| Library / Tipiṭaka / තිපිටක • Tipiṭaka / ජාතක-අට්‌ඨකථා • Jātaka-aṭṭhakathā |
[88] 8. සාරම්‌භජාතකවණ්‌ණනා
[88] 8. Sārambhajātakavaṇṇanā
කල්‍යාණිමෙව මුඤ්‌චෙය්‍යාති ඉදං සත්‌ථා ජෙතවනෙ විහරන්‌තො ඔමසවාදසික්‌ඛාපදං (පාචි. 15) ආරබ්‌භ කථෙසි. ද්‌වෙපි වත්‌ථූනි හෙට්‌ඨා නන්‌දිවිසාලජාතකෙ වුත්‌තසදිසානෙව. ඉමස්‌මිං පන ජාතකෙ බොධිසත්‌තො ගන්‌ධාරරට්‌ඨෙ තක්‌කසිලායං අඤ්‌ඤතරස්‌ස බ්‍රාහ්‌මණස්‌ස සාරම්‌භො නාම බලිබද්‌දො අහොසි. සත්‌ථා ඉදං අතීතවත්‌ථුං කථෙත්‌වා අභිසම්‌බුද්‌ධො හුත්‌වා ඉමං ගාථමාහ –
Kalyāṇimeva muñceyyāti idaṃ satthā jetavane viharanto omasavādasikkhāpadaṃ (pāci. 15) ārabbha kathesi. Dvepi vatthūni heṭṭhā nandivisālajātake vuttasadisāneva. Imasmiṃ pana jātake bodhisatto gandhāraraṭṭhe takkasilāyaṃ aññatarassa brāhmaṇassa sārambho nāma balibaddo ahosi. Satthā idaṃ atītavatthuṃ kathetvā abhisambuddho hutvā imaṃ gāthamāha –
88.
88.
‘‘කල්‍යාණිමෙව මුඤ්‌චෙය්‍ය, න හි මුඤ්‌චෙය්‍ය පාපිකං;
‘‘Kalyāṇimeva muñceyya, na hi muñceyya pāpikaṃ;
මොක්‌ඛො කල්‍යාණියා සාධු, මුත්‌වා තප්‌පති පාපික’’න්‌ති.
Mokkho kalyāṇiyā sādhu, mutvā tappati pāpika’’nti.
තත්‌ථ කල්‍යාණිමෙව මුඤ්‌චෙය්‍යාති චතුදොසවිනිමුත්‌තං කල්‍යාණිං සුන්‌දරං අනවජ්‌ජං වාචමෙව මුඤ්‌චෙය්‍ය විස්‌සජ්‌ජෙය්‍ය කථෙය්‍ය. න හි මුඤ්‌චෙය්‍ය පාපිකන්‌ති පාපිකං ලාමිකං පරෙසං අප්‌පියං අමනාපං න මුඤ්‌චෙය්‍ය න කථෙය්‍ය. මොක්‌ඛො කල්‍යාණියා සාධූති කල්‍යාණවාචාය විස්‌සජ්‌ජනමෙව ඉමස්‌මිං ලොකෙ සාධු සුන්‌දරං භද්‌දකං. මුත්‌වා තප්‌පති පාපිකන්‌ති පාපිකං ඵරුසවාචං මුඤ්‌චිත්‌වා විස්‌සජ්‌ජෙත්‌වා කථෙත්‌වා සො පුග්‌ගලො තප්‌පති සොචති කිලමතීති.
Tattha kalyāṇimeva muñceyyāti catudosavinimuttaṃ kalyāṇiṃ sundaraṃ anavajjaṃ vācameva muñceyya vissajjeyya katheyya. Na hi muñceyya pāpikanti pāpikaṃ lāmikaṃ paresaṃ appiyaṃ amanāpaṃ na muñceyya na katheyya. Mokkhokalyāṇiyā sādhūti kalyāṇavācāya vissajjanameva imasmiṃ loke sādhu sundaraṃ bhaddakaṃ. Mutvā tappati pāpikanti pāpikaṃ pharusavācaṃ muñcitvā vissajjetvā kathetvā so puggalo tappati socati kilamatīti.
එවං සත්‌ථා ඉමං ධම්‌මදෙසනං ආහරිත්‌වා ජාතකං සමොධානෙසි – ‘‘තදා බ්‍රාහ්‌මණො ආනන්‌දො අහොසි, බ්‍රාහ්‌මණී උප්‌පලවණ්‌ණා, සාරම්‌භො පන අහමෙව අහොසි’’න්‌ති.
Evaṃ satthā imaṃ dhammadesanaṃ āharitvā jātakaṃ samodhānesi – ‘‘tadā brāhmaṇo ānando ahosi, brāhmaṇī uppalavaṇṇā, sārambho pana ahameva ahosi’’nti.
සාරම්‌භජාතකවණ්‌ණනා අට්‌ඨමා.
Sārambhajātakavaṇṇanā aṭṭhamā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / ජාතකපාළි • Jātakapāḷi / 88. සාරම්‌භජාතකං • 88. Sārambhajātakaṃ
