| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੬. ਸਪ੍ਪਸੁਤ੍ਤવਣ੍ਣਨਾ
6. Sappasuttavaṇṇanā
੧੪੨. ਛਟ੍ਠੇ ਸੋਣ੍ਡਿਕਾਕਿਲਞ੍ਜਨ੍ਤਿ ਸੁਰਾਕਾਰਕਾਨਂ ਪਿਟ੍ਠਪਤ੍ਥਰਣਕਕਿਲਞ੍ਜਂ। ਕੋਸਲਿਕਾ ਕਂਸਪਾਤੀਤਿ ਕੋਸਲਰਞ੍ਞੋ ਰਥਚਕ੍ਕਪ੍ਪਮਾਣਾ ਪਰਿਭੋਗਪਾਤਿ । ਗਲ਼ਗਲ਼ਾਯਨ੍ਤੇਤਿ ਗਜ੍ਜਨ੍ਤੇ। ਕਮ੍ਮਾਰਗਗ੍ਗਰਿਯਾਤਿ ਕਮ੍ਮਾਰੁਦ੍ਧਨਪਣਾਲ਼ਿਯਾ। ਧਮਮਾਨਾਯਾਤਿ ਭਸ੍ਤવਾਤੇਨ ਪੂਰਿਯਮਾਨਾਯ। ਇਤਿ વਿਦਿਤ੍વਾਤਿ – ‘‘ਸਮਣੋ ਗੋਤਮੋ ਪਧਾਨਮਨੁਯੁਤ੍ਤੋ ਸੁਖੇਨ ਨਿਸਿਨ੍ਨੋ, ਘਟ੍ਟਯਿਸ੍ਸਾਮਿ ਨ’’ਨ੍ਤਿ વੁਤ੍ਤਪ੍ਪਕਾਰਂ ਅਤ੍ਤਭਾવਂ ਮਾਪੇਤ੍વਾ ਨਿਯਾਮਭੂਮਿਯਂ ਇਤੋ ਚਿਤੋ ਚ ਸਞ੍ਚਰਨ੍ਤਂ વਿਜ੍ਜੁਲਤਾਲੋਕੇਨ ਦਿਸ੍વਾ, ‘‘ਕੋ ਨੁ ਖੋ ਏਸੋ ਸਤ੍ਤੋ’’ਤਿ? ਆવਜ੍ਜੇਨ੍ਤੋ, ‘‘ਮਾਰੋ ਅਯ’’ਨ੍ਤਿ ਏવਂ વਿਦਿਤ੍વਾ।
142. Chaṭṭhe soṇḍikākilañjanti surākārakānaṃ piṭṭhapattharaṇakakilañjaṃ. Kosalikā kaṃsapātīti kosalarañño rathacakkappamāṇā paribhogapāti . Gaḷagaḷāyanteti gajjante. Kammāragaggariyāti kammāruddhanapaṇāḷiyā. Dhamamānāyāti bhastavātena pūriyamānāya. Iti viditvāti – ‘‘samaṇo gotamo padhānamanuyutto sukhena nisinno, ghaṭṭayissāmi na’’nti vuttappakāraṃ attabhāvaṃ māpetvā niyāmabhūmiyaṃ ito cito ca sañcarantaṃ vijjulatālokena disvā, ‘‘ko nu kho eso satto’’ti? Āvajjento, ‘‘māro aya’’nti evaṃ viditvā.
