| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. সরভসুত্তং
4. Sarabhasuttaṃ
৬৫. এৰং মে সুতং – একং সমযং ভগৰা রাজগহে ৰিহরতি গিজ্ঝকূটে পব্বতে। তেন খো পন সমযেন সরভো নাম পরিব্বাজকো অচিরপক্কন্তো হোতি ইমস্মা ধম্মৰিনযা। সো রাজগহে পরিসতি 1 এৰং ৰাচং ভাসতি – ‘‘অঞ্ঞাতো মযা সমণানং সক্যপুত্তিকানং ধম্মো। অঞ্ঞায চ পনাহং সমণানং সক্যপুত্তিকানং ধম্মং এৰাহং তস্মা ধম্মৰিনযা অপক্কন্তো’’তি। অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পৰিসিংসু। অস্সোসুং খো তে ভিক্খূ সরভস্স পরিব্বাজকস্স রাজগহে পরিসতি এৰং ৰাচং ভাসমানস্স – ‘‘অঞ্ঞাতো মযা সমণানং সক্যপুত্তিকানং ধম্মো। অঞ্ঞায চ পনাহং সমণানং সক্যপুত্তিকানং ধম্মং এৰাহং তস্মা ধম্মৰিনযা অপক্কন্তো’’তি।
65. Evaṃ me sutaṃ – ekaṃ samayaṃ bhagavā rājagahe viharati gijjhakūṭe pabbate. Tena kho pana samayena sarabho nāma paribbājako acirapakkanto hoti imasmā dhammavinayā. So rājagahe parisati 2 evaṃ vācaṃ bhāsati – ‘‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’ti. Atha kho sambahulā bhikkhū pubbaṇhasamayaṃ nivāsetvā pattacīvaramādāya rājagahaṃ piṇḍāya pavisiṃsu. Assosuṃ kho te bhikkhū sarabhassa paribbājakassa rājagahe parisati evaṃ vācaṃ bhāsamānassa – ‘‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’ti.
অথ খো তে ভিক্খূ রাজগহে পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং – ‘‘সরভো নাম, ভন্তে, পরিব্বাজকো অচিরপক্কন্তো ইমস্মা ধম্মৰিনযা। সো রাজগহে পরিসতি এৰং ৰাচং ভাসতি – ‘অঞ্ঞাতো মযা সমণানং সক্যপুত্তিকানং ধম্মো। অঞ্ঞায চ পনাহং সমণানং সক্যপুত্তিকানং ধম্মং এৰাহং তস্মা ধম্মৰিনযা অপক্কন্তো’তি। সাধু ভন্তে, ভগৰা যেন সিপ্পিনিকাতীরং 3 পরিব্বাজকারামো যেন সরভো পরিব্বাজকো তেনুপসঙ্কমতু অনুকম্পং উপাদাযা’’তি। অধিৰাসেসি ভগৰা তুণ্হীভাৰেন।
Atha kho te bhikkhū rājagahe piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘sarabho nāma, bhante, paribbājako acirapakkanto imasmā dhammavinayā. So rājagahe parisati evaṃ vācaṃ bhāsati – ‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’ti. Sādhu bhante, bhagavā yena sippinikātīraṃ 4 paribbājakārāmo yena sarabho paribbājako tenupasaṅkamatu anukampaṃ upādāyā’’ti. Adhivāsesi bhagavā tuṇhībhāvena.
অথ খো ভগৰা সাযন্হসমযং পটিসল্লানা ৰুট্ঠিতো যেন সিপ্পিনিকাতীরং পরিব্বাজকারামো যেন সরভো পরিব্বাজকো তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি । নিসজ্জ খো ভগৰা সরভং পরিব্বাজকং এতদৰোচ – ‘‘সচ্চং কির ত্ৰং, সরভ, এৰং ৰদেসি – ‘অঞ্ঞাতো মযা সমণানং সক্যপুত্তিকানং ধম্মো। অঞ্ঞায চ পনাহং সমণানং সক্যপুত্তিকানং ধম্মং এৰাহং তস্মা ধম্মৰিনযা অপক্কন্তো’’’তি? এৰং ৰুত্তে সরভো পরিব্বাজকো তুণ্হী অহোসি।
Atha kho bhagavā sāyanhasamayaṃ paṭisallānā vuṭṭhito yena sippinikātīraṃ paribbājakārāmo yena sarabho paribbājako tenupasaṅkami; upasaṅkamitvā paññatte āsane nisīdi . Nisajja kho bhagavā sarabhaṃ paribbājakaṃ etadavoca – ‘‘saccaṃ kira tvaṃ, sarabha, evaṃ vadesi – ‘aññāto mayā samaṇānaṃ sakyaputtikānaṃ dhammo. Aññāya ca panāhaṃ samaṇānaṃ sakyaputtikānaṃ dhammaṃ evāhaṃ tasmā dhammavinayā apakkanto’’’ti? Evaṃ vutte sarabho paribbājako tuṇhī ahosi.
