| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
7. ஸப்பாணகவக்³கோ³
7. Sappāṇakavaggo
1. ஸஞ்சிச்சஸிக்கா²பத³வண்ணனா
1. Sañciccasikkhāpadavaṇṇanā
ஸப்பாணகவக்³க³ஸ்ஸ பட²மே பாணோதி திரச்சா²னக³தபாணோ அதி⁴ப்பேதோ. தங் கு²த்³த³கம்பி மஹந்தம்பி மாரெந்தஸ்ஸ பாசித்தியமேவ, மஹந்தே பன உபக்கமமஹந்ததாய அகுஸலங் மஹந்தங் ஹோதி.
Sappāṇakavaggassa paṭhame pāṇoti tiracchānagatapāṇo adhippeto. Taṃ khuddakampi mahantampi mārentassa pācittiyameva, mahante pana upakkamamahantatāya akusalaṃ mahantaṃ hoti.
ஸாவத்தி²யங் உதா³யித்தே²ரங் ஆரப்³ப⁴ பாணங் ஜீவிதா வோரோபனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, ஸாணத்திகங், பாணே வேமதிகஸ்ஸ, அபாணே பாணஸஞ்ஞினோ, வேமதிகஸ்ஸ வா து³க்கடங் . அபாணஸஞ்ஞிஸ்ஸ, அஸஞ்சிச்ச, அஜானந்தஸ்ஸ, நமரணாதி⁴ப்பாயஸ்ஸ, உம்மத்தகாதீ³னஞ்ச அனாபத்தி. ஸேஸங் மனுஸ்ஸவிக்³க³ஹே வுத்தனயமேவாதி.
Sāvatthiyaṃ udāyittheraṃ ārabbha pāṇaṃ jīvitā voropanavatthusmiṃ paññattaṃ, sādhāraṇapaññatti, sāṇattikaṃ, pāṇe vematikassa, apāṇe pāṇasaññino, vematikassa vā dukkaṭaṃ . Apāṇasaññissa, asañcicca, ajānantassa, namaraṇādhippāyassa, ummattakādīnañca anāpatti. Sesaṃ manussaviggahe vuttanayamevāti.
ஸஞ்சிச்சஸிக்கா²பத³வண்ணனா நிட்டி²தா.
Sañciccasikkhāpadavaṇṇanā niṭṭhitā.
2. ஸப்பாணகஸிக்கா²பத³வண்ணனா
2. Sappāṇakasikkhāpadavaṇṇanā
து³தியே ஸப்பாணகந்தி யே பாணகா பரிபோ⁴கே³ன மரந்தி, தேஹி ஸப்பாணகங், தாதி³ஸஞ்ஹி ஜானங் பரிபு⁴ஞ்ஜந்தஸ்ஸ பயோகே³ பயோகே³ பாசித்தியங்.
Dutiye sappāṇakanti ye pāṇakā paribhogena maranti, tehi sappāṇakaṃ, tādisañhi jānaṃ paribhuñjantassa payoge payoge pācittiyaṃ.
ஸாவத்தி²யங் ச²ப்³ப³க்³கி³யே ஆரப்³ப⁴ ஜானங் ஸப்பாணகங் உத³கங் பரிபு⁴ஞ்ஜனவத்து²ஸ்மிங் பஞ்ஞத்தங், ஸேஸமெத்த² ஸிஞ்சனஸிக்கா²பதே³ வுத்தனயேனேவ வேதி³தப்³ப³ந்தி.
Sāvatthiyaṃ chabbaggiye ārabbha jānaṃ sappāṇakaṃ udakaṃ paribhuñjanavatthusmiṃ paññattaṃ, sesamettha siñcanasikkhāpade vuttanayeneva veditabbanti.
ஸப்பாணகஸிக்கா²பத³வண்ணனா நிட்டி²தா.
Sappāṇakasikkhāpadavaṇṇanā niṭṭhitā.
3. உக்கோடனஸிக்கா²பத³வண்ணனா
3. Ukkoṭanasikkhāpadavaṇṇanā
ததியே யதா²த⁴ம்மந்தி யோ யஸ்ஸ அதி⁴கரணஸ்ஸ வூபஸமாய த⁴ம்மோ வுத்தோ, தேனேவ த⁴ம்மேன. நிஹதாதி⁴கரணந்தி நிஹதங் அதி⁴கரணங், ஸமத²க்க²ந்த⁴கே (சூளவ॰ 185 ஆத³யோ) ஸத்தா²ரா வுத்தத⁴ம்மேனேவ வூபஸமிதந்தி அத்தோ², வூபஸமனநயங் பனஸ்ஸ அதி⁴கரணஸமதே²ஸு த³ஸ்ஸயிஸ்ஸாம. புனகம்மாய உக்கோடெய்யாதி தஸ்ஸ தஸ்ஸ பி⁴க்கு²னோ ஸந்திகங் க³ந்த்வா ‘‘அகதங் கம்ம’’ந்திஆதீ³னி (பாசி॰ 394) வத³ந்தோ புனகரணத்தா²ய உச்சாலெய்ய. யதா²டி²தபா⁴வேன பதிட்டா²துங் ந த³தெ³ய்ய, தஸ்ஸேவங் கரொந்தஸ்ஸ பாசித்தியங். யங் பன த⁴ம்மேன அதி⁴கரணங் நிஹதங் , தங் ஸுனிஹதமேவ. ஸசே விப்பகதே கம்மே படிக்கோஸதி, தங் ஸஞ்ஞாபெத்வா காதப்³ப³ங். இதரதா² கம்மஞ்ச குப்பதி, காரகானஞ்ச ஆபத்தி.
Tatiye yathādhammanti yo yassa adhikaraṇassa vūpasamāya dhammo vutto, teneva dhammena. Nihatādhikaraṇanti nihataṃ adhikaraṇaṃ, samathakkhandhake (cūḷava. 185 ādayo) satthārā vuttadhammeneva vūpasamitanti attho, vūpasamananayaṃ panassa adhikaraṇasamathesu dassayissāma. Punakammāya ukkoṭeyyāti tassa tassa bhikkhuno santikaṃ gantvā ‘‘akataṃ kamma’’ntiādīni (pāci. 394) vadanto punakaraṇatthāya uccāleyya. Yathāṭhitabhāvena patiṭṭhātuṃ na dadeyya, tassevaṃ karontassa pācittiyaṃ. Yaṃ pana dhammena adhikaraṇaṃ nihataṃ , taṃ sunihatameva. Sace vippakate kamme paṭikkosati, taṃ saññāpetvā kātabbaṃ. Itarathā kammañca kuppati, kārakānañca āpatti.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ உக்கோடனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், த⁴ம்மகம்மே வேமதிகஸ்ஸ, அத⁴ம்மகம்மே த⁴ம்மகம்மஸஞ்ஞினோ, வேமதிகஸ்ஸ வா து³க்கடங். உப⁴யேஸு அத⁴ம்மகம்மஸஞ்ஞிஸ்ஸ, ‘‘அத⁴ம்மேன வா வக்³கே³ன வா அகம்மாரஹஸ்ஸ வா கம்மங் கத’’ந்தி ஜானந்தஸ்ஸ, உம்மத்தகாதீ³னஞ்ச அனாபத்தி. யதா²த⁴ம்மங் நிஹதபா⁴வோ, ஜானநா, உக்கோடனாதி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னந்தி.
Sāvatthiyaṃ chabbaggiye bhikkhū ārabbha ukkoṭanavatthusmiṃ paññattaṃ, sādhāraṇapaññatti, anāṇattikaṃ, dhammakamme vematikassa, adhammakamme dhammakammasaññino, vematikassa vā dukkaṭaṃ. Ubhayesu adhammakammasaññissa, ‘‘adhammena vā vaggena vā akammārahassa vā kammaṃ kata’’nti jānantassa, ummattakādīnañca anāpatti. Yathādhammaṃ nihatabhāvo, jānanā, ukkoṭanāti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
உக்கோடனஸிக்கா²பத³வண்ணனா நிட்டி²தா.
Ukkoṭanasikkhāpadavaṇṇanā niṭṭhitā.
4. து³ட்டு²ல்லஸிக்கா²பத³வண்ணனா
4. Duṭṭhullasikkhāpadavaṇṇanā
சதுத்தே² து³ட்டு²ல்லந்தி ஸங்கா⁴தி³ஸேஸங் அதி⁴ப்பேதங், தங் யேன கேனசி உபாயேன ஞத்வா படிச்சா²தெ³ந்தஸ்ஸ பாசித்தியங். ஸசேபி ‘‘ந தா³னி நங் கஸ்ஸசி பி⁴க்கு²னோ ஆரோசெஸ்ஸாமீ’’தி து⁴ரங் நிக்கி²பித்வா பச்சா² ஆரோசேதி, பாசித்தியங், ஆபஜ்ஜித்வாவ ஆரோசெஸ்ஸதி. ஸசே பன ஏவங் து⁴ரங் நிக்கி²பித்வா படிச்சா²த³னத்த²மேவ அஞ்ஞஸ்ஸ ஆரோசேதி, ஸோபி அஞ்ஞஸ்ஸாதி ஏதேனுபாயேன ஸமணஸதம்பி ஆபஜ்ஜதியேவ தாவ, யாவ கோடி ந சி²ஜ்ஜதி. கத²ங் பன கோடி சி²ஜ்ஜதி? ஸசே ஹி ஆபன்னோ ஏகஸ்ஸ ஆரோசேதி, ஸோபி அஞ்ஞஸ்ஸ ஆரோசேதி, ஸோ நிவத்தித்வா யேனஸ்ஸ ஆரோசிதங், தஸ்ஸேவ ஆரோசேதி, ஏவங் ததியேன புக்³க³லேன து³தியஸ்ஸ ஆரோசிதே கோடி சி²ன்னா ஹோதி.
