| Library / Tipiṭaka / д̇ибидага • Tipiṭaka / д̣̇взмаад̇игаабаал̣и • Dvemātikāpāḷi |
7. саббаан̣агаваг̇г̇о
7. Sappāṇakavaggo
1. сан̃жижжасигкаабад̣̇аван̣н̣анаа
1. Sañciccasikkhāpadavaṇṇanā
саббаан̣агаваг̇г̇асса батамз баан̣од̇и д̇иражчаанаг̇ад̇абаан̣о ад̇хиббзд̇о. д̇ам̣ куд̣̇д̣̇агамби маханд̇амби маарзнд̇асса баажид̇д̇ияамзва, маханд̇з бана убаггамамаханд̇ад̇ааяа агусалам̣ маханд̇ам̣ ход̇и.
Sappāṇakavaggassa paṭhame pāṇoti tiracchānagatapāṇo adhippeto. Taṃ khuddakampi mahantampi mārentassa pācittiyameva, mahante pana upakkamamahantatāya akusalaṃ mahantaṃ hoti.
саавад̇т̇ияам̣ уд̣̇ааяид̇т̇зрам̣ аараб̣бха баан̣ам̣ ж̇ийвид̇аа воробанавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, саан̣ад̇д̇игам̣, баан̣з взмад̇игасса, абаан̣з баан̣асан̃н̃ино, взмад̇игасса ваа д̣̇уггадам̣ . абаан̣асан̃н̃исса, асан̃жижжа, аж̇аананд̇асса, намаран̣аад̇хиббааяасса, уммад̇д̇агаад̣̇ийнан̃жа анаабад̇д̇и. сзсам̣ мануссавиг̇г̇ахз вуд̇д̇анаяамзваад̇и.
Sāvatthiyaṃ udāyittheraṃ ārabbha pāṇaṃ jīvitā voropanavatthusmiṃ paññattaṃ, sādhāraṇapaññatti, sāṇattikaṃ, pāṇe vematikassa, apāṇe pāṇasaññino, vematikassa vā dukkaṭaṃ . Apāṇasaññissa, asañcicca, ajānantassa, namaraṇādhippāyassa, ummattakādīnañca anāpatti. Sesaṃ manussaviggahe vuttanayamevāti.
сан̃жижжасигкаабад̣̇аван̣н̣анаа нидтид̇аа.
Sañciccasikkhāpadavaṇṇanā niṭṭhitā.
2. саббаан̣агасигкаабад̣̇аван̣н̣анаа
2. Sappāṇakasikkhāpadavaṇṇanā
д̣̇уд̇ияз саббаан̣аганд̇и яз баан̣агаа барибхог̇зна маранд̇и, д̇зхи саббаан̣агам̣, д̇аад̣̇исан̃хи ж̇аанам̣ барибхун̃ж̇анд̇асса баяог̇з баяог̇з баажид̇д̇ияам̣.
Dutiye sappāṇakanti ye pāṇakā paribhogena maranti, tehi sappāṇakaṃ, tādisañhi jānaṃ paribhuñjantassa payoge payoge pācittiyaṃ.
саавад̇т̇ияам̣ чаб̣б̣аг̇г̇ияз аараб̣бха ж̇аанам̣ саббаан̣агам̣ уд̣̇агам̣ барибхун̃ж̇анавад̇т̇усмим̣ бан̃н̃ад̇д̇ам̣, сзсамзд̇т̇а син̃жанасигкаабад̣̇з вуд̇д̇анаязнзва взд̣̇ид̇аб̣б̣анд̇и.
Sāvatthiyaṃ chabbaggiye ārabbha jānaṃ sappāṇakaṃ udakaṃ paribhuñjanavatthusmiṃ paññattaṃ, sesamettha siñcanasikkhāpade vuttanayeneva veditabbanti.
саббаан̣агасигкаабад̣̇аван̣н̣анаа нидтид̇аа.
Sappāṇakasikkhāpadavaṇṇanā niṭṭhitā.
3. уггоданасигкаабад̣̇аван̣н̣анаа
3. Ukkoṭanasikkhāpadavaṇṇanā
д̇ад̇ияз яат̇аад̇хамманд̇и яо яасса ад̇хигаран̣асса вуубасамааяа д̇хаммо вуд̇д̇о, д̇знзва д̇хаммзна. нихад̇аад̇хигаран̣анд̇и нихад̇ам̣ ад̇хигаран̣ам̣, самат̇агканд̇хагз (жуул̣ава. 185 аад̣̇аяо) сад̇т̇аараа вуд̇д̇ад̇хаммзнзва вуубасамид̇анд̇и ад̇т̇о, вуубасамананаяам̣ банасса ад̇хигаран̣асамат̇зсу д̣̇ассаяиссаама. бунагаммааяа уггодзяяаад̇и д̇асса д̇асса бхигкуно санд̇игам̣ г̇анд̇ваа ‘‘агад̇ам̣ гамма’’нд̇иаад̣̇ийни (баажи. 394) вад̣̇анд̇о бунагаран̣ад̇т̇ааяа ужжаалзяяа. яат̇аатид̇абхаавзна бад̇идтаад̇ум̣ на д̣̇ад̣̇зяяа, д̇ассзвам̣ гаронд̇асса баажид̇д̇ияам̣. яам̣ бана д̇хаммзна ад̇хигаран̣ам̣ нихад̇ам̣ , д̇ам̣ сунихад̇амзва. сажз виббагад̇з гаммз бадиггосад̇и, д̇ам̣ сан̃н̃аабзд̇ваа гаад̇аб̣б̣ам̣. ид̇арат̇аа гамман̃жа губбад̇и, гаарагаанан̃жа аабад̇д̇и.