দুতিযম্পি খো, ভগৰা সরভং পরিব্বাজকং এতদৰোচ – ‘‘ৰদেহি, সরভ, কিন্তি তে অঞ্ঞাতো সমণানং সক্যপুত্তিকানং ধম্মো? সচে তে অপরিপূরং ভৰিস্সতি, অহং পরিপূরেস্সামি। সচে পন তে পরিপূরং ভৰিস্সতি, অহং অনুমোদিস্সামী’’তি। দুতিযম্পি খো সরভো পরিব্বাজকো তুণ্হী অহোসি।
Dutiyampi kho, bhagavā sarabhaṃ paribbājakaṃ etadavoca – ‘‘vadehi, sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, ahaṃ paripūressāmi. Sace pana te paripūraṃ bhavissati, ahaṃ anumodissāmī’’ti. Dutiyampi kho sarabho paribbājako tuṇhī ahosi.
ততিযম্পি খো ভগৰা সরভং পরিব্বাজকং এতদৰোচ – (‘‘যো 5 খো সরভ পঞ্ঞাযতি সমণানং সক্যপুত্তিকানং ধম্মো) 6 ‘‘ৰদেহি, সরভ, কিন্তি তে অঞ্ঞাতো সমণানং সক্যপুত্তিকানং ধম্মো? সচে তে অপরিপূরং ভৰিস্সতি, অহং পরিপূরেস্সামি। সচে পন তে পরিপূরং ভৰিস্সতি, অহং অনুমোদিস্সামী’’তি। ততিযম্পি খো সরভো পরিব্বাজকো তুণ্হী অহোসি।
Tatiyampi kho bhagavā sarabhaṃ paribbājakaṃ etadavoca – (‘‘yo 7 kho sarabha paññāyati samaṇānaṃ sakyaputtikānaṃ dhammo) 8 ‘‘vadehi, sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, ahaṃ paripūressāmi. Sace pana te paripūraṃ bhavissati, ahaṃ anumodissāmī’’ti. Tatiyampi kho sarabho paribbājako tuṇhī ahosi.
অথ খো তে পরিব্বাজকা সরভং পরিব্বাজকং এতদৰোচুং – ‘‘যদেৰ খো ত্ৰং, আৰুসো সরভ, সমণং গোতমং যাচেয্যাসি তদেৰ তে সমণো গোতমো পৰারেতি। ৰদেহাৰুসো সরভ, কিন্তি তে অঞ্ঞাতো সমণানং সক্যপুত্তিকানং ধম্মো? সচে তে অপরিপূরং ভৰিস্সতি, সমণো গোতমো পরিপূরেস্সতি। সচে পন তে পরিপূরং ভৰিস্সতি, সমণো গোতমো অনুমোদিস্সতী’’তি। এৰং ৰুত্তে সরভো পরিব্বাজকো তুণ্হীভূতো মঙ্কুভূতো পত্তক্খন্ধো অধোমুখো পজ্ঝাযন্তো অপ্পটিভানো নিসীদি।
Atha kho te paribbājakā sarabhaṃ paribbājakaṃ etadavocuṃ – ‘‘yadeva kho tvaṃ, āvuso sarabha, samaṇaṃ gotamaṃ yāceyyāsi tadeva te samaṇo gotamo pavāreti. Vadehāvuso sarabha, kinti te aññāto samaṇānaṃ sakyaputtikānaṃ dhammo? Sace te aparipūraṃ bhavissati, samaṇo gotamo paripūressati. Sace pana te paripūraṃ bhavissati, samaṇo gotamo anumodissatī’’ti. Evaṃ vutte sarabho paribbājako tuṇhībhūto maṅkubhūto pattakkhandho adhomukho pajjhāyanto appaṭibhāno nisīdi.
