| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៦. សប្បសុត្តវណ្ណនា
6. Sappasuttavaṇṇanā
១៤២. សុរាការកានន្តិ បិដ្ឋសុរាយោជនកានំ។ កោសលានំ ឥស្សរោតិ កោសលោ, កោសលរាជស្ស អយន្តិ កោសលិកា។ បរិភោគបាតីតិ ភត្តបរិភោជនត្ថាយ បាតិ បរិភោគបាតិ។ កម្មារុទ្ធនបណាឡិយាតិ កម្មារុទ្ធនបណាឡិមុខេ។ ធមមានាយាតិ ធមិយមានាយ។ តំ បន យស្មា ភស្តវាតេហិ បូរិតំ នាម ហោតិ, តស្មា ‘‘ភស្តវាតេន បូរិយមានាយា’’តិ វុត្តំ។ និយាមភូមិយន្តិ ភគវតោ បដិសល្លានដ្ឋានេ សញ្ចរន្តំ មារំ មំសចក្ខុនាវ ទិស្វា។ តេនាហ ‘‘វិជ្ជុលតាលោកេនា’’តិ។
142.Surākārakānanti piṭṭhasurāyojanakānaṃ. Kosalānaṃ issaroti kosalo, kosalarājassa ayanti kosalikā. Paribhogapātīti bhattaparibhojanatthāya pāti paribhogapāti. Kammāruddhanapaṇāḷiyāti kammāruddhanapaṇāḷimukhe. Dhamamānāyāti dhamiyamānāya. Taṃ pana yasmā bhastavātehi pūritaṃ nāma hoti, tasmā ‘‘bhastavātena pūriyamānāyā’’ti vuttaṃ. Niyāmabhūmiyanti bhagavato paṭisallānaṭṭhāne sañcarantaṃ māraṃ maṃsacakkhunāva disvā. Tenāha ‘‘vijjulatālokenā’’ti.
សេយ្យត្ថាយាតិ សេយ្យានិសំសាយ។ តេនាហ ‘‘ឋស្សាមី’’តិអាទិ។ អត្តសញ្ញតោតិ អត្តភាវេន សំយតោ។ តេនាហ ‘‘សំយតត្តភាវោ’’តិ។ តំសណ្ឋិតស្សាតិ តស្មិំ ហត្ថបាទកុក្កុច្ចរហិតេ ពុទ្ធមុនិស្មិំ អវដ្ឋិតស្ស។ វោស្សជ្ជ ចរេយ្យ តត្ថ សោតិ ឥមិនា ភគវា តំ ព្យាករមានោ វិភិំសិតា ពុទ្ធានំ កិំ ករិស្សតិ ភយាភាវតោ? កេវលំ បន អនដ្ឋវលិកំ ឧប្បីឡេន្តោ វិយ ត្វមេវ អាយាសំ អាបជ្ជិស្សសីតិ មារំ សន្តជ្ជេតិ។
Seyyatthāyāti seyyānisaṃsāya. Tenāha ‘‘ṭhassāmī’’tiādi. Attasaññatoti attabhāvena saṃyato. Tenāha ‘‘saṃyatattabhāvo’’ti. Taṃsaṇṭhitassāti tasmiṃ hatthapādakukkuccarahite buddhamunismiṃ avaṭṭhitassa. Vossajja careyya tattha soti iminā bhagavā taṃ byākaramāno vibhiṃsitā buddhānaṃ kiṃ karissati bhayābhāvato? Kevalaṃ pana anaṭṭhavalikaṃ uppīḷento viya tvameva āyāsaṃ āpajjissasīti māraṃ santajjeti.
ភេរវាតិ អវីតរាគានំ ភយជនកា។ តត្ថាតិ តំនិមិត្តំ។ ផលេយ្យាតិ ភិជ្ជេយ្យ។ សត្តិសល្លន្តិ សត្តិសង្ខាតំ បុថុសល្លំ។ ឧរស្មិំ ចារយេយ្យុន្តិ ផាសុំ វិជ្ឈិតុំ ឋបេយ្យុំ ឧគ្គិរេយ្យុំ។ ខន្ធុបធីសូតិ ខន្ធសង្ខាតេសុ ឧបធីសុ។ តាណំ ករោន្តិ នាមាតិ តតោ ភយនិមិត្តតោ អត្តនោ តាណំ ករោន្តិ នាម។
Bheravāti avītarāgānaṃ bhayajanakā. Tatthāti taṃnimittaṃ. Phaleyyāti bhijjeyya. Sattisallanti sattisaṅkhātaṃ puthusallaṃ. Urasmiṃ cārayeyyunti phāsuṃ vijjhituṃ ṭhapeyyuṃ uggireyyuṃ. Khandhupadhīsūti khandhasaṅkhātesu upadhīsu. Tāṇaṃ karonti nāmāti tato bhayanimittato attano tāṇaṃ karonti nāma.
សប្បសុត្តវណ្ណនា និដ្ឋិតា។
Sappasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៦. សប្បសុត្តំ • 6. Sappasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. សប្បសុត្តវណ្ណនា • 6. Sappasuttavaṇṇanā
