| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
4. сарабхасуд̇д̇аван̣н̣анаа
4. Sarabhasuttavaṇṇanā
65. жад̇уд̇т̇з г̇иж̇жхаа зд̇т̇а санд̇ийд̇и г̇иж̇жхам̣, гуудам̣. д̇ам̣ зд̇ассаад̇и г̇иж̇жхагуудо. г̇иж̇жхо вияаад̇и ваа г̇иж̇жхам̣, гуудам̣. д̇ам̣ зд̇ассаад̇и г̇иж̇жхагуудо, баб̣б̣ад̇о. д̇асмим̣ г̇иж̇жхагуудз. д̇знааха ‘‘г̇иж̇жхаа ваа’’д̇иаад̣̇и. ажирабагганд̇од̇и зд̇т̇а на д̣̇зсанд̇арабаггаманам̣ ад̇хиббзд̇ам̣, ат̇а ко саасанабаггамананд̇и д̣̇ассзнд̇о ‘‘имасмим̣ саасанз баб̣б̣аж̇ид̇ваа’’д̇иаад̣̇имааха, д̇знзва хи ‘‘имассаа д̇хаммавинаяаа’’д̇и вуд̇д̇ам̣. лаб̣бхад̇ийд̇и лаабхо, жад̇уннам̣ бажжаяаанамзд̇ам̣ ад̇хиважанам̣. саггажжам̣ гаад̇аб̣б̣о д̣̇аад̇аб̣б̣од̇и саггааро. бажжаяаа зва хи бан̣ийд̇абан̣ийд̇аа сунд̣̇арасунд̣̇араа абхисан̇карид̇ваа гад̇аа саггаараад̇и вужжанд̇и. саггаарод̇и ваа сунд̣̇арагааро, барзхи ад̇д̇ано г̇ааравагирияаа бубпаад̣̇ийхи ваа бууж̇аа. лаабхо жа саггааро жа лаабхасаггаараа, д̇з надтаа бахийнаа зд̇зсанд̇и надталаабхасаггаараа.
65. Catutthe gijjhā ettha santīti gijjhaṃ, kūṭaṃ. Taṃ etassāti gijjhakūṭo. Gijjho viyāti vā gijjhaṃ, kūṭaṃ. Taṃ etassāti gijjhakūṭo, pabbato. Tasmiṃ gijjhakūṭe. Tenāha ‘‘gijjhāvā’’tiādi. Acirapakkantoti ettha na desantarapakkamanaṃ adhippetaṃ, atha kho sāsanapakkamananti dassento ‘‘imasmiṃ sāsane pabbajitvā’’tiādimāha, teneva hi ‘‘imassā dhammavinayā’’ti vuttaṃ. Labbhatīti lābho, catunnaṃ paccayānametaṃ adhivacanaṃ. Sakkaccaṃ kātabbo dātabboti sakkāro. Paccayā eva hi paṇītapaṇītā sundarasundarā abhisaṅkharitvā katā sakkārāti vuccanti. Sakkāroti vā sundarakāro, parehi attano gāravakiriyā pupphādīhi vā pūjā. Lābho ca sakkāro ca lābhasakkārā, te naṭṭhā pahīnā etesanti naṭṭhalābhasakkārā.
махаалаабхасаггааро уббаж̇ж̇ийд̇и д̇ад̣̇аа гира бхаг̇авад̇о махаалаабхасаггааро уббаж̇ж̇и яат̇аа д̇ам̣ жад̇д̇ааро асан̇кзяяз буурид̇ад̣̇аанабаарамисан̃жаяасса. саб̣б̣ад̣̇исаасу хи яамагамахаамзгхо вудтахид̇ваа махогхо вияа саб̣б̣абаарамияо ‘‘згасмим̣ ад̇д̇абхаавз вибаагам̣ д̣̇ассаамаа’’д̇и самбин̣д̣ид̇аа вияа лаабхасаггаарамахогхам̣ ниб̣б̣ад̇д̇аяим̣су. д̇ад̇о д̇ад̇о аннабаанаяаанавад̇т̇амаалааг̇анд̇хавилзбанаад̣̇ихад̇т̇аа кад̇д̇ияаб̣раахман̣аад̣̇аяо ааг̇анд̇ваа ‘‘гахам̣ б̣уд̣̇д̇хо , гахам̣ бхаг̇аваа, гахам̣ д̣̇звад̣̇зво нараасабхо бурисасийхо’’д̇и бхаг̇аванд̇ам̣ бариязсанд̇и, сагадасад̇зхиби бажжаяз аахарид̇ваа огаасам̣ алабхамаанаа саманд̇аа г̇аавуд̇аббамаан̣амби сагадад̇хурзна сагадад̇хурам̣ аахажжа д̇идтанд̇и жзва ануб̣анд̇ханд̇и жа анд̇хагавинд̣̇аб̣раахман̣о вияа. яат̇аа жа бхаг̇авад̇о, звам̣ бхигкусан̇гхассаби. вуд̇д̇амби жзд̇ам̣ –
Mahālābhasakkāro uppajjīti tadā kira bhagavato mahālābhasakkāro uppajji yathā taṃ cattāro asaṅkheyye pūritadānapāramisañcayassa. Sabbadisāsu hi yamakamahāmegho vuṭṭhahitvā mahogho viya sabbapāramiyo ‘‘ekasmiṃ attabhāve vipākaṃ dassāmā’’ti sampiṇḍitā viya lābhasakkāramahoghaṃ nibbattayiṃsu. Tato tato annapānayānavatthamālāgandhavilepanādihatthā khattiyabrāhmaṇādayo āgantvā ‘‘kahaṃ buddho , kahaṃ bhagavā, kahaṃ devadevo narāsabho purisasīho’’ti bhagavantaṃ pariyesanti, sakaṭasatehipi paccaye āharitvā okāsaṃ alabhamānā samantā gāvutappamāṇampi sakaṭadhurena sakaṭadhuraṃ āhacca tiṭṭhanti ceva anubandhanti ca andhakavindabrāhmaṇo viya. Yathā ca bhagavato, evaṃ bhikkhusaṅghassapi. Vuttampi cetaṃ –
‘‘д̇зна ко бана самаязна бхаг̇аваа саггад̇о ход̇и г̇аругад̇о маанид̇о бууж̇ид̇о абажид̇о лаабхий жийварабин̣д̣абаад̇асзнаасанаг̇илаанабажжаяабхзсаж̇ж̇абаригкаараанам̣, бхигкусан̇гхоби саггад̇о ход̇и…бз… баригкаараана’’нд̇и (уд̣̇аа. 38).