Catutthe duṭṭhullanti saṅghādisesaṃ adhippetaṃ, taṃ yena kenaci upāyena ñatvā paṭicchādentassa pācittiyaṃ. Sacepi ‘‘na dāni naṃ kassaci bhikkhuno ārocessāmī’’ti dhuraṃ nikkhipitvā pacchā āroceti, pācittiyaṃ, āpajjitvāva ārocessati. Sace pana evaṃ dhuraṃ nikkhipitvā paṭicchādanatthameva aññassa āroceti, sopi aññassāti etenupāyena samaṇasatampi āpajjatiyeva tāva, yāva koṭi na chijjati. Kathaṃ pana koṭi chijjati? Sace hi āpanno ekassa āroceti, sopi aññassa āroceti, so nivattitvā yenassa ārocitaṃ, tasseva āroceti, evaṃ tatiyena puggalena dutiyassa ārocite koṭi chinnā hoti.
ஸாவத்தி²யங் அஞ்ஞதரங் பி⁴க்கு²ங் ஆரப்³ப⁴ து³ட்டு²ல்லாபத்திபடிச்சா²த³னவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், து³ட்டு²ல்லாய ஆபத்தியா ஆதி³பதே³ பாசித்தியங், இதரேஸு த்³வீஸு து³க்கடங், அது³ட்டு²ல்லாய திகது³க்கடங், அனுபஸம்பன்னஸ்ஸ து³ட்டு²ல்லே வா அது³ட்டு²ல்லே வா அஜ்ஜா²சாரே து³க்கடமேவ. ‘‘ஸங்க⁴ஸ்ஸ ப⁴ண்ட³னாதீ³னி ப⁴விஸ்ஸந்தீ’’தி (பாசி॰ 401) வா ‘‘அயங் கக்க²ளோ ப²ருஸோ ஜீவிதந்தராயங் வா ப்³ரஹ்மசரியந்தராயங் வா கரிஸ்ஸதீ’’தி வா அனாரோசெந்தஸ்ஸ, பதிரூபங் பி⁴க்கு²ங் அபஸ்ஸதோ , ந சா²தே³துகாமஸ்ஸ, ‘‘பஞ்ஞாயிஸ்ஸதி ஸகேன கம்மேனா’’தி அனாரோசெந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னஸ்ஸ து³ட்டு²ல்லாபத்திஜானநங், ‘‘படிச்சா²தே³துகாமதாய நாரோசெஸ்ஸாமீ’’தி து⁴ரனிக்கே²போதி இமானெத்த² த்³வே அங்கா³னி. ஸமுட்டா²னாதீ³னி ஸமனுபா⁴ஸனஸஅஸானேவாதி.
Sāvatthiyaṃ aññataraṃ bhikkhuṃ ārabbha duṭṭhullāpattipaṭicchādanavatthusmiṃ paññattaṃ, asādhāraṇapaññatti, anāṇattikaṃ, duṭṭhullāya āpattiyā ādipade pācittiyaṃ, itaresu dvīsu dukkaṭaṃ, aduṭṭhullāya tikadukkaṭaṃ, anupasampannassa duṭṭhulle vā aduṭṭhulle vā ajjhācāre dukkaṭameva. ‘‘Saṅghassa bhaṇḍanādīni bhavissantī’’ti (pāci. 401) vā ‘‘ayaṃ kakkhaḷo pharuso jīvitantarāyaṃ vā brahmacariyantarāyaṃ vā karissatī’’ti vā anārocentassa, patirūpaṃ bhikkhuṃ apassato , na chādetukāmassa, ‘‘paññāyissati sakena kammenā’’ti anārocentassa, ummattakādīnañca anāpatti. Upasampannassa duṭṭhullāpattijānanaṃ, ‘‘paṭicchādetukāmatāya nārocessāmī’’ti dhuranikkhepoti imānettha dve aṅgāni. Samuṭṭhānādīni samanubhāsanasaasānevāti.
து³ட்டு²ல்லஸிக்கா²பத³வண்ணனா நிட்டி²தா.
Duṭṭhullasikkhāpadavaṇṇanā niṭṭhitā.
