| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৩. সপ্পুরিসধম্মসুত্তৰণ্ণনা
3. Sappurisadhammasuttavaṇṇanā
১০৫. এৰং মে সুতন্তি সপ্পুরিসধম্মসুত্তং। তত্থ সপ্পুরিসধম্মন্তি সপ্পুরিসানং ধম্মং। অসপ্পুরিসধম্মন্তি পাপপুরিসানং ধম্মং। এৰং মাতিকং ঠপেত্ৰাপি পুন যথা নাম মগ্গকুসলো পুরিসো ৰামং মুঞ্চিত্ৰা দক্খিণং গণ্হাতি। পঠমং মুঞ্চিতব্বং কথেতি, এৰং পহাতব্বং ধম্মং পঠমং দেসেন্তো কতমো চ, ভিক্খৰে, অসপ্পুরিসধম্মোতিআদিমাহ। তত্থ উচ্চাকুলাতি খত্তিযকুলা ৰা ব্রাহ্মণকুলা ৰা। এতদেৰ হি কুলদ্ৰযং ‘‘উচ্চাকুল’’ন্তি ৰুচ্চতি। সো তত্থ পুজ্জোতি সো ভিক্খু তেসু ভিক্খূসু পূজারহো। অন্তরং করিত্ৰাতি অব্ভন্তরং কত্ৰা।
105.Evaṃme sutanti sappurisadhammasuttaṃ. Tattha sappurisadhammanti sappurisānaṃ dhammaṃ. Asappurisadhammanti pāpapurisānaṃ dhammaṃ. Evaṃ mātikaṃ ṭhapetvāpi puna yathā nāma maggakusalo puriso vāmaṃ muñcitvā dakkhiṇaṃ gaṇhāti. Paṭhamaṃ muñcitabbaṃ katheti, evaṃ pahātabbaṃ dhammaṃ paṭhamaṃ desento katamo ca, bhikkhave, asappurisadhammotiādimāha. Tattha uccākulāti khattiyakulā vā brāhmaṇakulā vā. Etadeva hi kuladvayaṃ ‘‘uccākula’’nti vuccati. So tattha pujjoti so bhikkhu tesu bhikkhūsu pūjāraho. Antaraṃ karitvāti abbhantaraṃ katvā.
মহাকুলাতি খত্তিযকুলা ৰা ব্রাহ্মণকুলা ৰা ৰেস্সকুলা ৰা। ইদমেৰ হি কুলত্তযং ‘‘মহাকুল’’ন্তি ৰুচ্চতি। মহাভোগকুলাতি মহন্তেহি ভোগেহি সমন্নাগতা কুলা। উল়ারভোগকুলাতি উল়ারেহি পণীতেহি ভোগেহি সম্পন্নকুলা। ইমস্মিং পদদ্ৰযে চত্তারিপি কুলানি লব্ভন্তি। যত্থ কত্থচি কুলে জাতো হি পুঞ্ঞবলেহি মহাভোগোপি উল়ারভোগোপি হোতিযেৰ।
Mahākulāti khattiyakulā vā brāhmaṇakulā vā vessakulā vā. Idameva hi kulattayaṃ ‘‘mahākula’’nti vuccati. Mahābhogakulāti mahantehi bhogehi samannāgatā kulā. Uḷārabhogakulāti uḷārehi paṇītehi bhogehi sampannakulā. Imasmiṃ padadvaye cattāripi kulāni labbhanti. Yattha katthaci kule jāto hi puññabalehi mahābhogopi uḷārabhogopi hotiyeva.
১০৬. যসস্সীতি পরিৰারসম্পন্নো। অপ্পঞ্ঞাতাতি রত্তিং খিত্তসরা ৰিয সঙ্ঘমজ্ঝাদীসু ন পঞ্ঞাযন্তি। অপ্পেসক্খাতি অপ্পপরিৰারা।
106.Yasassīti parivārasampanno. Appaññātāti rattiṃ khittasarā viya saṅghamajjhādīsu na paññāyanti. Appesakkhāti appaparivārā.
১০৭. আরঞ্ঞিকোতি সমাদিন্নআরঞ্ঞিকধুতঙ্গো। সেসধুতঙ্গেসুপি এসেৰ নযো। ইমস্মিঞ্চ সুত্তে পাল়িযং নৰেৰ ধুতঙ্গানি আগতানি, ৰিত্থারেন পনেতানি তেরস হোন্তি। তেসু যং ৰত্তব্বং, তং সব্বং সব্বাকারেন ৰিসুদ্ধিমগ্গে ধুতঙ্গনিদ্দেসে ৰুত্তমেৰ।
107.Āraññikoti samādinnaāraññikadhutaṅgo. Sesadhutaṅgesupi eseva nayo. Imasmiñca sutte pāḷiyaṃ naveva dhutaṅgāni āgatāni, vitthārena panetāni terasa honti. Tesu yaṃ vattabbaṃ, taṃ sabbaṃ sabbākārena visuddhimagge dhutaṅganiddese vuttameva.
১০৮. অতম্মযতাতি তম্মযতা ৰুচ্চতি তণ্হা, নিত্তণ্হাতি অত্থো। অতম্মযতঞ্ঞেৰ অন্তরং করিত্ৰাতি নিত্তণ্হতংযেৰ কারণং কত্ৰা অব্ভন্তরং ৰা কত্ৰা, চিত্তে উপ্পাদেত্ৰাতি অত্থো।
108.Atammayatāti tammayatā vuccati taṇhā, nittaṇhāti attho. Atammayataññeva antaraṃ karitvāti nittaṇhataṃyeva kāraṇaṃ katvā abbhantaraṃ vā katvā, citte uppādetvāti attho.
নিরোধৰারে যস্মা অনাগামিখীণাসৰাৰ তং সমাপত্তিং সমাপজ্জন্তি, পুথুজ্জনস্স সা নত্থি, তস্মা অসপ্পুরিসৰারো পরিহীনো। ন কঞ্চি মঞ্ঞতীতি কঞ্চি পুগ্গলং তীহি মঞ্ঞনাহি ন মঞ্ঞতি। ন কুহিঞ্চি মঞ্ঞতীতি কিস্মিঞ্চি ওকাসে ন মঞ্ঞতি। ন কেনচি মঞ্ঞতীতি কেনচি ৰত্থুনাপি তং পুগ্গলং ন মঞ্ঞতি। সেসং সব্বত্থ উত্তানমেৰাতি।
Nirodhavāre yasmā anāgāmikhīṇāsavāva taṃ samāpattiṃ samāpajjanti, puthujjanassa sā natthi, tasmā asappurisavāro parihīno. Na kañci maññatīti kañci puggalaṃ tīhi maññanāhi na maññati. Nakuhiñci maññatīti kismiñci okāse na maññati. Na kenaci maññatīti kenaci vatthunāpi taṃ puggalaṃ na maññati. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
সপ্পুরিসধম্মসুত্তৰণ্ণনা নিট্ঠিতা।
Sappurisadhammasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৩. সপ্পুরিসসুত্তং • 3. Sappurisasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৩. সপ্পুরিসধম্মসুত্তৰণ্ণনা • 3. Sappurisadhammasuttavaṇṇanā