‘‘Tena kho pana samayena bhagavā sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṃ, bhikkhusaṅghopi sakkato hoti…pe… parikkhārāna’’nti (udā. 38).
д̇ат̇аа –
Tathā –
‘‘яаавад̇аа ко бана, жунд̣̇а, зд̇арахи сан̇гхо ваа г̇ан̣о ваа логз уббанно, наахам̣, жунд̣̇а, ан̃н̃ам̣ згам̣ сан̇гхамби саманубассаами звам̣лаабхаг̇г̇аяасаг̇г̇аббад̇д̇ам̣ яат̇аривааяам̣, жунд̣̇а, бхигкусан̇гхо’’д̇и (д̣̇ий. ни. 3.176).
‘‘Yāvatā kho pana, cunda, etarahi saṅgho vā gaṇo vā loke uppanno, nāhaṃ, cunda, aññaṃ ekaṃ saṅghampi samanupassāmi evaṃlābhaggayasaggappattaṃ yatharivāyaṃ, cunda, bhikkhusaṅgho’’ti (dī. ni. 3.176).
свааяам̣ бхаг̇авад̇о жа сан̇гхасса жа уббанно лаабхасаггааро згад̇о худ̇ваа д̣̇виннам̣ махаанад̣̇ийнам̣ уд̣̇агам̣ вияа аббамзяяо ахоси, бхаг̇авад̇о бана бхигкусан̇гхасса жа уббанно лаабхасаггааро д̇хаммассаби уббанноязва. д̇хаммад̇хараанан̃хи гад̇о саггааро д̇хаммасса гад̇о наама ход̇и. д̇зна вуд̇д̇ам̣ ‘‘д̇ин̣н̣ам̣ рад̇анаанам̣ махаалаабхасаггааро уббаж̇ж̇ий’’д̇и.
Svāyaṃ bhagavato ca saṅghassa ca uppanno lābhasakkāro ekato hutvā dvinnaṃ mahānadīnaṃ udakaṃ viya appameyyo ahosi, bhagavato pana bhikkhusaṅghassa ca uppanno lābhasakkāro dhammassapi uppannoyeva. Dhammadharānañhi kato sakkāro dhammassa kato nāma hoti. Tena vuttaṃ ‘‘tiṇṇaṃ ratanānaṃ mahālābhasakkāro uppajjī’’ti.
вуд̇д̇амад̇т̇ам̣ баал̣ияаа нид̣̇ассзнд̇о ‘‘яат̇аахаа’’д̇иаад̣̇имааха. д̇ад̇т̇а саггад̇од̇и саггаараббад̇д̇о. яасса хи жад̇д̇ааро бажжаяз саггад̇ваа суабхисан̇кад̇з бан̣ийд̇абан̣ийд̇з убанзд̇и, со саггад̇о. г̇аругад̇од̇и г̇арубхаавахзд̇уунам̣ уд̇д̇амаг̇ун̣аанам̣ мад̇т̇агаббад̇д̇ияаа анан̃н̃асаад̇хааран̣зна г̇аругаарзна саб̣б̣ад̣̇звамануссзхи баасаан̣ажчад̇д̇ам̣ вияа г̇аругад̇о. яасмин̃хи г̇арубхаавам̣ бажжубадтабзд̇ваа бажжаяз д̣̇знд̇и, со г̇аругад̇о. маанид̇од̇и саммаабадибад̇д̇ияаа маанид̇о манзна бияааяид̇о. д̇ааяа хи вин̃н̃уунам̣ манаабад̇аа. бууж̇ид̇од̇и маананаад̣̇ибууж̇ааяа жзва жад̇убажжаяабууж̇ааяа жа бууж̇ид̇о. яасса хи саб̣б̣амзд̇ам̣ бууж̇анан̃жа гаронд̇и, со бууж̇ид̇о. абажид̇од̇и нийжавуд̇д̇игаран̣зна абажид̇о. сад̇т̇ааран̃хи д̣̇исваа мануссаа хад̇т̇игканд̇хаад̣̇ийхи од̇аранд̇и, маг̇г̇ам̣ д̣̇знд̇и, ам̣сагуудад̇о саадагам̣ абанзнд̇и. аасанад̇о вудтаханд̇и, ванд̣̇анд̇ийд̇и звам̣ со д̇зхи абажид̇о наама ход̇и.
