| Library / Tipiṭaka / তিপিটক • Tipiṭaka / দ্ৰেমাতিকাপাল়ি • Dvemātikāpāḷi |
৭. সপ্পাণকৰগ্গো
7. Sappāṇakavaggo
১. সঞ্চিচ্চসিক্খাপদৰণ্ণনা
1. Sañciccasikkhāpadavaṇṇanā
সপ্পাণকৰগ্গস্স পঠমে পাণোতি তিরচ্ছানগতপাণো অধিপ্পেতো। তং খুদ্দকম্পি মহন্তম্পি মারেন্তস্স পাচিত্তিযমেৰ, মহন্তে পন উপক্কমমহন্ততায অকুসলং মহন্তং হোতি।
Sappāṇakavaggassa paṭhame pāṇoti tiracchānagatapāṇo adhippeto. Taṃ khuddakampi mahantampi mārentassa pācittiyameva, mahante pana upakkamamahantatāya akusalaṃ mahantaṃ hoti.
সাৰত্থিযং উদাযিত্থেরং আরব্ভ পাণং জীৰিতা ৰোরোপনৰত্থুস্মিং পঞ্ঞত্তং, সাধারণপঞ্ঞত্তি, সাণত্তিকং, পাণে ৰেমতিকস্স, অপাণে পাণসঞ্ঞিনো, ৰেমতিকস্স ৰা দুক্কটং । অপাণসঞ্ঞিস্স, অসঞ্চিচ্চ, অজানন্তস্স, নমরণাধিপ্পাযস্স, উম্মত্তকাদীনঞ্চ অনাপত্তি। সেসং মনুস্সৰিগ্গহে ৰুত্তনযমেৰাতি।
Sāvatthiyaṃ udāyittheraṃ ārabbha pāṇaṃ jīvitā voropanavatthusmiṃ paññattaṃ, sādhāraṇapaññatti, sāṇattikaṃ, pāṇe vematikassa, apāṇe pāṇasaññino, vematikassa vā dukkaṭaṃ . Apāṇasaññissa, asañcicca, ajānantassa, namaraṇādhippāyassa, ummattakādīnañca anāpatti. Sesaṃ manussaviggahe vuttanayamevāti.
সঞ্চিচ্চসিক্খাপদৰণ্ণনা নিট্ঠিতা।
Sañciccasikkhāpadavaṇṇanā niṭṭhitā.
২. সপ্পাণকসিক্খাপদৰণ্ণনা
2. Sappāṇakasikkhāpadavaṇṇanā
দুতিযে সপ্পাণকন্তি যে পাণকা পরিভোগেন মরন্তি, তেহি সপ্পাণকং, তাদিসঞ্হি জানং পরিভুঞ্জন্তস্স পযোগে পযোগে পাচিত্তিযং।
Dutiye sappāṇakanti ye pāṇakā paribhogena maranti, tehi sappāṇakaṃ, tādisañhi jānaṃ paribhuñjantassa payoge payoge pācittiyaṃ.
সাৰত্থিযং ছব্বগ্গিযে আরব্ভ জানং সপ্পাণকং উদকং পরিভুঞ্জনৰত্থুস্মিং পঞ্ঞত্তং, সেসমেত্থ সিঞ্চনসিক্খাপদে ৰুত্তনযেনেৰ ৰেদিতব্বন্তি।
Sāvatthiyaṃ chabbaggiye ārabbha jānaṃ sappāṇakaṃ udakaṃ paribhuñjanavatthusmiṃ paññattaṃ, sesamettha siñcanasikkhāpade vuttanayeneva veditabbanti.
সপ্পাণকসিক্খাপদৰণ্ণনা নিট্ঠিতা।
Sappāṇakasikkhāpadavaṇṇanā niṭṭhitā.
