| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൮. സപ്പുരിസദാനസുത്തം
8. Sappurisadānasuttaṃ
൧൪൮. ‘‘പഞ്ചിമാനി , ഭിക്ഖവേ, സപ്പുരിസദാനാനി. കതമാനി പഞ്ച? സദ്ധായ ദാനം ദേതി, സക്കച്ചം ദാനം ദേതി, കാലേന ദാനം ദേതി, അനുഗ്ഗഹിതചിത്തോ 1 ദാനം ദേതി, അത്താനഞ്ച പരഞ്ച അനുപഹച്ച ദാനം ദേതി.
148. ‘‘Pañcimāni , bhikkhave, sappurisadānāni. Katamāni pañca? Saddhāya dānaṃ deti, sakkaccaṃ dānaṃ deti, kālena dānaṃ deti, anuggahitacitto 2 dānaṃ deti, attānañca parañca anupahacca dānaṃ deti.
‘‘സദ്ധായ ഖോ പന, ഭിക്ഖവേ, ദാനം ദത്വാ യത്ഥ യത്ഥ തസ്സ ദാനസ്സ വിപാകോ നിബ്ബത്തതി, അഡ്ഢോ ച ഹോതി മഹദ്ധനോ മഹാഭോഗോ, അഭിരൂപോ ച ഹോതി ദസ്സനീയോ പാസാദികോ പരമായ വണ്ണപോക്ഖരതായ സമന്നാഗതോ.
‘‘Saddhāya kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo, abhirūpo ca hoti dassanīyo pāsādiko paramāya vaṇṇapokkharatāya samannāgato.
‘‘സക്കച്ചം ഖോ പന, ഭിക്ഖവേ, ദാനം ദത്വാ യത്ഥ യത്ഥ തസ്സ ദാനസ്സ വിപാകോ നിബ്ബത്തതി, അഡ്ഢോ ച ഹോതി മഹദ്ധനോ മഹാഭോഗോ. യേപിസ്സ തേ ഹോന്തി പുത്താതി വാ ദാരാതി വാ ദാസാതി വാ പേസ്സാതി വാ കമ്മകരാതി 3 വാ, തേപി സുസ്സൂസന്തി സോതം ഓദഹന്തി അഞ്ഞാ ചിത്തം ഉപട്ഠപേന്തി.
‘‘Sakkaccaṃ kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo. Yepissa te honti puttāti vā dārāti vā dāsāti vā pessāti vā kammakarāti 4 vā, tepi sussūsanti sotaṃ odahanti aññā cittaṃ upaṭṭhapenti.
‘‘കാലേന ഖോ പന, ഭിക്ഖവേ, ദാനം ദത്വാ യത്ഥ യത്ഥ തസ്സ ദാനസ്സ വിപാകോ നിബ്ബത്തതി, അഡ്ഢോ ച ഹോതി മഹദ്ധനോ മഹാഭോഗോ; കാലാഗതാ ചസ്സ അത്ഥാ പചുരാ ഹോന്തി.
‘‘Kālena kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; kālāgatā cassa atthā pacurā honti.
‘‘അനുഗ്ഗഹിതചിത്തോ ഖോ പന, ഭിക്ഖവേ, ദാനം ദത്വാ യത്ഥ യത്ഥ തസ്സ ദാനസ്സ വിപാകോ നിബ്ബത്തതി, അഡ്ഢോ ച ഹോതി മഹദ്ധനോ മഹാഭോഗോ; ഉളാരേസു ച പഞ്ചസു കാമഗുണേസു ഭോഗായ ചിത്തം നമതി.
‘‘Anuggahitacitto kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; uḷāresu ca pañcasu kāmaguṇesu bhogāya cittaṃ namati.
‘‘അത്താനഞ്ച പരഞ്ച അനുപഹച്ച ഖോ പന, ഭിക്ഖവേ, ദാനം ദത്വാ യത്ഥ യത്ഥ തസ്സ ദാനസ്സ വിപാകോ നിബ്ബത്തതി, അഡ്ഢോ ച ഹോതി മഹദ്ധനോ മഹാഭോഗോ; ന ചസ്സ കുതോചി ഭോഗാനം ഉപഘാതോ ആഗച്ഛതി അഗ്ഗിതോ വാ ഉദകതോ വാ രാജതോ വാ ചോരതോ വാ അപ്പിയതോ വാ ദായാദതോ വാ 5. ഇമാനി ഖോ, ഭിക്ഖവേ, പഞ്ച സപ്പുരിസദാനാനീ’’തി. അട്ഠമം.
‘‘Attānañca parañca anupahacca kho pana, bhikkhave, dānaṃ datvā yattha yattha tassa dānassa vipāko nibbattati, aḍḍho ca hoti mahaddhano mahābhogo; na cassa kutoci bhogānaṃ upaghāto āgacchati aggito vā udakato vā rājato vā corato vā appiyato vā dāyādato vā 6. Imāni kho, bhikkhave, pañca sappurisadānānī’’ti. Aṭṭhamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൮. സപ്പുരിസദാനസുത്തവണ്ണനാ • 8. Sappurisadānasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൭-൧൦. അസപ്പുരിസദാനസുത്താദിവണ്ണനാ • 7-10. Asappurisadānasuttādivaṇṇanā