Vuttamatthaṃ pāḷiyā nidassento ‘‘yathāhā’’tiādimāha. Tattha sakkatoti sakkārappatto. Yassa hi cattāro paccaye sakkatvā suabhisaṅkhate paṇītapaṇīte upaneti, so sakkato. Garukatoti garubhāvahetūnaṃ uttamaguṇānaṃ matthakappattiyā anaññasādhāraṇena garukārena sabbadevamanussehi pāsāṇacchattaṃ viya garukato. Yasmiñhi garubhāvaṃ paccupaṭṭhapetvā paccaye denti, so garukato. Mānitoti sammāpaṭipattiyā mānito manena piyāyito. Tāya hi viññūnaṃ manāpatā. Pūjitoti mānanādipūjāya ceva catupaccayapūjāya ca pūjito. Yassa hi sabbametaṃ pūjanañca karonti, so pūjito. Apacitoti nīcavuttikaraṇena apacito. Satthārañhi disvā manussā hatthikkhandhādīhi otaranti, maggaṃ denti, aṃsakūṭato sāṭakaṃ apanenti. Āsanato vuṭṭhahanti, vandantīti evaṃ so tehi apacito nāma hoti.
аван̣н̣ам̣ бад̇т̇арид̇ваад̇и аван̣н̣ам̣ д̇ад̇т̇а д̇ад̇т̇а сам̣гид̇д̇анавасзна бад̇т̇арид̇ваа. аавадданимааяанд̇и ааваддзд̇ваа г̇ахан̣амааяам̣. ааваддзд̇и буримаагаарад̇о нивад̇д̇зд̇и ад̇д̇ано васз вад̇д̇зд̇и зд̇ааяаад̇и аавадданий, мааяаа, д̇ам̣ аавадданимааяам̣ осаарзд̇ваа бариж̇аббзд̇ваад̇и ад̇т̇о. годид̇о бадтааяаад̇и анд̇имагодид̇о бадтааяа. т̇ад̣̇д̇хагааязна парусаваажааяа д̇ин̣н̣ам̣ рад̇анаанам̣ аван̣н̣агат̇анам̣ анад̇т̇аавахад̇д̇аа висасин̃жанасад̣̇исаа ход̇ийд̇и ааха ‘‘висам̣ син̃жид̇ваа’’д̇и. ан̃н̃аад̇од̇и аан̃аад̇о. д̇знааха ‘‘н̃аад̇о’’д̇иаад̣̇и.
Avaṇṇaṃ pattharitvāti avaṇṇaṃ tattha tattha saṃkittanavasena pattharitvā. Āvaṭṭanimāyanti āvaṭṭetvā gahaṇamāyaṃ. Āvaṭṭeti purimākārato nivatteti attano vase vatteti etāyāti āvaṭṭanī, māyā, taṃ āvaṭṭanimāyaṃ osāretvā parijappetvāti attho. Koṭito paṭṭhāyāti antimakoṭito paṭṭhāya. Thaddhakāyena pharusavācāya tiṇṇaṃ ratanānaṃ avaṇṇakathanaṃ anatthāvahattā visasiñcanasadisā hotīti āha ‘‘visaṃ siñcitvā’’ti. Aññātoti āñāto. Tenāha ‘‘ñāto’’tiādi.
гааяан̇г̇анд̇и гааяамзва ан̇г̇ам̣, гааяасса ваа ан̇г̇ам̣, сийсаад̣̇и. ваажан̇г̇анд̇и ‘‘ход̇у, саад̇хуу’’д̇и звамаад̣̇иваажааяа аваяавам̣. згагзнаад̇и асахааязна. имасса банад̇т̇ассаад̇и ‘‘жарияам̣ жаран̣агаалз’’д̇иаад̣̇инаа вуд̇д̇асса. яад̇о яад̇о г̇ару д̇хуранд̇и яасмим̣ яасмим̣ таанз д̇хурам̣ г̇ару бхааригам̣ ход̇и, ан̃н̃з б̣алиб̣ад̣̇д̣̇аа угкибид̇ум̣ на саггонд̇и. яад̇о г̇амбхийравад̇д̇анийд̇и вад̇д̇анд̇и зд̇т̇аад̇и вад̇д̇аний, д̣̇уммаг̇г̇ассзд̇ам̣ наамам̣, яасмим̣ таанз уд̣̇агажигкалламаханд̇ад̇ааяа ваа висамажчиннад̇адабхаавзна ваа маг̇г̇о г̇амбхийро ход̇ийд̇и ад̇т̇о. д̇ад̣̇аассу ган̣хам̣ яун̃ж̇знд̇ийд̇и ассууд̇и нибаад̇амад̇д̇ам̣, д̇ад̣̇аа ган̣хам̣ яун̃ж̇знд̇ийд̇и ад̇т̇о. яад̣̇аа д̇хуран̃жа г̇ару ход̇и маг̇г̇о жа г̇амбхийро, д̇ад̣̇аа ан̃н̃з б̣алиб̣ад̣̇д̣̇з абанзд̇ваа ган̣хамзва яун̃ж̇знд̇ийд̇и вуд̇д̇ам̣ ход̇и. сваассу д̇ам̣ вахад̇з д̇хуранд̇и зд̇т̇аби ассууд̇и нибаад̇амад̇д̇амзва, со д̇ам̣ д̇хурам̣ вахад̇ийд̇и ад̇т̇о.
