| Library / Tipiṭaka / තිපිටක • Tipiṭaka / අපදානපාළි • Apadānapāḷi |
9. සප්‌පිදායකත්‌ථෙරඅපදානං
9. Sappidāyakattheraapadānaṃ
44.
44.
‘‘නිසින්‌නො පාසාදවරෙ, නාරීගණපුරක්‌ඛතො;
‘‘Nisinno pāsādavare, nārīgaṇapurakkhato;
බ්‍යාධිතං සමණං දිස්‌වා, අභිනාමෙසහං ඝරං.
Byādhitaṃ samaṇaṃ disvā, abhināmesahaṃ gharaṃ.
45.
45.
‘‘උපවිට්‌ඨං මහාවීරං, දෙවදෙවං නරාසභං;
‘‘Upaviṭṭhaṃ mahāvīraṃ, devadevaṃ narāsabhaṃ;
සප්‌පිතෙලං මයා දින්‌නං, සිද්‌ධත්‌ථස්‌ස මහෙසිනො.
Sappitelaṃ mayā dinnaṃ, siddhatthassa mahesino.
46.
46.
‘‘පස්‌සද්‌ධදරථං දිස්‌වා, විප්‌පසන්‌නමුඛින්‌ද්‍රියං;
‘‘Passaddhadarathaṃ disvā, vippasannamukhindriyaṃ;
වන්‌දිත්‌වා සත්‌ථුනො පාදෙ, අනුසංසාවයිං පුරෙ.
Vanditvā satthuno pāde, anusaṃsāvayiṃ pure.
47.
47.
‘‘දිස්‌වා මං සුප්‌පසන්‌නත්‌තං 1, ඉද්‌ධියා පාරමිඞ්‌ගතො;
‘‘Disvā maṃ suppasannattaṃ 2, iddhiyā pāramiṅgato;
නභං අබ්‌භුග්‌ගමී ධීරො, හංසරාජාව අම්‌බරෙ.
Nabhaṃ abbhuggamī dhīro, haṃsarājāva ambare.
48.
48.
‘‘චතුන්‌නවුතිතො කප්‌පෙ, යං දානමදදිං තදා;
‘‘Catunnavutito kappe, yaṃ dānamadadiṃ tadā;
දුග්‌ගතිං නාභිජානාමි, සප්‌පිතෙලස්‌සිදං ඵලං.
Duggatiṃ nābhijānāmi, sappitelassidaṃ phalaṃ.
49.
49.
සත්‌තරතනසම්‌පන්‌නො, චක්‌කවත්‌තී මහබ්‌බලො.
Sattaratanasampanno, cakkavattī mahabbalo.
50.
50.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා සප්‌පිදායකො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā sappidāyako thero imā gāthāyo abhāsitthāti.
සප්‌පිදායකත්‌ථෙරස්‌සාපදානං නවමං.
Sappidāyakattherassāpadānaṃ navamaṃ.
Footnotes:
