| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៣. សប្បុរិសសុត្តវណ្ណនា
3. Sappurisasuttavaṇṇanā
៧៣. តតិយេ អវណ្ណោតិ អគុណោ។ បាតុ ករោតីតិ កថេតិ, បាកដំ ករោតិ។ បញ្ហាភិនីតោតិ បញ្ហត្ថាយ អភិនីតោ។ អហាបេត្វា អលម្ពិត្វាតិ អបរិហីនំ អលម្ពិតំ កត្វា។ ឯត្ថ ច អសប្បុរិសោ បាបិច្ឆតាយ អត្តនោ អវណ្ណំ ឆាទេតិ, សប្បុរិសោ លជ្ជិតាយ អត្តនោ វណ្ណំ។ ឥទានិ យស្មា អសប្បុរិសោ ហិរោត្តប្បរហិតោ សំវាសេន អវជានាតិ, សប្បុរិសោ បន ហិរោត្តប្បសមន្នាគតោ សំវាសេនាបិ នាវជានាតិ។ តស្មា អសប្បុរិសភាវសាធកំ អធុនាគតវធុកោបម្មំ ទស្សេតុំ សេយ្យថាបិ, ភិក្ខវេ, វធុកាតិអាទិមាហ។ តត្ថ វធុកាតិ សុណិសា។ តិព្ពន្តិ ពហលំ។ សេសមេត្ថ ឧត្តានត្ថមេវាតិ។
73. Tatiye avaṇṇoti aguṇo. Pātukarotīti katheti, pākaṭaṃ karoti. Pañhābhinītoti pañhatthāya abhinīto. Ahāpetvā alambitvāti aparihīnaṃ alambitaṃ katvā. Ettha ca asappuriso pāpicchatāya attano avaṇṇaṃ chādeti, sappuriso lajjitāya attano vaṇṇaṃ. Idāni yasmā asappuriso hirottapparahito saṃvāsena avajānāti, sappuriso pana hirottappasamannāgato saṃvāsenāpi nāvajānāti. Tasmā asappurisabhāvasādhakaṃ adhunāgatavadhukopammaṃ dassetuṃ seyyathāpi, bhikkhave, vadhukātiādimāha. Tattha vadhukāti suṇisā. Tibbanti bahalaṃ. Sesamettha uttānatthamevāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៣. សប្បុរិសសុត្តំ • 3. Sappurisasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៣-៥. សប្បុរិសសុត្តាទិវណ្ណនា • 3-5. Sappurisasuttādivaṇṇanā