Kāyaṅganti kāyameva aṅgaṃ, kāyassa vā aṅgaṃ, sīsādi. Vācaṅganti ‘‘hotu, sādhū’’ti evamādivācāya avayavaṃ. Ekakenāti asahāyena. Imassa panatthassāti ‘‘cariyaṃ caraṇakāle’’tiādinā vuttassa. Yato yato garu dhuranti yasmiṃ yasmiṃ ṭhāne dhuraṃ garu bhārikaṃ hoti, aññe balibaddā ukkhipituṃ na sakkonti. Yato gambhīravattanīti vattanti etthāti vattanī, dummaggassetaṃ nāmaṃ, yasmiṃ ṭhāne udakacikkhallamahantatāya vā visamacchinnataṭabhāvena vā maggo gambhīro hotīti attho. Tadāssu kaṇhaṃ yuñjentīti assūti nipātamattaṃ, tadā kaṇhaṃ yuñjentīti attho. Yadā dhurañca garu hoti maggo ca gambhīro, tadā aññe balibadde apanetvā kaṇhameva yuñjentīti vuttaṃ hoti. Svāssu taṃ vahate dhuranti etthapi assūti nipātamattameva, so taṃ dhuraṃ vahatīti attho.
г̇зхавзд̇ананд̇и г̇зхз нивудтабхаавахзд̇у д̣̇аад̇аб̣б̣ам̣. гаал̣аго наама наамзнаад̇и ан̃ж̇анаван̣н̣о гирзса, д̇знасса ‘‘гаал̣аго’’д̇и наамам̣ агам̣су. гаал̣агам̣ убасан̇гамид̇ваа аахаад̇и гаал̣аго гира згад̣̇ивасам̣ жинд̇зси ‘‘маяхам̣ маад̇аа д̣̇уг̇г̇ад̇аа мам̣ буд̇д̇адтаанз табзд̇ваа д̣̇угкзна босзд̇и, яам̣нуунаахам̣ бхад̇им̣ гад̇ваа имам̣ д̣̇уг̇г̇ад̇абхаавад̇о можзяяа’’нд̇и. со д̇ад̇о бадтааяа бхад̇им̣ убад̇хаарзнд̇о вижарад̇и. ат̇а д̇асмим̣ д̣̇ивасз г̇аамаг̇оруубзхи сад̣̇д̇хим̣ д̇ад̇т̇а самийбз жарад̇и. сад̇т̇аваахабуд̇д̇оби г̇осуд̇д̇авид̇д̇аго, со ‘‘ад̇т̇и ну ко зд̇зсам̣ г̇уннам̣ анд̇арз сагадаани уд̇д̇аарзд̇ум̣ самад̇т̇о усабхааж̇аанийяо’’д̇и убад̇хаараяамаано б̣од̇хисад̇д̇ам̣ д̣̇исваа ‘‘аяам̣ ааж̇аанийяо сагкиссад̇и маяхам̣ сагадаани уд̇д̇аарзд̇у’’нд̇и ан̃н̃ааси. д̇зна д̇ам̣ убасан̇гамид̇ваа звамааха. со ан̃н̃зсам̣…бз… г̇зхамзва аг̇амаасийд̇и д̇ад̣̇аа гира г̇аамад̣̇аарагаа ‘‘гим̣ наамзд̇ам̣ гаал̣агасса г̇алз’’д̇и д̇асса санд̇игам̣ ааг̇ажчанд̇и. со д̇з ануб̣анд̇хид̇ваа д̣̇уурад̇ова балаабзнд̇о маад̇у санд̇игам̣ г̇ад̇о. д̇ам̣ санд̇хааязд̇ам̣ вуд̇д̇ам̣.
Gehavetananti gehe nivuṭṭhabhāvahetu dātabbaṃ. Kāḷako nāma nāmenāti añjanavaṇṇo kiresa, tenassa ‘‘kāḷako’’ti nāmaṃ akaṃsu. Kāḷakaṃ upasaṅkamitvā āhāti kāḷako kira ekadivasaṃ cintesi ‘‘mayhaṃ mātā duggatā maṃ puttaṭṭhāne ṭhapetvā dukkhena poseti, yaṃnūnāhaṃ bhatiṃ katvā imaṃ duggatabhāvato moceyya’’nti. So tato paṭṭhāya bhatiṃ upadhārento vicarati. Atha tasmiṃ divase gāmagorūpehi saddhiṃ tattha samīpe carati. Satthavāhaputtopi gosuttavittako, so ‘‘atthi nu kho etesaṃ gunnaṃ antare sakaṭāni uttāretuṃ samattho usabhājānīyo’’ti upadhārayamāno bodhisattaṃ disvā ‘‘ayaṃ ājānīyo sakkhissati mayhaṃ sakaṭāni uttāretu’’nti aññāsi. Tena taṃ upasaṅkamitvā evamāha. So aññesaṃ…pe… gehameva agamāsīti tadā kira gāmadārakā ‘‘kiṃ nāmetaṃ kāḷakassa gale’’ti tassa santikaṃ āgacchanti. So te anubandhitvā dūratova palāpento mātu santikaṃ gato. Taṃ sandhāyetaṃ vuttaṃ.