5. ஊனவீஸதிவஸ்ஸஸிக்கா²பத³வண்ணனா
5. Ūnavīsativassasikkhāpadavaṇṇanā
பஞ்சமே ஊனவீஸதிவஸ்ஸந்தி படிஸந்தி⁴க்³க³ஹணதோ பட்டா²ய அபரிபுண்ணவீஸதிவஸ்ஸங். உபஸம்பாதெ³ய்யாதி உபஜ்ஜா²யோ ஹுத்வா உபஸம்பாதெ³ய்ய. ஸோ ச புக்³க³லோ அனுபஸம்பன்னோதி ஜானந்தேனாபி அஜானந்தேனாபி உபஸம்பாதி³தோ அனுபஸம்பன்னோவ. ஸசே பன ஸோ த³ஸவஸ்ஸச்சயேன அஞ்ஞங் உபஸம்பாதே³தி, தஞ்சே முஞ்சித்வா க³ணோ பூரதி, ஸூபஸம்பன்னோ. ஸோபி யாவ ந ஜானாதி, தாவ தஸ்ஸ நேவ ஸக்³க³ந்தராயோ ந மொக்க²ந்தராயோ, ஞத்வா பன புன உபஸம்பஜ்ஜிதப்³ப³ங். தே ச பி⁴க்கூ² கா³ரய்ஹாதி ட²பெத்வா உபஜ்ஜா²யங் அவஸேஸா கா³ரய்ஹா ஹொந்தி, ஸப்³பே³ து³க்கடங் ஆபஜ்ஜந்தி. இத³ங் தஸ்மிங் பாசித்தியந்தி யோ பன உபஜ்ஜா²யோ ஹுத்வா உபஸம்பாதே³தி, தஸ்மிங்யேவ புக்³க³லே இத³ங் பாசித்தியங் வேதி³தப்³ப³ங். தஸ்மா யோ ‘‘ஏவங் உபஸம்பாதெ³ஸ்ஸாமீ’’தி க³ணங் வா ஆசரியங் வா பத்தங் வா சீவரங் வா பரியேஸதி, ஸீமங் வா ஸம்மன்னதி (பாசி॰ 404), உத³குக்கே²பங் வா பரிச்சி²ந்த³தி, ஸோ ஏதேஸு ஸப்³ப³கிச்சேஸு ஞத்தியா, த்³வீஸு ச கம்மவாசாஸு து³க்கடானி ஆபஜ்ஜித்வா கம்மவாசாபரியோஸானே பாசித்தியங் ஆபஜ்ஜதி.
Pañcame ūnavīsativassanti paṭisandhiggahaṇato paṭṭhāya aparipuṇṇavīsativassaṃ. Upasampādeyyāti upajjhāyo hutvā upasampādeyya. So ca puggalo anupasampannoti jānantenāpi ajānantenāpi upasampādito anupasampannova. Sace pana so dasavassaccayena aññaṃ upasampādeti, tañce muñcitvā gaṇo pūrati, sūpasampanno. Sopi yāva na jānāti, tāva tassa neva saggantarāyo na mokkhantarāyo, ñatvā pana puna upasampajjitabbaṃ. Te ca bhikkhū gārayhāti ṭhapetvā upajjhāyaṃ avasesā gārayhā honti, sabbe dukkaṭaṃ āpajjanti. Idaṃ tasmiṃ pācittiyanti yo pana upajjhāyo hutvā upasampādeti, tasmiṃyeva puggale idaṃ pācittiyaṃ veditabbaṃ. Tasmā yo ‘‘evaṃ upasampādessāmī’’ti gaṇaṃ vā ācariyaṃ vā pattaṃ vā cīvaraṃ vā pariyesati, sīmaṃ vā sammannati (pāci. 404), udakukkhepaṃ vā paricchindati, so etesu sabbakiccesu ñattiyā, dvīsu ca kammavācāsu dukkaṭāni āpajjitvā kammavācāpariyosāne pācittiyaṃ āpajjati.
ராஜக³ஹே ஸம்ப³ஹுலே பி⁴க்கூ² ஆரப்³ப⁴ ஊனவீஸதிவஸ்ஸங் உபஸம்பாத³னவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், ஊனவீஸதிவஸ்ஸே வேமதிகஸ்ஸ, பரிபுண்ணவீஸதிவஸ்ஸே ஊனகஸஞ்ஞினோ, வேமதிகஸ்ஸ ச து³க்கடங். உப⁴யத்த² பரிபுண்ணஸஞ்ஞிஸ்ஸ, உம்மத்தகாதீ³னஞ்ச அனாபத்தி. ஊனவீஸதிவஸ்ஸதா, ஊனகஸஞ்ஞிதா, உபஸம்பாத³னந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன பண்ணத்திவஜ்ஜங், திசித்தங், திவேத³னந்தி.
Rājagahe sambahule bhikkhū ārabbha ūnavīsativassaṃ upasampādanavatthusmiṃ paññattaṃ, asādhāraṇapaññatti, anāṇattikaṃ, ūnavīsativasse vematikassa, paripuṇṇavīsativasse ūnakasaññino, vematikassa ca dukkaṭaṃ. Ubhayattha paripuṇṇasaññissa, ummattakādīnañca anāpatti. Ūnavīsativassatā, ūnakasaññitā, upasampādananti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
ஊனவீஸதிவஸ்ஸஸிக்கா²பத³வண்ணனா நிட்டி²தா.
Ūnavīsativassasikkhāpadavaṇṇanā niṭṭhitā.
6. தெ²ய்யஸத்த²ஸிக்கா²பத³வண்ணனா
6. Theyyasatthasikkhāpadavaṇṇanā
ச²ட்டே² யே ராஜானங் வா வஞ்செத்வா ஸுங்கங் வா பரிஹரிதுகாமா சோரா கதகம்மா சேவ அகதகம்மா ச மக்³க³ப்படிபன்னா, தேஸு இத⁴ தெ²ய்யஸத்த²ஸஞ்ஞினோ தஸ்ஸ தெ²ய்யஸத்த²பா⁴வங் ஞத்வா தேன ஸத்³தி⁴ங் ஸங்விதா⁴ய க³ச்ச²ந்தஸ்ஸ ஸங்விதா⁴னே ச க³மனே ச ஓவாத³வக்³கே³ வுத்தனயேன ஆபத்திவினிச்ச²யோ வேதி³தப்³போ³.
