| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. ஸப்புரிஸத⁴ம்மஸுத்தவண்ணனா
3. Sappurisadhammasuttavaṇṇanā
105. ஸப்புரிஸத⁴ம்மந்தி ஸப்புரிஸபா⁴வகரங் த⁴ம்மங். ஸோ பன யஸ்மா ஸப்புரிஸானங் பவேணிகோ த⁴ம்மோ ஹோதி. தஸ்மா ஆஹ – ‘‘ஸப்புரிஸானங் த⁴ம்ம’’ந்தி, ஏஸ நயோ அஸப்புரிஸத⁴ம்மந்தி எத்தா²பி. ஏவங் பதா⁴னங் அனுட்டா²தப்³ப³ஞ்ச ஸப்புரிஸத⁴ம்மங் ஆதி³ங் கத்வா மாதிகங் ட²பெத்வா அயதா²னுபுப்³பி³யா நித்³தி³ஸந்தோ ‘‘கதமோ ச, பி⁴க்க²வே, அஸப்புரிஸத⁴ம்மோ’’திஆதி³மாஹ. ததா² பன நித்³தி³ஸந்தோ உதா³ஹரணபுப்³ப³கங் ஹேதுங் த³ஸ்ஸேதுங், ‘‘யதா² நாமா’’திஆதி³ வுத்தங். தேன இச்சி²தப்³ப³பரிச்சாக³புப்³ப³கங் க³ஹேதப்³ப³க்³க³ஹணங் நாம ஞாயபடிபத்தி, தஸ்மா ஸப்புரிஸத⁴ம்மா ஸம்பாதே³தப்³பா³தி தீ³பெந்தோ ஸத்தா² அயதா²னுபுப்³பி³யா நித்³தா⁴ரீயதீதி இமமத்த²ங் த³ஸ்ஸேதி. ததா² அஞ்ஞத்தா²பி ‘‘அஸேவனா ச பா³லானங், பண்டி³தானஞ்ச ஸேவனா’’தி. ஏததே³வ ஹி குலத்³வயங் ‘‘உச்சகுல’’ந்தி வுச்சதி நிப்பரியாயதோ. ததா²ஹி அந்திமப⁴விகா போ³தி⁴ஸத்தா தத்தே²வ படிஸந்தி⁴ங் க³ண்ஹந்தி. ஸோதி ஸாமீசிப்படிபன்னோ பி⁴க்கு². அந்தரங் கரித்வாதி தங் காரணங் கத்வா. படிபதா³ ஹி விஞ்ஞூனங் பூஜாய காரணங், ந உச்சகுலீனதா. மஹாகுலாதி விபுலகுலா உபாதி³தோதி³தகுலஸம்பவத்திகாதி அத்தோ².
105.Sappurisadhammanti sappurisabhāvakaraṃ dhammaṃ. So pana yasmā sappurisānaṃ paveṇiko dhammo hoti. Tasmā āha – ‘‘sappurisānaṃ dhamma’’nti, esa nayo asappurisadhammanti etthāpi. Evaṃ padhānaṃ anuṭṭhātabbañca sappurisadhammaṃ ādiṃ katvā mātikaṃ ṭhapetvā ayathānupubbiyā niddisanto ‘‘katamo ca, bhikkhave, asappurisadhammo’’tiādimāha. Tathā pana niddisanto udāharaṇapubbakaṃ hetuṃ dassetuṃ, ‘‘yathā nāmā’’tiādi vuttaṃ. Tena icchitabbapariccāgapubbakaṃ gahetabbaggahaṇaṃ nāma ñāyapaṭipatti, tasmā sappurisadhammā sampādetabbāti dīpento satthā ayathānupubbiyā niddhārīyatīti imamatthaṃ dasseti. Tathā aññatthāpi ‘‘asevanā ca bālānaṃ, paṇḍitānañca sevanā’’ti. Etadeva hi kuladvayaṃ ‘‘uccakula’’nti vuccati nippariyāyato. Tathāhi antimabhavikā bodhisattā tattheva paṭisandhiṃ gaṇhanti. Soti sāmīcippaṭipanno bhikkhu. Antaraṃ karitvāti taṃ kāraṇaṃ katvā. Paṭipadā hi viññūnaṃ pūjāya kāraṇaṃ, na uccakulīnatā. Mahākulāti vipulakulā upāditoditakulasampavattikāti attho.
106. யஸஸத்³தோ³ பரிவாரவாசகோ. யஸஸ்ஸீதி ச ஸாதிஸயபரிவாரவந்ததா வுச்சதீதி ஆஹ ‘‘பரிவாரஸம்பன்னோ’’தி. ஆதி⁴பதெய்யாபா⁴வதோ பரேஸங் உபரினத்தி ஏதேஸங் ஈஸோ ஈஸனங் இஸ்ஸரியந்தி அக்கா²தப்³பா³தி அப்பேஸக்கா². தேனாஹ ‘‘அப்பபரிவாரா’’தி. அபா⁴வத்தோ² ஹி இத⁴ அப்ப-ஸத்³தோ³.
