| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៣. សរទសុត្តវណ្ណនា
3. Saradasuttavaṇṇanā
៩៥. តតិយេ វិទ្ធេតិ ទូរីភូតេ។ ទូរភាវោ ច អាកាសស្ស វលាហកវិគមេន ហោតីតិ អាហ ‘‘វលាហកវិគមេន ទូរីភូតេ’’តិ។ តេនេវ ហិ ‘‘វិទ្ធេ វិគតវលាហកេ’’តិ វុត្តំ។ នភំ អព្ភុស្សក្កមានោតិ អាកាសំ អភិលង្ឃន្តោ។ ឥមិនា តរុណសូរិយភាវោ ទស្សិតោ។ នាតិទូរោទិតេ ហិ អាទិច្ចេ តរុណសូរិយសមញ្ញា។ ទុវិធមេវស្ស សំយោជនំ នត្ថីតិ ឱរម្ភាគិយឧទ្ធម្ភាគិយវសេន ទុវិធម្បិ សំយោជនំ អស្ស បឋមជ្ឈានលាភិនោ អរិយសាវកស្ស នត្ថិ។ កស្មា បនស្ស ឧទ្ធម្ភាគិយសំយោជនម្បិ នត្ថីតិ វុត្តំ។ ឱរម្ភាគិយសំយោជនានមេវ ហេត្ថ បហានំ វុត្តន្តិ អាហ ‘‘ឥតរម្បី’’តិអាទិ, ឥតរំ ឧទ្ធម្ភាគិយសំយោជនំ បុន ឥមំ លោកំ បដិសន្ធិវសេន អានេតុំ អសមត្ថតាយ នត្ថីតិ វុត្តន្តិ អត្ថោ។ ឈានលាភិនោ ហិ សព្ពេបិ អរិយា ព្រហ្មលោកូបបន្នា ហេដ្ឋា ន ឧប្បជ្ជន្តិ, ឧទ្ធំ ឧទ្ធំ ឧប្បជ្ជន្តាបិ វេហប្ផលំ អកនិដ្ឋំ ភវគ្គញ្ច បត្វា ន បុនញ្ញត្ថ ជាយន្តិ, តត្ថ តត្ថេវ អរហត្តំ បត្វា បរិនិព្ពាយន្តិ។ តេនេវាហ ‘‘ឥមស្មិំ សុត្តេ ឈានានាគាមី នាម កថិតោ’’តិ។ ឈានវសេន ហិ ហេដ្ឋា ន អាគច្ឆតីតិ ឈានានាគាមី។
95. Tatiye viddheti dūrībhūte. Dūrabhāvo ca ākāsassa valāhakavigamena hotīti āha ‘‘valāhakavigamena dūrībhūte’’ti. Teneva hi ‘‘viddhe vigatavalāhake’’ti vuttaṃ. Nabhaṃ abbhussakkamānoti ākāsaṃ abhilaṅghanto. Iminā taruṇasūriyabhāvo dassito. Nātidūrodite hi ādicce taruṇasūriyasamaññā. Duvidhamevassa saṃyojanaṃ natthīti orambhāgiyauddhambhāgiyavasena duvidhampi saṃyojanaṃ assa paṭhamajjhānalābhino ariyasāvakassa natthi. Kasmā panassa uddhambhāgiyasaṃyojanampi natthīti vuttaṃ. Orambhāgiyasaṃyojanānameva hettha pahānaṃ vuttanti āha ‘‘itarampī’’tiādi, itaraṃ uddhambhāgiyasaṃyojanaṃ puna imaṃ lokaṃ paṭisandhivasena ānetuṃ asamatthatāya natthīti vuttanti attho. Jhānalābhino hi sabbepi ariyā brahmalokūpapannā heṭṭhā na uppajjanti, uddhaṃ uddhaṃ uppajjantāpi vehapphalaṃ akaniṭṭhaṃ bhavaggañca patvā na punaññattha jāyanti, tattha tattheva arahattaṃ patvā parinibbāyanti. Tenevāha ‘‘imasmiṃ sutte jhānānāgāmī nāma kathito’’ti. Jhānavasena hi heṭṭhā na āgacchatīti jhānānāgāmī.
សរទសុត្តវណ្ណនា និដ្ឋិតា។
Saradasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៣. សរទសុត្តំ • 3. Saradasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៣. សរទសុត្តវណ្ណនា • 3. Saradasuttavaṇṇanā