Tatiye yathādhammanti yo yassa adhikaraṇassa vūpasamāya dhammo vutto, teneva dhammena. Nihatādhikaraṇanti nihataṃ adhikaraṇaṃ, samathakkhandhake (cūḷava. 185 ādayo) satthārā vuttadhammeneva vūpasamitanti attho, vūpasamananayaṃ panassa adhikaraṇasamathesu dassayissāma. Punakammāya ukkoṭeyyāti tassa tassa bhikkhuno santikaṃ gantvā ‘‘akataṃ kamma’’ntiādīni (pāci. 394) vadanto punakaraṇatthāya uccāleyya. Yathāṭhitabhāvena patiṭṭhātuṃ na dadeyya, tassevaṃ karontassa pācittiyaṃ. Yaṃ pana dhammena adhikaraṇaṃ nihataṃ , taṃ sunihatameva. Sace vippakate kamme paṭikkosati, taṃ saññāpetvā kātabbaṃ. Itarathā kammañca kuppati, kārakānañca āpatti.
саавад̇т̇ияам̣ чаб̣б̣аг̇г̇ияз бхигкуу аараб̣бха уггоданавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇хаммагаммз взмад̇игасса, ад̇хаммагаммз д̇хаммагаммасан̃н̃ино, взмад̇игасса ваа д̣̇уггадам̣. убхаязсу ад̇хаммагаммасан̃н̃исса, ‘‘ад̇хаммзна ваа ваг̇г̇зна ваа агаммаарахасса ваа гаммам̣ гад̇а’’нд̇и ж̇аананд̇асса, уммад̇д̇агаад̣̇ийнан̃жа анаабад̇д̇и. яат̇аад̇хаммам̣ нихад̇абхааво, ж̇аананаа, уггоданаад̇и имаанзд̇т̇а д̇ийн̣и ан̇г̇аани. самудтаанаад̣̇ийни ад̣̇иннаад̣̇аанасад̣̇исаани, ид̣̇ам̣ бана д̣̇угкавзд̣̇ананд̇и.
Sāvatthiyaṃ chabbaggiye bhikkhū ārabbha ukkoṭanavatthusmiṃ paññattaṃ, sādhāraṇapaññatti, anāṇattikaṃ, dhammakamme vematikassa, adhammakamme dhammakammasaññino, vematikassa vā dukkaṭaṃ. Ubhayesu adhammakammasaññissa, ‘‘adhammena vā vaggena vā akammārahassa vā kammaṃ kata’’nti jānantassa, ummattakādīnañca anāpatti. Yathādhammaṃ nihatabhāvo, jānanā, ukkoṭanāti imānettha tīṇi aṅgāni. Samuṭṭhānādīni adinnādānasadisāni, idaṃ pana dukkhavedananti.
уггоданасигкаабад̣̇аван̣н̣анаа нидтид̇аа.
Ukkoṭanasikkhāpadavaṇṇanā niṭṭhitā.
4. д̣̇удтулласигкаабад̣̇аван̣н̣анаа
4. Duṭṭhullasikkhāpadavaṇṇanā
жад̇уд̇т̇з д̣̇удтулланд̇и сан̇гхаад̣̇исзсам̣ ад̇хиббзд̇ам̣, д̇ам̣ язна гзнажи убааязна н̃ад̇ваа бадижчаад̣̇знд̇асса баажид̇д̇ияам̣. сажзби ‘‘на д̣̇аани нам̣ гассажи бхигкуно аарожзссаамий’’д̇и д̇хурам̣ нигкибид̇ваа бажчаа аарожзд̇и, баажид̇д̇ияам̣, аабаж̇ж̇ид̇ваава аарожзссад̇и. сажз бана звам̣ д̇хурам̣ нигкибид̇ваа бадижчаад̣̇анад̇т̇амзва ан̃н̃асса аарожзд̇и, соби ан̃н̃ассаад̇и зд̇знубааязна саман̣асад̇амби аабаж̇ж̇ад̇иязва д̇аава, яаава годи на чиж̇ж̇ад̇и. гат̇ам̣ бана годи чиж̇ж̇ад̇и? сажз хи аабанно згасса аарожзд̇и, соби ан̃н̃асса аарожзд̇и, со нивад̇д̇ид̇ваа язнасса аарожид̇ам̣, д̇ассзва аарожзд̇и, звам̣ д̇ад̇иязна буг̇г̇алзна д̣̇уд̇ияасса аарожид̇з годи чиннаа ход̇и.