106.Yasasaddo parivāravācako. Yasassīti ca sātisayaparivāravantatā vuccatīti āha ‘‘parivārasampanno’’ti. Ādhipateyyābhāvato paresaṃ uparinatti etesaṃ īso īsanaṃ issariyanti akkhātabbāti appesakkhā. Tenāha ‘‘appaparivārā’’ti. Abhāvattho hi idha appa-saddo.
107. நவேவ து⁴தங்கா³னி ஆக³தானீதி எத்த² யதா² உக்கட்ட²பங்ஸுகூலிகஸ்ஸ தேசீவரிகதா ஸுகரா. ஏவங் உக்கட்ட²பிண்ட³பாதிகஸ்ஸ ஸபதா³னசாரிகதா ஸுகரா. ஏகாஸனிகஸ்ஸ ச பத்தபிண்டி³கக²லுபச்சா²ப⁴த்திகதா ஸுகரா ஏவாதி – ‘‘பங்ஸுகூலிகோ ஹோதீ’’திஆதி³வசனேனேவ பாளியா அனாக³தானம்பி ஆக³தபா⁴வோ வேதி³தப்³போ³ பரிஹரணஸுகரதாய தேஸம்பி ஸமாதா³னஸம்ப⁴வதோ. தேனாஹ ‘‘தேரஸ ஹொந்தீ’’தி.
107.Naveva dhutaṅgāni āgatānīti ettha yathā ukkaṭṭhapaṃsukūlikassa tecīvarikatā sukarā. Evaṃ ukkaṭṭhapiṇḍapātikassa sapadānacārikatā sukarā. Ekāsanikassa ca pattapiṇḍikakhalupacchābhattikatā sukarā evāti – ‘‘paṃsukūliko hotī’’tiādivacaneneva pāḷiyā anāgatānampi āgatabhāvo veditabbo pariharaṇasukaratāya tesampi samādānasambhavato. Tenāha ‘‘terasa hontī’’ti.
108. காமதண்ஹாதி³காய தாய தண்ஹாய நிப்³ப³த்தாதி தம்மயா, புது²ஜ்ஜனா, பகதிபா⁴வூபக³மனேன தேஸங் பா⁴வோ தம்மயதா, தப்படிக்கே²பதோ அதம்மயதா, நித்தண்ஹதா. தங்யேவ காரணங் கத்வாதி பட²மஜ்ஜா²னேபி தண்ஹாபஹானங்யேவ காரணங் கத்வா. சித்தே உப்பாதெ³த்வாதி அதம்மயதாபரியாயேன வுத்தே தண்ஹாய படிபக்க²த⁴ம்மே ஸம்பாதெ³த்வா. ந மஞ்ஞதீதி மஞ்ஞனானங் அரியமக்³கே³ன ஸப்³ப³ஸோ ஸமுச்சி²ன்னத்தா கிஸ்மிஞ்சி ஓகாஸே காமப⁴வாதி³கே கேனசி வத்து²னா ஹத்தி²அஸ்ஸகெ²த்தவத்தா²தி³னா பத்தசீவரவிஹாரபரிவேணாதி³னா ச புக்³க³லங் ந மஞ்ஞதி. ஸேஸங் ஸுவிஞ்ஞெய்யமேவ.
108. Kāmataṇhādikāya tāya taṇhāya nibbattāti tammayā, puthujjanā, pakatibhāvūpagamanena tesaṃ bhāvo tammayatā, tappaṭikkhepato atammayatā, nittaṇhatā. Taṃyeva kāraṇaṃ katvāti paṭhamajjhānepi taṇhāpahānaṃyeva kāraṇaṃ katvā. Citte uppādetvāti atammayatāpariyāyena vutte taṇhāya paṭipakkhadhamme sampādetvā. Na maññatīti maññanānaṃ ariyamaggena sabbaso samucchinnattā kismiñci okāse kāmabhavādike kenaci vatthunā hatthiassakhettavatthādinā pattacīvaravihārapariveṇādinā ca puggalaṃ na maññati. Sesaṃ suviññeyyameva.
ஸப்புரிஸத⁴ம்மஸுத்தவண்ணனாய லீனத்த²ப்பகாஸனா ஸமத்தா.
Sappurisadhammasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. ஸப்புரிஸஸுத்தங் • 3. Sappurisasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. ஸப்புரிஸத⁴ம்மஸுத்தவண்ணனா • 3. Sappurisadhammasuttavaṇṇanā