сааяанхасамаяанд̇и сааяанхагаалз. бхуммад̇т̇з зд̇ам̣ убаяог̇аважанам̣. на хзд̇т̇а ажжанд̇асам̣яог̇о самбхавад̇и. бадисаллаанаа вудтид̇од̇и зд̇т̇а д̇зхи д̇зхи сад̣̇д̇хивихааригаанд̇зваасигаубаасагаубаасигаад̣̇исад̇д̇зхи жзва руубаарамман̣аад̣̇исан̇каарзхи жа бадинивад̇д̇зд̇ваа абасаггид̇ваа нилийяанам̣ вивзжанам̣ гааяажид̇д̇зхи д̇ад̇о вивид̇д̇ад̇ааяа бадисаллаанам̣ гааяавивзго, жид̇д̇авивзго жа. яо д̇ад̇о д̣̇увид̇хавивзгад̇о вудтид̇о бхаван̇г̇аббад̇д̇ияаа саб̣рахмажаарийхи самааг̇амзна жа абзд̇о. со бадисаллаанаа вудтид̇о наама ход̇и. аяам̣ бана яасмаа бадисаллаанаанам̣ уд̇д̇амад̇о паласамаабад̇д̇ид̇о вудтааси, д̇асмаа ‘‘паласамаабад̇д̇ид̇о’’д̇и вуд̇д̇ам̣. гааяасагкино бхависсаамаад̇и наамагааязна д̣̇зсанаасамбадижчанавасзна сагкибхууд̇аа бхависсаама. нану жа ‘‘бан̃н̃ад̇д̇з аасанз нисийд̣̇ий’’д̇и ид̣̇ам̣ гасмаа вуд̇д̇ам̣. д̇ид̇т̇ияаа хи бхаг̇авад̇о бадибагкаа, д̇з гасмаа д̇асса аасанам̣ бан̃н̃аабзнд̇ийд̇и ааха ‘‘д̇ат̇ааг̇ад̇о хий’’д̇иаад̣̇и.
Sāyanhasamayanti sāyanhakāle. Bhummatthe etaṃ upayogavacanaṃ. Na hettha accantasaṃyogo sambhavati. Paṭisallānā vuṭṭhitoti ettha tehi tehi saddhivihārikaantevāsikaupāsakaupāsikādisattehi ceva rūpārammaṇādisaṅkhārehi ca paṭinivattetvā apasakkitvā nilīyanaṃ vivecanaṃ kāyacittehi tato vivittatāya paṭisallānaṃ kāyaviveko, cittaviveko ca. Yo tato duvidhavivekato vuṭṭhito bhavaṅgappattiyā sabrahmacārīhi samāgamena ca apeto. So paṭisallānā vuṭṭhito nāma hoti. Ayaṃ pana yasmā paṭisallānānaṃ uttamato phalasamāpattito vuṭṭhāsi, tasmā ‘‘phalasamāpattito’’ti vuttaṃ. Kāyasakkhino bhavissāmāti nāmakāyena desanāsampaṭicchanavasena sakkhibhūtā bhavissāma. Nanu ca ‘‘paññatte āsane nisīdī’’ti idaṃ kasmā vuttaṃ. Titthiyā hi bhagavato paṭipakkhā, te kasmā tassa āsanaṃ paññāpentīti āha ‘‘tathāgato hī’’tiādi.
виг̇г̇аахигагат̇анд̇и виг̇г̇аахасам̣вад̇д̇анигам̣ саарамбхагат̇ам̣. ааяаажзяяаасийд̇и важийбхзд̣̇ам̣ гад̇ваа яаажзяяааси. бад̇т̇зяяаасийд̇и манасаа аасийсзяяааси. бихзяяаасийд̇и д̇ассзва взважанам̣. нид̇д̇зж̇ад̇ам̣ аабаннод̇и д̇зж̇ахаанияаа нид̇д̇зж̇абхаавам̣ аабанно, нид̇д̇зж̇абхууд̇од̇и ад̇т̇о. д̇ад̇о зва бхигкуаад̣̇аяоби саммукаа ологзд̇ум̣ асамад̇т̇ад̇ааяа бад̇д̇агканд̇хо, бад̇ид̇агканд̇ход̇и ад̇т̇о. д̇знааха ‘‘онад̇аг̇ийво’’д̇и. д̣̇ассид̇ад̇хаммзсууд̇и вуд̇д̇ад̇хаммзсу. важанамад̇д̇амзва хи д̇зсам̣, на бана д̣̇ассанам̣ д̇аад̣̇исассзва д̇хаммасса абхаавад̇о. бхаг̇авад̇о зва ваа ‘‘имз д̇хаммаа анабхисамб̣уд̣̇д̇хаа’’д̇и барасса важанавасзна д̣̇ассид̇ад̇хаммзсу. бадижариссад̇ийд̇и бадижчаад̣̇анавасз жариссад̇и бавад̇д̇иссад̇и, бадижчаад̣̇анад̇т̇о зва ваа жарад̇и-сад̣̇д̣̇о анзгад̇т̇ад̇д̇аа д̇хаад̇уунанд̇и ааха ‘‘бадижчаад̣̇зссад̇ий’’д̇и. ан̃н̃зна ваа ан̃н̃анд̇и бана бадижчаад̣̇анаагаарад̣̇ассананд̇и ааха ‘‘ан̃н̃зна ваа важанзнаа’’д̇иаад̣̇и.
