| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[88] 8. ஸாரம்ப⁴ஜாதகவண்ணனா
[88] 8. Sārambhajātakavaṇṇanā
கல்யாணிமேவ முஞ்செய்யாதி இத³ங் ஸத்தா² ஜேதவனே விஹரந்தோ ஓமஸவாத³ஸிக்கா²பத³ங் (பாசி॰ 15) ஆரப்³ப⁴ கதே²ஸி. த்³வேபி வத்தூ²னி ஹெட்டா² நந்தி³விஸாலஜாதகே வுத்தஸதி³ஸானேவ. இமஸ்மிங் பன ஜாதகே போ³தி⁴ஸத்தோ க³ந்தா⁴ரரட்டே² தக்கஸிலாயங் அஞ்ஞதரஸ்ஸ ப்³ராஹ்மணஸ்ஸ ஸாரம்போ⁴ நாம ப³லிப³த்³தோ³ அஹோஸி. ஸத்தா² இத³ங் அதீதவத்து²ங் கதெ²த்வா அபி⁴ஸம்பு³த்³தோ⁴ ஹுத்வா இமங் கா³த²மாஹ –
Kalyāṇimeva muñceyyāti idaṃ satthā jetavane viharanto omasavādasikkhāpadaṃ (pāci. 15) ārabbha kathesi. Dvepi vatthūni heṭṭhā nandivisālajātake vuttasadisāneva. Imasmiṃ pana jātake bodhisatto gandhāraraṭṭhe takkasilāyaṃ aññatarassa brāhmaṇassa sārambho nāma balibaddo ahosi. Satthā idaṃ atītavatthuṃ kathetvā abhisambuddho hutvā imaṃ gāthamāha –
88.
88.
‘‘கல்யாணிமேவ முஞ்செய்ய, ந ஹி முஞ்செய்ய பாபிகங்;
‘‘Kalyāṇimeva muñceyya, na hi muñceyya pāpikaṃ;
மொக்கோ² கல்யாணியா ஸாது⁴, முத்வா தப்பதி பாபிக’’ந்தி.
Mokkho kalyāṇiyā sādhu, mutvā tappati pāpika’’nti.
தத்த² கல்யாணிமேவ முஞ்செய்யாதி சதுதோ³ஸவினிமுத்தங் கல்யாணிங் ஸுந்த³ரங் அனவஜ்ஜங் வாசமேவ முஞ்செய்ய விஸ்ஸஜ்ஜெய்ய கதெ²ய்ய. ந ஹி முஞ்செய்ய பாபிகந்தி பாபிகங் லாமிகங் பரேஸங் அப்பியங் அமனாபங் ந முஞ்செய்ய ந கதெ²ய்ய. மொக்கோ² கல்யாணியா ஸாதூ⁴தி கல்யாணவாசாய விஸ்ஸஜ்ஜனமேவ இமஸ்மிங் லோகே ஸாது⁴ ஸுந்த³ரங் ப⁴த்³த³கங். முத்வா தப்பதி பாபிகந்தி பாபிகங் ப²ருஸவாசங் முஞ்சித்வா விஸ்ஸஜ்ஜெத்வா கதெ²த்வா ஸோ புக்³க³லோ தப்பதி ஸோசதி கிலமதீதி.
Tattha kalyāṇimeva muñceyyāti catudosavinimuttaṃ kalyāṇiṃ sundaraṃ anavajjaṃ vācameva muñceyya vissajjeyya katheyya. Na hi muñceyya pāpikanti pāpikaṃ lāmikaṃ paresaṃ appiyaṃ amanāpaṃ na muñceyya na katheyya. Mokkhokalyāṇiyā sādhūti kalyāṇavācāya vissajjanameva imasmiṃ loke sādhu sundaraṃ bhaddakaṃ. Mutvā tappati pāpikanti pāpikaṃ pharusavācaṃ muñcitvā vissajjetvā kathetvā so puggalo tappati socati kilamatīti.
ஏவங் ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ ப்³ராஹ்மணோ ஆனந்தோ³ அஹோஸி, ப்³ராஹ்மணீ உப்பலவண்ணா, ஸாரம்போ⁴ பன அஹமேவ அஹோஸி’’ந்தி.
Evaṃ satthā imaṃ dhammadesanaṃ āharitvā jātakaṃ samodhānesi – ‘‘tadā brāhmaṇo ānando ahosi, brāhmaṇī uppalavaṇṇā, sārambho pana ahameva ahosi’’nti.
ஸாரம்ப⁴ஜாதகவண்ணனா அட்ட²மா.
Sārambhajātakavaṇṇanā aṭṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 88. ஸாரம்ப⁴ஜாதகங் • 88. Sārambhajātakaṃ
