| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. ஸப்பிதா³யகத்தே²ரஅபதா³னவண்ணனா
6. Sappidāyakattheraapadānavaṇṇanā
பு²ஸ்ஸோ நாமாத² ப⁴க³வாதிஆதி³கங் ஆயஸ்மதோ ஸப்பிதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ பு²ஸ்ஸஸ்ஸ ப⁴க³வதோ காலே குலகே³ஹே நிப்³ப³த்தோ அஹோஸி. ததா³ ப⁴க³வா பி⁴க்கு²ஸங்க⁴பரிவுதோ வீதி²யங் சரமானோ தஸ்ஸ உபாஸகஸ்ஸ கே³ஹத்³வாரங் ஸம்பாபுணி. அத² ஸோ உபாஸகோ ப⁴க³வந்தங் தி³ஸ்வா பஸன்னமானஸோ வந்தி³த்வா பத்தபூரங் ஸப்பிதேலங் அதா³ஸி, ப⁴க³வா அனுமோத³னங் கத்வா பக்காமி. ஸோ தேனேவ ஸோமனஸ்ஸேன யாவதாயுகங் ட²த்வா ததோ சுதோ தேன புஞ்ஞேன தே³வலோகே உப்பன்னோ தத்த² தி³ப்³ப³ஸுக²ங் அனுப⁴வித்வா மனுஸ்ஸேஸு ச நிப்³ப³த்தோ உப்பன்னுப்பன்னப⁴வே ஸப்பிதேலமது⁴பா²ணிதாதி³மது⁴ராஹாரஸமங்கீ³ ஸுக²ங் அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் ஏகஸ்மிங் குலே நிப்³ப³த்தோ வுத்³தி⁴ப்பத்தோ ஸத்³தோ⁴ பு³த்³தி⁴ஸம்பன்னோ ஸத்து² த⁴ம்மதே³ஸனங் ஸுத்வா பஸன்னமானஸோ பப்³ப³ஜித்வா வத்தஸம்பன்னோ நசிரஸ்ஸேவ அரஹா அஹோஸி.
Phussonāmātha bhagavātiādikaṃ āyasmato sappidāyakattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto phussassa bhagavato kāle kulagehe nibbatto ahosi. Tadā bhagavā bhikkhusaṅghaparivuto vīthiyaṃ caramāno tassa upāsakassa gehadvāraṃ sampāpuṇi. Atha so upāsako bhagavantaṃ disvā pasannamānaso vanditvā pattapūraṃ sappitelaṃ adāsi, bhagavā anumodanaṃ katvā pakkāmi. So teneva somanassena yāvatāyukaṃ ṭhatvā tato cuto tena puññena devaloke uppanno tattha dibbasukhaṃ anubhavitvā manussesu ca nibbatto uppannuppannabhave sappitelamadhuphāṇitādimadhurāhārasamaṅgī sukhaṃ anubhavitvā imasmiṃ buddhuppāde sāvatthiyaṃ ekasmiṃ kule nibbatto vuddhippatto saddho buddhisampanno satthu dhammadesanaṃ sutvā pasannamānaso pabbajitvā vattasampanno nacirasseva arahā ahosi.
28. ஸோ அத்தனோ புப்³ப³கம்மங் ஸரித்வா ஜாதஸோமனஸ்ஸோ புப்³ப³சரிதாபதா³னங் பகாஸெந்தோ பு²ஸ்ஸோ நாமாத² ப⁴க³வாதிஆதி³மாஹ. தத்த² பு²ஸ்ஸோதி பு²ஸ்ஸனக்க²த்தயோகே³ன ஜாதத்தா மாதாபிதூஹி கதனாமதெ⁴ய்யேன பு²ஸ்ஸோ. அத² வா நிப்³பா³னங் பு²ஸி பஸ்ஸி ஸச்சி² அகாஸீதி பு²ஸ்ஸோ. அத² வா ஸமதிங்ஸபாரமிதாஸத்ததிங்ஸபோ³தி⁴பக்கி²யத⁴ம்மே ஸகலே ச தேபிடகே பரியத்தித⁴ம்மே பு²ஸி பஸ்ஸி அஞ்ஞாஸீதி பு²ஸ்ஸோ. ப⁴க்³க³வா ப⁴க்³யவா யுத்தோதிஆதி³புஞ்ஞகொட்டா²ஸஸமங்கி³தாய ப⁴க³வா. ஆஹுதீனங் படிக்³க³ஹோதி ஆஹுதினோ வுச்சந்தி பூஜாஸக்காரா, தேஸங் ஆஹுதீனங் படிக்³க³ஹேதுங் அரஹதீதி ஆஹுதீனங் படிக்³க³ஹோ. மஹாஜனங் நிப்³பா³பெந்தோ வீரோ பு²ஸ்ஸோ நாம ப⁴க³வா வீதி²யங் அத² ததா³ க³ச்ச²தேதி ஸம்ப³ந்தோ⁴. ஸேஸங் பாகடமேவாதி.
28. So attano pubbakammaṃ saritvā jātasomanasso pubbacaritāpadānaṃ pakāsento phusso nāmātha bhagavātiādimāha. Tattha phussoti phussanakkhattayogena jātattā mātāpitūhi katanāmadheyyena phusso. Atha vā nibbānaṃ phusi passi sacchi akāsīti phusso. Atha vā samatiṃsapāramitāsattatiṃsabodhipakkhiyadhamme sakale ca tepiṭake pariyattidhamme phusi passi aññāsīti phusso. Bhaggavā bhagyavā yuttotiādipuññakoṭṭhāsasamaṅgitāya bhagavā. Āhutīnaṃ paṭiggahoti āhutino vuccanti pūjāsakkārā, tesaṃ āhutīnaṃ paṭiggahetuṃ arahatīti āhutīnaṃ paṭiggaho. Mahājanaṃ nibbāpento vīro phusso nāma bhagavā vīthiyaṃ atha tadā gacchateti sambandho. Sesaṃ pākaṭamevāti.
ஸப்பிதா³யகத்தே²ரஅபதா³னவண்ணனா ஸமத்தா.
Sappidāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. ஸப்பிதா³யகத்தே²ரஅபதா³னங் • 6. Sappidāyakattheraapadānaṃ
