| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๖. สปฺปสุตฺตํ
6. Sappasuttaṃ
๑๔๒. เอวํ เม สุตํ – เอกํ สมยํ ภควา ราชคเห วิหรติ เวฬุวเน กลนฺทกนิวาเปฯ เตน โข ปน สมเยน ภควา รตฺตนฺธการติมิสายํ อโพฺภกาเส นิสิโนฺน โหติ, เทโว จ เอกเมกํ ผุสายติฯ
142. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena bhagavā rattandhakāratimisāyaṃ abbhokāse nisinno hoti, devo ca ekamekaṃ phusāyati.
อถ โข มาโร ปาปิมา ภควโต ภยํ ฉมฺภิตตฺตํ โลมหํสํ อุปฺปาเทตุกาโม มหนฺตํ สปฺปราชวณฺณํ อภินิมฺมินิตฺวา เยน ภควา เตนุปสงฺกมิฯ เสยฺยถาปิ นาม มหตี เอกรุกฺขิกา นาวา, เอวมสฺส กาโย โหติฯ เสยฺยถาปิ นาม มหนฺตํ โสณฺฑิกากิฬญฺชํ, เอวมสฺส ผโณ โหติฯ เสยฺยถาปิ นาม มหตี โกสลิกา กํสปาติ, เอวมสฺส อกฺขีนิ ภวนฺติฯ เสยฺยถาปิ นาม เทเว คฬคฬายเนฺต วิชฺชุลฺลตา นิจฺฉรนฺติ, เอวมสฺส มุขโต ชิวฺหา นิจฺฉรติฯ เสยฺยถาปิ นาม กมฺมารคคฺคริยา ธมมานาย สโทฺท โหติ, เอวมสฺส อสฺสาสปสฺสาสานํ สโทฺท โหติฯ
Atha kho māro pāpimā bhagavato bhayaṃ chambhitattaṃ lomahaṃsaṃ uppādetukāmo mahantaṃ sapparājavaṇṇaṃ abhinimminitvā yena bhagavā tenupasaṅkami. Seyyathāpi nāma mahatī ekarukkhikā nāvā, evamassa kāyo hoti. Seyyathāpi nāma mahantaṃ soṇḍikākiḷañjaṃ, evamassa phaṇo hoti. Seyyathāpi nāma mahatī kosalikā kaṃsapāti, evamassa akkhīni bhavanti. Seyyathāpi nāma deve gaḷagaḷāyante vijjullatā niccharanti, evamassa mukhato jivhā niccharati. Seyyathāpi nāma kammāragaggariyā dhamamānāya saddo hoti, evamassa assāsapassāsānaṃ saddo hoti.
อถ โข ภควา ‘‘มาโร อยํ ปาปิมา’’ อิติ วิทิตฺวา มารํ ปาปิมนฺตํ คาถาหิ อชฺฌภาสิ –
Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāhi ajjhabhāsi –
‘‘โย สุญฺญเคหานิ เสวติ,
‘‘Yo suññagehāni sevati,
เสโยฺย โส มุนิ อตฺตสญฺญโต;
Seyyo so muni attasaññato;
โวสฺสชฺช จเรยฺย ตตฺถ โส,
Vossajja careyya tattha so,
ปติรูปญฺหิ ตถาวิธสฺส ตํฯ
Patirūpañhi tathāvidhassa taṃ.
‘‘จรกา พหู เภรวา พหู,
‘‘Carakā bahū bheravā bahū,
โลมมฺปิ น ตตฺถ อิญฺชเย,
Lomampi na tattha iñjaye,
สุญฺญาคารคโต มหามุนิฯ
Suññāgāragato mahāmuni.
‘‘นภํ ผเลยฺย ปถวี จเลยฺย,
‘‘Nabhaṃ phaleyya pathavī caleyya,
สเพฺพปิ ปาณา อุท สนฺตเสยฺยุํ;
Sabbepi pāṇā uda santaseyyuṃ;
สลฺลมฺปิ เจ อุรสิ ปกปฺปเยยฺยุํ,
Sallampi ce urasi pakappayeyyuṃ,
อุปธีสุ ตาณํ น กโรนฺติ พุทฺธา’’ติฯ
Upadhīsu tāṇaṃ na karonti buddhā’’ti.
อถ โข มาโร ปาปิมา ‘‘ชานาติ มํ ภควา, ชานาติ มํ สุคโต’’ติ ทุกฺขี ทุมฺมโน ตเตฺถวนฺตรธายีติฯ
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๖. สปฺปสุตฺตวณฺณนา • 6. Sappasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๖. สปฺปสุตฺตวณฺณนา • 6. Sappasuttavaṇṇanā
