| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೩. ಸರದಸುತ್ತವಣ್ಣನಾ
3. Saradasuttavaṇṇanā
೯೫. ತತಿಯೇ ವಿದ್ಧೇತಿ ದೂರೀಭೂತೇ। ದೂರಭಾವೋ ಚ ಆಕಾಸಸ್ಸ ವಲಾಹಕವಿಗಮೇನ ಹೋತೀತಿ ಆಹ ‘‘ವಲಾಹಕವಿಗಮೇನ ದೂರೀಭೂತೇ’’ತಿ। ತೇನೇವ ಹಿ ‘‘ವಿದ್ಧೇ ವಿಗತವಲಾಹಕೇ’’ತಿ ವುತ್ತಂ। ನಭಂ ಅಬ್ಭುಸ್ಸಕ್ಕಮಾನೋತಿ ಆಕಾಸಂ ಅಭಿಲಙ್ಘನ್ತೋ। ಇಮಿನಾ ತರುಣಸೂರಿಯಭಾವೋ ದಸ್ಸಿತೋ। ನಾತಿದೂರೋದಿತೇ ಹಿ ಆದಿಚ್ಚೇ ತರುಣಸೂರಿಯಸಮಞ್ಞಾ। ದುವಿಧಮೇವಸ್ಸ ಸಂಯೋಜನಂ ನತ್ಥೀತಿ ಓರಮ್ಭಾಗಿಯಉದ್ಧಮ್ಭಾಗಿಯವಸೇನ ದುವಿಧಮ್ಪಿ ಸಂಯೋಜನಂ ಅಸ್ಸ ಪಠಮಜ್ಝಾನಲಾಭಿನೋ ಅರಿಯಸಾವಕಸ್ಸ ನತ್ಥಿ। ಕಸ್ಮಾ ಪನಸ್ಸ ಉದ್ಧಮ್ಭಾಗಿಯಸಂಯೋಜನಮ್ಪಿ ನತ್ಥೀತಿ ವುತ್ತಂ। ಓರಮ್ಭಾಗಿಯಸಂಯೋಜನಾನಮೇವ ಹೇತ್ಥ ಪಹಾನಂ ವುತ್ತನ್ತಿ ಆಹ ‘‘ಇತರಮ್ಪೀ’’ತಿಆದಿ, ಇತರಂ ಉದ್ಧಮ್ಭಾಗಿಯಸಂಯೋಜನಂ ಪುನ ಇಮಂ ಲೋಕಂ ಪಟಿಸನ್ಧಿವಸೇನ ಆನೇತುಂ ಅಸಮತ್ಥತಾಯ ನತ್ಥೀತಿ ವುತ್ತನ್ತಿ ಅತ್ಥೋ। ಝಾನಲಾಭಿನೋ ಹಿ ಸಬ್ಬೇಪಿ ಅರಿಯಾ ಬ್ರಹ್ಮಲೋಕೂಪಪನ್ನಾ ಹೇಟ್ಠಾ ನ ಉಪ್ಪಜ್ಜನ್ತಿ, ಉದ್ಧಂ ಉದ್ಧಂ ಉಪ್ಪಜ್ಜನ್ತಾಪಿ ವೇಹಪ್ಫಲಂ ಅಕನಿಟ್ಠಂ ಭವಗ್ಗಞ್ಚ ಪತ್ವಾ ನ ಪುನಞ್ಞತ್ಥ ಜಾಯನ್ತಿ, ತತ್ಥ ತತ್ಥೇವ ಅರಹತ್ತಂ ಪತ್ವಾ ಪರಿನಿಬ್ಬಾಯನ್ತಿ। ತೇನೇವಾಹ ‘‘ಇಮಸ್ಮಿಂ ಸುತ್ತೇ ಝಾನಾನಾಗಾಮೀ ನಾಮ ಕಥಿತೋ’’ತಿ। ಝಾನವಸೇನ ಹಿ ಹೇಟ್ಠಾ ನ ಆಗಚ್ಛತೀತಿ ಝಾನಾನಾಗಾಮೀ।
95. Tatiye viddheti dūrībhūte. Dūrabhāvo ca ākāsassa valāhakavigamena hotīti āha ‘‘valāhakavigamena dūrībhūte’’ti. Teneva hi ‘‘viddhe vigatavalāhake’’ti vuttaṃ. Nabhaṃ abbhussakkamānoti ākāsaṃ abhilaṅghanto. Iminā taruṇasūriyabhāvo dassito. Nātidūrodite hi ādicce taruṇasūriyasamaññā. Duvidhamevassa saṃyojanaṃ natthīti orambhāgiyauddhambhāgiyavasena duvidhampi saṃyojanaṃ assa paṭhamajjhānalābhino ariyasāvakassa natthi. Kasmā panassa uddhambhāgiyasaṃyojanampi natthīti vuttaṃ. Orambhāgiyasaṃyojanānameva hettha pahānaṃ vuttanti āha ‘‘itarampī’’tiādi, itaraṃ uddhambhāgiyasaṃyojanaṃ puna imaṃ lokaṃ paṭisandhivasena ānetuṃ asamatthatāya natthīti vuttanti attho. Jhānalābhino hi sabbepi ariyā brahmalokūpapannā heṭṭhā na uppajjanti, uddhaṃ uddhaṃ uppajjantāpi vehapphalaṃ akaniṭṭhaṃ bhavaggañca patvā na punaññattha jāyanti, tattha tattheva arahattaṃ patvā parinibbāyanti. Tenevāha ‘‘imasmiṃ sutte jhānānāgāmī nāma kathito’’ti. Jhānavasena hi heṭṭhā na āgacchatīti jhānānāgāmī.
ಸರದಸುತ್ತವಣ್ಣನಾ ನಿಟ್ಠಿತಾ।
Saradasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೩. ಸರದಸುತ್ತಂ • 3. Saradasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೩. ಸರದಸುತ್ತವಣ್ಣನಾ • 3. Saradasuttavaṇṇanā
