| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
6. සප්‌පසුත්‌තවණ්‌ණනා
6. Sappasuttavaṇṇanā
142. සුරාකාරකානන්‌ති පිට්‌ඨසුරායොජනකානං. කොසලානං ඉස්‌සරොති කොසලො, කොසලරාජස්‌ස අයන්‌ති කොසලිකා. පරිභොගපාතීති භත්‌තපරිභොජනත්‌ථාය පාති පරිභොගපාති. කම්‌මාරුද්‌ධනපණාළියාති කම්‌මාරුද්‌ධනපණාළිමුඛෙ. ධමමානායාති ධමියමානාය. තං පන යස්‌මා භස්‌තවාතෙහි පූරිතං නාම හොති, තස්‌මා ‘‘භස්‌තවාතෙන පූරියමානායා’’ති වුත්‌තං. නියාමභූමියන්‌ති භගවතො පටිසල්‌ලානට්‌ඨානෙ සඤ්‌චරන්‌තං මාරං මංසචක්‌ඛුනාව දිස්‌වා. තෙනාහ ‘‘විජ්‌ජුලතාලොකෙනා’’ති.
142.Surākārakānanti piṭṭhasurāyojanakānaṃ. Kosalānaṃ issaroti kosalo, kosalarājassa ayanti kosalikā. Paribhogapātīti bhattaparibhojanatthāya pāti paribhogapāti. Kammāruddhanapaṇāḷiyāti kammāruddhanapaṇāḷimukhe. Dhamamānāyāti dhamiyamānāya. Taṃ pana yasmā bhastavātehi pūritaṃ nāma hoti, tasmā ‘‘bhastavātena pūriyamānāyā’’ti vuttaṃ. Niyāmabhūmiyanti bhagavato paṭisallānaṭṭhāne sañcarantaṃ māraṃ maṃsacakkhunāva disvā. Tenāha ‘‘vijjulatālokenā’’ti.
සෙය්‍යත්‌ථායාති සෙය්‍යානිසංසාය. තෙනාහ ‘‘ඨස්‌සාමී’’තිආදි. අත්‌තසඤ්‌ඤතොති අත්‌තභාවෙන සංයතො. තෙනාහ ‘‘සංයතත්‌තභාවො’’ති. තංසණ්‌ඨිතස්‌සාති තස්‌මිං හත්‌ථපාදකුක්‌කුච්‌චරහිතෙ බුද්‌ධමුනිස්‌මිං අවට්‌ඨිතස්‌ස. වොස්‌සජ්‌ජ චරෙය්‍ය තත්‌ථ සොති ඉමිනා භගවා තං බ්‍යාකරමානො විභිංසිතා බුද්‌ධානං කිං කරිස්‌සති භයාභාවතො? කෙවලං පන අනට්‌ඨවලිකං උප්‌පීළෙන්‌තො විය ත්‌වමෙව ආයාසං ආපජ්‌ජිස්‌සසීති මාරං සන්‌තජ්‌ජෙති.
Seyyatthāyāti seyyānisaṃsāya. Tenāha ‘‘ṭhassāmī’’tiādi. Attasaññatoti attabhāvena saṃyato. Tenāha ‘‘saṃyatattabhāvo’’ti. Taṃsaṇṭhitassāti tasmiṃ hatthapādakukkuccarahite buddhamunismiṃ avaṭṭhitassa. Vossajja careyya tattha soti iminā bhagavā taṃ byākaramāno vibhiṃsitā buddhānaṃ kiṃ karissati bhayābhāvato? Kevalaṃ pana anaṭṭhavalikaṃ uppīḷento viya tvameva āyāsaṃ āpajjissasīti māraṃ santajjeti.
භෙරවාති අවීතරාගානං භයජනකා. තත්‌ථාති තංනිමිත්‌තං. ඵලෙය්‍යාති භිජ්‌ජෙය්‍ය. සත්‌තිසල්‌ලන්‌ති සත්‌තිසඞ්‌ඛාතං පුථුසල්‌ලං. උරස්‌මිං චාරයෙය්‍යුන්‌ති ඵාසුං විජ්‌ඣිතුං ඨපෙය්‍යුං උග්‌ගිරෙය්‍යුං. ඛන්‌ධුපධීසූති ඛන්‌ධසඞ්‌ඛාතෙසු උපධීසු. තාණං කරොන්‌ති නාමාති තතො භයනිමිත්‌තතො අත්‌තනො තාණං කරොන්‌ති නාම.
Bheravāti avītarāgānaṃ bhayajanakā. Tatthāti taṃnimittaṃ. Phaleyyāti bhijjeyya. Sattisallanti sattisaṅkhātaṃ puthusallaṃ. Urasmiṃ cārayeyyunti phāsuṃ vijjhituṃ ṭhapeyyuṃ uggireyyuṃ. Khandhupadhīsūti khandhasaṅkhātesu upadhīsu. Tāṇaṃ karonti nāmāti tato bhayanimittato attano tāṇaṃ karonti nāma.
සප්‌පසුත්‌තවණ්‌ණනා නිට්‌ඨිතා.
Sappasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. සප්‌පසුත්‌තං • 6. Sappasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. සප්‌පසුත්‌තවණ්‌ණනා • 6. Sappasuttavaṇṇanā