৩. উক্কোটনসিক্খাপদৰণ্ণনা
3. Ukkoṭanasikkhāpadavaṇṇanā
ততিযে যথাধম্মন্তি যো যস্স অধিকরণস্স ৰূপসমায ধম্মো ৰুত্তো, তেনেৰ ধম্মেন। নিহতাধিকরণন্তি নিহতং অধিকরণং, সমথক্খন্ধকে (চূল়ৰ॰ ১৮৫ আদযো) সত্থারা ৰুত্তধম্মেনেৰ ৰূপসমিতন্তি অত্থো, ৰূপসমননযং পনস্স অধিকরণসমথেসু দস্সযিস্সাম। পুনকম্মায উক্কোটেয্যাতি তস্স তস্স ভিক্খুনো সন্তিকং গন্ত্ৰা ‘‘অকতং কম্ম’’ন্তিআদীনি (পাচি॰ ৩৯৪) ৰদন্তো পুনকরণত্থায উচ্চালেয্য। যথাঠিতভাৰেন পতিট্ঠাতুং ন দদেয্য, তস্সেৰং করোন্তস্স পাচিত্তিযং। যং পন ধম্মেন অধিকরণং নিহতং , তং সুনিহতমেৰ। সচে ৰিপ্পকতে কম্মে পটিক্কোসতি, তং সঞ্ঞাপেত্ৰা কাতব্বং। ইতরথা কম্মঞ্চ কুপ্পতি, কারকানঞ্চ আপত্তি।
Tatiye yathādhammanti yo yassa adhikaraṇassa vūpasamāya dhammo vutto, teneva dhammena. Nihatādhikaraṇanti nihataṃ adhikaraṇaṃ, samathakkhandhake (cūḷava. 185 ādayo) satthārā vuttadhammeneva vūpasamitanti attho, vūpasamananayaṃ panassa adhikaraṇasamathesu dassayissāma. Punakammāya ukkoṭeyyāti tassa tassa bhikkhuno santikaṃ gantvā ‘‘akataṃ kamma’’ntiādīni (pāci. 394) vadanto punakaraṇatthāya uccāleyya. Yathāṭhitabhāvena patiṭṭhātuṃ na dadeyya, tassevaṃ karontassa pācittiyaṃ. Yaṃ pana dhammena adhikaraṇaṃ nihataṃ , taṃ sunihatameva. Sace vippakate kamme paṭikkosati, taṃ saññāpetvā kātabbaṃ. Itarathā kammañca kuppati, kārakānañca āpatti.
সাৰত্থিযং ছব্বগ্গিযে ভিক্খূ আরব্ভ উক্কোটনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, ধম্মকম্মে ৰেমতিকস্স, অধম্মকম্মে ধম্মকম্মসঞ্ঞিনো, ৰেমতিকস্স ৰা দুক্কটং। উভযেসু অধম্মকম্মসঞ্ঞিস্স, ‘‘অধম্মেন ৰা ৰগ্গেন ৰা অকম্মারহস্স ৰা কম্মং কত’’ন্তি জানন্তস্স, উম্মত্তকাদীনঞ্চ অনাপত্তি। যথাধম্মং নিহতভাৰো, জাননা, উক্কোটনাতি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানি, ইদং পন দুক্খৰেদনন্তি।
Sāvatthiyaṃ chabbaggiye bhikkhū ārabbha ukkoṭanavatthusmiṃ paññattaṃ, sādhāraṇapaññatti, anāṇattikaṃ, dhammakamme vematikassa, adhammakamme dhammakammasaññino, vematikassa vā dukkaṭaṃ. Ubhayesu adhammakammasaññissa, ‘‘adhammena vā vaggena vā akammārahassa vā kammaṃ kata’’nti jānantassa, ummattakādīnañca anāpatti. Yathādhammaṃ nihatabhāvo, jānanā, ukkoṭanāti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
উক্কোটনসিক্খাপদৰণ্ণনা নিট্ঠিতা।
Ukkoṭanasikkhāpadavaṇṇanā niṭṭhitā.
৪. দুট্ঠুল্লসিক্খাপদৰণ্ণনা
4. Duṭṭhullasikkhāpadavaṇṇanā
চতুত্থে দুট্ঠুল্লন্তি সঙ্ঘাদিসেসং অধিপ্পেতং, তং যেন কেনচি উপাযেন ঞত্ৰা পটিচ্ছাদেন্তস্স পাচিত্তিযং। সচেপি ‘‘ন দানি নং কস্সচি ভিক্খুনো আরোচেস্সামী’’তি ধুরং নিক্খিপিত্ৰা পচ্ছা আরোচেতি, পাচিত্তিযং, আপজ্জিত্ৰাৰ আরোচেস্সতি। সচে পন এৰং ধুরং নিক্খিপিত্ৰা পটিচ্ছাদনত্থমেৰ অঞ্ঞস্স আরোচেতি, সোপি অঞ্ঞস্সাতি এতেনুপাযেন সমণসতম্পি আপজ্জতিযেৰ তাৰ, যাৰ কোটি ন ছিজ্জতি। কথং পন কোটি ছিজ্জতি? সচে হি আপন্নো একস্স আরোচেতি, সোপি অঞ্ঞস্স আরোচেতি, সো নিৰত্তিত্ৰা যেনস্স আরোচিতং, তস্সেৰ আরোচেতি, এৰং ততিযেন পুগ্গলেন দুতিযস্স আরোচিতে কোটি ছিন্না হোতি।
Catutthe duṭṭhullanti saṅghādisesaṃ adhippetaṃ, taṃ yena kenaci upāyena ñatvā paṭicchādentassa pācittiyaṃ. Sacepi ‘‘na dāni naṃ kassaci bhikkhuno ārocessāmī’’ti dhuraṃ nikkhipitvā pacchā āroceti, pācittiyaṃ, āpajjitvāva ārocessati. Sace pana evaṃ dhuraṃ nikkhipitvā paṭicchādanatthameva aññassa āroceti, sopi aññassāti etenupāyena samaṇasatampi āpajjatiyeva tāva, yāva koṭi na chijjati. Kathaṃ pana koṭi chijjati? Sace hi āpanno ekassa āroceti, sopi aññassa āroceti, so nivattitvā yenassa ārocitaṃ, tasseva āroceti, evaṃ tatiyena puggalena dutiyassa ārocite koṭi chinnā hoti.
