| Library / Tipiṭaka / তিপিটক • Tipiṭaka / থেরগাথাপাল়ি • Theragāthāpāḷi |
৫. সরভঙ্গত্থেরগাথা
5. Sarabhaṅgattheragāthā
৪৮৭.
487.
‘‘সরে হত্থেহি ভঞ্জিত্ৰা, কত্ৰান কুটিমচ্ছিসং।
‘‘Sare hatthehi bhañjitvā, katvāna kuṭimacchisaṃ;
তেন মে সরভঙ্গোতি, নামং সম্মুতিযা অহু॥
Tena me sarabhaṅgoti, nāmaṃ sammutiyā ahu.
৪৮৮.
488.
‘‘ন ময্হং কপ্পতে অজ্জ, সরে হত্থেহি ভঞ্জিতুং।
‘‘Na mayhaṃ kappate ajja, sare hatthehi bhañjituṃ;
সিক্খাপদা নো পঞ্ঞত্তা, গোতমেন যসস্সিনা॥
Sikkhāpadā no paññattā, gotamena yasassinā.
৪৮৯.
489.
‘‘সকলং সমত্তং রোগং, সরভঙ্গো নাদ্দসং পুব্বে।
‘‘Sakalaṃ samattaṃ rogaṃ, sarabhaṅgo nāddasaṃ pubbe;
সোযং রোগো দিট্ঠো, ৰচনকরেনাতিদেৰস্স॥
Soyaṃ rogo diṭṭho, vacanakarenātidevassa.
৪৯০.
490.
‘‘যেনেৰ মগ্গেন গতো ৰিপস্সী, যেনেৰ মগ্গেন সিখী চ ৰেস্সভূ।
‘‘Yeneva maggena gato vipassī, yeneva maggena sikhī ca vessabhū;
ককুসন্ধকোণাগমনো চ কস্সপো, তেনঞ্জসেন অগমাসি গোতমো॥
Kakusandhakoṇāgamano ca kassapo, tenañjasena agamāsi gotamo.
৪৯১.
491.
‘‘ৰীততণ্হা অনাদানা, সত্ত বুদ্ধা খযোগধা।
‘‘Vītataṇhā anādānā, satta buddhā khayogadhā;
যেহাযং দেসিতো ধম্মো, ধম্মভূতেহি তাদিভি॥
Yehāyaṃ desito dhammo, dhammabhūtehi tādibhi.
৪৯২.
492.
‘‘চত্তারি অরিযসচ্চানি, অনুকম্পায পাণিনং।
‘‘Cattāri ariyasaccāni, anukampāya pāṇinaṃ;
দুক্খং সমুদযো মগ্গো, নিরোধো দুক্খসঙ্খযো॥
Dukkhaṃ samudayo maggo, nirodho dukkhasaṅkhayo.
৪৯৩.
493.
‘‘যস্মিং নিৰত্ততে 1 দুক্খং, সংসারস্মিং অনন্তকং।
‘‘Yasmiṃ nivattate 2 dukkhaṃ, saṃsārasmiṃ anantakaṃ;
ভেদা ইমস্স কাযস্স, জীৰিতস্স চ সঙ্খযা।
Bhedā imassa kāyassa, jīvitassa ca saṅkhayā;
অঞ্ঞো পুনব্ভৰো নত্থি, সুৰিমুত্তোম্হি সব্বধী’’তি॥
Añño punabbhavo natthi, suvimuttomhi sabbadhī’’ti.
… সরভঙ্গো থেরো…।
… Sarabhaṅgo thero….
সত্তকনিপাতো নিট্ঠিতো।
Sattakanipāto niṭṭhito.
তত্রুদ্দানং –
Tatruddānaṃ –
সুন্দরসমুদ্দো থেরো, থেরো লকুণ্ডভদ্দিযো।
Sundarasamuddo thero, thero lakuṇḍabhaddiyo;
ভদ্দো থেরো চ সোপাকো, সরভঙ্গো মহাইসি।
Bhaddo thero ca sopāko, sarabhaṅgo mahāisi;
সত্তকে পঞ্চকা থেরা, গাথাযো পঞ্চতিংসতীতি॥
Sattake pañcakā therā, gāthāyo pañcatiṃsatīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / থেরগাথা-অট্ঠকথা • Theragāthā-aṭṭhakathā / ৫. সরভঙ্গত্থেরগাথাৰণ্ণনা • 5. Sarabhaṅgattheragāthāvaṇṇanā