Viggāhikakathanti viggāhasaṃvattanikaṃ sārambhakathaṃ. Āyāceyyāsīti vacībhedaṃ katvā yāceyyāsi. Pattheyyāsīti manasā āsīseyyāsi. Piheyyāsīti tasseva vevacanaṃ. Nittejataṃ āpannoti tejahāniyā nittejabhāvaṃ āpanno, nittejabhūtoti attho. Tato eva bhikkhuādayopi sammukhā oloketuṃ asamatthatāya pattakkhandho, patitakkhandhoti attho. Tenāha ‘‘onatagīvo’’ti. Dassitadhammesūti vuttadhammesu. Vacanamattameva hi tesaṃ, na pana dassanaṃ tādisasseva dhammassa abhāvato. Bhagavato eva vā ‘‘ime dhammā anabhisambuddhā’’ti parassa vacanavasena dassitadhammesu. Paṭicarissatīti paṭicchādanavase carissati pavattissati, paṭicchādanattho eva vā carati-saddo anekatthattā dhātūnanti āha ‘‘paṭicchādessatī’’ti. Aññenavā aññanti pana paṭicchādanākāradassananti āha ‘‘aññena vā vacanenā’’tiādi.
д̇ад̇т̇а ан̃н̃ам̣ важананд̇и яам̣ самануяун̃ж̇анд̇зна бхаг̇авад̇аа барасса д̣̇осавибхааванам̣ важанам̣ вуд̇д̇ам̣, д̇ам̣ д̇ад̇о ан̃н̃знзва важанзна бадижчаад̣̇зд̇и. ‘‘аабад̇д̇им̣ аабанносий’’д̇и жод̣̇агзна вуд̇д̇аважанам̣ вияа ‘‘го аабанно, гим̣ аабанно, гисмим̣ аабанно, гам̣ бхан̣ат̇а, гим̣ бхан̣ат̇аа’’д̇иаад̣̇иважанзна ан̃н̃ам̣ ааг̇анд̇угагат̇ам̣ аахаранд̇о ‘‘д̇вам̣ ид̇т̇аннаамам̣ аабад̇д̇им̣ аабанносий’’д̇и будто ‘‘баадалибуд̇д̇ам̣ г̇ад̇омхий’’д̇и вад̇ваа буна ‘‘на д̇ава баадалибуд̇д̇аг̇аманам̣ бужчаама, аабад̇д̇им̣ бужчаамаа’’д̇и вуд̇д̇з д̇ад̇о рааж̇аг̇ахам̣ г̇ад̇омхи. рааж̇аг̇ахам̣ ваа яаахи б̣раахман̣аг̇зхам̣ ваа, аабад̇д̇им̣ аабанносийд̇и. ‘‘д̇ад̇т̇а мз суугарамам̣сам̣ лад̣̇д̇ха’’нд̇иаад̣̇ийни вад̣̇анд̇о вияа самануяун̃ж̇агзна вуд̇д̇аважанад̇о ан̃н̃ам̣ ааг̇анд̇угагат̇ам̣ аахаранд̇о абанаамзссад̇и, вигкзбам̣ г̇амаяиссад̇и. аббад̇ийд̇аа хонд̇и д̇зна ад̇удтаа асоманассигаад̇и абажжаяо, д̣̇оманассзд̇ам̣ ад̇хиважанам̣. нзва ад̇д̇ано, на барзсам̣ хид̇ам̣ абхираад̇хаяад̇ийд̇и анабхирад̣̇д̇хи, д̣̇оманассамзва. д̇знзвааха ‘‘абажжаязна д̣̇оманассам̣ вуд̇д̇а’’нд̇и.
Tattha aññaṃ vacananti yaṃ samanuyuñjantena bhagavatā parassa dosavibhāvanaṃ vacanaṃ vuttaṃ, taṃ tato aññeneva vacanena paṭicchādeti. ‘‘Āpattiṃ āpannosī’’ti codakena vuttavacanaṃ viya ‘‘ko āpanno, kiṃ āpanno, kismiṃ āpanno, kaṃ bhaṇatha, kiṃ bhaṇathā’’tiādivacanena aññaṃ āgantukakathaṃ āharanto ‘‘tvaṃ itthannāmaṃ āpattiṃ āpannosī’’ti puṭṭho ‘‘pāṭaliputtaṃ gatomhī’’ti vatvā puna ‘‘na tava pāṭaliputtagamanaṃ pucchāma, āpattiṃ pucchāmā’’ti vutte tato rājagahaṃ gatomhi. Rājagahaṃ vā yāhi brāhmaṇagehaṃ vā, āpattiṃ āpannosīti. ‘‘Tattha me sūkaramaṃsaṃ laddha’’ntiādīni vadanto viya samanuyuñjakena vuttavacanato aññaṃ āgantukakathaṃ āharanto apanāmessati, vikkhepaṃ gamayissati. Appatītā honti tena atuṭṭhā asomanassikāti apaccayo, domanassetaṃ adhivacanaṃ. Neva attano, na paresaṃ hitaṃ abhirādhayatīti anabhiraddhi, domanassameva. Tenevāha ‘‘apaccayena domanassaṃ vutta’’nti.