Catutthe duṭṭhullanti saṅghādisesaṃ adhippetaṃ, taṃ yena kenaci upāyena ñatvā paṭicchādentassa pācittiyaṃ. Sacepi ‘‘na dāni naṃ kassaci bhikkhuno ārocessāmī’’ti dhuraṃ nikkhipitvā pacchā āroceti, pācittiyaṃ, āpajjitvāva ārocessati. Sace pana evaṃ dhuraṃ nikkhipitvā paṭicchādanatthameva aññassa āroceti, sopi aññassāti etenupāyena samaṇasatampi āpajjatiyeva tāva, yāva koṭi na chijjati. Kathaṃ pana koṭi chijjati? Sace hi āpanno ekassa āroceti, sopi aññassa āroceti, so nivattitvā yenassa ārocitaṃ, tasseva āroceti, evaṃ tatiyena puggalena dutiyassa ārocite koṭi chinnā hoti.
саавад̇т̇ияам̣ ан̃н̃ад̇арам̣ бхигкум̣ аараб̣бха д̣̇удтуллаабад̇д̇ибадижчаад̣̇анавад̇т̇усмим̣ бан̃н̃ад̇д̇ам̣, асаад̇хааран̣абан̃н̃ад̇д̇и, анаан̣ад̇д̇игам̣, д̣̇удтуллааяа аабад̇д̇ияаа аад̣̇ибад̣̇з баажид̇д̇ияам̣, ид̇арзсу д̣̇вийсу д̣̇уггадам̣, ад̣̇удтуллааяа д̇игад̣̇уггадам̣, анубасамбаннасса д̣̇удтуллз ваа ад̣̇удтуллз ваа аж̇жхаажаарз д̣̇уггадамзва. ‘‘сан̇гхасса бхан̣д̣анаад̣̇ийни бхависсанд̇ий’’д̇и (баажи. 401) ваа ‘‘аяам̣ гагкал̣о парусо ж̇ийвид̇анд̇арааяам̣ ваа б̣рахмажарияанд̇арааяам̣ ваа гариссад̇ий’’д̇и ваа анаарожзнд̇асса, бад̇ируубам̣ бхигкум̣ абассад̇о , на чаад̣̇зд̇угаамасса, ‘‘бан̃н̃ааяиссад̇и сагзна гаммзнаа’’д̇и анаарожзнд̇асса, уммад̇д̇агаад̣̇ийнан̃жа анаабад̇д̇и. убасамбаннасса д̣̇удтуллаабад̇д̇иж̇аананам̣, ‘‘бадижчаад̣̇зд̇угаамад̇ааяа наарожзссаамий’’д̇и д̇хуранигкзбод̇и имаанзд̇т̇а д̣̇вз ан̇г̇аани. самудтаанаад̣̇ийни саманубхаасанасаасаанзваад̇и.
Sāvatthiyaṃ aññataraṃ bhikkhuṃ ārabbha duṭṭhullāpattipaṭicchādanavatthusmiṃ paññattaṃ, asādhāraṇapaññatti, anāṇattikaṃ, duṭṭhullāya āpattiyā ādipade pācittiyaṃ, itaresu dvīsu dukkaṭaṃ, aduṭṭhullāya tikadukkaṭaṃ, anupasampannassa duṭṭhulle vā aduṭṭhulle vā ajjhācāre dukkaṭameva. ‘‘Saṅghassa bhaṇḍanādīni bhavissantī’’ti (pāci. 401) vā ‘‘ayaṃ kakkhaḷo pharuso jīvitantarāyaṃ vā brahmacariyantarāyaṃ vā karissatī’’ti vā anārocentassa, patirūpaṃ bhikkhuṃ apassato , na chādetukāmassa, ‘‘paññāyissati sakena kammenā’’ti anārocentassa, ummattakādīnañca anāpatti. Upasampannassa duṭṭhullāpattijānanaṃ, ‘‘paṭicchādetukāmatāya nārocessāmī’’ti dhuranikkhepoti imānettha dve aṅgāni. Samuṭṭhānādīni samanubhāsanasaasānevāti.
д̣̇удтулласигкаабад̣̇аван̣н̣анаа нидтид̇аа.
Duṭṭhullasikkhāpadavaṇṇanā niṭṭhitā.
5. уунавийсад̇ивассасигкаабад̣̇аван̣н̣анаа
5. Ūnavīsativassasikkhāpadavaṇṇanā
бан̃жамз уунавийсад̇ивассанд̇и бадисанд̇хиг̇г̇ахан̣ад̇о бадтааяа абарибун̣н̣авийсад̇ивассам̣. убасамбаад̣̇зяяаад̇и убаж̇жхааяо худ̇ваа убасамбаад̣̇зяяа. со жа буг̇г̇ало анубасамбаннод̇и ж̇аананд̇знааби аж̇аананд̇знааби убасамбаад̣̇ид̇о анубасамбаннова. сажз бана со д̣̇асавассажжаязна ан̃н̃ам̣ убасамбаад̣̇зд̇и, д̇ан̃жз мун̃жид̇ваа г̇ан̣о буурад̇и, суубасамбанно. соби яаава на ж̇аанаад̇и, д̇аава д̇асса нзва саг̇г̇анд̇арааяо на могканд̇арааяо, н̃ад̇ваа бана буна убасамбаж̇ж̇ид̇аб̣б̣ам̣. д̇з жа бхигкуу г̇аараяхаад̇и табзд̇ваа убаж̇жхааяам̣ авасзсаа г̇аараяхаа хонд̇и, саб̣б̣з д̣̇уггадам̣ аабаж̇ж̇анд̇и. ид̣̇ам̣ д̇асмим̣ баажид̇д̇ияанд̇и яо бана убаж̇жхааяо худ̇ваа убасамбаад̣̇зд̇и, д̇асмим̣язва буг̇г̇алз ид̣̇ам̣ баажид̇д̇ияам̣ взд̣̇ид̇аб̣б̣ам̣. д̇асмаа яо ‘‘звам̣ убасамбаад̣̇зссаамий’’д̇и г̇ан̣ам̣ ваа аажарияам̣ ваа бад̇д̇ам̣ ваа жийварам̣ ваа бариязсад̇и, сиймам̣ ваа самманнад̇и (баажи. 404), уд̣̇агугкзбам̣ ваа барижчинд̣̇ад̇и, со зд̇зсу саб̣б̣агижжзсу н̃ад̇д̇ияаа, д̣̇вийсу жа гаммаваажаасу д̣̇уггадаани аабаж̇ж̇ид̇ваа гаммаваажаабарияосаанз баажид̇д̇ияам̣ аабаж̇ж̇ад̇и.
