| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༧. སརཱགཝཱིཏརཱགནཱནཱཀརཎཔཉྷོ
7. Sarāgavītarāganānākaraṇapañho
༧. རཱཛཱ ཨཱཧ ‘‘བྷནྟེ ནཱགསེན, ཀིཾ ནཱནཱཀརཎཾ སརཱགསྶ ཙ ཝཱིཏརཱགསྶ ཙཱ’’ཏི? ‘‘ཨེཀོ ཁོ, མཧཱརཱཛ, ཨཛ྄ཛྷོསིཏོ, ཨེཀོ ཨནཛ྄ཛྷོསིཏོ’’ཏི། ‘‘ཀིཾ ཨེཏཾ, བྷནྟེ, ཨཛ྄ཛྷོསིཏོ ཨནཛ྄ཛྷོསིཏོ ནཱམཱ’’ཏི? ‘‘ཨེཀོ ཁོ, མཧཱརཱཛ, ཨཏྠིཀོ, ཨེཀོ ཨནཏྠིཀོ’’ཏི། ‘‘པསྶཱམཧཾ, བྷནྟེ, ཨེཝརཱུཔཾ ཡོ ཙ སརཱགོ, ཡོ ཙ ཝཱིཏརཱགོ, སབྦོཔེསོ སོབྷནཾ ཡེཝ ཨིཙྪཏི ཁཱདནཱིཡཾ ཝཱ བྷོཛནཱིཡཾ ཝཱ, ན ཀོཙི པཱཔཀཾ ཨིཙྪཏཱི’’ཏི། ‘‘ཨཝཱིཏརཱགོ ཁོ, མཧཱརཱཛ, རསཔཊིསཾཝེདཱི ཙ རསརཱགཔཊིསཾཝེདཱི ཙ བྷོཛནཾ བྷུཉྫཏི, ཝཱིཏརཱགོ པན རསཔཊིསཾཝེདཱི བྷོཛནཾ བྷུཉྫཏི, ནོ ཙ ཁོ རསརཱགཔཊིསཾཝེདཱི’’ཏི།
7. Rājā āha ‘‘bhante nāgasena, kiṃ nānākaraṇaṃ sarāgassa ca vītarāgassa cā’’ti? ‘‘Eko kho, mahārāja, ajjhosito, eko anajjhosito’’ti. ‘‘Kiṃ etaṃ, bhante, ajjhosito anajjhosito nāmā’’ti? ‘‘Eko kho, mahārāja, atthiko, eko anatthiko’’ti. ‘‘Passāmahaṃ, bhante, evarūpaṃ yo ca sarāgo, yo ca vītarāgo, sabbopeso sobhanaṃ yeva icchati khādanīyaṃ vā bhojanīyaṃ vā, na koci pāpakaṃ icchatī’’ti. ‘‘Avītarāgo kho, mahārāja, rasapaṭisaṃvedī ca rasarāgapaṭisaṃvedī ca bhojanaṃ bhuñjati, vītarāgo pana rasapaṭisaṃvedī bhojanaṃ bhuñjati, no ca kho rasarāgapaṭisaṃvedī’’ti.
‘‘ཀལློསི , བྷནྟེ ནཱགསེནཱ’’ཏི།
‘‘Kallosi , bhante nāgasenā’’ti.
སརཱགཝཱིཏརཱགནཱནཱཀརཎཔཉྷོ སཏྟམོ།
Sarāgavītarāganānākaraṇapañho sattamo.
