| Library / Tipiṭaka / तिपिटक • Tipiṭaka / परिवारपाळि • Parivārapāḷi |
७. सप्पाणकवग्गो
7. Sappāṇakavaggo
१७१. सञ्चिच्च पाणं जीविता वोरोपेन्तो कति आपत्तियो आपज्जति? सञ्चिच्च पाणं जीविता वोरोपेन्तो चतस्सो आपत्तियो आपज्जति। अनोदिस्स ओपातं खणति – ‘‘यो कोचि पपतित्वा मरिस्सती’’ति, आपत्ति दुक्कटस्स; मनुस्सो तस्मिं पपतित्वा मरति, आपत्ति पाराजिकस्स; यक्खो वा पेतो वा तिरच्छानगतमनुस्सविग्गहो वा तस्मिं पपतित्वा मरति, आपत्ति थुल्लच्चयस्स; तिरच्छानगतो तस्मिं पपतित्वा मरति, आपत्ति पाचित्तियस्स – सञ्चिच्च पाणं जीविता वोरोपेन्तो इमा चतस्सो आपत्तियो आपज्जति।
171. Sañcicca pāṇaṃ jīvitā voropento kati āpattiyo āpajjati? Sañcicca pāṇaṃ jīvitā voropento catasso āpattiyo āpajjati. Anodissa opātaṃ khaṇati – ‘‘yo koci papatitvā marissatī’’ti, āpatti dukkaṭassa; manusso tasmiṃ papatitvā marati, āpatti pārājikassa; yakkho vā peto vā tiracchānagatamanussaviggaho vā tasmiṃ papatitvā marati, āpatti thullaccayassa; tiracchānagato tasmiṃ papatitvā marati, āpatti pācittiyassa – sañcicca pāṇaṃ jīvitā voropento imā catasso āpattiyo āpajjati.
जानं सप्पाणकं उदकं परिभुञ्जन्तो द्वे आपत्तियो आपज्जति। परिभुञ्जति, पयोगे दुक्कटं; परिभुत्ते आपत्ति पाचित्तियस्स।
Jānaṃ sappāṇakaṃ udakaṃ paribhuñjanto dve āpattiyo āpajjati. Paribhuñjati, payoge dukkaṭaṃ; paribhutte āpatti pācittiyassa.
जानं यथाधम्मं निहताधिकरणं पुनकम्माय उक्कोटेन्तो द्वे आपत्तियो आपज्जति। उक्कोटेति, पयोगे दुक्कटं; उक्कोटिते आपत्ति पाचित्तियस्स।
Jānaṃ yathādhammaṃ nihatādhikaraṇaṃ punakammāya ukkoṭento dve āpattiyo āpajjati. Ukkoṭeti, payoge dukkaṭaṃ; ukkoṭite āpatti pācittiyassa.
भिक्खुस्स जानं दुट्ठुल्लं आपत्तिं पटिच्छादेन्तो एकं आपत्तिं आपज्जति। पाचित्तियं।
Bhikkhussa jānaṃ duṭṭhullaṃ āpattiṃ paṭicchādento ekaṃ āpattiṃ āpajjati. Pācittiyaṃ.
जानं ऊनवीसतिवस्सं पुग्गलं उपसम्पादेन्तो द्वे आपत्तियो आपज्जति। उपसम्पादेति, पयोगे दुक्कटं; उपसम्पादिते आपत्ति पाचित्तियस्स।
Jānaṃ ūnavīsativassaṃ puggalaṃ upasampādento dve āpattiyo āpajjati. Upasampādeti, payoge dukkaṭaṃ; upasampādite āpatti pācittiyassa.
जानं थेय्यसत्थेन सद्धिं संविधाय एकद्धानमग्गं पटिपज्जन्तो द्वे आपत्तियो आपज्जति। पटिपज्जति, पयोगे दुक्कटं; पटिपन्ने आपत्ति पाचित्तियस्स।
Jānaṃ theyyasatthena saddhiṃ saṃvidhāya ekaddhānamaggaṃ paṭipajjanto dve āpattiyo āpajjati. Paṭipajjati, payoge dukkaṭaṃ; paṭipanne āpatti pācittiyassa.
मातुगामेन सद्धिं संविधाय एकद्धानमग्गं पटिपज्जन्तो द्वे आपत्तियो आपज्जति। पटिपज्जति, पयोगे दुक्कटं; पटिपन्ने आपत्ति पाचित्तियस्स।
Mātugāmena saddhiṃ saṃvidhāya ekaddhānamaggaṃ paṭipajjanto dve āpattiyo āpajjati. Paṭipajjati, payoge dukkaṭaṃ; paṭipanne āpatti pācittiyassa.
पापिकाय दिट्ठिया यावततियं समनुभासनाय न पटिनिस्सज्जन्तो द्वे आपत्तियो आपज्जति। ञत्तिया दुक्कटं; कम्मवाचापरियोसाने आपत्ति पाचित्तियस्स।
Pāpikāya diṭṭhiyā yāvatatiyaṃ samanubhāsanāya na paṭinissajjanto dve āpattiyo āpajjati. Ñattiyā dukkaṭaṃ; kammavācāpariyosāne āpatti pācittiyassa.
जानं तथावादिना भिक्खुना अकटानुधम्मेन तं दिट्ठिं अप्पटिनिस्सट्ठेन सद्धिं सम्भुञ्जन्तो द्वे आपत्तियो आपज्जति। सम्भुञ्जति, पयोगे दुक्कटं; सम्भुत्ते आपत्ति पाचित्तियस्स।
Jānaṃ tathāvādinā bhikkhunā akaṭānudhammena taṃ diṭṭhiṃ appaṭinissaṭṭhena saddhiṃ sambhuñjanto dve āpattiyo āpajjati. Sambhuñjati, payoge dukkaṭaṃ; sambhutte āpatti pācittiyassa.
जानं तथानासितं समणुद्देसं उपलापेन्तो द्वे आपत्तियो आपज्जति। उपलापेति, पयोगे दुक्कटं; उपलापिते आपत्ति पाचित्तियस्स।
Jānaṃ tathānāsitaṃ samaṇuddesaṃ upalāpento dve āpattiyo āpajjati. Upalāpeti, payoge dukkaṭaṃ; upalāpite āpatti pācittiyassa.
सप्पाणकवग्गो सत्तमो।
Sappāṇakavaggo sattamo.
Related texts:
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / कतापत्तिवारादिवण्णना • Katāpattivārādivaṇṇanā