Pañcame ūnavīsativassanti paṭisandhiggahaṇato paṭṭhāya aparipuṇṇavīsativassaṃ. Upasampādeyyāti upajjhāyo hutvā upasampādeyya. So ca puggalo anupasampannoti jānantenāpi ajānantenāpi upasampādito anupasampannova. Sace pana so dasavassaccayena aññaṃ upasampādeti, tañce muñcitvā gaṇo pūrati, sūpasampanno. Sopi yāva na jānāti, tāva tassa neva saggantarāyo na mokkhantarāyo, ñatvā pana puna upasampajjitabbaṃ. Te ca bhikkhū gārayhāti ṭhapetvā upajjhāyaṃ avasesā gārayhā honti, sabbe dukkaṭaṃ āpajjanti. Idaṃ tasmiṃ pācittiyanti yo pana upajjhāyo hutvā upasampādeti, tasmiṃyeva puggale idaṃ pācittiyaṃ veditabbaṃ. Tasmā yo ‘‘evaṃ upasampādessāmī’’ti gaṇaṃ vā ācariyaṃ vā pattaṃ vā cīvaraṃ vā pariyesati, sīmaṃ vā sammannati (pāci. 404), udakukkhepaṃ vā paricchindati, so etesu sabbakiccesu ñattiyā, dvīsu ca kammavācāsu dukkaṭāni āpajjitvā kammavācāpariyosāne pācittiyaṃ āpajjati.
рааж̇аг̇ахз самб̣ахулз бхигкуу аараб̣бха уунавийсад̇ивассам̣ убасамбаад̣̇анавад̇т̇усмим̣ бан̃н̃ад̇д̇ам̣, асаад̇хааран̣абан̃н̃ад̇д̇и, анаан̣ад̇д̇игам̣, уунавийсад̇ивассз взмад̇игасса, барибун̣н̣авийсад̇ивассз уунагасан̃н̃ино, взмад̇игасса жа д̣̇уггадам̣. убхаяад̇т̇а барибун̣н̣асан̃н̃исса, уммад̇д̇агаад̣̇ийнан̃жа анаабад̇д̇и. уунавийсад̇ивассад̇аа, уунагасан̃н̃ид̇аа, убасамбаад̣̇ананд̇и имаанзд̇т̇а д̇ийн̣и ан̇г̇аани. самудтаанаад̣̇ийни ад̣̇иннаад̣̇аанасад̣̇исаани, ид̣̇ам̣ бана бан̣н̣ад̇д̇иваж̇ж̇ам̣, д̇ижид̇д̇ам̣, д̇ивзд̣̇ананд̇и.
Rājagahe sambahule bhikkhū ārabbha ūnavīsativassaṃ upasampādanavatthusmiṃ paññattaṃ, asādhāraṇapaññatti, anāṇattikaṃ, ūnavīsativasse vematikassa, paripuṇṇavīsativasse ūnakasaññino, vematikassa ca dukkaṭaṃ. Ubhayattha paripuṇṇasaññissa, ummattakādīnañca anāpatti. Ūnavīsativassatā, ūnakasaññitā, upasampādananti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
уунавийсад̇ивассасигкаабад̣̇аван̣н̣анаа нидтид̇аа.
Ūnavīsativassasikkhāpadavaṇṇanā niṭṭhitā.
6. т̇зяяасад̇т̇асигкаабад̣̇аван̣н̣анаа
6. Theyyasatthasikkhāpadavaṇṇanā
чадтз яз рааж̇аанам̣ ваа ван̃жзд̇ваа сун̇гам̣ ваа барихарид̇угаамаа жораа гад̇агаммаа жзва агад̇агаммаа жа маг̇г̇аббадибаннаа, д̇зсу ид̇ха т̇зяяасад̇т̇асан̃н̃ино д̇асса т̇зяяасад̇т̇абхаавам̣ н̃ад̇ваа д̇зна сад̣̇д̇хим̣ сам̣вид̇хааяа г̇ажчанд̇асса сам̣вид̇хаанз жа г̇аманз жа оваад̣̇аваг̇г̇з вуд̇д̇анаязна аабад̇д̇ивинижчаяо взд̣̇ид̇аб̣б̣о.
Chaṭṭhe ye rājānaṃ vā vañcetvā suṅkaṃ vā pariharitukāmā corā katakammā ceva akatakammā ca maggappaṭipannā, tesu idha theyyasatthasaññino tassa theyyasatthabhāvaṃ ñatvā tena saddhiṃ saṃvidhāya gacchantassa saṃvidhāne ca gamane ca ovādavagge vuttanayena āpattivinicchayo veditabbo.
саавад̇т̇ияам̣ ан̃н̃ад̇арам̣ бхигкум̣ аараб̣бха т̇зяяасад̇т̇зна сад̣̇д̇хим̣ сам̣вид̇хааяа згад̣̇д̇хаанамаг̇г̇ам̣ бадибаж̇ж̇анавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, мануссзсу асам̣вид̣̇аханд̇зсу саяамзва сам̣вид̣̇ахид̇ваа г̇ажчанд̇асса, т̇зяяасад̇т̇з взмад̇игасса, ат̇зяяасад̇т̇з т̇зяяасад̇т̇асан̃н̃ино, взмад̇игасса жа д̣̇уггадам̣. ат̇зяяасад̇т̇асан̃н̃исса, асам̣вид̣̇ахид̇ваа ваа гаалависан̇гзд̇зна ваа, аабад̣̇аасу ваа, г̇ажчанд̇асса, уммад̇д̇агаад̣̇ийнан̃жа анаабад̇д̇и. т̇зяяасад̇т̇абхааво, ж̇аананам̣, сам̣вид̇хаанам̣, ависан̇гзд̇зна г̇амананд̇и имаанзд̇т̇а жад̇д̇аари ан̇г̇аани. т̇зяяасад̇т̇асамудтаанам̣, гирияам̣, сан̃н̃аавимогкам̣, сажид̇д̇агам̣, бан̣н̣ад̇д̇иваж̇ж̇ам̣, гааяагаммам̣, важийгаммам̣, д̇ижид̇д̇ам̣, д̇ивзд̣̇ананд̇и.
Sāvatthiyaṃ aññataraṃ bhikkhuṃ ārabbha theyyasatthena saddhiṃ saṃvidhāya ekaddhānamaggaṃ paṭipajjanavatthusmiṃ paññattaṃ, sādhāraṇapaññatti, anāṇattikaṃ, manussesu asaṃvidahantesu sayameva saṃvidahitvā gacchantassa, theyyasatthe vematikassa, atheyyasatthe theyyasatthasaññino, vematikassa ca dukkaṭaṃ. Atheyyasatthasaññissa, asaṃvidahitvā vā kālavisaṅketena vā, āpadāsu vā, gacchantassa, ummattakādīnañca anāpatti. Theyyasatthabhāvo, jānanaṃ, saṃvidhānaṃ, avisaṅketena gamananti imānettha cattāri aṅgāni. Theyyasatthasamuṭṭhānaṃ, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
т̇зяяасад̇т̇асигкаабад̣̇аван̣н̣анаа нидтид̇аа.
Theyyasatthasikkhāpadavaṇṇanā niṭṭhitā.
7. сам̣вид̇хаанасигкаабад̣̇аван̣н̣анаа
7. Saṃvidhānasikkhāpadavaṇṇanā
сад̇д̇амз саавад̇т̇ияам̣ ан̃н̃ад̇арам̣ бхигкум̣ аараб̣бха маад̇уг̇аамзна сад̣̇д̇хим̣ згад̣̇д̇хаанамаг̇г̇ам̣ бадибаж̇ж̇анавад̇т̇усмим̣ бан̃н̃ад̇д̇ам̣, сзсамзд̇т̇а бхигкунияаа сад̣̇д̇хим̣ сам̣вид̇хаанасигкаабад̣̇з вуд̇д̇анаязнзва взд̣̇ид̇аб̣б̣анд̇и.
Sattame sāvatthiyaṃ aññataraṃ bhikkhuṃ ārabbha mātugāmena saddhiṃ ekaddhānamaggaṃ paṭipajjanavatthusmiṃ paññattaṃ, sesamettha bhikkhuniyā saddhiṃ saṃvidhānasikkhāpade vuttanayeneva veditabbanti.
сам̣вид̇хаанасигкаабад̣̇аван̣н̣анаа нидтид̇аа.
Saṃvidhānasikkhāpadavaṇṇanā niṭṭhitā.
8. аридтасигкаабад̣̇аван̣н̣анаа
8. Ariṭṭhasikkhāpadavaṇṇanā
адтамз саг̇г̇амогкаанам̣ анд̇арааяам̣ гаронд̇ийд̇и анд̇арааяигаа, д̇з гаммагилзсавибаагаубаваад̣̇абан̃н̃ад̇д̇ивийд̇иггаманавасзна бан̃жавид̇хаа. д̇зсу муд̣̇угаанам̣ ад̇т̇аран̣аад̣̇ийнам̣ пассо вияа ид̇т̇исампассоби ваддад̇ийд̇и мзт̇унавийд̇иггаманз д̣̇осам̣ ад̣̇исваа бан̃н̃ад̇д̇ивийд̇иггаманд̇арааяигз санд̇хааяа ‘‘язмз анд̇арааяигаа д̇хаммаа вуд̇д̇аа бхаг̇авад̇аа, д̇з бадисзвад̇о наалам̣ анд̇арааяааяаа’’д̇и вуд̇д̇ам̣. анзгабарияааязнаад̇и ‘‘адтиган̇галуубамаа гаамаа’’д̇иаад̣̇ийхи (ма. ни. 2.42; баажи. 417; жуул̣ани. каг̇г̇ависаан̣асуд̇д̇анид̣̇д̣̇зса 147) нзгзхи гааран̣зхи. со бхигку бхигкуухийд̇и яз бассанд̇и ваа сун̣анд̇и ваа, д̇зхи д̇игкад̇д̇ум̣ звам̣ вад̇д̇аб̣б̣о ‘‘маа ааяасмаа звам̣ аважа…бз… алан̃жа бана д̇з бадисзвад̇о анд̇арааяааяаа’’д̇и. звам̣ вуд̇д̇з аббадиниссаж̇ж̇анд̇асса д̣̇уггадам̣, суд̇ваа авад̣̇анд̇аанамби д̣̇уггадам̣. буна сан̇гхамаж̇жхамби аагад̣дхид̇ваа д̇ат̇зва вад̇д̇аб̣б̣о, д̇ад̇рааби д̇асса аббадиниссаж̇ж̇анз, ид̇арзсан̃жа аважанз д̣̇уггадамзва. звамби аббадиниссаж̇ж̇анд̇о буна н̃ад̇д̇ижад̇уд̇т̇зна гаммзна яаавад̇ад̇ияам̣ саманубхаасид̇аб̣б̣о, ат̇асса аббадиниссаж̇ж̇ад̇о буна н̃ад̇д̇ияаа жа д̣̇вийхи жа гаммаваажаахи д̣̇уггадам̣, гаммаваажаабарияосаанз баажид̇д̇ияам̣.
Aṭṭhame saggamokkhānaṃ antarāyaṃ karontīti antarāyikā, te kammakilesavipākaupavādapaññattivītikkamanavasena pañcavidhā. Tesu mudukānaṃ attharaṇādīnaṃ phasso viya itthisamphassopi vaṭṭatīti methunavītikkamane dosaṃ adisvā paññattivītikkamantarāyike sandhāya ‘‘yeme antarāyikā dhammā vuttā bhagavatā, te paṭisevato nālaṃ antarāyāyā’’ti vuttaṃ. Anekapariyāyenāti ‘‘aṭṭhikaṅkalūpamā kāmā’’tiādīhi (ma. ni. 2.42; pāci. 417; cūḷani. khaggavisāṇasuttaniddesa 147) nekehi kāraṇehi. So bhikkhu bhikkhūhīti ye passanti vā suṇanti vā, tehi tikkhattuṃ evaṃ vattabbo ‘‘mā āyasmā evaṃ avaca…pe… alañca pana te paṭisevato antarāyāyā’’ti. Evaṃ vutte appaṭinissajjantassa dukkaṭaṃ, sutvā avadantānampi dukkaṭaṃ. Puna saṅghamajjhampi ākaḍḍhitvā tatheva vattabbo, tatrāpi tassa appaṭinissajjane, itaresañca avacane dukkaṭameva. Evampi appaṭinissajjanto puna ñatticatutthena kammena yāvatatiyaṃ samanubhāsitabbo, athassa appaṭinissajjato puna ñattiyā ca dvīhi ca kammavācāhi dukkaṭaṃ, kammavācāpariyosāne pācittiyaṃ.
саавад̇т̇ияам̣ аридтам̣ аараб̣бха баабигааяа д̣̇идтияаа аббадиниссаж̇ж̇анавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, д̇игабаажид̇д̇ияам̣, ад̇хаммагаммз д̇игад̣̇уггадам̣. асаманубхаасияамаанасса , бадиниссаж̇ж̇анд̇асса, уммад̇д̇агаад̣̇ийнан̃жа анаабад̇д̇и. д̇хаммагаммад̇аа, саманубхаасанаа, аббадиниссаж̇ж̇ананд̇и имаанзд̇т̇а д̇ийн̣и ан̇г̇аани. самудтаанаад̣̇ийни саманубхаасанасад̣̇исаанзваад̇и.
Sāvatthiyaṃ ariṭṭhaṃ ārabbha pāpikāya diṭṭhiyā appaṭinissajjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, adhammakamme tikadukkaṭaṃ. Asamanubhāsiyamānassa , paṭinissajjantassa, ummattakādīnañca anāpatti. Dhammakammatā, samanubhāsanā, appaṭinissajjananti imānettha tīṇi aṅgāni. Samuṭṭhānādīni samanubhāsanasadisānevāti.
аридтасигкаабад̣̇аван̣н̣анаа нидтид̇аа.
Ariṭṭhasikkhāpadavaṇṇanā niṭṭhitā.
