| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. තතියපණ්‌ණාසකං
3. Tatiyapaṇṇāsakaṃ
(11) 1. ඵාසුවිහාරවග්‌ගො
(11) 1. Phāsuvihāravaggo
1. සාරජ්‌ජසුත්‌තං
1. Sārajjasuttaṃ
101. ‘‘පඤ්‌චිමෙ , භික්‌ඛවෙ, සෙඛවෙසාරජ්‌ජකරණා ධම්‌මා. කතමෙ පඤ්‌ච? ඉධ, භික්‌ඛවෙ, භික්‌ඛු සද්‌ධො හොති, සීලවා හොති, බහුස්‌සුතො හොති, ආරද්‌ධවීරියො හොති, පඤ්‌ඤවා හොති.
101. ‘‘Pañcime , bhikkhave, sekhavesārajjakaraṇā dhammā. Katame pañca? Idha, bhikkhave, bhikkhu saddho hoti, sīlavā hoti, bahussuto hoti, āraddhavīriyo hoti, paññavā hoti.
‘‘යං, භික්‌ඛවෙ, අස්‌සද්‌ධස්‌ස සාරජ්‌ජං හොති, සද්‌ධස්‌ස තං සාරජ්‌ජං න හොති. තස්‌මායං ධම්‌මො සෙඛවෙසාරජ්‌ජකරණො.
‘‘Yaṃ, bhikkhave, assaddhassa sārajjaṃ hoti, saddhassa taṃ sārajjaṃ na hoti. Tasmāyaṃ dhammo sekhavesārajjakaraṇo.
‘‘යං, භික්‌ඛවෙ, දුස්‌සීලස්‌ස සාරජ්‌ජං හොති, සීලවතො තං සාරජ්‌ජං න හොති. තස්‌මායං ධම්‌මො සෙඛවෙසාරජ්‌ජකරණො.
‘‘Yaṃ, bhikkhave, dussīlassa sārajjaṃ hoti, sīlavato taṃ sārajjaṃ na hoti. Tasmāyaṃ dhammo sekhavesārajjakaraṇo.
‘‘යං, භික්‌ඛවෙ, අප්‌පස්‌සුතස්‌ස සාරජ්‌ජං හොති, බහුස්‌සුතස්‌ස තං සාරජ්‌ජං න හොති. තස්‌මායං ධම්‌මො සෙඛවෙසාරජ්‌ජකරණො.
‘‘Yaṃ, bhikkhave, appassutassa sārajjaṃ hoti, bahussutassa taṃ sārajjaṃ na hoti. Tasmāyaṃ dhammo sekhavesārajjakaraṇo.
‘‘යං, භික්‌ඛවෙ, කුසීතස්‌ස සාරජ්‌ජං හොති, ආරද්‌ධවීරියස්‌ස තං සාරජ්‌ජං න හොති. තස්‌මායං ධම්‌මො සෙඛවෙසාරජ්‌ජකරණො.
‘‘Yaṃ, bhikkhave, kusītassa sārajjaṃ hoti, āraddhavīriyassa taṃ sārajjaṃ na hoti. Tasmāyaṃ dhammo sekhavesārajjakaraṇo.
‘‘යං, භික්‌ඛවෙ, දුප්‌පඤ්‌ඤස්‌ස සාරජ්‌ජං හොති, පඤ්‌ඤවතො තං සාරජ්‌ජං න හොති. තස්‌මායං ධම්‌මො සෙඛවෙසාරජ්‌ජකරණො. ඉමෙ ඛො, භික්‌ඛවෙ, පඤ්‌ච සෙඛවෙසාරජ්‌ජකරණා ධම්‌මා’’ති. පඨමං.
‘‘Yaṃ, bhikkhave, duppaññassa sārajjaṃ hoti, paññavato taṃ sārajjaṃ na hoti. Tasmāyaṃ dhammo sekhavesārajjakaraṇo. Ime kho, bhikkhave, pañca sekhavesārajjakaraṇā dhammā’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. සාරජ්‌ජසුත්‌තවණ්‌ණනා • 1. Sārajjasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-4. සාරජ්‌ජසුත්‌තාදිවණ්‌ණනා • 1-4. Sārajjasuttādivaṇṇanā