яасса ко бана д̇з ад̇т̇ааяа д̇хаммо д̣̇зсид̇од̇и зд̇т̇а д̇хамма-сад̣̇д̣̇зна жад̇усажжад̇хаммо вуд̇д̇од̇и ааха ‘‘яасса маг̇г̇асса ваа паласса ваа ад̇т̇ааяаа’’д̇и. жад̇усажжад̇хаммо хи маг̇г̇апалаад̇хиг̇амад̇т̇ааяа д̣̇зсийяад̇и. на ниг̇г̇ажчад̇ийд̇и на бавад̇д̇зд̇и. нанд̇и нам̣ д̇хаммам̣. ид̣̇аани ‘‘яасса ко бана д̇з ад̇т̇ааяа д̇хаммо д̣̇зсид̇о’’д̇и зд̇т̇а д̇хамма-сад̣̇д̣̇зна бадибад̇д̇ид̇хаммо д̣̇ассид̇о, на бана жад̇усажжад̇хаммод̇и ад̇хиббааязна ад̇т̇авигаббам̣ д̣̇ассзнд̇о ‘‘ат̇а ваа’’д̇иаад̣̇имааха. бан̃жа д̇хаммаад̇и г̇амбхийран̃аан̣ажарияабхууд̇аанам̣ канд̇хаад̣̇ийнам̣ уг̇г̇ахасаванад̇хааран̣абарижаяаяонисоманасигаарз санд̇хааяааха. д̇аггарасса саммаа д̣̇угкагкаяааяаад̇и зд̇т̇а саммаасад̣̇д̣̇о убхаяад̇т̇ааби яож̇зд̇аб̣б̣о ‘‘саммаа д̇аггарасса саммаа д̣̇угкагкаяааяаа’’д̇и. яо хи саммаа д̇хаммам̣ бадибаж̇ж̇ад̇и, д̇ассзва саммаа д̣̇угкагкаяо ход̇ийд̇и. яо бана вуд̇д̇анаязна д̇аггаро, д̇асса нияяаанам̣ ад̇т̇ад̇о д̇хаммассзва нияяаананд̇и д̇аббадигкзбзна ‘‘со д̇хаммо…бз… на нияяаад̇и на ниг̇г̇ажчад̇ий’’д̇и ааха.
Yassa kho pana te atthāya dhammo desitoti ettha dhamma-saddena catusaccadhammo vuttoti āha ‘‘yassa maggassa vā phalassa vā atthāyā’’ti. Catusaccadhammo hi maggaphalādhigamatthāya desīyati. Na niggacchatīti na pavatteti. Nanti naṃ dhammaṃ. Idāni ‘‘yassa kho pana te atthāya dhammo desito’’ti ettha dhamma-saddena paṭipattidhammo dassito, na pana catusaccadhammoti adhippāyena atthavikappaṃ dassento ‘‘atha vā’’tiādimāha. Pañca dhammāti gambhīrañāṇacariyabhūtānaṃ khandhādīnaṃ uggahasavanadhāraṇaparicayayonisomanasikāre sandhāyāha. Takkarassa sammā dukkhakkhayāyāti ettha sammāsaddo ubhayatthāpi yojetabbo ‘‘sammā takkarassa sammā dukkhakkhayāyā’’ti. Yo hi sammā dhammaṃ paṭipajjati, tasseva sammā dukkhakkhayo hotīti. Yo pana vuttanayena takkaro, tassa niyyānaṃ atthato dhammasseva niyyānanti tappaṭikkhepena ‘‘so dhammo…pe… na niyyāti na niggacchatī’’ti āha.
яад̣̇и д̇иражчаанасийхасса наад̣̇о саб̣б̣ад̇иражчааназгажжамануссаамануссанаад̣̇ад̇о сздтад̇д̇аа сздтанаад̣̇о, гиман̇г̇ам̣ бана д̇ат̇ааг̇ад̇асийхасса наад̣̇од̇и ааха ‘‘сийханаад̣̇анд̇и сздтанаад̣̇а’’нд̇и. яад̣̇и ваа д̇иражчаанасийханаад̣̇асса сздтанаад̣̇ад̇аа ниб̣бхаяад̇ааяа аббадисад̇д̇уд̇ааяа ижчид̇аа, д̇ат̇ааг̇ад̇асийханаад̣̇ассзва аяамад̇т̇о саад̇исаяод̇и ааха ‘‘абхийд̇анаад̣̇ам̣ аббадинаад̣̇а’’нд̇и. ‘‘адтаанамзд̇ам̣ анавагаасо’’д̇иаад̣̇инаа (ма. ни. 3.129; а. ни. 1.268-271) хи яо ад̇т̇о вуд̇д̇о, д̇асса бхууд̇ад̇ааяа аяам̣ наад̣̇о сздтанаад̣̇о наама ход̇и уд̇д̇аманаад̣̇о. бхууд̇ад̇т̇о хи уд̇д̇амад̇т̇од̇и. имамад̇т̇ам̣ бана вад̣̇анд̇асса бхаг̇авад̇о ан̃н̃ад̇о бхаяам̣ ваа аасан̇гаа ваа над̇т̇ийд̇и абхийд̇анаад̣̇о наама ход̇и. абхууд̇ан̃хи вад̣̇ад̇о гуд̇ожи бхаяам̣ ваа аасан̇гаа ваа сияаа, звам̣ бана вад̣̇анд̇ам̣ бхаг̇аванд̇ам̣ гожи удтахид̇ваа бадиб̣аахид̇ум̣ самад̇т̇о наама над̇т̇ийд̇и аяам̣ наад̣̇о аббадинаад̣̇о наама ход̇и.
Yadi tiracchānasīhassa nādo sabbatiracchānaekaccamanussāmanussanādato seṭṭhattā seṭṭhanādo, kimaṅgaṃ pana tathāgatasīhassa nādoti āha ‘‘sīhanādanti seṭṭhanāda’’nti. Yadi vā tiracchānasīhanādassa seṭṭhanādatā nibbhayatāya appaṭisattutāya icchitā, tathāgatasīhanādasseva ayamattho sātisayoti āha ‘‘abhītanādaṃ appaṭināda’’nti. ‘‘Aṭṭhānametaṃ anavakāso’’tiādinā (ma. ni. 3.129; a. ni. 1.268-271) hi yo attho vutto, tassa bhūtatāya ayaṃ nādo seṭṭhanādo nāma hoti uttamanādo. Bhūtattho hi uttamatthoti. Imamatthaṃ pana vadantassa bhagavato aññato bhayaṃ vā āsaṅkā vā natthīti abhītanādo nāma hoti. Abhūtañhi vadato kutoci bhayaṃ vā āsaṅkā vā siyā, evaṃ pana vadantaṃ bhagavantaṃ koci uṭṭhahitvā paṭibāhituṃ samattho nāma natthīti ayaṃ nādo appaṭinādo nāma hoti.
саманд̇ад̇о ниг̇г̇ан̣ханавасзна д̇од̣̇анам̣ виж̇жханам̣ саннид̇од̣̇агам̣, саммаа ваа нид̇уд̣̇анд̇и бийл̣знд̇и зд̇знаад̇и саннид̇од̣̇агам̣. ваажааяаад̇и жа бажжад̇д̇з гаран̣аважанам̣. д̇знааха ‘‘важанабад̇од̣̇знаа’’д̇и. сан̃ж̇амбхаримагам̣сууд̇и саманд̇ад̇о самбхарид̇ам̣ агам̣су, саб̣б̣з бариб̣б̣ааж̇агаа ваажаад̇од̣̇анзхи д̇уд̣̇им̣сууд̇и ад̇т̇о. д̇знааха ‘‘самбхарид̇ам̣…бз… виж̇жхим̣суу’’д̇и. син̇г̇аалагам̣язваад̇и син̇г̇ааламзва, ‘‘сзг̇аалагам̣язваа’’д̇иби баато. д̇ассзваад̇и син̇г̇ааларавассзва. ат̇а ваа бхзран̣д̣агам̣язваад̇и бхзд̣̇ан̣д̣асагун̣исад̣̇исам̣язваад̇и ад̇т̇о. бхзд̣̇ан̣д̣ам̣ наама зго багкий д̣̇вимуко, д̇асса гира сад̣̇д̣̇о ад̇ивияа вируубо аманаабо. д̇знааха ‘‘абижа бхиннассарам̣ аманаабасад̣̇д̣̇ам̣ над̣̇ад̇ий’’д̇и. сзсамзд̇т̇а уд̇д̇аанамзва.
Samantato niggaṇhanavasena todanaṃ vijjhanaṃ sannitodakaṃ, sammā vā nitudanti pīḷenti etenāti sannitodakaṃ. Vācāyāti ca paccatte karaṇavacanaṃ. Tenāha ‘‘vacanapatodenā’’ti. Sañjambharimakaṃsūti samantato sambharitaṃ akaṃsu, sabbe paribbājakā vācātodanehi tudiṃsūti attho. Tenāha ‘‘sambharitaṃ…pe… vijjhiṃsū’’ti. Siṅgālakaṃyevāti siṅgālameva, ‘‘segālakaṃyevā’’tipi pāṭho. Tassevāti siṅgālaravasseva. Atha vā bheraṇḍakaṃyevāti bhedaṇḍasakuṇisadisaṃyevāti attho. Bhedaṇḍaṃ nāma eko pakkhī dvimukho, tassa kira saddo ativiya virūpo amanāpo. Tenāha ‘‘apica bhinnassaraṃ amanāpasaddaṃ nadatī’’ti. Sesamettha uttānameva.
сарабхасуд̇д̇аван̣н̣анаа нидтид̇аа.
Sarabhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 4. сарабхасуд̇д̇ам̣ • 4. Sarabhasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 4. сарабхасуд̇д̇аван̣н̣анаа • 4. Sarabhasuttavaṇṇanā