9. угкид̇д̇асамбхог̇асигкаабад̣̇аван̣н̣анаа
9. Ukkhittasambhogasikkhāpadavaṇṇanā
навамз д̇ат̇ааваад̣̇инаад̇и ‘‘д̇ат̇аахам̣ бхаг̇авад̇аа д̇хамма’’нд̇иаад̣̇иваад̣̇инаа. агад̇аануд̇хаммзнаад̇и ануд̇хаммо вужжад̇и аабад̇д̇ияаа ад̣̇ассанз ваа аббадигаммз ваа баабигааяа д̣̇идтияаа аббадиниссаг̇г̇з ваа д̇хаммзна винаязна угкид̇д̇агасса ануломавад̇д̇ам̣ д̣̇исваа гад̇аосааран̣аа, со осааран̣асан̇каад̇о ануд̇хаммо яасса на гад̇о, аяам̣ агад̇аануд̇хаммо наама, д̇аад̣̇исзна сад̣̇д̇хинд̇и ад̇т̇о. самбхун̃ж̇зяяа ваад̇и аамисасамбхог̇ам̣ ваа д̇хаммасамбхог̇ам̣ ваа гарзяяа. сам̣васзяяа ваад̇и убосат̇аад̣̇игам̣ сан̇гхагаммам̣ гарзяяа . саха ваа сзяяам̣ габбзяяаад̇и наануубажаарзби згажчаннз нибаж̇ж̇зяяа. д̇ад̇т̇а аамисабарибхог̇з згаббаяог̇зна б̣ахууби д̣̇ад̣̇ад̇о ваа г̇ан̣хад̇о ваа згам̣ баажид̇д̇ияам̣, вижчинд̣̇анз сад̇и баяог̇з баяог̇з баажид̇д̇ияам̣. д̇хаммасамбхог̇з бад̣̇аад̣̇ийхи уд̣̇д̣̇исанд̇асса ваа уд̣̇д̣̇исаабзнд̇асса ваа бад̣̇асод̇хаммз вуд̇д̇анаязна, сам̣ваасз гаммабарияосаанавасзна, сахасзяяааяа згасмим̣ нибаннз ид̇арасса нибаж̇ж̇анаббаяог̇авасзна аабад̇д̇ибарижчзд̣̇о взд̣̇ид̇аб̣б̣о.
Navame tathāvādināti ‘‘tathāhaṃ bhagavatā dhamma’’ntiādivādinā. Akatānudhammenāti anudhammo vuccati āpattiyā adassane vā appaṭikamme vā pāpikāya diṭṭhiyā appaṭinissagge vā dhammena vinayena ukkhittakassa anulomavattaṃ disvā kataosāraṇā, so osāraṇasaṅkhāto anudhammo yassa na kato, ayaṃ akatānudhammo nāma, tādisena saddhinti attho. Sambhuñjeyya vāti āmisasambhogaṃ vā dhammasambhogaṃ vā kareyya. Saṃvaseyya vāti uposathādikaṃ saṅghakammaṃ kareyya . Saha vā seyyaṃ kappeyyāti nānūpacārepi ekacchanne nipajjeyya. Tattha āmisaparibhoge ekappayogena bahūpi dadato vā gaṇhato vā ekaṃ pācittiyaṃ, vicchindane sati payoge payoge pācittiyaṃ. Dhammasambhoge padādīhi uddisantassa vā uddisāpentassa vā padasodhamme vuttanayena, saṃvāse kammapariyosānavasena, sahaseyyāya ekasmiṃ nipanne itarassa nipajjanappayogavasena āpattiparicchedo veditabbo.
саавад̇т̇ияам̣ чаб̣б̣аг̇г̇ияз аараб̣бха аридтзна бхигкунаа сад̣̇д̇хим̣ самбхун̃ж̇анавад̇т̇усмим̣ бан̃н̃ад̇д̇ам̣, саад̇хааран̣абан̃н̃ад̇д̇и, анаан̣ад̇д̇игам̣, угкид̇д̇агз взмад̇игасса, анугкид̇д̇агз угкид̇д̇агасан̃н̃ино жзва взмад̇игасса жа д̣̇уггадам̣. убхосу анугкид̇д̇агасан̃н̃исса, ‘‘осаарид̇о’’д̇и ваа ‘‘д̇ам̣ д̣̇идтим̣ бадиниссадто’’д̇и ваа ж̇аананд̇асса, уммад̇д̇агаад̣̇ийнан̃жа анаабад̇д̇и. агад̇аануд̇хаммад̇аа, ж̇аананаа, самбхог̇аад̣̇игаран̣анд̇и имаанзд̇т̇а д̇ийн̣и ан̇г̇аани. самудтаанаад̣̇ийни ад̣̇иннаад̣̇аанасад̣̇исаани, ид̣̇ам̣ бана бан̣н̣ад̇д̇иваж̇ж̇ам̣, д̇ижид̇д̇ам̣, д̇ивзд̣̇ананд̇и.
Sāvatthiyaṃ chabbaggiye ārabbha ariṭṭhena bhikkhunā saddhiṃ sambhuñjanavatthusmiṃ paññattaṃ, sādhāraṇapaññatti, anāṇattikaṃ, ukkhittake vematikassa, anukkhittake ukkhittakasaññino ceva vematikassa ca dukkaṭaṃ. Ubhosu anukkhittakasaññissa, ‘‘osārito’’ti vā ‘‘taṃ diṭṭhiṃ paṭinissaṭṭho’’ti vā jānantassa, ummattakādīnañca anāpatti. Akatānudhammatā, jānanā, sambhogādikaraṇanti imānettha tīṇi aṅgāni. Samuṭṭhānādīni adinnādānasadisāni, idaṃ pana paṇṇattivajjaṃ, ticittaṃ, tivedananti.
угкид̇д̇асамбхог̇асигкаабад̣̇аван̣н̣анаа нидтид̇аа.
Ukkhittasambhogasikkhāpadavaṇṇanā niṭṭhitā.
10. ган̣дагасигкаабад̣̇аван̣н̣анаа
10. Kaṇṭakasikkhāpadavaṇṇanā
д̣̇асамз саман̣уд̣̇д̣̇зсод̇и сааман̣зро. жараад̇и г̇ажча. бирзд̇и бара амаамага. винассаад̇и насса , яад̇т̇а д̇ам̣ на бассаама, д̇ад̇т̇а г̇ажчаад̇и вуд̇д̇ам̣ ход̇и. д̇ат̇аанаасид̇анд̇изд̇т̇а сам̣ваасанаасанаа лин̇г̇анаасанаа д̣̇ан̣д̣агамманаасанаад̇и д̇иссо наасанаа. д̇ад̇т̇а аабад̇д̇ияаа ад̣̇ассанаад̣̇ийсу угкзбанаа сам̣ваасанаасанаа наама. д̣̇уусаго наасзд̇аб̣б̣о (баараа. 66), мзд̇д̇ияам̣ бхигкуним̣ наасзт̇аад̇и (жуул̣ава. 193; баараа. 384) аяам̣ лин̇г̇анаасанаа наама. ‘‘аж̇ж̇ад̇аг̇г̇з д̇з, аавусо саман̣уд̣̇д̣̇зса, на жзва со бхаг̇аваа сад̇т̇аа абад̣̇исид̇аб̣б̣о’’д̇и (баажи. 429) аяам̣ д̣̇ан̣д̣агамманаасанаа наама, аяам̣ ид̇хаад̇хиббзд̇аа. д̇зна вуд̇д̇ам̣ ‘‘д̇ат̇аанаасид̇а’’нд̇и. убалаабзяяаад̇и ‘‘бад̇д̇ам̣ ваа жийварам̣ ваа уд̣̇д̣̇зсам̣ ваа барибужчам̣ ваа д̣̇ассаамий’’д̇и сан̇г̇ан̣хзяяа. убадтаабзяяаад̇и жун̣н̣амад̇д̇игаад̣̇ийни саад̣̇ияанд̇о д̇зна ад̇д̇ано убадтаанам̣ гаараабзяяа. самбхог̇асахасзяяаа ананд̇арасигкаабад̣̇з вуд̇д̇анаяаа зва, д̇асмаа аабад̇д̇ибарижчзд̣̇обзд̇т̇а д̇асмим̣ вуд̇д̇анаязнзва взд̣̇ид̇аб̣б̣о.
Dasame samaṇuddesoti sāmaṇero. Carāti gaccha. Pireti para amāmaka. Vinassāti nassa , yattha taṃ na passāma, tattha gacchāti vuttaṃ hoti. Tathānāsitantiettha saṃvāsanāsanā liṅganāsanā daṇḍakammanāsanāti tisso nāsanā. Tattha āpattiyā adassanādīsu ukkhepanā saṃvāsanāsanā nāma. Dūsako nāsetabbo (pārā. 66), mettiyaṃ bhikkhuniṃ nāsethāti (cūḷava. 193; pārā. 384) ayaṃ liṅganāsanā nāma. ‘‘Ajjatagge te, āvuso samaṇuddesa, na ceva so bhagavā satthā apadisitabbo’’ti (pāci. 429) ayaṃ daṇḍakammanāsanā nāma, ayaṃ idhādhippetā. Tena vuttaṃ ‘‘tathānāsita’’nti. Upalāpeyyāti ‘‘pattaṃ vā cīvaraṃ vā uddesaṃ vā paripucchaṃ vā dassāmī’’ti saṅgaṇheyya. Upaṭṭhāpeyyāti cuṇṇamattikādīni sādiyanto tena attano upaṭṭhānaṃ kārāpeyya. Sambhogasahaseyyā anantarasikkhāpade vuttanayā eva, tasmā āpattiparicchedopettha tasmiṃ vuttanayeneva veditabbo.
саавад̇т̇ияам̣ чаб̣б̣аг̇г̇ияз бхигкуу аараб̣бха ган̣дагасаман̣уд̣̇д̣̇зсаубалаабанавад̇т̇усмим̣ бан̃н̃ад̇д̇ам̣, сзсам̣ аридтасигкаабад̣̇з вуд̇д̇асад̣̇исамзваад̇и.
Sāvatthiyaṃ chabbaggiye bhikkhū ārabbha kaṇṭakasamaṇuddesaupalāpanavatthusmiṃ paññattaṃ, sesaṃ ariṭṭhasikkhāpade vuttasadisamevāti.
ган̣дагасигкаабад̣̇аван̣н̣анаа нидтид̇аа.
Kaṇṭakasikkhāpadavaṇṇanā niṭṭhitā.
саббаан̣агаваг̇г̇о сад̇д̇амо.
Sappāṇakavaggo sattamo.
