| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. သပ္ပသုတ္တဝဏ္ဏနာ
6. Sappasuttavaṇṇanā
၁၄၂. သုရာကာရကာနန္တိ ပိဋ္ဌသုရာယောဇနကာနံ။ ကောသလာနံ ဣသ္သရောတိ ကောသလော, ကောသလရာဇသ္သ အယန္တိ ကောသလိကာ။ ပရိဘောဂပာတီတိ ဘတ္တပရိဘောဇနတ္ထာယ ပာတိ ပရိဘောဂပာတိ။ ကမ္မာရုဒ္ဓနပဏာဠိယာတိ ကမ္မာရုဒ္ဓနပဏာဠိမုခေ။ ဓမမာနာယာတိ ဓမိယမာနာယ။ တံ ပန ယသ္မာ ဘသ္တဝာတေဟိ ပူရိတံ နာမ ဟောတိ, တသ္မာ ‘‘ဘသ္တဝာတေန ပူရိယမာနာယာ’’တိ ဝုတ္တံ။ နိယာမဘူမိယန္တိ ဘဂဝတော ပဋိသလ္လာနဋ္ဌာနေ သဉ္စရန္တံ မာရံ မံသစက္ခုနာဝ ဒိသ္ဝာ။ တေနာဟ ‘‘ဝိဇ္ဇုလတာလောကေနာ’’တိ။
142.Surākārakānanti piṭṭhasurāyojanakānaṃ. Kosalānaṃ issaroti kosalo, kosalarājassa ayanti kosalikā. Paribhogapātīti bhattaparibhojanatthāya pāti paribhogapāti. Kammāruddhanapaṇāḷiyāti kammāruddhanapaṇāḷimukhe. Dhamamānāyāti dhamiyamānāya. Taṃ pana yasmā bhastavātehi pūritaṃ nāma hoti, tasmā ‘‘bhastavātena pūriyamānāyā’’ti vuttaṃ. Niyāmabhūmiyanti bhagavato paṭisallānaṭṭhāne sañcarantaṃ māraṃ maṃsacakkhunāva disvā. Tenāha ‘‘vijjulatālokenā’’ti.
သေယ္ယတ္ထာယာတိ သေယ္ယာနိသံသာယ။ တေနာဟ ‘‘ဌသ္သာမီ’’တိအာဒိ။ အတ္တသညတောတိ အတ္တဘာဝေန သံယတော။ တေနာဟ ‘‘သံယတတ္တဘာဝော’’တိ။ တံသဏ္ဌိတသ္သာတိ တသ္မိံ ဟတ္ထပာဒကုက္ကုစ္စရဟိတေ ဗုဒ္ဓမုနိသ္မိံ အဝဋ္ဌိတသ္သ။ ဝောသ္သဇ္ဇ စရေယ္ယ တတ္ထ သောတိ ဣမိနာ ဘဂဝာ တံ ဗ္ယာကရမာနော ဝိဘိံသိတာ ဗုဒ္ဓာနံ ကိံ ကရိသ္သတိ ဘယာဘာဝတော? ကေဝလံ ပန အနဋ္ဌဝလိကံ ဥပ္ပီဠေန္တော ဝိယ တ္ဝမေဝ အာယာသံ အာပဇ္ဇိသ္သသီတိ မာရံ သန္တဇ္ဇေတိ။
Seyyatthāyāti seyyānisaṃsāya. Tenāha ‘‘ṭhassāmī’’tiādi. Attasaññatoti attabhāvena saṃyato. Tenāha ‘‘saṃyatattabhāvo’’ti. Taṃsaṇṭhitassāti tasmiṃ hatthapādakukkuccarahite buddhamunismiṃ avaṭṭhitassa. Vossajja careyya tattha soti iminā bhagavā taṃ byākaramāno vibhiṃsitā buddhānaṃ kiṃ karissati bhayābhāvato? Kevalaṃ pana anaṭṭhavalikaṃ uppīḷento viya tvameva āyāsaṃ āpajjissasīti māraṃ santajjeti.
ဘေရဝာတိ အဝီတရာဂာနံ ဘယဇနကာ။ တတ္ထာတိ တံနိမိတ္တံ။ ဖလေယ္ယာတိ ဘိဇ္ဇေယ္ယ။ သတ္တိသလ္လန္တိ သတ္တိသင္ခာတံ ပုထုသလ္လံ။ ဥရသ္မိံ စာရယေယ္ယုန္တိ ဖာသုံ ဝိဇ္ဈိတုံ ဌပေယ္ယုံ ဥဂ္ဂိရေယ္ယုံ။ ခန္ဓုပဓီသူတိ ခန္ဓသင္ခာတေသု ဥပဓီသု။ တာဏံ ကရောန္တိ နာမာတိ တတော ဘယနိမိတ္တတော အတ္တနော တာဏံ ကရောန္တိ နာမ။
Bheravāti avītarāgānaṃ bhayajanakā. Tatthāti taṃnimittaṃ. Phaleyyāti bhijjeyya. Sattisallanti sattisaṅkhātaṃ puthusallaṃ. Urasmiṃ cārayeyyunti phāsuṃ vijjhituṃ ṭhapeyyuṃ uggireyyuṃ. Khandhupadhīsūti khandhasaṅkhātesu upadhīsu. Tāṇaṃ karonti nāmāti tato bhayanimittato attano tāṇaṃ karonti nāma.
သပ္ပသုတ္တဝဏ္ဏနာ နိဋ္ဌိတာ။
Sappasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. သပ္ပသုတ္တံ • 6. Sappasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. သပ္ပသုတ္တဝဏ္ဏနာ • 6. Sappasuttavaṇṇanā
