| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸரணக³மனஸங்கிலேஸபே⁴த³கதா²
Saraṇagamanasaṃkilesabhedakathā
தத்த² ச லோகியஸரணக³மனங் தீஸு வத்தூ²ஸு அஞ்ஞாணஸங்ஸயமிச்சா²ஞாணாதீ³ஹி ஸங்கிலிஸ்ஸதி, ந மஹாஜுதிகங், ந உஜ்ஜலங் அபரிஸுத்³த⁴ங் அபரியோதா³தங் ஹோதி, ந மஹாவிப்பா²ரங் அனுளாரங். எத்த² ச அஞ்ஞாணங் நாம வத்து²த்தயஸ்ஸ கு³ணானங் அஜானநங் தத்த² ஸம்மோஹோ. ‘‘பு³த்³தோ⁴ நு கோ², ந நு கோ²’’திஆதி³னா விசிகிச்சா² ஸங்ஸயோ. மிச்சா²ஞாணங் நாம தஸ்ஸ கு³ணானங் அகு³ணபா⁴வபரிகப்பனேன விபரீதக்³கா³ஹோதி வேதி³தப்³ப³ங். லோகுத்தரஸ்ஸ பன ஸரணக³மனஸ்ஸ நத்தி² ஸங்கிலேஸோ. லோகியஸ்ஸ ச ஸரணக³மனஸ்ஸ து³விதோ⁴ பே⁴தோ³ ஸாவஜ்ஜோ அனவஜ்ஜோ ச. தத்த² ஸாவஜ்ஜோ அஞ்ஞஸத்தா²ராதீ³ஸு அத்தனிய்யாதனாதீ³ஹி ஹோதி, ஸோ அனிட்ட²ப²லோ. அனவஜ்ஜோ பன காலகிரியாய ஹோதி. லோகியஞ்ஹி ஸரணக³மனங் ஸிக்கா²பத³ஸமாதா³னங் விய அக்³க³ஹிதகாலபரிச்சே²த³கங் ஜீவிதபரியந்தமேவ ஹோதி, தஸ்மா தஸ்ஸ க²ந்த⁴பே⁴தே³ன பே⁴தோ³, ஸோ அவிபாகத்தா அப²லோ. லோகுத்தரஸ்ஸ பன நேவத்தி² பே⁴தோ³. ப⁴வந்தரேபி ஹி அரியஸாவகோ அஞ்ஞங் ஸத்தா²ரங் ந உத்³தி³ஸதீதி. ஏவங் ஸரணக³மனஸ்ஸ ஸங்கிலேஸோ ச பே⁴தோ³ ச வேதி³தப்³போ³.
Tattha ca lokiyasaraṇagamanaṃ tīsu vatthūsu aññāṇasaṃsayamicchāñāṇādīhi saṃkilissati, na mahājutikaṃ, na ujjalaṃ aparisuddhaṃ apariyodātaṃ hoti, na mahāvipphāraṃ anuḷāraṃ. Ettha ca aññāṇaṃ nāma vatthuttayassa guṇānaṃ ajānanaṃ tattha sammoho. ‘‘Buddho nu kho, na nu kho’’tiādinā vicikicchā saṃsayo. Micchāñāṇaṃ nāma tassa guṇānaṃ aguṇabhāvaparikappanena viparītaggāhoti veditabbaṃ. Lokuttarassa pana saraṇagamanassa natthi saṃkileso. Lokiyassa ca saraṇagamanassa duvidho bhedo sāvajjo anavajjo ca. Tattha sāvajjo aññasatthārādīsu attaniyyātanādīhi hoti, so aniṭṭhaphalo. Anavajjo pana kālakiriyāya hoti. Lokiyañhi saraṇagamanaṃ sikkhāpadasamādānaṃ viya aggahitakālaparicchedakaṃ jīvitapariyantameva hoti, tasmā tassa khandhabhedena bhedo, so avipākattā aphalo. Lokuttarassa pana nevatthi bhedo. Bhavantarepi hi ariyasāvako aññaṃ satthāraṃ na uddisatīti. Evaṃ saraṇagamanassa saṃkileso ca bhedo ca veditabbo.
கஸ்மா பனெத்த² வோதா³னங் ந க³ஹிதங், நனு வோதா³னவிபா⁴வனாபி தத்த² கோஸல்லாய ஹோதீதி? ஸச்சமேதங், தங் பன ஸங்கிலேஸக்³க³ஹணேன அத்த²தோ தீ³பிதங் ஹோதீதி ந க³ஹிதங். யானி ஹி தேஸங் ஸங்கிலேஸகாரணானி அஞ்ஞாணாதீ³னி , தேஸங் ஸப்³பே³ன ஸப்³ப³ங் அனுப்பாத³னேன உப்பன்னானஞ்ச பஹானேன வோதா³னங் ஹோதீதி. ஏவமெத்த² ‘‘ஸரணங் ஸரணக³மன’’ந்திஆதீ³னங் பபஞ்சோ வேதி³தப்³போ³. இமஸ்ஸ பன யதா²வுத்தபபஞ்சஸ்ஸ இத⁴ அவசனே காரணங் த³ஸ்ஸெந்தோ ஆஹ ‘‘ஸோ பன இத⁴ வுச்சமானோ’’திஆதி³. தத்த² ஸரணவண்ணனதோதி ஸாமஞ்ஞப²லஸுத்தே வுத்தஸரணவண்ணனதோ.
Kasmā panettha vodānaṃ na gahitaṃ, nanu vodānavibhāvanāpi tattha kosallāya hotīti? Saccametaṃ, taṃ pana saṃkilesaggahaṇena atthato dīpitaṃ hotīti na gahitaṃ. Yāni hi tesaṃ saṃkilesakāraṇāni aññāṇādīni , tesaṃ sabbena sabbaṃ anuppādanena uppannānañca pahānena vodānaṃ hotīti. Evamettha ‘‘saraṇaṃ saraṇagamana’’ntiādīnaṃ papañco veditabbo. Imassa pana yathāvuttapapañcassa idha avacane kāraṇaṃ dassento āha ‘‘so pana idha vuccamāno’’tiādi. Tattha saraṇavaṇṇanatoti sāmaññaphalasutte vuttasaraṇavaṇṇanato.
ஸரணக³மனஸங்கிலேஸபே⁴த³கதா² நிட்டி²தா.
Saraṇagamanasaṃkilesabhedakathā niṭṭhitā.