Chaṭṭhe ye rājānaṃ vā vañcetvā suṅkaṃ vā pariharitukāmā corā katakammā ceva akatakammā ca maggappaṭipannā, tesu idha theyyasatthasaññino tassa theyyasatthabhāvaṃ ñatvā tena saddhiṃ saṃvidhāya gacchantassa saṃvidhāne ca gamane ca ovādavagge vuttanayena āpattivinicchayo veditabbo.
ஸாவத்தி²யங் அஞ்ஞதரங் பி⁴க்கு²ங் ஆரப்³ப⁴ தெ²ய்யஸத்தே²ன ஸத்³தி⁴ங் ஸங்விதா⁴ய ஏகத்³தா⁴னமக்³க³ங் படிபஜ்ஜனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், மனுஸ்ஸேஸு அஸங்வித³ஹந்தேஸு ஸயமேவ ஸங்வித³ஹித்வா க³ச்ச²ந்தஸ்ஸ, தெ²ய்யஸத்தே² வேமதிகஸ்ஸ, அதெ²ய்யஸத்தே² தெ²ய்யஸத்த²ஸஞ்ஞினோ, வேமதிகஸ்ஸ ச து³க்கடங். அதெ²ய்யஸத்த²ஸஞ்ஞிஸ்ஸ, அஸங்வித³ஹித்வா வா காலவிஸங்கேதேன வா, ஆபதா³ஸு வா, க³ச்ச²ந்தஸ்ஸ, உம்மத்தகாதீ³னஞ்ச அனாபத்தி. தெ²ய்யஸத்த²பா⁴வோ, ஜானநங், ஸங்விதா⁴னங், அவிஸங்கேதேன க³மனந்தி இமானெத்த² சத்தாரி அங்கா³னி. தெ²ய்யஸத்த²ஸமுட்டா²னங், கிரியங், ஸஞ்ஞாவிமொக்க²ங், ஸசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Sāvatthiyaṃ aññataraṃ bhikkhuṃ ārabbha theyyasatthena saddhiṃ saṃvidhāya ekaddhānamaggaṃ paṭipajjanavatthusmiṃ paññattaṃ, sādhāraṇapaññatti, anāṇattikaṃ, manussesu asaṃvidahantesu sayameva saṃvidahitvā gacchantassa, theyyasatthe vematikassa, atheyyasatthe theyyasatthasaññino, vematikassa ca dukkaṭaṃ. Atheyyasatthasaññissa, asaṃvidahitvā vā kālavisaṅketena vā, āpadāsu vā, gacchantassa, ummattakādīnañca anāpatti. Theyyasatthabhāvo, jānanaṃ, saṃvidhānaṃ, avisaṅketena gamananti imānettha cattāri aṅgāni. Theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
தெ²ய்யஸத்த²ஸிக்கா²பத³வண்ணனா நிட்டி²தா.
Theyyasatthasikkhāpadavaṇṇanā niṭṭhitā.
7. ஸங்விதா⁴னஸிக்கா²பத³வண்ணனா
7. Saṃvidhānasikkhāpadavaṇṇanā
ஸத்தமே ஸாவத்தி²யங் அஞ்ஞதரங் பி⁴க்கு²ங் ஆரப்³ப⁴ மாதுகா³மேன ஸத்³தி⁴ங் ஏகத்³தா⁴னமக்³க³ங் படிபஜ்ஜனவத்து²ஸ்மிங் பஞ்ஞத்தங், ஸேஸமெத்த² பி⁴க்கு²னியா ஸத்³தி⁴ங் ஸங்விதா⁴னஸிக்கா²பதே³ வுத்தனயேனேவ வேதி³தப்³ப³ந்தி.
Sattame sāvatthiyaṃ aññataraṃ bhikkhuṃ ārabbha mātugāmena saddhiṃ ekaddhānamaggaṃ paṭipajjanavatthusmiṃ paññattaṃ, sesamettha bhikkhuniyā saddhiṃ saṃvidhānasikkhāpade vuttanayeneva veditabbanti.
ஸங்விதா⁴னஸிக்கா²பத³வண்ணனா நிட்டி²தா.
Saṃvidhānasikkhāpadavaṇṇanā niṭṭhitā.