ਸੁਞ੍ਞਗੇਹਾਨੀਤਿ ਸੁਞ੍ਞਾਗਾਰਾਨਿ। ਸੇਯ੍ਯਾਤਿ ਸੇਯ੍ਯਤ੍ਥਾਯ। ਠਸ੍ਸਾਮਿ ਚਙ੍ਕਮਿਸ੍ਸਾਮਿ ਨਿਸੀਦਿਸ੍ਸਾਮਿ ਨਿਪਜ੍ਜਿਸ੍ਸਾਮੀਤਿ ਏਤਦਤ੍ਥਾਯ ਯੋ ਸੁਞ੍ਞਾਗਾਰਾਨਿ ਸੇવਤੀਤਿ ਅਤ੍ਥੋ। ਸੋ ਮੁਨਿ ਅਤ੍ਤਸਞ੍ਞਤੋਤਿ ਸੋ ਬੁਦ੍ਧਮੁਨਿ ਹਤ੍ਥਪਾਦਕੁਕ੍ਕੁਚ੍ਚਾਭਾવੇਨ ਸਂਯਤਤ੍ਤਭਾવੋ। વੋਸ੍ਸਜ੍ਜ ਚਰੇਯ੍ਯ ਤਤ੍ਥ ਸੋਤਿ ਸੋ ਤਸ੍ਮਿਂ ਅਤ੍ਤਭਾવੇ ਆਲਯਂ ਨਿਕਨ੍ਤਿਂ વੋਸ੍ਸਜ੍ਜਿਤ੍વਾ ਪਹਾਯ ਚਰੇਯ੍ਯ। ਪਤਿਰੂਪਂ ਹਿ ਤਥਾવਿਧਸ੍ਸ ਤਨ੍ਤਿ ਤਾਦਿਸਸ੍ਸ ਤਂਸਣ੍ਠਿਤਸ੍ਸ ਬੁਦ੍ਧਮੁਨਿਨੋ ਤਂ ਅਤ੍ਤਭਾવੇ ਨਿਕਨ੍ਤਿਂ વੋਸ੍ਸਜ੍ਜਿਤ੍વਾ ਚਰਣਂ ਨਾਮ ਪਤਿਰੂਪਂ ਯੁਤ੍ਤਂ ਅਨੁਚ੍ਛવਿਕਂ।
Suññagehānīti suññāgārāni. Seyyāti seyyatthāya. Ṭhassāmi caṅkamissāmi nisīdissāmi nipajjissāmīti etadatthāya yo suññāgārāni sevatīti attho. So muni attasaññatoti so buddhamuni hatthapādakukkuccābhāvena saṃyatattabhāvo. Vossajja careyya tattha soti so tasmiṃ attabhāve ālayaṃ nikantiṃ vossajjitvā pahāya careyya. Patirūpaṃ hi tathāvidhassa tanti tādisassa taṃsaṇṭhitassa buddhamunino taṃ attabhāve nikantiṃ vossajjitvā caraṇaṃ nāma patirūpaṃ yuttaṃ anucchavikaṃ.
ਚਰਕਾਤਿ ਸੀਹਬ੍ਯਗ੍ਘਾਦਿਕਾ ਸਞ੍ਚਰਣਸਤ੍ਤਾ। ਭੇਰવਾਤਿ ਸવਿਞ੍ਞਾਣਕਅવਿਞ੍ਞਾਣਕਭੇਰવਾ। ਤਤ੍ਥ ਸવਿਞ੍ਞਾਣਕਾ ਸੀਹਬ੍ਯਗ੍ਘਾਦਯੋ, ਅવਿਞ੍ਞਾਣਕਾ ਰਤ੍ਤਿਭਾਗੇ ਖਾਣੁવਮ੍ਮਿਕਾਦਯੋ। ਤੇਪਿ ਹਿ ਤਸ੍ਮਿਂ ਕਾਲੇ ਯਕ੍ਖਾ વਿਯ ਉਪਟ੍ਠਹਨ੍ਤਿ, ਰਜ੍ਜੁવਲ੍ਲਿਯਾਦੀਨਿ ਸਬ੍ਬਾਨਿ ਸਪ੍ਪਾ વਿਯ ਉਪਟ੍ਠਹਨ੍ਤਿ। ਤਤ੍ਥਾਤਿ ਤੇਸੁ ਭੇਰવੇਸੁ ਸੁਞ੍ਞਾਗਾਰਗਤੋ ਬੁਦ੍ਧਮੁਨਿ ਲੋਮਚਲਨਮਤ੍ਤਕਮ੍ਪਿ ਨ ਕਰੋਤਿ।
Carakāti sīhabyagghādikā sañcaraṇasattā. Bheravāti saviññāṇakaaviññāṇakabheravā. Tattha saviññāṇakā sīhabyagghādayo, aviññāṇakā rattibhāge khāṇuvammikādayo. Tepi hi tasmiṃ kāle yakkhā viya upaṭṭhahanti, rajjuvalliyādīni sabbāni sappā viya upaṭṭhahanti. Tatthāti tesu bheravesu suññāgāragato buddhamuni lomacalanamattakampi na karoti.
ਇਦਾਨਿ ਅਟ੍ਠਾਨਪਰਿਕਪ੍ਪਂ ਦਸ੍ਸੇਨ੍ਤੋ ਨਭਂ ਫਲੇਯ੍ਯਾਤਿਆਦਿਮਾਹ। ਤਤ੍ਥ ਫਲੇਯ੍ਯਾਤਿ ਕਾਕਪਦਂ વਿਯ ਹੀਰਹੀਰਸੋ ਫਲੇਯ੍ਯ। ਚਲੇਯ੍ਯਾਤਿ ਪੋਕ੍ਖਰਪਤ੍ਤੇ વਾਤਾਹਤੋ ਉਦਕਬਿਨ੍ਦੁ વਿਯ ਚਲੇਯ੍ਯ। ਸਲ੍ਲਮ੍ਪਿ ਚੇ ਉਰਸਿ ਪਕਪ੍ਪਯੇਯ੍ਯੁਨ੍ਤਿ ਤਿਖਿਣਸਤ੍ਤਿਸਲ੍ਲਂ ਚੇਪਿ ਉਰਸ੍ਮਿਂ ਚਾਰੇਯੇਯ੍ਯੁਂ। ਉਪਧੀਸੂਤਿ ਖਨ੍ਧੂਪਧੀਸੁ। ਤਾਣਂ ਨ ਕਰੋਨ੍ਤੀਤਿ ਤਿਖਿਣੇ ਸਲ੍ਲੇ ਉਰਸ੍ਮਿਂ ਚਾਰਿਯਮਾਨੇ ਭਯੇਨ ਗੁਮ੍ਬਨ੍ਤਰਕਨ੍ਦਰਾਦੀਨਿ ਪવਿਸਨ੍ਤਾ ਤਾਣਂ ਕਰੋਨ੍ਤਿ ਨਾਮ। ਬੁਦ੍ਧਾ ਪਨ ਸਮੁਚ੍ਛਿਨ੍ਨਸਬ੍ਬਭਯਾ ਏવਰੂਪਂ ਤਾਣਂ ਨਾਮ ਨ ਕਰੋਨ੍ਤਿ। ਛਟ੍ਠਂ।
Idāni aṭṭhānaparikappaṃ dassento nabhaṃ phaleyyātiādimāha. Tattha phaleyyāti kākapadaṃ viya hīrahīraso phaleyya. Caleyyāti pokkharapatte vātāhato udakabindu viya caleyya. Sallampi ce urasi pakappayeyyunti tikhiṇasattisallaṃ cepi urasmiṃ cāreyeyyuṃ. Upadhīsūti khandhūpadhīsu. Tāṇaṃ na karontīti tikhiṇe salle urasmiṃ cāriyamāne bhayena gumbantarakandarādīni pavisantā tāṇaṃ karonti nāma. Buddhā pana samucchinnasabbabhayā evarūpaṃ tāṇaṃ nāma na karonti. Chaṭṭhaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੬. ਸਪ੍ਪਸੁਤ੍ਤਂ • 6. Sappasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੬. ਸਪ੍ਪਸੁਤ੍ਤવਣ੍ਣਨਾ • 6. Sappasuttavaṇṇanā
