| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৬. সপ্পসুত্তৰণ্ণনা
6. Sappasuttavaṇṇanā
১৪২. সুরাকারকানন্তি পিট্ঠসুরাযোজনকানং। কোসলানং ইস্সরোতি কোসলো, কোসলরাজস্স অযন্তি কোসলিকা। পরিভোগপাতীতি ভত্তপরিভোজনত্থায পাতি পরিভোগপাতি। কম্মারুদ্ধনপণাল়িযাতি কম্মারুদ্ধনপণাল়িমুখে। ধমমানাযাতি ধমিযমানায। তং পন যস্মা ভস্তৰাতেহি পূরিতং নাম হোতি, তস্মা ‘‘ভস্তৰাতেন পূরিযমানাযা’’তি ৰুত্তং। নিযামভূমিযন্তি ভগৰতো পটিসল্লানট্ঠানে সঞ্চরন্তং মারং মংসচক্খুনাৰ দিস্ৰা। তেনাহ ‘‘ৰিজ্জুলতালোকেনা’’তি।
142.Surākārakānanti piṭṭhasurāyojanakānaṃ. Kosalānaṃ issaroti kosalo, kosalarājassa ayanti kosalikā. Paribhogapātīti bhattaparibhojanatthāya pāti paribhogapāti. Kammāruddhanapaṇāḷiyāti kammāruddhanapaṇāḷimukhe. Dhamamānāyāti dhamiyamānāya. Taṃ pana yasmā bhastavātehi pūritaṃ nāma hoti, tasmā ‘‘bhastavātena pūriyamānāyā’’ti vuttaṃ. Niyāmabhūmiyanti bhagavato paṭisallānaṭṭhāne sañcarantaṃ māraṃ maṃsacakkhunāva disvā. Tenāha ‘‘vijjulatālokenā’’ti.
সেয্যত্থাযাতি সেয্যানিসংসায। তেনাহ ‘‘ঠস্সামী’’তিআদি। অত্তসঞ্ঞতোতি অত্তভাৰেন সংযতো। তেনাহ ‘‘সংযতত্তভাৰো’’তি। তংসণ্ঠিতস্সাতি তস্মিং হত্থপাদকুক্কুচ্চরহিতে বুদ্ধমুনিস্মিং অৰট্ঠিতস্স। ৰোস্সজ্জ চরেয্য তত্থ সোতি ইমিনা ভগৰা তং ব্যাকরমানো ৰিভিংসিতা বুদ্ধানং কিং করিস্সতি ভযাভাৰতো? কেৰলং পন অনট্ঠৰলিকং উপ্পীল়েন্তো ৰিয ত্ৰমেৰ আযাসং আপজ্জিস্সসীতি মারং সন্তজ্জেতি।
Seyyatthāyāti seyyānisaṃsāya. Tenāha ‘‘ṭhassāmī’’tiādi. Attasaññatoti attabhāvena saṃyato. Tenāha ‘‘saṃyatattabhāvo’’ti. Taṃsaṇṭhitassāti tasmiṃ hatthapādakukkuccarahite buddhamunismiṃ avaṭṭhitassa. Vossajja careyya tattha soti iminā bhagavā taṃ byākaramāno vibhiṃsitā buddhānaṃ kiṃ karissati bhayābhāvato? Kevalaṃ pana anaṭṭhavalikaṃ uppīḷento viya tvameva āyāsaṃ āpajjissasīti māraṃ santajjeti.
ভেরৰাতি অৰীতরাগানং ভযজনকা। তত্থাতি তংনিমিত্তং। ফলেয্যাতি ভিজ্জেয্য। সত্তিসল্লন্তি সত্তিসঙ্খাতং পুথুসল্লং। উরস্মিং চারযেয্যুন্তি ফাসুং ৰিজ্ঝিতুং ঠপেয্যুং উগ্গিরেয্যুং। খন্ধুপধীসূতি খন্ধসঙ্খাতেসু উপধীসু। তাণং করোন্তি নামাতি ততো ভযনিমিত্ততো অত্তনো তাণং করোন্তি নাম।
Bheravāti avītarāgānaṃ bhayajanakā. Tatthāti taṃnimittaṃ. Phaleyyāti bhijjeyya. Sattisallanti sattisaṅkhātaṃ puthusallaṃ. Urasmiṃ cārayeyyunti phāsuṃ vijjhituṃ ṭhapeyyuṃ uggireyyuṃ. Khandhupadhīsūti khandhasaṅkhātesu upadhīsu. Tāṇaṃ karonti nāmāti tato bhayanimittato attano tāṇaṃ karonti nāma.
সপ্পসুত্তৰণ্ণনা নিট্ঠিতা।
Sappasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৬. সপ্পসুত্তং • 6. Sappasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. সপ্পসুত্তৰণ্ণনা • 6. Sappasuttavaṇṇanā
