| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၃. သရဒသုတ္တဝဏ္ဏနာ
3. Saradasuttavaṇṇanā
၉၅. တတိယေ ဝိဒ္ဓေတိ ဒူရီဘူတေ။ ဒူရဘာဝော စ အာကာသသ္သ ဝလာဟကဝိဂမေန ဟောတီတိ အာဟ ‘‘ဝလာဟကဝိဂမေန ဒူရီဘူတေ’’တိ။ တေနေဝ ဟိ ‘‘ဝိဒ္ဓေ ဝိဂတဝလာဟကေ’’တိ ဝုတ္တံ။ နဘံ အဗ္ဘုသ္သက္ကမာနောတိ အာကာသံ အဘိလင္ဃန္တော။ ဣမိနာ တရုဏသူရိယဘာဝော ဒသ္သိတော။ နာတိဒူရောဒိတေ ဟိ အာဒိစ္စေ တရုဏသူရိယသမညာ။ ဒုဝိဓမေဝသ္သ သံယောဇနံ နတ္ထီတိ ဩရမ္ဘာဂိယဥဒ္ဓမ္ဘာဂိယဝသေန ဒုဝိဓမ္ပိ သံယောဇနံ အသ္သ ပဌမဇ္ဈာနလာဘိနော အရိယသာဝကသ္သ နတ္ထိ။ ကသ္မာ ပနသ္သ ဥဒ္ဓမ္ဘာဂိယသံယောဇနမ္ပိ နတ္ထီတိ ဝုတ္တံ။ ဩရမ္ဘာဂိယသံယောဇနာနမေဝ ဟေတ္ထ ပဟာနံ ဝုတ္တန္တိ အာဟ ‘‘ဣတရမ္ပီ’’တိအာဒိ, ဣတရံ ဥဒ္ဓမ္ဘာဂိယသံယောဇနံ ပုန ဣမံ လောကံ ပဋိသန္ဓိဝသေန အာနေတုံ အသမတ္ထတာယ နတ္ထီတိ ဝုတ္တန္တိ အတ္ထော။ ဈာနလာဘိနော ဟိ သဗ္ဗေပိ အရိယာ ဗ္ရဟ္မလောကူပပန္နာ ဟေဋ္ဌာ န ဥပ္ပဇ္ဇန္တိ, ဥဒ္ဓံ ဥဒ္ဓံ ဥပ္ပဇ္ဇန္တာပိ ဝေဟပ္ဖလံ အကနိဋ္ဌံ ဘဝဂ္ဂဉ္စ ပတ္ဝာ န ပုနညတ္ထ ဇာယန္တိ, တတ္ထ တတ္ထေဝ အရဟတ္တံ ပတ္ဝာ ပရိနိဗ္ဗာယန္တိ။ တေနေဝာဟ ‘‘ဣမသ္မိံ သုတ္တေ ဈာနာနာဂာမီ နာမ ကထိတော’’တိ။ ဈာနဝသေန ဟိ ဟေဋ္ဌာ န အာဂစ္ဆတီတိ ဈာနာနာဂာမီ။
95. Tatiye viddheti dūrībhūte. Dūrabhāvo ca ākāsassa valāhakavigamena hotīti āha ‘‘valāhakavigamena dūrībhūte’’ti. Teneva hi ‘‘viddhe vigatavalāhake’’ti vuttaṃ. Nabhaṃ abbhussakkamānoti ākāsaṃ abhilaṅghanto. Iminā taruṇasūriyabhāvo dassito. Nātidūrodite hi ādicce taruṇasūriyasamaññā. Duvidhamevassa saṃyojanaṃ natthīti orambhāgiyauddhambhāgiyavasena duvidhampi saṃyojanaṃ assa paṭhamajjhānalābhino ariyasāvakassa natthi. Kasmā panassa uddhambhāgiyasaṃyojanampi natthīti vuttaṃ. Orambhāgiyasaṃyojanānameva hettha pahānaṃ vuttanti āha ‘‘itarampī’’tiādi, itaraṃ uddhambhāgiyasaṃyojanaṃ puna imaṃ lokaṃ paṭisandhivasena ānetuṃ asamatthatāya natthīti vuttanti attho. Jhānalābhino hi sabbepi ariyā brahmalokūpapannā heṭṭhā na uppajjanti, uddhaṃ uddhaṃ uppajjantāpi vehapphalaṃ akaniṭṭhaṃ bhavaggañca patvā na punaññattha jāyanti, tattha tattheva arahattaṃ patvā parinibbāyanti. Tenevāha ‘‘imasmiṃ sutte jhānānāgāmī nāma kathito’’ti. Jhānavasena hi heṭṭhā na āgacchatīti jhānānāgāmī.
သရဒသုတ္တဝဏ္ဏနာ နိဋ္ဌိတာ။
Saradasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. သရဒသုတ္တံ • 3. Saradasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. သရဒသုတ္တဝဏ္ဏနာ • 3. Saradasuttavaṇṇanā
