེན ཧོཏཱིཏི ཀུསལཱཀུསལཱབྱཱཀཏཙིཏྟཝསེན ཏིཙིཏྟཾ ཧོཏི།
‘‘Padīpe (sārattha. ṭī. pācittiya 3.140) patitvā paṭaṅgādipāṇakā marissantī’’ti jānantassāpi kusalacittena padīpujjalanaṃ viya ‘‘siñcanena pāṇakā marissantī’’ti pubbabhāge jānantassāpi ‘‘idaṃ jalaṃ siñcāmī’’ti siñcantassa vadhakacittaṃ na hotīti āha ‘‘vinā vadhakacetanāyā’’tiādi. Evañca katvā ‘‘paṇṇattivajja’’nti idampi samatthitaṃ hoti. Ticittanti kusalākusalābyākatavasena ticittaṃ. Tathā hi paṇṇattiṃ madditvā siñcantassa vā siñcāpentassa vā akusalacittena hoti, ‘‘āsanaṃ dhovissāmī’’ti cittena dhovanatthaṃ siñcantassa vā siñcāpentassa vā kusalacittena hoti, paṇṇattiṃ ajānatā arahatā siñcanādikaraṇe abyākatacittena hotīti kusalākusalābyākatacittavasena ticittaṃ hoti.
སཔྤཱཎཀསིཀྑཱཔདཝཎྞནཱ ནིཊྛིཏཱ།
Sappāṇakasikkhāpadavaṇṇanā niṭṭhitā.
བྷཱུཏགཱམཝགྒོ དུཏིཡོ།
Bhūtagāmavaggo dutiyo.
