| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၆. သပ္ပိဒာယကတ္ထေရအပဒာနဝဏ္ဏနာ
6. Sappidāyakattheraapadānavaṇṇanā
ဖုသ္သော နာမာထ ဘဂဝာတိအာဒိကံ အာယသ္မတော သပ္ပိဒာယကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော အနေကေသု ဘဝေသု ဝိဝဋ္ဋူပနိသ္သယာနိ ပုညာနိ ဥပစိနန္တော ဖုသ္သသ္သ ဘဂဝတော ကာလေ ကုလဂေဟေ နိဗ္ဗတ္တော အဟောသိ။ တဒာ ဘဂဝာ ဘိက္ခုသင္ဃပရိဝုတော ဝီထိယံ စရမာနော တသ္သ ဥပာသကသ္သ ဂေဟဒ္ဝာရံ သမ္ပာပုဏိ။ အထ သော ဥပာသကော ဘဂဝန္တံ ဒိသ္ဝာ ပသန္နမာနသော ဝန္ဒိတ္ဝာ ပတ္တပူရံ သပ္ပိတေလံ အဒာသိ, ဘဂဝာ အနုမောဒနံ ကတ္ဝာ ပက္ကာမိ။ သော တေနေဝ သောမနသ္သေန ယာဝတာယုကံ ဌတ္ဝာ တတော စုတော တေန ပုညေန ဒေဝလောကေ ဥပ္ပန္နော တတ္ထ ဒိဗ္ဗသုခံ အနုဘဝိတ္ဝာ မနုသ္သေသု စ နိဗ္ဗတ္တော ဥပ္ပန္နုပ္ပန္နဘဝေ သပ္ပိတေလမဓုဖာဏိတာဒိမဓုရာဟာရသမင္ဂီ သုခံ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ သာဝတ္ထိယံ ဧကသ္မိံ ကုလေ နိဗ္ဗတ္တော ဝုဒ္ဓိပ္ပတ္တော သဒ္ဓော ဗုဒ္ဓိသမ္ပန္နော သတ္ထု ဓမ္မဒေသနံ သုတ္ဝာ ပသန္နမာနသော ပဗ္ဗဇိတ္ဝာ ဝတ္တသမ္ပန္နော နစိရသ္သေဝ အရဟာ အဟောသိ။
Phussonāmātha bhagavātiādikaṃ āyasmato sappidāyakattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto phussassa bhagavato kāle kulagehe nibbatto ahosi. Tadā bhagavā bhikkhusaṅghaparivuto vīthiyaṃ caramāno tassa upāsakassa gehadvāraṃ sampāpuṇi. Atha so upāsako bhagavantaṃ disvā pasannamānaso vanditvā pattapūraṃ sappitelaṃ adāsi, bhagavā anumodanaṃ katvā pakkāmi. So teneva somanassena yāvatāyukaṃ ṭhatvā tato cuto tena puññena devaloke uppanno tattha dibbasukhaṃ anubhavitvā manussesu ca nibbatto uppannuppannabhave sappitelamadhuphāṇitādimadhurāhārasamaṅgī sukhaṃ anubhavitvā imasmiṃ buddhuppāde sāvatthiyaṃ ekasmiṃ kule nibbatto vuddhippatto saddho buddhisampanno satthu dhammadesanaṃ sutvā pasannamānaso pabbajitvā vattasampanno nacirasseva arahā ahosi.
၂၈. သော အတ္တနော ပုဗ္ဗကမ္မံ သရိတ္ဝာ ဇာတသောမနသ္သော ပုဗ္ဗစရိတာပဒာနံ ပကာသေန္တော ဖုသ္သော နာမာထ ဘဂဝာတိအာဒိမာဟ။ တတ္ထ ဖုသ္သောတိ ဖုသ္သနက္ခတ္တယောဂေန ဇာတတ္တာ မာတာပိတူဟိ ကတနာမဓေယ္ယေန ဖုသ္သော။ အထ ဝာ နိဗ္ဗာနံ ဖုသိ ပသ္သိ သစ္ဆိ အကာသီတိ ဖုသ္သော။ အထ ဝာ သမတိံသပာရမိတာသတ္တတိံသဗောဓိပက္ခိယဓမ္မေ သကလေ စ တေပိဋကေ ပရိယတ္တိဓမ္မေ ဖုသိ ပသ္သိ အညာသီတိ ဖုသ္သော။ ဘဂ္ဂဝာ ဘဂ္ယဝာ ယုတ္တောတိအာဒိပုညကောဋ္ဌာသသမင္ဂိတာယ ဘဂဝာ။ အာဟုတီနံ ပဋိဂ္ဂဟောတိ အာဟုတိနော ဝုစ္စန္တိ ပူဇာသက္ကာရာ, တေသံ အာဟုတီနံ ပဋိဂ္ဂဟေတုံ အရဟတီတိ အာဟုတီနံ ပဋိဂ္ဂဟော။ မဟာဇနံ နိဗ္ဗာပေန္တော ဝီရော ဖုသ္သော နာမ ဘဂဝာ ဝီထိယံ အထ တဒာ ဂစ္ဆတေတိ သမ္ဗန္ဓော။ သေသံ ပာကဋမေဝာတိ။
28. So attano pubbakammaṃ saritvā jātasomanasso pubbacaritāpadānaṃ pakāsento phusso nāmātha bhagavātiādimāha. Tattha phussoti phussanakkhattayogena jātattā mātāpitūhi katanāmadheyyena phusso. Atha vā nibbānaṃ phusi passi sacchi akāsīti phusso. Atha vā samatiṃsapāramitāsattatiṃsabodhipakkhiyadhamme sakale ca tepiṭake pariyattidhamme phusi passi aññāsīti phusso. Bhaggavā bhagyavā yuttotiādipuññakoṭṭhāsasamaṅgitāya bhagavā. Āhutīnaṃ paṭiggahoti āhutino vuccanti pūjāsakkārā, tesaṃ āhutīnaṃ paṭiggahetuṃ arahatīti āhutīnaṃ paṭiggaho. Mahājanaṃ nibbāpento vīro phusso nāma bhagavā vīthiyaṃ atha tadā gacchateti sambandho. Sesaṃ pākaṭamevāti.
သပ္ပိဒာယကတ္ထေရအပဒာနဝဏ္ဏနာ သမတ္တာ။
Sappidāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၆. သပ္ပိဒာယကတ္ထေရအပဒာနံ • 6. Sappidāyakattheraapadānaṃ