অথ খো ভগৰা সরভং পরিব্বাজকং তুণ্হীভূতং মঙ্কুভূতং পত্তক্খন্ধং অধোমুখং পজ্ঝাযন্তং অপ্পটিভানং ৰিদিত্ৰা তে পরিব্বাজকে এতদৰোচ –
Atha kho bhagavā sarabhaṃ paribbājakaṃ tuṇhībhūtaṃ maṅkubhūtaṃ pattakkhandhaṃ adhomukhaṃ pajjhāyantaṃ appaṭibhānaṃ viditvā te paribbājake etadavoca –
‘‘যো খো মং, পরিব্বাজকা 9, এৰং ৰদেয্য – ‘সম্মাসম্বুদ্ধস্স তে পটিজানতো ইমে ধম্মা অনভিসম্বুদ্ধা’তি, তমহং তত্থ সাধুকং সমনুযুঞ্জেয্যং সমনুগাহেয্যং সমনুভাসেয্যং। সো ৰত মযা সাধুকং সমনুযুঞ্জিযমানো সমনুগাহিযমানো সমনুভাসিযমানো অট্ঠানমেতং অনৰকাসো যং সো তিণ্ণং ঠানানং নাঞ্ঞতরং 10 ঠানং নিগচ্ছেয্য, অঞ্ঞেন ৰা অঞ্ঞং পটিচরিস্সতি, বহিদ্ধা কথং অপনামেস্সতি, কোপঞ্চ দোসঞ্চ অপ্পচ্চযঞ্চ পাতুকরিস্সতি, তুণ্হীভূতো মঙ্কুভূতো 11 পত্তক্খন্ধো অধোমুখো পজ্ঝাযন্তো অপ্পটিভানো নিসীদিস্সতি, সেয্যথাপি সরভো পরিব্বাজকো।
‘‘Yo kho maṃ, paribbājakā 12, evaṃ vadeyya – ‘sammāsambuddhassa te paṭijānato ime dhammā anabhisambuddhā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ 13 ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto 14 pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.
‘‘যো খো মং, পরিব্বাজকা, এৰং ৰদেয্য – ‘খীণাসৰস্স তে পটিজানতো ইমে আসৰা অপরিক্খীণা’তি, তমহং তত্থ সাধুকং সমনুযুঞ্জেয্যং সমনুগাহেয্যং সমনুভাসেয্যং। সো ৰত মযা সাধুকং সমনুযুঞ্জিযমানো সমনুগাহিযমানো সমনুভাসিযমানো অট্ঠানমেতং অনৰকাসো যং সো তিণ্ণং ঠানানং নাঞ্ঞতরং ঠানং নিগচ্ছেয্য, অঞ্ঞেন ৰা অঞ্ঞং পটিচরিস্সতি, বহিদ্ধা কথং অপনামেস্সতি, কোপঞ্চ দোসঞ্চ অপ্পচ্চযঞ্চ পাতুকরিস্সতি, তুণ্হীভূতো মঙ্কুভূতো পত্তক্খন্ধো অধোমুখো পজ্ঝাযন্তো অপ্পটিভানো নিসীদিস্সতি, সেয্যথাপি সরভো পরিব্বাজকো।
‘‘Yo kho maṃ, paribbājakā, evaṃ vadeyya – ‘khīṇāsavassa te paṭijānato ime āsavā aparikkhīṇā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako.
‘‘যো খো মং, পরিব্বাজকা, এৰং ৰদেয্য – ‘যস্স খো পন তে অত্থায ধম্মো দেসিতো, সো ন নিয্যাতি তক্করস্স সম্মা দুক্খক্খযাযা’তি, তমহং তত্থ সাধুকং সমনুযুঞ্জেয্যং সমনুগাহেয্যং সমনুভাসেয্যং। সো ৰত মযা সাধুকং সমনুযুঞ্জিযমানো সমনুগাহিযমানো সমনুভাসিযমানো অট্ঠানমেতং অনৰকাসো যং সো তিণ্ণং ঠানানং নাঞ্ঞতরং ঠানং নিগচ্ছেয্য, অঞ্ঞেন ৰা অঞ্ঞং পটিচরিস্সতি, বহিদ্ধা কথং অপনামেস্সতি, কোপঞ্চ দোসঞ্চ অপ্পচ্চযঞ্চ পাতুকরিস্সতি, তুণ্হীভূতো মঙ্কুভূতো পত্তক্খন্ধো অধোমুখো পজ্ঝাযন্তো অপ্পটিভানো নিসীদিস্সতি, সেয্যথাপি সরভো পরিব্বাজকো’’তি। অথ খো ভগৰা সিপ্পিনিকাতীরে পরিব্বাজকারামে তিক্খত্তুং সীহনাদং নদিত্ৰা ৰেহাসং পক্কামি।
‘‘Yo kho maṃ, paribbājakā, evaṃ vadeyya – ‘yassa kho pana te atthāya dhammo desito, so na niyyāti takkarassa sammā dukkhakkhayāyā’ti, tamahaṃ tattha sādhukaṃ samanuyuñjeyyaṃ samanugāheyyaṃ samanubhāseyyaṃ. So vata mayā sādhukaṃ samanuyuñjiyamāno samanugāhiyamāno samanubhāsiyamāno aṭṭhānametaṃ anavakāso yaṃ so tiṇṇaṃ ṭhānānaṃ nāññataraṃ ṭhānaṃ nigaccheyya, aññena vā aññaṃ paṭicarissati, bahiddhā kathaṃ apanāmessati, kopañca dosañca appaccayañca pātukarissati, tuṇhībhūto maṅkubhūto pattakkhandho adhomukho pajjhāyanto appaṭibhāno nisīdissati, seyyathāpi sarabho paribbājako’’ti. Atha kho bhagavā sippinikātīre paribbājakārāme tikkhattuṃ sīhanādaṃ naditvā vehāsaṃ pakkāmi.
