| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
7. සප්‌පාණකවග්‌ගො
7. Sappāṇakavaggo
171. සඤ්‌චිච්‌ච පාණං ජීවිතා වොරොපෙන්‌තො කති ආපත්‌තියො ආපජ්‌ජති? සඤ්‌චිච්‌ච පාණං ජීවිතා වොරොපෙන්‌තො චතස්‌සො ආපත්‌තියො ආපජ්‌ජති. අනොදිස්‌ස ඔපාතං ඛණති – ‘‘යො කොචි පපතිත්‌වා මරිස්‌සතී’’ති, ආපත්‌ති දුක්‌කටස්‌ස; මනුස්‌සො තස්‌මිං පපතිත්‌වා මරති, ආපත්‌ති පාරාජිකස්‌ස; යක්‌ඛො වා පෙතො වා තිරච්‌ඡානගතමනුස්‌සවිග්‌ගහො වා තස්‌මිං පපතිත්‌වා මරති, ආපත්‌ති ථුල්‌ලච්‌චයස්‌ස; තිරච්‌ඡානගතො තස්‌මිං පපතිත්‌වා මරති, ආපත්‌ති පාචිත්‌තියස්‌ස – සඤ්‌චිච්‌ච පාණං ජීවිතා වොරොපෙන්‌තො ඉමා චතස්‌සො ආපත්‌තියො ආපජ්‌ජති.
171. Sañcicca pāṇaṃ jīvitā voropento kati āpattiyo āpajjati? Sañcicca pāṇaṃ jīvitā voropento catasso āpattiyo āpajjati. Anodissa opātaṃ khaṇati – ‘‘yo koci papatitvā marissatī’’ti, āpatti dukkaṭassa; manusso tasmiṃ papatitvā marati, āpatti pārājikassa; yakkho vā peto vā tiracchānagatamanussaviggaho vā tasmiṃ papatitvā marati, āpatti thullaccayassa; tiracchānagato tasmiṃ papatitvā marati, āpatti pācittiyassa – sañcicca pāṇaṃ jīvitā voropento imā catasso āpattiyo āpajjati.
ජානං සප්‌පාණකං උදකං පරිභුඤ්‌ජන්‌තො ද්‌වෙ ආපත්‌තියො ආපජ්‌ජති. පරිභුඤ්‌ජති, පයොගෙ දුක්‌කටං; පරිභුත්‌තෙ ආපත්‌ති පාචිත්‌තියස්‌ස.
Jānaṃ sappāṇakaṃ udakaṃ paribhuñjanto dve āpattiyo āpajjati. Paribhuñjati, payoge dukkaṭaṃ; paribhutte āpatti pācittiyassa.
ජානං යථාධම්‌මං නිහතාධිකරණං පුනකම්‌මාය උක්‌කොටෙන්‌තො ද්‌වෙ ආපත්‌තියො ආපජ්‌ජති. උක්‌කොටෙති, පයොගෙ දුක්‌කටං; උක්‌කොටිතෙ ආපත්‌ති පාචිත්‌තියස්‌ස.
Jānaṃ yathādhammaṃ nihatādhikaraṇaṃ punakammāya ukkoṭento dve āpattiyo āpajjati. Ukkoṭeti, payoge dukkaṭaṃ; ukkoṭite āpatti pācittiyassa.
භික්‌ඛුස්‌ස ජානං දුට්‌ඨුල්‌ලං ආපත්‌තිං පටිච්‌ඡාදෙන්‌තො එකං ආපත්‌තිං ආපජ්‌ජති. පාචිත්‌තියං.
Bhikkhussa jānaṃ duṭṭhullaṃ āpattiṃ paṭicchādento ekaṃ āpattiṃ āpajjati. Pācittiyaṃ.
ජානං ඌනවීසතිවස්‌සං පුග්‌ගලං උපසම්‌පාදෙන්‌තො ද්‌වෙ ආපත්‌තියො ආපජ්‌ජති. උපසම්‌පාදෙති, පයොගෙ දුක්‌කටං; උපසම්‌පාදිතෙ ආපත්‌ති පාචිත්‌තියස්‌ස.
Jānaṃ ūnavīsativassaṃ puggalaṃ upasampādento dve āpattiyo āpajjati. Upasampādeti, payoge dukkaṭaṃ; upasampādite āpatti pācittiyassa.
ජානං ථෙය්‍යසත්‌ථෙන සද්‌ධිං සංවිධාය එකද්‌ධානමග්‌ගං පටිපජ්‌ජන්‌තො ද්‌වෙ ආපත්‌තියො ආපජ්‌ජති. පටිපජ්‌ජති, පයොගෙ දුක්‌කටං; පටිපන්‌නෙ ආපත්‌ති පාචිත්‌තියස්‌ස.
Jānaṃ theyyasatthena saddhiṃ saṃvidhāya ekaddhānamaggaṃ paṭipajjanto dve āpattiyo āpajjati. Paṭipajjati, payoge dukkaṭaṃ; paṭipanne āpatti pācittiyassa.
මාතුගාමෙන සද්‌ධිං සංවිධාය එකද්‌ධානමග්‌ගං පටිපජ්‌ජන්‌තො ද්‌වෙ ආපත්‌තියො ආපජ්‌ජති. පටිපජ්‌ජති, පයොගෙ දුක්‌කටං; පටිපන්‌නෙ ආපත්‌ති පාචිත්‌තියස්‌ස.
Mātugāmena saddhiṃ saṃvidhāya ekaddhānamaggaṃ paṭipajjanto dve āpattiyo āpajjati. Paṭipajjati, payoge dukkaṭaṃ; paṭipanne āpatti pācittiyassa.
පාපිකාය දිට්‌ඨියා යාවතතියං සමනුභාසනාය න පටිනිස්‌සජ්‌ජන්‌තො ද්‌වෙ ආපත්‌තියො ආපජ්‌ජති. ඤත්‌තියා දුක්‌කටං; කම්‌මවාචාපරියොසානෙ ආපත්‌ති පාචිත්‌තියස්‌ස.
Pāpikāya diṭṭhiyā yāvatatiyaṃ samanubhāsanāya na paṭinissajjanto dve āpattiyo āpajjati. Ñattiyā dukkaṭaṃ; kammavācāpariyosāne āpatti pācittiyassa.
ජානං තථාවාදිනා භික්‌ඛුනා අකටානුධම්‌මෙන තං දිට්‌ඨිං අප්‌පටිනිස්‌සට්‌ඨෙන සද්‌ධිං සම්‌භුඤ්‌ජන්‌තො ද්‌වෙ ආපත්‌තියො ආපජ්‌ජති. සම්‌භුඤ්‌ජති, පයොගෙ දුක්‌කටං; සම්‌භුත්‌තෙ ආපත්‌ති පාචිත්‌තියස්‌ස.
Jānaṃ tathāvādinā bhikkhunā akaṭānudhammena taṃ diṭṭhiṃ appaṭinissaṭṭhena saddhiṃ sambhuñjanto dve āpattiyo āpajjati. Sambhuñjati, payoge dukkaṭaṃ; sambhutte āpatti pācittiyassa.
ජානං තථානාසිතං සමණුද්‌දෙසං උපලාපෙන්‌තො ද්‌වෙ ආපත්‌තියො ආපජ්‌ජති. උපලාපෙති, පයොගෙ දුක්‌කටං; උපලාපිතෙ ආපත්‌ති පාචිත්‌තියස්‌ස.
Jānaṃ tathānāsitaṃ samaṇuddesaṃ upalāpento dve āpattiyo āpajjati. Upalāpeti, payoge dukkaṭaṃ; upalāpite āpatti pācittiyassa.
සප්‌පාණකවග්‌ගො සත්‌තමො.
Sappāṇakavaggo sattamo.
Related texts:
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / කතාපත්‌තිවාරාදිවණ්‌ණනා • Katāpattivārādivaṇṇanā