8. அரிட்ட²ஸிக்கா²பத³வண்ணனா
8. Ariṭṭhasikkhāpadavaṇṇanā
அட்ட²மே ஸக்³க³மொக்கா²னங் அந்தராயங் கரொந்தீதி அந்தராயிகா, தே கம்மகிலேஸவிபாகஉபவாத³பஞ்ஞத்திவீதிக்கமனவஸேன பஞ்சவிதா⁴. தேஸு முது³கானங் அத்த²ரணாதீ³னங் ப²ஸ்ஸோ விய இத்தி²ஸம்ப²ஸ்ஸோபி வட்டதீதி மேது²னவீதிக்கமனே தோ³ஸங் அதி³ஸ்வா பஞ்ஞத்திவீதிக்கமந்தராயிகே ஸந்தா⁴ய ‘‘யேமே அந்தராயிகா த⁴ம்மா வுத்தா ப⁴க³வதா, தே படிஸேவதோ நாலங் அந்தராயாயா’’தி வுத்தங். அனேகபரியாயேனாதி ‘‘அட்டி²கங்கலூபமா காமா’’திஆதீ³ஹி (ம॰ நி॰ 2.42; பாசி॰ 417; சூளனி॰ க²க்³க³விஸாணஸுத்தனித்³தே³ஸ 147) நேகேஹி காரணேஹி. ஸோ பி⁴க்கு² பி⁴க்கூ²ஹீதி யே பஸ்ஸந்தி வா ஸுணந்தி வா, தேஹி திக்க²த்துங் ஏவங் வத்தப்³போ³ ‘‘மா ஆயஸ்மா ஏவங் அவச…பே॰… அலஞ்ச பன தே படிஸேவதோ அந்தராயாயா’’தி. ஏவங் வுத்தே அப்படினிஸ்ஸஜ்ஜந்தஸ்ஸ து³க்கடங், ஸுத்வா அவத³ந்தானம்பி து³க்கடங். புன ஸங்க⁴மஜ்ஜ²ம்பி ஆகட்³டி⁴த்வா ததே²வ வத்தப்³போ³, தத்ராபி தஸ்ஸ அப்படினிஸ்ஸஜ்ஜனே, இதரேஸஞ்ச அவசனே து³க்கடமேவ. ஏவம்பி அப்படினிஸ்ஸஜ்ஜந்தோ புன ஞத்திசதுத்தே²ன கம்மேன யாவததியங் ஸமனுபா⁴ஸிதப்³போ³, அத²ஸ்ஸ அப்படினிஸ்ஸஜ்ஜதோ புன ஞத்தியா ச த்³வீஹி ச கம்மவாசாஹி து³க்கடங், கம்மவாசாபரியோஸானே பாசித்தியங்.
Aṭṭhame saggamokkhānaṃ antarāyaṃ karontīti antarāyikā, te kammakilesavipākaupavādapaññattivītikkamanavasena pañcavidhā. Tesu mudukānaṃ attharaṇādīnaṃ phasso viya itthisamphassopi vaṭṭatīti methunavītikkamane dosaṃ adisvā paññattivītikkamantarāyike sandhāya ‘‘yeme antarāyikā dhammā vuttā bhagavatā, te paṭisevato nālaṃ antarāyāyā’’ti vuttaṃ. Anekapariyāyenāti ‘‘aṭṭhikaṅkalūpamā kāmā’’tiādīhi (ma. ni. 2.42; pāci. 417; cūḷani. khaggavisāṇasuttaniddesa 147) nekehi kāraṇehi. So bhikkhu bhikkhūhīti ye passanti vā suṇanti vā, tehi tikkhattuṃ evaṃ vattabbo ‘‘mā āyasmā evaṃ avaca…pe… alañca pana te paṭisevato antarāyāyā’’ti. Evaṃ vutte appaṭinissajjantassa dukkaṭaṃ, sutvā avadantānampi dukkaṭaṃ. Puna saṅghamajjhampi ākaḍḍhitvā tatheva vattabbo, tatrāpi tassa appaṭinissajjane, itaresañca avacane dukkaṭameva. Evampi appaṭinissajjanto puna ñatticatutthena kammena yāvatatiyaṃ samanubhāsitabbo, athassa appaṭinissajjato puna ñattiyā ca dvīhi ca kammavācāhi dukkaṭaṃ, kammavācāpariyosāne pācittiyaṃ.
ஸாவத்தி²யங் அரிட்ட²ங் ஆரப்³ப⁴ பாபிகாய தி³ட்டி²யா அப்படினிஸ்ஸஜ்ஜனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், அத⁴ம்மகம்மே திகது³க்கடங். அஸமனுபா⁴ஸியமானஸ்ஸ , படினிஸ்ஸஜ்ஜந்தஸ்ஸ, உம்மத்தகாதீ³னஞ்ச அனாபத்தி. த⁴ம்மகம்மதா, ஸமனுபா⁴ஸனா, அப்படினிஸ்ஸஜ்ஜனந்தி இமானெத்த² தீணி அங்கா³னி. ஸமுட்டா²னாதீ³னி ஸமனுபா⁴ஸனஸதி³ஸானேவாதி.
Sāvatthiyaṃ ariṭṭhaṃ ārabbha pāpikāya diṭṭhiyā appaṭinissajjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, adhammakamme tikadukkaṭaṃ. Asamanubhāsiyamānassa , paṭinissajjantassa, ummattakādīnañca anāpatti. Dhammakammatā, samanubhāsanā, appaṭinissajjananti imānettha tīṇi aṅgāni. Samuṭṭhānādīni samanubhāsanasadisānevāti.
அரிட்ட²ஸிக்கா²பத³வண்ணனா நிட்டி²தா.
