| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. සප්‌පුරිසදානසුත්‌තං
8. Sappurisadānasuttaṃ
148. ‘‘පඤ්‌චිමානි , භික්‌ඛවෙ, සප්‌පුරිසදානානි. කතමානි පඤ්‌ච? සද්‌ධාය දානං දෙති, සක්‌කච්‌චං දානං දෙති, කාලෙන දානං දෙති, අනුග්‌ගහිතචිත්‌තො 1 දානං දෙති, අත්‌තානඤ්‌ච පරඤ්‌ච අනුපහච්‌ච දානං දෙති.
148. ‘‘Pañcimāni , bhikkhave, sappurisadānāni. Katamāni pañca? Saddhāya dānaṃ deti, sakkaccaṃ dānaṃ deti, kālena dānaṃ deti, anuggahitacitto 2 dānaṃ deti, attānañca parañca anupahacca dānaṃ deti.
‘‘සද්‌ධාය ඛො පන, භික්‌ඛවෙ, දානං දත්‌වා යත්‌ථ යත්‌ථ තස්‌ස දානස්‌ස විපාකො නිබ්‌බත්‌තති, අඩ්‌ඪො ච හොති මහද්‌ධනො මහාභොගො, අභිරූපො ච හොති දස්‌සනීයො පාසාදිකො පරමාය වණ්‌ණපොක්‌ඛරතාය සමන්‌නාගතො.
‘‘Saddhāya kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
‘‘සක්‌කච්‌චං ඛො පන, භික්‌ඛවෙ, දානං දත්‌වා යත්‌ථ යත්‌ථ තස්‌ස දානස්‌ස විපාකො නිබ්‌බත්‌තති, අඩ්‌ඪො ච හොති මහද්‌ධනො මහාභොගො. යෙපිස්‌ස තෙ හොන්‌ති පුත්‌තාති වා දාරාති වා දාසාති වා පෙස්‌සාති වා කම්‌මකරාති 3 වා, තෙපි සුස්‌සූසන්‌ති සොතං ඔදහන්‌ති අඤ්‌ඤා චිත්‌තං උපට්‌ඨපෙන්‌ති.
‘‘Sakkaccaṃ kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo. Yepissa te honti puttāti vā dārāti vā dāsāti vā pessāti vā kammakarāti 4 vā, tepi sussūsanti sotaṃ odahanti aññā cittaṃ upaṭṭhapenti.
‘‘කාලෙන ඛො පන, භික්‌ඛවෙ, දානං දත්‌වා යත්‌ථ යත්‌ථ තස්‌ස දානස්‌ස විපාකො නිබ්‌බත්‌තති, අඩ්‌ඪො ච හොති මහද්‌ධනො මහාභොගො; කාලාගතා චස්‌ස අත්‌ථා පචුරා හොන්‌ති.
‘‘Kālena kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; kālāgatā cassa atthā pacurā honti.
‘‘අනුග්‌ගහිතචිත්‌තො ඛො පන, භික්‌ඛවෙ, දානං දත්‌වා යත්‌ථ යත්‌ථ තස්‌ස දානස්‌ස විපාකො නිබ්‌බත්‌තති, අඩ්‌ඪො ච හොති මහද්‌ධනො මහාභොගො; උළාරෙසු ච පඤ්‌චසු කාමගුණෙසු භොගාය චිත්‌තං නමති.
‘‘Anuggahitacitto kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; uḷāresu ca pañcasu kāmaguṇesu bhogāya cittaṃ namati.
‘‘අත්‌තානඤ්‌ච පරඤ්‌ච අනුපහච්‌ච ඛො පන, භික්‌ඛවෙ, දානං දත්‌වා යත්‌ථ යත්‌ථ තස්‌ස දානස්‌ස විපාකො නිබ්‌බත්‌තති, අඩ්‌ඪො ච හොති මහද්‌ධනො මහාභොගො; න චස්‌ස කුතොචි භොගානං උපඝාතො ආගච්‌ඡති අග්‌ගිතො වා උදකතො වා රාජතො වා චොරතො වා අප්‌පියතො වා දායාදතො වා 5. ඉමානි ඛො, භික්‌ඛවෙ, පඤ්‌ච සප්‌පුරිසදානානී’’ති. අට්‌ඨමං.
‘‘Attānañca parañca anupahacca kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; na cassa kutoci bhogānaṃ upaghāto āgacchati aggito vā udakato vā rājato vā corato vā appiyato vā dāyādato vā 6. Imāni kho, bhikkhave, pañca sappurisadānānī’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. සප්‌පුරිසදානසුත්‌තවණ්‌ණනා • 8. Sappurisadānasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7-10. අසප්‌පුරිසදානසුත්‌තාදිවණ්‌ණනා • 7-10. Asappurisadānasuttādivaṇṇanā
