| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៨. សប្បុរិសទានសុត្តំ
8. Sappurisadānasuttaṃ
១៤៨. ‘‘បញ្ចិមានិ , ភិក្ខវេ, សប្បុរិសទានានិ។ កតមានិ បញ្ច? សទ្ធាយ ទានំ ទេតិ, សក្កច្ចំ ទានំ ទេតិ, កាលេន ទានំ ទេតិ, អនុគ្គហិតចិត្តោ 1 ទានំ ទេតិ, អត្តានញ្ច បរញ្ច អនុបហច្ច ទានំ ទេតិ។
148. ‘‘Pañcimāni , bhikkhave, sappurisadānāni. Katamāni pañca? Saddhāya dānaṃ deti, sakkaccaṃ dānaṃ deti, kālena dānaṃ deti, anuggahitacitto 2 dānaṃ deti, attānañca parañca anupahacca dānaṃ deti.
‘‘សទ្ធាយ ខោ បន, ភិក្ខវេ, ទានំ ទត្វា យត្ថ យត្ថ តស្ស ទានស្ស វិបាកោ និព្ពត្តតិ, អឌ្ឍោ ច ហោតិ មហទ្ធនោ មហាភោគោ, អភិរូបោ ច ហោតិ ទស្សនីយោ បាសាទិកោ បរមាយ វណ្ណបោក្ខរតាយ សមន្នាគតោ។
‘‘Saddhāya kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
‘‘សក្កច្ចំ ខោ បន, ភិក្ខវេ, ទានំ ទត្វា យត្ថ យត្ថ តស្ស ទានស្ស វិបាកោ និព្ពត្តតិ, អឌ្ឍោ ច ហោតិ មហទ្ធនោ មហាភោគោ។ យេបិស្ស តេ ហោន្តិ បុត្តាតិ វា ទារាតិ វា ទាសាតិ វា បេស្សាតិ វា កម្មករាតិ 3 វា, តេបិ សុស្សូសន្តិ សោតំ ឱទហន្តិ អញ្ញា ចិត្តំ ឧបដ្ឋបេន្តិ។
‘‘Sakkaccaṃ kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo. Yepissa te honti puttāti vā dārāti vā dāsāti vā pessāti vā kammakarāti 4 vā, tepi sussūsanti sotaṃ odahanti aññā cittaṃ upaṭṭhapenti.
‘‘កាលេន ខោ បន, ភិក្ខវេ, ទានំ ទត្វា យត្ថ យត្ថ តស្ស ទានស្ស វិបាកោ និព្ពត្តតិ, អឌ្ឍោ ច ហោតិ មហទ្ធនោ មហាភោគោ; កាលាគតា ចស្ស អត្ថា បចុរា ហោន្តិ។
‘‘Kālena kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; kālāgatā cassa atthā pacurā honti.
‘‘អនុគ្គហិតចិត្តោ ខោ បន, ភិក្ខវេ, ទានំ ទត្វា យត្ថ យត្ថ តស្ស ទានស្ស វិបាកោ និព្ពត្តតិ, អឌ្ឍោ ច ហោតិ មហទ្ធនោ មហាភោគោ; ឧឡារេសុ ច បញ្ចសុ កាមគុណេសុ ភោគាយ ចិត្តំ នមតិ។
‘‘Anuggahitacitto kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; uḷāresu ca pañcasu kāmaguṇesu bhogāya cittaṃ namati.
‘‘អត្តានញ្ច បរញ្ច អនុបហច្ច ខោ បន, ភិក្ខវេ, ទានំ ទត្វា យត្ថ យត្ថ តស្ស ទានស្ស វិបាកោ និព្ពត្តតិ, អឌ្ឍោ ច ហោតិ មហទ្ធនោ មហាភោគោ; ន ចស្ស កុតោចិ ភោគានំ ឧបឃាតោ អាគច្ឆតិ អគ្គិតោ វា ឧទកតោ វា រាជតោ វា ចោរតោ វា អប្បិយតោ វា ទាយាទតោ វា 5។ ឥមានិ ខោ, ភិក្ខវេ, បញ្ច សប្បុរិសទានានី’’តិ។ អដ្ឋមំ។
‘‘Attānañca parañca anupahacca kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; na cassa kutoci bhogānaṃ upaghāto āgacchati aggito vā udakato vā rājato vā corato vā appiyato vā dāyādato vā 6. Imāni kho, bhikkhave, pañca sappurisadānānī’’ti. Aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៨. សប្បុរិសទានសុត្តវណ្ណនា • 8. Sappurisadānasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៧-១០. អសប្បុរិសទានសុត្តាទិវណ្ណនា • 7-10. Asappurisadānasuttādivaṇṇanā