Ariṭṭhasikkhāpadavaṇṇanā niṭṭhitā.
9. உக்கி²த்தஸம்போ⁴க³ஸிக்கா²பத³வண்ணனா
9. Ukkhittasambhogasikkhāpadavaṇṇanā
நவமே ததா²வாதி³னாதி ‘‘ததா²ஹங் ப⁴க³வதா த⁴ம்ம’’ந்திஆதி³வாதி³னா. அகதானுத⁴ம்மேனாதி அனுத⁴ம்மோ வுச்சதி ஆபத்தியா அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா த⁴ம்மேன வினயேன உக்கி²த்தகஸ்ஸ அனுலோமவத்தங் தி³ஸ்வா கதஓஸாரணா, ஸோ ஓஸாரணஸங்கா²தோ அனுத⁴ம்மோ யஸ்ஸ ந கதோ, அயங் அகதானுத⁴ம்மோ நாம, தாதி³ஸேன ஸத்³தி⁴ந்தி அத்தோ². ஸம்பு⁴ஞ்ஜெய்ய வாதி ஆமிஸஸம்போ⁴க³ங் வா த⁴ம்மஸம்போ⁴க³ங் வா கரெய்ய. ஸங்வஸெய்ய வாதி உபோஸதா²தி³கங் ஸங்க⁴கம்மங் கரெய்ய . ஸஹ வா ஸெய்யங் கப்பெய்யாதி நானூபசாரேபி ஏகச்ச²ன்னே நிபஜ்ஜெய்ய. தத்த² ஆமிஸபரிபோ⁴கே³ ஏகப்பயோகே³ன ப³ஹூபி த³த³தோ வா க³ண்ஹதோ வா ஏகங் பாசித்தியங், விச்சி²ந்த³னே ஸதி பயோகே³ பயோகே³ பாசித்தியங். த⁴ம்மஸம்போ⁴கே³ பதா³தீ³ஹி உத்³தி³ஸந்தஸ்ஸ வா உத்³தி³ஸாபெந்தஸ்ஸ வா பத³ஸோத⁴ம்மே வுத்தனயேன, ஸங்வாஸே கம்மபரியோஸானவஸேன, ஸஹஸெய்யாய ஏகஸ்மிங் நிபன்னே இதரஸ்ஸ நிபஜ்ஜனப்பயோக³வஸேன ஆபத்திபரிச்சே²தோ³ வேதி³தப்³போ³.
Navame tathāvādināti ‘‘tathāhaṃ bhagavatā dhamma’’ntiādivādinā. Akatānudhammenāti anudhammo vuccati āpattiyā adassane vā appaṭikamme vā pāpikāya diṭṭhiyā appaṭinissagge vā dhammena vinayena ukkhittakassa anulomavattaṃ disvā kataosāraṇā, so osāraṇasaṅkhāto anudhammo yassa na kato, ayaṃ akatānudhammo nāma, tādisena saddhinti attho. Sambhuñjeyya vāti āmisasambhogaṃ vā dhammasambhogaṃ vā kareyya. Saṃvaseyya vāti uposathādikaṃ saṅghakammaṃ kareyya . Saha vā seyyaṃ kappeyyāti nānūpacārepi ekacchanne nipajjeyya. Tattha āmisaparibhoge ekappayogena bahūpi dadato vā gaṇhato vā ekaṃ pācittiyaṃ, vicchindane sati payoge payoge pācittiyaṃ. Dhammasambhoge padādīhi uddisantassa vā uddisāpentassa vā padasodhamme vuttanayena, saṃvāse kammapariyosānavasena, sahaseyyāya ekasmiṃ nipanne itarassa nipajjanappayogavasena āpattiparicchedo veditabbo.
ஸாவத்தி²யங் ச²ப்³ப³க்³கி³யே ஆரப்³ப⁴ அரிட்டே²ன பி⁴க்கு²னா ஸத்³தி⁴ங் ஸம்பு⁴ஞ்ஜனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், உக்கி²த்தகே வேமதிகஸ்ஸ, அனுக்கி²த்தகே உக்கி²த்தகஸஞ்ஞினோ சேவ வேமதிகஸ்ஸ ச து³க்கடங். உபோ⁴ஸு அனுக்கி²த்தகஸஞ்ஞிஸ்ஸ, ‘‘ஓஸாரிதோ’’தி வா ‘‘தங் தி³ட்டி²ங் படினிஸ்ஸட்டோ²’’தி வா ஜானந்தஸ்ஸ, உம்மத்தகாதீ³னஞ்ச அனாபத்தி. அகதானுத⁴ம்மதா, ஜானநா, ஸம்போ⁴கா³தி³கரணந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன பண்ணத்திவஜ்ஜங், திசித்தங், திவேத³னந்தி.
