| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. সপ্পুরিসদানসুত্তং
8. Sappurisadānasuttaṃ
১৪৮. ‘‘পঞ্চিমানি , ভিক্খৰে, সপ্পুরিসদানানি। কতমানি পঞ্চ? সদ্ধায দানং দেতি, সক্কচ্চং দানং দেতি, কালেন দানং দেতি, অনুগ্গহিতচিত্তো 1 দানং দেতি, অত্তানঞ্চ পরঞ্চ অনুপহচ্চ দানং দেতি।
148. ‘‘Pañcimāni , bhikkhave, sappurisadānāni. Katamāni pañca? Saddhāya dānaṃ deti, sakkaccaṃ dānaṃ deti, kālena dānaṃ deti, anuggahitacitto 2 dānaṃ deti, attānañca parañca anupahacca dānaṃ deti.
‘‘সদ্ধায খো পন, ভিক্খৰে, দানং দত্ৰা যত্থ যত্থ তস্স দানস্স ৰিপাকো নিব্বত্ততি, অড্ঢো চ হোতি মহদ্ধনো মহাভোগো, অভিরূপো চ হোতি দস্সনীযো পাসাদিকো পরমায ৰণ্ণপোক্খরতায সমন্নাগতো।
‘‘Saddhāya kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
‘‘সক্কচ্চং খো পন, ভিক্খৰে, দানং দত্ৰা যত্থ যত্থ তস্স দানস্স ৰিপাকো নিব্বত্ততি, অড্ঢো চ হোতি মহদ্ধনো মহাভোগো। যেপিস্স তে হোন্তি পুত্তাতি ৰা দারাতি ৰা দাসাতি ৰা পেস্সাতি ৰা কম্মকরাতি 3 ৰা, তেপি সুস্সূসন্তি সোতং ওদহন্তি অঞ্ঞা চিত্তং উপট্ঠপেন্তি।
‘‘Sakkaccaṃ kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo. Yepissa te honti puttāti vā dārāti vā dāsāti vā pessāti vā kammakarāti 4 vā, tepi sussūsanti sotaṃ odahanti aññā cittaṃ upaṭṭhapenti.
‘‘কালেন খো পন, ভিক্খৰে, দানং দত্ৰা যত্থ যত্থ তস্স দানস্স ৰিপাকো নিব্বত্ততি, অড্ঢো চ হোতি মহদ্ধনো মহাভোগো; কালাগতা চস্স অত্থা পচুরা হোন্তি।
‘‘Kālena kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; kālāgatā cassa atthā pacurā honti.
‘‘অনুগ্গহিতচিত্তো খো পন, ভিক্খৰে, দানং দত্ৰা যত্থ যত্থ তস্স দানস্স ৰিপাকো নিব্বত্ততি, অড্ঢো চ হোতি মহদ্ধনো মহাভোগো; উল়ারেসু চ পঞ্চসু কামগুণেসু ভোগায চিত্তং নমতি।
‘‘Anuggahitacitto kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; uḷāresu ca pañcasu kāmaguṇesu bhogāya cittaṃ namati.
‘‘অত্তানঞ্চ পরঞ্চ অনুপহচ্চ খো পন, ভিক্খৰে, দানং দত্ৰা যত্থ যত্থ তস্স দানস্স ৰিপাকো নিব্বত্ততি, অড্ঢো চ হোতি মহদ্ধনো মহাভোগো; ন চস্স কুতোচি ভোগানং উপঘাতো আগচ্ছতি অগ্গিতো ৰা উদকতো ৰা রাজতো ৰা চোরতো ৰা অপ্পিযতো ৰা দাযাদতো ৰা 5। ইমানি খো, ভিক্খৰে, পঞ্চ সপ্পুরিসদানানী’’তি। অট্ঠমং।
‘‘Attānañca parañca anupahacca kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; na cassa kutoci bhogānaṃ upaghāto āgacchati aggito vā udakato vā rājato vā corato vā appiyato vā dāyādato vā 6. Imāni kho, bhikkhave, pañca sappurisadānānī’’ti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. সপ্পুরিসদানসুত্তৰণ্ণনা • 8. Sappurisadānasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭-১০. অসপ্পুরিসদানসুত্তাদিৰণ্ণনা • 7-10. Asappurisadānasuttādivaṇṇanā
