| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. සප්‌පඞ්‌ගපඤ්‌හො
9. Sappaṅgapañho
9. ‘‘භන්‌තෙ නාගසෙන, ‘සප්‌පස්‌ස තීණි අඞ්‌ගානි ගහෙතබ්‌බානී’ති යං වදෙසි, කතමානි තානි තීණි අඞ්‌ගානි ගහෙතබ්‌බානී’’ති? ‘‘යථා, මහාරාජ, සප්‌පො උරෙන ගච්‌ඡති, එවමෙව ඛො, මහාරාජ, යොගිනා යොගාවචරෙන පඤ්‌ඤාය චරිතබ්‌බං, පඤ්‌ඤාය චරමානස්‌ස ඛො, මහාරාජ, යොගිනො චිත්‌තං ඤායෙ චරති, විලක්‌ඛණං විවජ්‌ජෙති, සලක්‌ඛණං භාවෙති. ඉදං, මහාරාජ , සප්‌පස්‌ස පඨමං අඞ්‌ගං ගහෙතබ්‌බං.
9. ‘‘Bhante nāgasena, ‘sappassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, sappo urena gacchati, evameva kho, mahārāja, yoginā yogāvacarena paññāya caritabbaṃ, paññāya caramānassa kho, mahārāja, yogino cittaṃ ñāye carati, vilakkhaṇaṃ vivajjeti, salakkhaṇaṃ bhāveti. Idaṃ, mahārāja , sappassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, සප්‌පො චරමානො ඔසධං පරිවජ්‌ජෙන්‌තො චරති, එවමෙව ඛො, මහාරාජ, යොගිනා යොගාවචරෙන දුච්‌චරිතං පරිවජ්‌ජෙන්‌තෙන චරිතබ්‌බං. ඉදං, මහාරාජ, සප්‌පස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, sappo caramāno osadhaṃ parivajjento carati, evameva kho, mahārāja, yoginā yogāvacarena duccaritaṃ parivajjentena caritabbaṃ. Idaṃ, mahārāja, sappassa dutiyaṃ aṅgaṃ gahetabbaṃ.
‘‘පුන චපරං, මහාරාජ, සප්‌පො මනුස්‌සෙ දිස්‌වා තප්‌පති 1 සොචති චින්‌තයති, එවමෙව ඛො මහාරාජ යොගිනා යොගාවචරෙන කුවිතක්‌කෙ, විතක්‌කෙත්‌වා අරතිං උප්‌පාදයිත්‌වා තප්‌පිතබ්‌බං සොචිතබ්‌බං චින්‌තයිතබ්‌බං ‘පමාදෙන මෙ දිවසො වීතිනාමිතො, න සො පුන සක්‌කා ලද්‌ධු’න්‌ති. ඉදං, මහාරාජ, සප්‌පස්‌ස තතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා භල්‌ලාටියජාතකෙ ද්‌වින්‌නං කින්‌නරානං –
‘‘Puna caparaṃ, mahārāja, sappo manusse disvā tappati 2 socati cintayati, evameva kho mahārāja yoginā yogāvacarena kuvitakke, vitakketvā aratiṃ uppādayitvā tappitabbaṃ socitabbaṃ cintayitabbaṃ ‘pamādena me divaso vītināmito, na so puna sakkā laddhu’nti. Idaṃ, mahārāja, sappassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā bhallāṭiyajātake dvinnaṃ kinnarānaṃ –
‘‘‘මයෙකරත්‌තං 3 විප්‌පවසිම්‌හ ලුද්‌ද, අකාමකා අඤ්‌ඤමඤ්‌ඤං සරන්‌තා;
‘‘‘Mayekarattaṃ 4 vippavasimha ludda, akāmakā aññamaññaṃ sarantā;
තමෙකරත්‌තං 5 අනුතප්‌පමානා, සොචාම ‘සා රත්‌ති පුන නහෙස්‌සතී’’’ති.
Tamekarattaṃ 6 anutappamānā, socāma ‘sā ratti puna nahessatī’’’ti.
සප්‌පඞ්‌ගපඤ්‌හො නවමො.
Sappaṅgapañho navamo.
Footnotes:
