| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. ஸப்பஸுத்தவண்ணனா
6. Sappasuttavaṇṇanā
142. ச²ட்டே² ஸொண்டி³காகிலஞ்ஜந்தி ஸுராகாரகானங் பிட்ட²பத்த²ரணககிலஞ்ஜங். கோஸலிகா கங்ஸபாதீதி கோஸலரஞ்ஞோ ரத²சக்கப்பமாணா பரிபோ⁴க³பாதி . க³ளக³ளாயந்தேதி க³ஜ்ஜந்தே. கம்மாரக³க்³க³ரியாதி கம்மாருத்³த⁴னபணாளியா. த⁴மமானாயாதி ப⁴ஸ்தவாதேன பூரியமானாய. இதி விதி³த்வாதி – ‘‘ஸமணோ கோ³தமோ பதா⁴னமனுயுத்தோ ஸுகே²ன நிஸின்னோ, க⁴ட்டயிஸ்ஸாமி ந’’ந்தி வுத்தப்பகாரங் அத்தபா⁴வங் மாபெத்வா நியாமபூ⁴மியங் இதோ சிதோ ச ஸஞ்சரந்தங் விஜ்ஜுலதாலோகேன தி³ஸ்வா, ‘‘கோ நு கோ² ஏஸோ ஸத்தோ’’தி? ஆவஜ்ஜெந்தோ, ‘‘மாரோ அய’’ந்தி ஏவங் விதி³த்வா.
142. Chaṭṭhe soṇḍikākilañjanti surākārakānaṃ piṭṭhapattharaṇakakilañjaṃ. Kosalikā kaṃsapātīti kosalarañño rathacakkappamāṇā paribhogapāti . Gaḷagaḷāyanteti gajjante. Kammāragaggariyāti kammāruddhanapaṇāḷiyā. Dhamamānāyāti bhastavātena pūriyamānāya. Iti viditvāti – ‘‘samaṇo gotamo padhānamanuyutto sukhena nisinno, ghaṭṭayissāmi na’’nti vuttappakāraṃ attabhāvaṃ māpetvā niyāmabhūmiyaṃ ito cito ca sañcarantaṃ vijjulatālokena disvā, ‘‘ko nu kho eso satto’’ti? Āvajjento, ‘‘māro aya’’nti evaṃ viditvā.
ஸுஞ்ஞகே³ஹானீதி ஸுஞ்ஞாகா³ரானி. ஸெய்யாதி ஸெய்யத்தா²ய. ட²ஸ்ஸாமி சங்கமிஸ்ஸாமி நிஸீதி³ஸ்ஸாமி நிபஜ்ஜிஸ்ஸாமீதி ஏதத³த்தா²ய யோ ஸுஞ்ஞாகா³ரானி ஸேவதீதி அத்தோ². ஸோ முனி அத்தஸஞ்ஞதோதி ஸோ பு³த்³த⁴முனி ஹத்த²பாத³குக்குச்சாபா⁴வேன ஸங்யதத்தபா⁴வோ. வொஸ்ஸஜ்ஜ சரெய்ய தத்த² ஸோதி ஸோ தஸ்மிங் அத்தபா⁴வே ஆலயங் நிகந்திங் வொஸ்ஸஜ்ஜித்வா பஹாய சரெய்ய. பதிரூபங் ஹி ததா²வித⁴ஸ்ஸ தந்தி தாதி³ஸஸ்ஸ தங்ஸண்டி²தஸ்ஸ பு³த்³த⁴முனினோ தங் அத்தபா⁴வே நிகந்திங் வொஸ்ஸஜ்ஜித்வா சரணங் நாம பதிரூபங் யுத்தங் அனுச்ச²விகங்.
Suññagehānīti suññāgārāni. Seyyāti seyyatthāya. Ṭhassāmi caṅkamissāmi nisīdissāmi nipajjissāmīti etadatthāya yo suññāgārāni sevatīti attho. So muni attasaññatoti so buddhamuni hatthapādakukkuccābhāvena saṃyatattabhāvo. Vossajja careyya tattha soti so tasmiṃ attabhāve ālayaṃ nikantiṃ vossajjitvā pahāya careyya. Patirūpaṃ hi tathāvidhassa tanti tādisassa taṃsaṇṭhitassa buddhamunino taṃ attabhāve nikantiṃ vossajjitvā caraṇaṃ nāma patirūpaṃ yuttaṃ anucchavikaṃ.
சரகாதி ஸீஹப்³யக்³கா⁴தி³கா ஸஞ்சரணஸத்தா. பே⁴ரவாதி ஸவிஞ்ஞாணகஅவிஞ்ஞாணகபே⁴ரவா. தத்த² ஸவிஞ்ஞாணகா ஸீஹப்³யக்³கா⁴த³யோ, அவிஞ்ஞாணகா ரத்திபா⁴கே³ கா²ணுவம்மிகாத³யோ. தேபி ஹி தஸ்மிங் காலே யக்கா² விய உபட்ட²ஹந்தி, ரஜ்ஜுவல்லியாதீ³னி ஸப்³பா³னி ஸப்பா விய உபட்ட²ஹந்தி. தத்தா²தி தேஸு பே⁴ரவேஸு ஸுஞ்ஞாகா³ரக³தோ பு³த்³த⁴முனி லோமசலனமத்தகம்பி ந கரோதி.
Carakāti sīhabyagghādikā sañcaraṇasattā. Bheravāti saviññāṇakaaviññāṇakabheravā. Tattha saviññāṇakā sīhabyagghādayo, aviññāṇakā rattibhāge khāṇuvammikādayo. Tepi hi tasmiṃ kāle yakkhā viya upaṭṭhahanti, rajjuvalliyādīni sabbāni sappā viya upaṭṭhahanti. Tatthāti tesu bheravesu suññāgāragato buddhamuni lomacalanamattakampi na karoti.
இதா³னி அட்டா²னபரிகப்பங் த³ஸ்ஸெந்தோ நப⁴ங் ப²லெய்யாதிஆதி³மாஹ. தத்த² ப²லெய்யாதி காகபத³ங் விய ஹீரஹீரஸோ ப²லெய்ய. சலெய்யாதி பொக்க²ரபத்தே வாதாஹதோ உத³கபி³ந்து³ விய சலெய்ய. ஸல்லம்பி சே உரஸி பகப்பயெய்யுந்தி திகி²ணஸத்திஸல்லங் சேபி உரஸ்மிங் சாரேயெய்யுங். உபதீ⁴ஸூதி க²ந்தூ⁴பதீ⁴ஸு. தாணங் ந கரொந்தீதி திகி²ணே ஸல்லே உரஸ்மிங் சாரியமானே ப⁴யேன கு³ம்ப³ந்தரகந்த³ராதீ³னி பவிஸந்தா தாணங் கரொந்தி நாம. பு³த்³தா⁴ பன ஸமுச்சி²ன்னஸப்³ப³ப⁴யா ஏவரூபங் தாணங் நாம ந கரொந்தி. ச²ட்ட²ங்.
Idāni aṭṭhānaparikappaṃ dassento nabhaṃ phaleyyātiādimāha. Tattha phaleyyāti kākapadaṃ viya hīrahīraso phaleyya. Caleyyāti pokkharapatte vātāhato udakabindu viya caleyya. Sallampi ce urasi pakappayeyyunti tikhiṇasattisallaṃ cepi urasmiṃ cāreyeyyuṃ. Upadhīsūti khandhūpadhīsu. Tāṇaṃ na karontīti tikhiṇe salle urasmiṃ cāriyamāne bhayena gumbantarakandarādīni pavisantā tāṇaṃ karonti nāma. Buddhā pana samucchinnasabbabhayā evarūpaṃ tāṇaṃ nāma na karonti. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஸப்பஸுத்தங் • 6. Sappasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. ஸப்பஸுத்தவண்ணனா • 6. Sappasuttavaṇṇanā