সাৰত্থিযং অঞ্ঞতরং ভিক্খুং আরব্ভ দুট্ঠুল্লাপত্তিপটিচ্ছাদনৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, দুট্ঠুল্লায আপত্তিযা আদিপদে পাচিত্তিযং, ইতরেসু দ্ৰীসু দুক্কটং, অদুট্ঠুল্লায তিকদুক্কটং, অনুপসম্পন্নস্স দুট্ঠুল্লে ৰা অদুট্ঠুল্লে ৰা অজ্ঝাচারে দুক্কটমেৰ। ‘‘সঙ্ঘস্স ভণ্ডনাদীনি ভৰিস্সন্তী’’তি (পাচি॰ ৪০১) ৰা ‘‘অযং কক্খল়ো ফরুসো জীৰিতন্তরাযং ৰা ব্রহ্মচরিযন্তরাযং ৰা করিস্সতী’’তি ৰা অনারোচেন্তস্স, পতিরূপং ভিক্খুং অপস্সতো , ন ছাদেতুকামস্স, ‘‘পঞ্ঞাযিস্সতি সকেন কম্মেনা’’তি অনারোচেন্তস্স, উম্মত্তকাদীনঞ্চ অনাপত্তি। উপসম্পন্নস্স দুট্ঠুল্লাপত্তিজাননং, ‘‘পটিচ্ছাদেতুকামতায নারোচেস্সামী’’তি ধুরনিক্খেপোতি ইমানেত্থ দ্ৰে অঙ্গানি। সমুট্ঠানাদীনি সমনুভাসনসঅসানেৰাতি।
Sāvatthiyaṃ aññataraṃ bhikkhuṃ ārabbha duṭṭhullāpattipaṭicchādanavatthusmiṃ paññattaṃ, asādhāraṇapaññatti, anāṇattikaṃ, duṭṭhullāya āpattiyā ādipade pācittiyaṃ, itaresu dvīsu dukkaṭaṃ, aduṭṭhullāya tikadukkaṭaṃ, anupasampannassa duṭṭhulle vā aduṭṭhulle vā ajjhācāre dukkaṭameva. ‘‘Saṅghassa bhaṇḍanādīni bhavissantī’’ti (pāci. 401) vā ‘‘ayaṃ kakkhaḷo pharuso jīvitantarāyaṃ vā brahmacariyantarāyaṃ vā karissatī’’ti vā anārocentassa, patirūpaṃ bhikkhuṃ apassato , na chādetukāmassa, ‘‘paññāyissati sakena kammenā’’ti anārocentassa, ummattakādīnañca anāpatti. Upasampannassa duṭṭhullāpattijānanaṃ, ‘‘paṭicchādetukāmatāya nārocessāmī’’ti dhuranikkhepoti imānettha dve aṅgāni. Samuṭṭhānādīni samanubhāsanasaasānevāti.
দুট্ঠুল্লসিক্খাপদৰণ্ণনা নিট্ঠিতা।
Duṭṭhullasikkhāpadavaṇṇanā niṭṭhitā.
৫. ঊনৰীসতিৰস্সসিক্খাপদৰণ্ণনা
5. Ūnavīsativassasikkhāpadavaṇṇanā
পঞ্চমে ঊনৰীসতিৰস্সন্তি পটিসন্ধিগ্গহণতো পট্ঠায অপরিপুণ্ণৰীসতিৰস্সং। উপসম্পাদেয্যাতি উপজ্ঝাযো হুত্ৰা উপসম্পাদেয্য। সো চ পুগ্গলো অনুপসম্পন্নোতি জানন্তেনাপি অজানন্তেনাপি উপসম্পাদিতো অনুপসম্পন্নোৰ। সচে পন সো দসৰস্সচ্চযেন অঞ্ঞং উপসম্পাদেতি, তঞ্চে মুঞ্চিত্ৰা গণো পূরতি, সূপসম্পন্নো। সোপি যাৰ ন জানাতি, তাৰ তস্স নেৰ সগ্গন্তরাযো ন মোক্খন্তরাযো, ঞত্ৰা পন পুন উপসম্পজ্জিতব্বং। তে চ ভিক্খূ গারয্হাতি ঠপেত্ৰা উপজ্ঝাযং অৰসেসা গারয্হা হোন্তি, সব্বে দুক্কটং আপজ্জন্তি। ইদং তস্মিং পাচিত্তিযন্তি যো পন উপজ্ঝাযো হুত্ৰা উপসম্পাদেতি, তস্মিংযেৰ পুগ্গলে ইদং পাচিত্তিযং ৰেদিতব্বং। তস্মা যো ‘‘এৰং উপসম্পাদেস্সামী’’তি গণং ৰা আচরিযং ৰা পত্তং ৰা চীৰরং ৰা পরিযেসতি, সীমং ৰা সম্মন্নতি (পাচি॰ ৪০৪), উদকুক্খেপং ৰা পরিচ্ছিন্দতি, সো এতেসু সব্বকিচ্চেসু ঞত্তিযা, দ্ৰীসু চ কম্মৰাচাসু দুক্কটানি আপজ্জিত্ৰা কম্মৰাচাপরিযোসানে পাচিত্তিযং আপজ্জতি।
Pañcame ūnavīsativassanti paṭisandhiggahaṇato paṭṭhāya aparipuṇṇavīsativassaṃ. Upasampādeyyāti upajjhāyo hutvā upasampādeyya. So ca puggalo anupasampannoti jānantenāpi ajānantenāpi upasampādito anupasampannova. Sace pana so dasavassaccayena aññaṃ upasampādeti, tañce muñcitvā gaṇo pūrati, sūpasampanno. Sopi yāva na jānāti, tāva tassa neva saggantarāyo na mokkhantarāyo, ñatvā pana puna upasampajjitabbaṃ. Te ca bhikkhū gārayhāti ṭhapetvā upajjhāyaṃ avasesā gārayhā honti, sabbe dukkaṭaṃ āpajjanti. Idaṃ tasmiṃ pācittiyanti yo pana upajjhāyo hutvā upasampādeti, tasmiṃyeva puggale idaṃ pācittiyaṃ veditabbaṃ. Tasmā yo ‘‘evaṃ upasampādessāmī’’ti gaṇaṃ vā ācariyaṃ vā pattaṃ vā cīvaraṃ vā pariyesati, sīmaṃ vā sammannati (pāci. 404), udakukkhepaṃ vā paricchindati, so etesu sabbakiccesu ñattiyā, dvīsu ca kammavācāsu dukkaṭāni āpajjitvā kammavācāpariyosāne pācittiyaṃ āpajjati.
রাজগহে সম্বহুলে ভিক্খূ আরব্ভ ঊনৰীসতিৰস্সং উপসম্পাদনৰত্থুস্মিং পঞ্ঞত্তং, অসাধারণপঞ্ঞত্তি, অনাণত্তিকং, ঊনৰীসতিৰস্সে ৰেমতিকস্স, পরিপুণ্ণৰীসতিৰস্সে ঊনকসঞ্ঞিনো, ৰেমতিকস্স চ দুক্কটং। উভযত্থ পরিপুণ্ণসঞ্ঞিস্স, উম্মত্তকাদীনঞ্চ অনাপত্তি। ঊনৰীসতিৰস্সতা, ঊনকসঞ্ঞিতা, উপসম্পাদনন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানি, ইদং পন পণ্ণত্তিৰজ্জং, তিচিত্তং, তিৰেদনন্তি।
Rājagahe sambahule bhikkhū ārabbha ūnavīsativassaṃ upasampādanavatthusmiṃ paññattaṃ, asādhāraṇapaññatti, anāṇattikaṃ, ūnavīsativasse vematikassa, paripuṇṇavīsativasse ūnakasaññino, vematikassa ca dukkaṭaṃ. Ubhayattha paripuṇṇasaññissa, ummattakādīnañca anāpatti. Ūnavīsativassatā, ūnakasaññitā, upasampādananti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
ঊনৰীসতিৰস্সসিক্খাপদৰণ্ণনা নিট্ঠিতা।
Ūnavīsativassasikkhāpadavaṇṇanā niṭṭhitā.