Sāvatthiyaṃ chabbaggiye ārabbha ariṭṭhena bhikkhunā saddhiṃ sambhuñjanavatthusmiṃ paññattaṃ, sādhāraṇapaññatti, anāṇattikaṃ, ukkhittake vematikassa, anukkhittake ukkhittakasaññino ceva vematikassa ca dukkaṭaṃ. Ubhosu anukkhittakasaññissa, ‘‘osārito’’ti vā ‘‘taṃ diṭṭhiṃ paṭinissaṭṭho’’ti vā jānantassa, ummattakādīnañca anāpatti. Akatānudhammatā, jānanā, sambhogādikaraṇanti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
உக்கி²த்தஸம்போ⁴க³ஸிக்கா²பத³வண்ணனா நிட்டி²தா.
Ukkhittasambhogasikkhāpadavaṇṇanā niṭṭhitā.
10. கண்டகஸிக்கா²பத³வண்ணனா
10. Kaṇṭakasikkhāpadavaṇṇanā
த³ஸமே ஸமணுத்³தே³ஸோதி ஸாமணேரோ. சராதி க³ச்ச². பிரேதி பர அமாமக. வினஸ்ஸாதி நஸ்ஸ , யத்த² தங் ந பஸ்ஸாம, தத்த² க³ச்சா²தி வுத்தங் ஹோதி. ததா²னாஸிதந்திஎத்த² ஸங்வாஸனாஸனா லிங்க³னாஸனா த³ண்ட³கம்மனாஸனாதி திஸ்ஸோ நாஸனா. தத்த² ஆபத்தியா அத³ஸ்ஸனாதீ³ஸு உக்கே²பனா ஸங்வாஸனாஸனா நாம. தூ³ஸகோ நாஸேதப்³போ³ (பாரா॰ 66), மெத்தியங் பி⁴க்கு²னிங் நாஸேதா²தி (சூளவ॰ 193; பாரா॰ 384) அயங் லிங்க³னாஸனா நாம. ‘‘அஜ்ஜதக்³கே³ தே, ஆவுஸோ ஸமணுத்³தே³ஸ, ந சேவ ஸோ ப⁴க³வா ஸத்தா² அபதி³ஸிதப்³போ³’’தி (பாசி॰ 429) அயங் த³ண்ட³கம்மனாஸனா நாம, அயங் இதா⁴தி⁴ப்பேதா. தேன வுத்தங் ‘‘ததா²னாஸித’’ந்தி. உபலாபெய்யாதி ‘‘பத்தங் வா சீவரங் வா உத்³தே³ஸங் வா பரிபுச்ச²ங் வா த³ஸ்ஸாமீ’’தி ஸங்க³ண்ஹெய்ய. உபட்டா²பெய்யாதி சுண்ணமத்திகாதீ³னி ஸாதி³யந்தோ தேன அத்தனோ உபட்டா²னங் காராபெய்ய. ஸம்போ⁴க³ஸஹஸெய்யா அனந்தரஸிக்கா²பதே³ வுத்தனயா ஏவ, தஸ்மா ஆபத்திபரிச்சே²தோ³பெத்த² தஸ்மிங் வுத்தனயேனேவ வேதி³தப்³போ³.
Dasame samaṇuddesoti sāmaṇero. Carāti gaccha. Pireti para amāmaka. Vinassāti nassa , yattha taṃ na passāma, tattha gacchāti vuttaṃ hoti. Tathānāsitantiettha saṃvāsanāsanā liṅganāsanā daṇḍakammanāsanāti tisso nāsanā. Tattha āpattiyā adassanādīsu ukkhepanā saṃvāsanāsanā nāma. Dūsako nāsetabbo (pārā. 66), mettiyaṃ bhikkhuniṃ nāsethāti (cūḷava. 193; pārā. 384) ayaṃ liṅganāsanā nāma. ‘‘Ajjatagge te, āvuso samaṇuddesa, na ceva so bhagavā satthā apadisitabbo’’ti (pāci. 429) ayaṃ daṇḍakammanāsanā nāma, ayaṃ idhādhippetā. Tena vuttaṃ ‘‘tathānāsita’’nti. Upalāpeyyāti ‘‘pattaṃ vā cīvaraṃ vā uddesaṃ vā paripucchaṃ vā dassāmī’’ti saṅgaṇheyya. Upaṭṭhāpeyyāti cuṇṇamattikādīni sādiyanto tena attano upaṭṭhānaṃ kārāpeyya. Sambhogasahaseyyā anantarasikkhāpade vuttanayā eva, tasmā āpattiparicchedopettha tasmiṃ vuttanayeneva veditabbo.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ கண்டகஸமணுத்³தே³ஸஉபலாபனவத்து²ஸ்மிங் பஞ்ஞத்தங், ஸேஸங் அரிட்ட²ஸிக்கா²பதே³ வுத்தஸதி³ஸமேவாதி.
Sāvatthiyaṃ chabbaggiye bhikkhū ārabbha kaṇṭakasamaṇuddesaupalāpanavatthusmiṃ paññattaṃ, sesaṃ ariṭṭhasikkhāpade vuttasadisamevāti.
கண்டகஸிக்கா²பத³வண்ணனா நிட்டி²தா.
Kaṇṭakasikkhāpadavaṇṇanā niṭṭhitā.
ஸப்பாணகவக்³கோ³ ஸத்தமோ.
Sappāṇakavaggo sattamo.
