| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৭. সপ্পাণকৰগ্গো
7. Sappāṇakavaggo
১৭১. সঞ্চিচ্চ পাণং জীৰিতা ৰোরোপেন্তো কতি আপত্তিযো আপজ্জতি? সঞ্চিচ্চ পাণং জীৰিতা ৰোরোপেন্তো চতস্সো আপত্তিযো আপজ্জতি। অনোদিস্স ওপাতং খণতি – ‘‘যো কোচি পপতিত্ৰা মরিস্সতী’’তি, আপত্তি দুক্কটস্স; মনুস্সো তস্মিং পপতিত্ৰা মরতি, আপত্তি পারাজিকস্স; যক্খো ৰা পেতো ৰা তিরচ্ছানগতমনুস্সৰিগ্গহো ৰা তস্মিং পপতিত্ৰা মরতি, আপত্তি থুল্লচ্চযস্স; তিরচ্ছানগতো তস্মিং পপতিত্ৰা মরতি, আপত্তি পাচিত্তিযস্স – সঞ্চিচ্চ পাণং জীৰিতা ৰোরোপেন্তো ইমা চতস্সো আপত্তিযো আপজ্জতি।
171. Sañcicca pāṇaṃ jīvitā voropento kati āpattiyo āpajjati? Sañcicca pāṇaṃ jīvitā voropento catasso āpattiyo āpajjati. Anodissa opātaṃ khaṇati – ‘‘yo koci papatitvā marissatī’’ti, āpatti dukkaṭassa; manusso tasmiṃ papatitvā marati, āpatti pārājikassa; yakkho vā peto vā tiracchānagatamanussaviggaho vā tasmiṃ papatitvā marati, āpatti thullaccayassa; tiracchānagato tasmiṃ papatitvā marati, āpatti pācittiyassa – sañcicca pāṇaṃ jīvitā voropento imā catasso āpattiyo āpajjati.
জানং সপ্পাণকং উদকং পরিভুঞ্জন্তো দ্ৰে আপত্তিযো আপজ্জতি। পরিভুঞ্জতি, পযোগে দুক্কটং; পরিভুত্তে আপত্তি পাচিত্তিযস্স।
Jānaṃ sappāṇakaṃ udakaṃ paribhuñjanto dve āpattiyo āpajjati. Paribhuñjati, payoge dukkaṭaṃ; paribhutte āpatti pācittiyassa.
জানং যথাধম্মং নিহতাধিকরণং পুনকম্মায উক্কোটেন্তো দ্ৰে আপত্তিযো আপজ্জতি। উক্কোটেতি, পযোগে দুক্কটং; উক্কোটিতে আপত্তি পাচিত্তিযস্স।
Jānaṃ yathādhammaṃ nihatādhikaraṇaṃ punakammāya ukkoṭento dve āpattiyo āpajjati. Ukkoṭeti, payoge dukkaṭaṃ; ukkoṭite āpatti pācittiyassa.
ভিক্খুস্স জানং দুট্ঠুল্লং আপত্তিং পটিচ্ছাদেন্তো একং আপত্তিং আপজ্জতি। পাচিত্তিযং।
Bhikkhussa jānaṃ duṭṭhullaṃ āpattiṃ paṭicchādento ekaṃ āpattiṃ āpajjati. Pācittiyaṃ.
জানং ঊনৰীসতিৰস্সং পুগ্গলং উপসম্পাদেন্তো দ্ৰে আপত্তিযো আপজ্জতি। উপসম্পাদেতি, পযোগে দুক্কটং; উপসম্পাদিতে আপত্তি পাচিত্তিযস্স।
Jānaṃ ūnavīsativassaṃ puggalaṃ upasampādento dve āpattiyo āpajjati. Upasampādeti, payoge dukkaṭaṃ; upasampādite āpatti pācittiyassa.
জানং থেয্যসত্থেন সদ্ধিং সংৰিধায একদ্ধানমগ্গং পটিপজ্জন্তো দ্ৰে আপত্তিযো আপজ্জতি। পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স।
Jānaṃ theyyasatthena saddhiṃ saṃvidhāya ekaddhānamaggaṃ paṭipajjanto dve āpattiyo āpajjati. Paṭipajjati, payoge dukkaṭaṃ; paṭipanne āpatti pācittiyassa.
মাতুগামেন সদ্ধিং সংৰিধায একদ্ধানমগ্গং পটিপজ্জন্তো দ্ৰে আপত্তিযো আপজ্জতি। পটিপজ্জতি, পযোগে দুক্কটং; পটিপন্নে আপত্তি পাচিত্তিযস্স।
Mātugāmena saddhiṃ saṃvidhāya ekaddhānamaggaṃ paṭipajjanto dve āpattiyo āpajjati. Paṭipajjati, payoge dukkaṭaṃ; paṭipanne āpatti pācittiyassa.
পাপিকায দিট্ঠিযা যাৰততিযং সমনুভাসনায ন পটিনিস্সজ্জন্তো দ্ৰে আপত্তিযো আপজ্জতি। ঞত্তিযা দুক্কটং; কম্মৰাচাপরিযোসানে আপত্তি পাচিত্তিযস্স।
Pāpikāya diṭṭhiyā yāvatatiyaṃ samanubhāsanāya na paṭinissajjanto dve āpattiyo āpajjati. Ñattiyā dukkaṭaṃ; kammavācāpariyosāne āpatti pācittiyassa.
জানং তথাৰাদিনা ভিক্খুনা অকটানুধম্মেন তং দিট্ঠিং অপ্পটিনিস্সট্ঠেন সদ্ধিং সম্ভুঞ্জন্তো দ্ৰে আপত্তিযো আপজ্জতি। সম্ভুঞ্জতি, পযোগে দুক্কটং; সম্ভুত্তে আপত্তি পাচিত্তিযস্স।
Jānaṃ tathāvādinā bhikkhunā akaṭānudhammena taṃ diṭṭhiṃ appaṭinissaṭṭhena saddhiṃ sambhuñjanto dve āpattiyo āpajjati. Sambhuñjati, payoge dukkaṭaṃ; sambhutte āpatti pācittiyassa.
জানং তথানাসিতং সমণুদ্দেসং উপলাপেন্তো দ্ৰে আপত্তিযো আপজ্জতি। উপলাপেতি, পযোগে দুক্কটং; উপলাপিতে আপত্তি পাচিত্তিযস্স।
Jānaṃ tathānāsitaṃ samaṇuddesaṃ upalāpento dve āpattiyo āpajjati. Upalāpeti, payoge dukkaṭaṃ; upalāpite āpatti pācittiyassa.
সপ্পাণকৰগ্গো সত্তমো।
Sappāṇakavaggo sattamo.
Related texts:
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / কতাপত্তিৰারাদিৰণ্ণনা • Katāpattivārādivaṇṇanā