৬. থেয্যসত্থসিক্খাপদৰণ্ণনা
6. Theyyasatthasikkhāpadavaṇṇanā
ছট্ঠে যে রাজানং ৰা ৰঞ্চেত্ৰা সুঙ্কং ৰা পরিহরিতুকামা চোরা কতকম্মা চেৰ অকতকম্মা চ মগ্গপ্পটিপন্না, তেসু ইধ থেয্যসত্থসঞ্ঞিনো তস্স থেয্যসত্থভাৰং ঞত্ৰা তেন সদ্ধিং সংৰিধায গচ্ছন্তস্স সংৰিধানে চ গমনে চ ওৰাদৰগ্গে ৰুত্তনযেন আপত্তিৰিনিচ্ছযো ৰেদিতব্বো।
Chaṭṭhe ye rājānaṃ vā vañcetvā suṅkaṃ vā pariharitukāmā corā katakammā ceva akatakammā ca maggappaṭipannā, tesu idha theyyasatthasaññino tassa theyyasatthabhāvaṃ ñatvā tena saddhiṃ saṃvidhāya gacchantassa saṃvidhāne ca gamane ca ovādavagge vuttanayena āpattivinicchayo veditabbo.
সাৰত্থিযং অঞ্ঞতরং ভিক্খুং আরব্ভ থেয্যসত্থেন সদ্ধিং সংৰিধায একদ্ধানমগ্গং পটিপজ্জনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, মনুস্সেসু অসংৰিদহন্তেসু সযমেৰ সংৰিদহিত্ৰা গচ্ছন্তস্স, থেয্যসত্থে ৰেমতিকস্স, অথেয্যসত্থে থেয্যসত্থসঞ্ঞিনো, ৰেমতিকস্স চ দুক্কটং। অথেয্যসত্থসঞ্ঞিস্স, অসংৰিদহিত্ৰা ৰা কালৰিসঙ্কেতেন ৰা, আপদাসু ৰা, গচ্ছন্তস্স, উম্মত্তকাদীনঞ্চ অনাপত্তি। থেয্যসত্থভাৰো, জাননং, সংৰিধানং, অৰিসঙ্কেতেন গমনন্তি ইমানেত্থ চত্তারি অঙ্গানি। থেয্যসত্থসমুট্ঠানং, কিরিযং, সঞ্ঞাৰিমোক্খং, সচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি।
Sāvatthiyaṃ aññataraṃ bhikkhuṃ ārabbha theyyasatthena saddhiṃ saṃvidhāya ekaddhānamaggaṃ paṭipajjanavatthusmiṃ paññattaṃ, sādhāraṇapaññatti, anāṇattikaṃ, manussesu asaṃvidahantesu sayameva saṃvidahitvā gacchantassa, theyyasatthe vematikassa, atheyyasatthe theyyasatthasaññino, vematikassa ca dukkaṭaṃ. Atheyyasatthasaññissa, asaṃvidahitvā vā kālavisaṅketena vā, āpadāsu vā, gacchantassa, ummattakādīnañca anāpatti. Theyyasatthabhāvo, jānanaṃ, saṃvidhānaṃ, avisaṅketena gamananti imānettha cattāri aṅgāni. Theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
থেয্যসত্থসিক্খাপদৰণ্ণনা নিট্ঠিতা।
Theyyasatthasikkhāpadavaṇṇanā niṭṭhitā.
৭. সংৰিধানসিক্খাপদৰণ্ণনা
7. Saṃvidhānasikkhāpadavaṇṇanā
সত্তমে সাৰত্থিযং অঞ্ঞতরং ভিক্খুং আরব্ভ মাতুগামেন সদ্ধিং একদ্ধানমগ্গং পটিপজ্জনৰত্থুস্মিং পঞ্ঞত্তং, সেসমেত্থ ভিক্খুনিযা সদ্ধিং সংৰিধানসিক্খাপদে ৰুত্তনযেনেৰ ৰেদিতব্বন্তি।
Sattame sāvatthiyaṃ aññataraṃ bhikkhuṃ ārabbha mātugāmena saddhiṃ ekaddhānamaggaṃ paṭipajjanavatthusmiṃ paññattaṃ, sesamettha bhikkhuniyā saddhiṃ saṃvidhānasikkhāpade vuttanayeneva veditabbanti.
সংৰিধানসিক্খাপদৰণ্ণনা নিট্ঠিতা।
Saṃvidhānasikkhāpadavaṇṇanā niṭṭhitā.
