| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৬. সপ্পিদাযকত্থেরঅপদানৰণ্ণনা
6. Sappidāyakattheraapadānavaṇṇanā
ফুস্সো নামাথ ভগৰাতিআদিকং আযস্মতো সপ্পিদাযকত্থেরস্স অপদানং। অযম্পি পুরিমবুদ্ধেসু কতাধিকারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে কুলগেহে নিব্বত্তো অহোসি। তদা ভগৰা ভিক্খুসঙ্ঘপরিৰুতো ৰীথিযং চরমানো তস্স উপাসকস্স গেহদ্ৰারং সম্পাপুণি। অথ সো উপাসকো ভগৰন্তং দিস্ৰা পসন্নমানসো ৰন্দিত্ৰা পত্তপূরং সপ্পিতেলং অদাসি, ভগৰা অনুমোদনং কত্ৰা পক্কামি। সো তেনেৰ সোমনস্সেন যাৰতাযুকং ঠত্ৰা ততো চুতো তেন পুঞ্ঞেন দেৰলোকে উপ্পন্নো তত্থ দিব্বসুখং অনুভৰিত্ৰা মনুস্সেসু চ নিব্বত্তো উপ্পন্নুপ্পন্নভৰে সপ্পিতেলমধুফাণিতাদিমধুরাহারসমঙ্গী সুখং অনুভৰিত্ৰা ইমস্মিং বুদ্ধুপ্পাদে সাৰত্থিযং একস্মিং কুলে নিব্বত্তো ৰুদ্ধিপ্পত্তো সদ্ধো বুদ্ধিসম্পন্নো সত্থু ধম্মদেসনং সুত্ৰা পসন্নমানসো পব্বজিত্ৰা ৰত্তসম্পন্নো নচিরস্সেৰ অরহা অহোসি।
Phussonāmātha bhagavātiādikaṃ āyasmato sappidāyakattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto phussassa bhagavato kāle kulagehe nibbatto ahosi. Tadā bhagavā bhikkhusaṅghaparivuto vīthiyaṃ caramāno tassa upāsakassa gehadvāraṃ sampāpuṇi. Atha so upāsako bhagavantaṃ disvā pasannamānaso vanditvā pattapūraṃ sappitelaṃ adāsi, bhagavā anumodanaṃ katvā pakkāmi. So teneva somanassena yāvatāyukaṃ ṭhatvā tato cuto tena puññena devaloke uppanno tattha dibbasukhaṃ anubhavitvā manussesu ca nibbatto uppannuppannabhave sappitelamadhuphāṇitādimadhurāhārasamaṅgī sukhaṃ anubhavitvā imasmiṃ buddhuppāde sāvatthiyaṃ ekasmiṃ kule nibbatto vuddhippatto saddho buddhisampanno satthu dhammadesanaṃ sutvā pasannamānaso pabbajitvā vattasampanno nacirasseva arahā ahosi.
২৮. সো অত্তনো পুব্বকম্মং সরিত্ৰা জাতসোমনস্সো পুব্বচরিতাপদানং পকাসেন্তো ফুস্সো নামাথ ভগৰাতিআদিমাহ। তত্থ ফুস্সোতি ফুস্সনক্খত্তযোগেন জাতত্তা মাতাপিতূহি কতনামধেয্যেন ফুস্সো। অথ ৰা নিব্বানং ফুসি পস্সি সচ্ছি অকাসীতি ফুস্সো। অথ ৰা সমতিংসপারমিতাসত্ততিংসবোধিপক্খিযধম্মে সকলে চ তেপিটকে পরিযত্তিধম্মে ফুসি পস্সি অঞ্ঞাসীতি ফুস্সো। ভগ্গৰা ভগ্যৰা যুত্তোতিআদিপুঞ্ঞকোট্ঠাসসমঙ্গিতায ভগৰা। আহুতীনং পটিগ্গহোতি আহুতিনো ৰুচ্চন্তি পূজাসক্কারা, তেসং আহুতীনং পটিগ্গহেতুং অরহতীতি আহুতীনং পটিগ্গহো। মহাজনং নিব্বাপেন্তো ৰীরো ফুস্সো নাম ভগৰা ৰীথিযং অথ তদা গচ্ছতেতি সম্বন্ধো। সেসং পাকটমেৰাতি।
28. So attano pubbakammaṃ saritvā jātasomanasso pubbacaritāpadānaṃ pakāsento phusso nāmātha bhagavātiādimāha. Tattha phussoti phussanakkhattayogena jātattā mātāpitūhi katanāmadheyyena phusso. Atha vā nibbānaṃ phusi passi sacchi akāsīti phusso. Atha vā samatiṃsapāramitāsattatiṃsabodhipakkhiyadhamme sakale ca tepiṭake pariyattidhamme phusi passi aññāsīti phusso. Bhaggavā bhagyavā yuttotiādipuññakoṭṭhāsasamaṅgitāya bhagavā. Āhutīnaṃ paṭiggahoti āhutino vuccanti pūjāsakkārā, tesaṃ āhutīnaṃ paṭiggahetuṃ arahatīti āhutīnaṃ paṭiggaho. Mahājanaṃ nibbāpento vīro phusso nāma bhagavā vīthiyaṃ atha tadā gacchateti sambandho. Sesaṃ pākaṭamevāti.
সপ্পিদাযকত্থেরঅপদানৰণ্ণনা সমত্তা।
Sappidāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৬. সপ্পিদাযকত্থেরঅপদানং • 6. Sappidāyakattheraapadānaṃ
