| Library / Tipiṭaka / តិបិដក • Tipiṭaka / ជាតក-អដ្ឋកថា • Jātaka-aṭṭhakathā |
[៨៨] ៨. សារម្ភជាតកវណ្ណនា
[88] 8. Sārambhajātakavaṇṇanā
កល្យាណិមេវ មុញ្ចេយ្យាតិ ឥទំ សត្ថា ជេតវនេ វិហរន្តោ ឱមសវាទសិក្ខាបទំ (បាចិ. ១៥) អារព្ភ កថេសិ។ ទ្វេបិ វត្ថូនិ ហេដ្ឋា នន្ទិវិសាលជាតកេ វុត្តសទិសានេវ។ ឥមស្មិំ បន ជាតកេ ពោធិសត្តោ គន្ធាររដ្ឋេ តក្កសិលាយំ អញ្ញតរស្ស ព្រាហ្មណស្ស សារម្ភោ នាម ពលិពទ្ទោ អហោសិ។ សត្ថា ឥទំ អតីតវត្ថុំ កថេត្វា អភិសម្ពុទ្ធោ ហុត្វា ឥមំ គាថមាហ –
Kalyāṇimeva muñceyyāti idaṃ satthā jetavane viharanto omasavādasikkhāpadaṃ (pāci. 15) ārabbha kathesi. Dvepi vatthūni heṭṭhā nandivisālajātake vuttasadisāneva. Imasmiṃ pana jātake bodhisatto gandhāraraṭṭhe takkasilāyaṃ aññatarassa brāhmaṇassa sārambho nāma balibaddo ahosi. Satthā idaṃ atītavatthuṃ kathetvā abhisambuddho hutvā imaṃ gāthamāha –
៨៨.
88.
‘‘កល្យាណិមេវ មុញ្ចេយ្យ, ន ហិ មុញ្ចេយ្យ បាបិកំ;
‘‘Kalyāṇimeva muñceyya, na hi muñceyya pāpikaṃ;
មោក្ខោ កល្យាណិយា សាធុ, មុត្វា តប្បតិ បាបិក’’ន្តិ។
Mokkho kalyāṇiyā sādhu, mutvā tappati pāpika’’nti.
តត្ថ កល្យាណិមេវ មុញ្ចេយ្យាតិ ចតុទោសវិនិមុត្តំ កល្យាណិំ សុន្ទរំ អនវជ្ជំ វាចមេវ មុញ្ចេយ្យ វិស្សជ្ជេយ្យ កថេយ្យ។ ន ហិ មុញ្ចេយ្យ បាបិកន្តិ បាបិកំ លាមិកំ បរេសំ អប្បិយំ អមនាបំ ន មុញ្ចេយ្យ ន កថេយ្យ។ មោក្ខោ កល្យាណិយា សាធូតិ កល្យាណវាចាយ វិស្សជ្ជនមេវ ឥមស្មិំ លោកេ សាធុ សុន្ទរំ ភទ្ទកំ។ មុត្វា តប្បតិ បាបិកន្តិ បាបិកំ ផរុសវាចំ មុញ្ចិត្វា វិស្សជ្ជេត្វា កថេត្វា សោ បុគ្គលោ តប្បតិ សោចតិ កិលមតីតិ។
Tattha kalyāṇimeva muñceyyāti catudosavinimuttaṃ kalyāṇiṃ sundaraṃ anavajjaṃ vācameva muñceyya vissajjeyya katheyya. Na hi muñceyya pāpikanti pāpikaṃ lāmikaṃ paresaṃ appiyaṃ amanāpaṃ na muñceyya na katheyya. Mokkhokalyāṇiyā sādhūti kalyāṇavācāya vissajjanameva imasmiṃ loke sādhu sundaraṃ bhaddakaṃ. Mutvā tappati pāpikanti pāpikaṃ pharusavācaṃ muñcitvā vissajjetvā kathetvā so puggalo tappati socati kilamatīti.
ឯវំ សត្ថា ឥមំ ធម្មទេសនំ អាហរិត្វា ជាតកំ សមោធានេសិ – ‘‘តទា ព្រាហ្មណោ អានន្ទោ អហោសិ, ព្រាហ្មណី ឧប្បលវណ្ណា, សារម្ភោ បន អហមេវ អហោសិ’’ន្តិ។
Evaṃ satthā imaṃ dhammadesanaṃ āharitvā jātakaṃ samodhānesi – ‘‘tadā brāhmaṇo ānando ahosi, brāhmaṇī uppalavaṇṇā, sārambho pana ahameva ahosi’’nti.
សារម្ភជាតកវណ្ណនា អដ្ឋមា។
Sārambhajātakavaṇṇanā aṭṭhamā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ជាតកបាឡិ • Jātakapāḷi / ៨៨. សារម្ភជាតកំ • 88. Sārambhajātakaṃ