৮. অরিট্ঠসিক্খাপদৰণ্ণনা
8. Ariṭṭhasikkhāpadavaṇṇanā
অট্ঠমে সগ্গমোক্খানং অন্তরাযং করোন্তীতি অন্তরাযিকা, তে কম্মকিলেসৰিপাকউপৰাদপঞ্ঞত্তিৰীতিক্কমনৰসেন পঞ্চৰিধা। তেসু মুদুকানং অত্থরণাদীনং ফস্সো ৰিয ইত্থিসম্ফস্সোপি ৰট্টতীতি মেথুনৰীতিক্কমনে দোসং অদিস্ৰা পঞ্ঞত্তিৰীতিক্কমন্তরাযিকে সন্ধায ‘‘যেমে অন্তরাযিকা ধম্মা ৰুত্তা ভগৰতা, তে পটিসেৰতো নালং অন্তরাযাযা’’তি ৰুত্তং। অনেকপরিযাযেনাতি ‘‘অট্ঠিকঙ্কলূপমা কামা’’তিআদীহি (ম॰ নি॰ ২.৪২; পাচি॰ ৪১৭; চূল়নি॰ খগ্গৰিসাণসুত্তনিদ্দেস ১৪৭) নেকেহি কারণেহি। সো ভিক্খু ভিক্খূহীতি যে পস্সন্তি ৰা সুণন্তি ৰা, তেহি তিক্খত্তুং এৰং ৰত্তব্বো ‘‘মা আযস্মা এৰং অৰচ…পে॰… অলঞ্চ পন তে পটিসেৰতো অন্তরাযাযা’’তি। এৰং ৰুত্তে অপ্পটিনিস্সজ্জন্তস্স দুক্কটং, সুত্ৰা অৰদন্তানম্পি দুক্কটং। পুন সঙ্ঘমজ্ঝম্পি আকড্ঢিত্ৰা তথেৰ ৰত্তব্বো, তত্রাপি তস্স অপ্পটিনিস্সজ্জনে, ইতরেসঞ্চ অৰচনে দুক্কটমেৰ। এৰম্পি অপ্পটিনিস্সজ্জন্তো পুন ঞত্তিচতুত্থেন কম্মেন যাৰততিযং সমনুভাসিতব্বো, অথস্স অপ্পটিনিস্সজ্জতো পুন ঞত্তিযা চ দ্ৰীহি চ কম্মৰাচাহি দুক্কটং, কম্মৰাচাপরিযোসানে পাচিত্তিযং।
Aṭṭhame saggamokkhānaṃ antarāyaṃ karontīti antarāyikā, te kammakilesavipākaupavādapaññattivītikkamanavasena pañcavidhā. Tesu mudukānaṃ attharaṇādīnaṃ phasso viya itthisamphassopi vaṭṭatīti methunavītikkamane dosaṃ adisvā paññattivītikkamantarāyike sandhāya ‘‘yeme antarāyikā dhammā vuttā bhagavatā, te paṭisevato nālaṃ antarāyāyā’’ti vuttaṃ. Anekapariyāyenāti ‘‘aṭṭhikaṅkalūpamā kāmā’’tiādīhi (ma. ni. 2.42; pāci. 417; cūḷani. khaggavisāṇasuttaniddesa 147) nekehi kāraṇehi. So bhikkhu bhikkhūhīti ye passanti vā suṇanti vā, tehi tikkhattuṃ evaṃ vattabbo ‘‘mā āyasmā evaṃ avaca…pe… alañca pana te paṭisevato antarāyāyā’’ti. Evaṃ vutte appaṭinissajjantassa dukkaṭaṃ, sutvā avadantānampi dukkaṭaṃ. Puna saṅghamajjhampi ākaḍḍhitvā tatheva vattabbo, tatrāpi tassa appaṭinissajjane, itaresañca avacane dukkaṭameva. Evampi appaṭinissajjanto puna ñatticatutthena kammena yāvatatiyaṃ samanubhāsitabbo, athassa appaṭinissajjato puna ñattiyā ca dvīhi ca kammavācāhi dukkaṭaṃ, kammavācāpariyosāne pācittiyaṃ.
সাৰত্থিযং অরিট্ঠং আরব্ভ পাপিকায দিট্ঠিযা অপ্পটিনিস্সজ্জনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, তিকপাচিত্তিযং, অধম্মকম্মে তিকদুক্কটং। অসমনুভাসিযমানস্স , পটিনিস্সজ্জন্তস্স, উম্মত্তকাদীনঞ্চ অনাপত্তি। ধম্মকম্মতা, সমনুভাসনা, অপ্পটিনিস্সজ্জনন্তি ইমানেত্থ তীণি অঙ্গানি। সমুট্ঠানাদীনি সমনুভাসনসদিসানেৰাতি।
Sāvatthiyaṃ ariṭṭhaṃ ārabbha pāpikāya diṭṭhiyā appaṭinissajjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, adhammakamme tikadukkaṭaṃ. Asamanubhāsiyamānassa , paṭinissajjantassa, ummattakādīnañca anāpatti. Dhammakammatā, samanubhāsanā, appaṭinissajjananti imānettha tīṇi aṅgāni. Samuṭṭhānādīni samanubhāsanasadisānevāti.
অরিট্ঠসিক্খাপদৰণ্ণনা নিট্ঠিতা।
Ariṭṭhasikkhāpadavaṇṇanā niṭṭhitā.
৯. উক্খিত্তসম্ভোগসিক্খাপদৰণ্ণনা
9. Ukkhittasambhogasikkhāpadavaṇṇanā
নৰমে তথাৰাদিনাতি ‘‘তথাহং ভগৰতা ধম্ম’’ন্তিআদিৰাদিনা। অকতানুধম্মেনাতি অনুধম্মো ৰুচ্চতি আপত্তিযা অদস্সনে ৰা অপ্পটিকম্মে ৰা পাপিকায দিট্ঠিযা অপ্পটিনিস্সগ্গে ৰা ধম্মেন ৰিনযেন উক্খিত্তকস্স অনুলোমৰত্তং দিস্ৰা কতওসারণা, সো ওসারণসঙ্খাতো অনুধম্মো যস্স ন কতো, অযং অকতানুধম্মো নাম, তাদিসেন সদ্ধিন্তি অত্থো। সম্ভুঞ্জেয্য ৰাতি আমিসসম্ভোগং ৰা ধম্মসম্ভোগং ৰা করেয্য। সংৰসেয্য ৰাতি উপোসথাদিকং সঙ্ঘকম্মং করেয্য । সহ ৰা সেয্যং কপ্পেয্যাতি নানূপচারেপি একচ্ছন্নে নিপজ্জেয্য। তত্থ আমিসপরিভোগে একপ্পযোগেন বহূপি দদতো ৰা গণ্হতো ৰা একং পাচিত্তিযং, ৰিচ্ছিন্দনে সতি পযোগে পযোগে পাচিত্তিযং। ধম্মসম্ভোগে পদাদীহি উদ্দিসন্তস্স ৰা উদ্দিসাপেন্তস্স ৰা পদসোধম্মে ৰুত্তনযেন, সংৰাসে কম্মপরিযোসানৰসেন, সহসেয্যায একস্মিং নিপন্নে ইতরস্স নিপজ্জনপ্পযোগৰসেন আপত্তিপরিচ্ছেদো ৰেদিতব্বো।
Navame tathāvādināti ‘‘tathāhaṃ bhagavatā dhamma’’ntiādivādinā. Akatānudhammenāti anudhammo vuccati āpattiyā adassane vā appaṭikamme vā pāpikāya diṭṭhiyā appaṭinissagge vā dhammena vinayena ukkhittakassa anulomavattaṃ disvā kataosāraṇā, so osāraṇasaṅkhāto anudhammo yassa na kato, ayaṃ akatānudhammo nāma, tādisena saddhinti attho. Sambhuñjeyya vāti āmisasambhogaṃ vā dhammasambhogaṃ vā kareyya. Saṃvaseyya vāti uposathādikaṃ saṅghakammaṃ kareyya . Saha vā seyyaṃ kappeyyāti nānūpacārepi ekacchanne nipajjeyya. Tattha āmisaparibhoge ekappayogena bahūpi dadato vā gaṇhato vā ekaṃ pācittiyaṃ, vicchindane sati payoge payoge pācittiyaṃ. Dhammasambhoge padādīhi uddisantassa vā uddisāpentassa vā padasodhamme vuttanayena, saṃvāse kammapariyosānavasena, sahaseyyāya ekasmiṃ nipanne itarassa nipajjanappayogavasena āpattiparicchedo veditabbo.
সাৰত্থিযং ছব্বগ্গিযে আরব্ভ অরিট্ঠেন ভিক্খুনা সদ্ধিং সম্ভুঞ্জনৰত্থুস্মিং পঞ্ঞত্তং, সাধারণপঞ্ঞত্তি, অনাণত্তিকং, উক্খিত্তকে ৰেমতিকস্স, অনুক্খিত্তকে উক্খিত্তকসঞ্ঞিনো চেৰ ৰেমতিকস্স চ দুক্কটং। উভোসু অনুক্খিত্তকসঞ্ঞিস্স, ‘‘ওসারিতো’’তি ৰা ‘‘তং দিট্ঠিং পটিনিস্সট্ঠো’’তি ৰা জানন্তস্স, উম্মত্তকাদীনঞ্চ অনাপত্তি। অকতানুধম্মতা, জাননা, সম্ভোগাদিকরণন্তি ইমানেত্থ তীণি অঙ্গানি। সমুট্ঠানাদীনি অদিন্নাদানসদিসানি, ইদং পন পণ্ণত্তিৰজ্জং, তিচিত্তং, তিৰেদনন্তি।
Sāvatthiyaṃ chabbaggiye ārabbha ariṭṭhena bhikkhunā saddhiṃ sambhuñjanavatthusmiṃ paññattaṃ, sādhāraṇapaññatti, anāṇattikaṃ, ukkhittake vematikassa, anukkhittake ukkhittakasaññino ceva vematikassa ca dukkaṭaṃ. Ubhosu anukkhittakasaññissa, ‘‘osārito’’ti vā ‘‘taṃ diṭṭhiṃ paṭinissaṭṭho’’ti vā jānantassa, ummattakādīnañca anāpatti. Akatānudhammatā, jānanā, sambhogādikaraṇanti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
উক্খিত্তসম্ভোগসিক্খাপদৰণ্ণনা নিট্ঠিতা।
Ukkhittasambhogasikkhāpadavaṇṇanā niṭṭhitā.