অথ খো তে পরিব্বাজকা অচিরপক্কন্তস্স ভগৰতো সরভং পরিব্বাজকং সমন্ততো ৰাচাযসন্নিতোদকেন 15 সঞ্জম্ভরিমকংসু 16 – ‘‘সেয্যথাপি, আৰুসো সরভ, ব্রহারঞ্ঞে জরসিঙ্গালো ‘সীহনাদং নদিস্সামী’তি সিঙ্গালকংযেৰ 17 নদতি, ভেরণ্ডকংযেৰ নদতি 18; এৰমেৰং খো ত্ৰং, আৰুসো সরভ, অঞ্ঞত্রেৰ সমণেন গোতমেন ‘সীহনাদং নদিস্সামী’তি সিঙ্গালকংযেৰ নদসি ভেরণ্ডকংযেৰ নদসি। সেয্যথাপি, আৰুসো সরভ, অম্বুকসঞ্চরী 19 ‘পুরিসকরৰিতং 20 রৰিস্সামী’তি অম্বুকসঞ্চরিরৰিতংযেৰ রৰতি; এৰমেৰং খো ত্ৰং, আৰুসো সরভ, অঞ্ঞত্রেৰ সমণেন গোতমেন ‘পুরিসকরৰিতং রৰিস্সামী’তি, অম্বুকসঞ্চরিরৰিতংযেৰ রৰসি। সেয্যথাপি, আৰুসো সরভ, উসভো সুঞ্ঞায গোসালায গম্ভীরং নদিতব্বং মঞ্ঞতি; এৰমেৰং খো ত্ৰং, আৰুসো সরভ, অঞ্ঞত্রেৰ সমণেন গোতমেন গম্ভীরং নদিতব্বং মঞ্ঞসী’’তি। অথ খো তে পরিব্বাজকা সরভং পরিব্বাজকং সমন্ততো ৰাচাযসন্নিতোদকেন সঞ্জম্ভরিমকংসূতি। চতুত্থং।
Atha kho te paribbājakā acirapakkantassa bhagavato sarabhaṃ paribbājakaṃ samantato vācāyasannitodakena 21 sañjambharimakaṃsu 22 – ‘‘seyyathāpi, āvuso sarabha, brahāraññe jarasiṅgālo ‘sīhanādaṃ nadissāmī’ti siṅgālakaṃyeva 23 nadati, bheraṇḍakaṃyeva nadati 24; evamevaṃ kho tvaṃ, āvuso sarabha, aññatreva samaṇena gotamena ‘sīhanādaṃ nadissāmī’ti siṅgālakaṃyeva nadasi bheraṇḍakaṃyeva nadasi. Seyyathāpi, āvuso sarabha, ambukasañcarī 25 ‘purisakaravitaṃ 26 ravissāmī’ti ambukasañcariravitaṃyeva ravati; evamevaṃ kho tvaṃ, āvuso sarabha, aññatreva samaṇena gotamena ‘purisakaravitaṃ ravissāmī’ti, ambukasañcariravitaṃyeva ravasi. Seyyathāpi, āvuso sarabha, usabho suññāya gosālāya gambhīraṃ naditabbaṃ maññati; evamevaṃ kho tvaṃ, āvuso sarabha, aññatreva samaṇena gotamena gambhīraṃ naditabbaṃ maññasī’’ti. Atha kho te paribbājakā sarabhaṃ paribbājakaṃ samantato vācāyasannitodakena sañjambharimakaṃsūti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. সরভসুত্তৰণ্ণনা • 4. Sarabhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৪. সরভসুত্তৰণ্ণনা • 4. Sarabhasuttavaṇṇanā