১০. কণ্টকসিক্খাপদৰণ্ণনা
10. Kaṇṭakasikkhāpadavaṇṇanā
দসমে সমণুদ্দেসোতি সামণেরো। চরাতি গচ্ছ। পিরেতি পর অমামক। ৰিনস্সাতি নস্স , যত্থ তং ন পস্সাম, তত্থ গচ্ছাতি ৰুত্তং হোতি। তথানাসিতন্তিএত্থ সংৰাসনাসনা লিঙ্গনাসনা দণ্ডকম্মনাসনাতি তিস্সো নাসনা। তত্থ আপত্তিযা অদস্সনাদীসু উক্খেপনা সংৰাসনাসনা নাম। দূসকো নাসেতব্বো (পারা॰ ৬৬), মেত্তিযং ভিক্খুনিং নাসেথাতি (চূল়ৰ॰ ১৯৩; পারা॰ ৩৮৪) অযং লিঙ্গনাসনা নাম। ‘‘অজ্জতগ্গে তে, আৰুসো সমণুদ্দেস, ন চেৰ সো ভগৰা সত্থা অপদিসিতব্বো’’তি (পাচি॰ ৪২৯) অযং দণ্ডকম্মনাসনা নাম, অযং ইধাধিপ্পেতা। তেন ৰুত্তং ‘‘তথানাসিত’’ন্তি। উপলাপেয্যাতি ‘‘পত্তং ৰা চীৰরং ৰা উদ্দেসং ৰা পরিপুচ্ছং ৰা দস্সামী’’তি সঙ্গণ্হেয্য। উপট্ঠাপেয্যাতি চুণ্ণমত্তিকাদীনি সাদিযন্তো তেন অত্তনো উপট্ঠানং কারাপেয্য। সম্ভোগসহসেয্যা অনন্তরসিক্খাপদে ৰুত্তনযা এৰ, তস্মা আপত্তিপরিচ্ছেদোপেত্থ তস্মিং ৰুত্তনযেনেৰ ৰেদিতব্বো।
Dasame samaṇuddesoti sāmaṇero. Carāti gaccha. Pireti para amāmaka. Vinassāti nassa , yattha taṃ na passāma, tattha gacchāti vuttaṃ hoti. Tathānāsitantiettha saṃvāsanāsanā liṅganāsanā daṇḍakammanāsanāti tisso nāsanā. Tattha āpattiyā adassanādīsu ukkhepanā saṃvāsanāsanā nāma. Dūsako nāsetabbo (pārā. 66), mettiyaṃ bhikkhuniṃ nāsethāti (cūḷava. 193; pārā. 384) ayaṃ liṅganāsanā nāma. ‘‘Ajjatagge te, āvuso samaṇuddesa, na ceva so bhagavā satthā apadisitabbo’’ti (pāci. 429) ayaṃ daṇḍakammanāsanā nāma, ayaṃ idhādhippetā. Tena vuttaṃ ‘‘tathānāsita’’nti. Upalāpeyyāti ‘‘pattaṃ vā cīvaraṃ vā uddesaṃ vā paripucchaṃ vā dassāmī’’ti saṅgaṇheyya. Upaṭṭhāpeyyāti cuṇṇamattikādīni sādiyanto tena attano upaṭṭhānaṃ kārāpeyya. Sambhogasahaseyyā anantarasikkhāpade vuttanayā eva, tasmā āpattiparicchedopettha tasmiṃ vuttanayeneva veditabbo.
সাৰত্থিযং ছব্বগ্গিযে ভিক্খূ আরব্ভ কণ্টকসমণুদ্দেসউপলাপনৰত্থুস্মিং পঞ্ঞত্তং, সেসং অরিট্ঠসিক্খাপদে ৰুত্তসদিসমেৰাতি।
Sāvatthiyaṃ chabbaggiye bhikkhū ārabbha kaṇṭakasamaṇuddesaupalāpanavatthusmiṃ paññattaṃ, sesaṃ ariṭṭhasikkhāpade vuttasadisamevāti.
কণ্টকসিক্খাপদৰণ্ণনা নিট্ঠিতা।
Kaṇṭakasikkhāpadavaṇṇanā niṭṭhitā.
সপ্পাণকৰগ্গো সত্তমো।
Sappāṇakavaggo sattamo.
