| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
སརཎགམནསཾཀིལེསབྷེདཀཐཱ
Saraṇagamanasaṃkilesabhedakathā
ཏཏྠ ཙ ལོཀིཡསརཎགམནཾ ཏཱིསུ ཝཏྠཱུསུ ཨཉྙཱཎསཾསཡམིཙྪཱཉཱཎཱདཱིཧི སཾཀིལིསྶཏི, ན མཧཱཛུཏིཀཾ, ན ཨུཛྫལཾ ཨཔརིསུདྡྷཾ ཨཔརིཡོདཱཏཾ ཧོཏི, ན མཧཱཝིཔྥཱརཾ ཨནུལཱ༹རཾ། ཨེཏྠ ཙ ཨཉྙཱཎཾ ནཱམ ཝཏྠུཏྟཡསྶ གུཎཱནཾ ཨཛཱནནཾ ཏཏྠ སམྨོཧོ། ‘‘བུདྡྷོ ནུ ཁོ, ན ནུ ཁོ’’ཏིཨཱདིནཱ ཝིཙིཀིཙྪཱ སཾསཡོ། མིཙྪཱཉཱཎཾ ནཱམ ཏསྶ གུཎཱནཾ ཨགུཎབྷཱཝཔརིཀཔྤནེན ཝིཔརཱིཏགྒཱཧོཏི ཝེདིཏབྦཾ། ལོཀུཏྟརསྶ པན སརཎགམནསྶ ནཏྠི སཾཀིལེསོ། ལོཀིཡསྶ ཙ སརཎགམནསྶ དུཝིདྷོ བྷེདོ སཱཝཛྫོ ཨནཝཛྫོ ཙ། ཏཏྠ སཱཝཛྫོ ཨཉྙསཏྠཱརཱདཱིསུ ཨཏྟནིཡྻཱཏནཱདཱིཧི ཧོཏི, སོ ཨནིཊྛཕལོ། ཨནཝཛྫོ པན ཀཱལཀིརིཡཱཡ ཧོཏི། ལོཀིཡཉྷི སརཎགམནཾ སིཀྑཱཔདསམཱདཱནཾ ཝིཡ ཨགྒཧིཏཀཱལཔརིཙྪེདཀཾ ཛཱིཝིཏཔརིཡནྟམེཝ ཧོཏི, ཏསྨཱ ཏསྶ ཁནྡྷབྷེདེན བྷེདོ, སོ ཨཝིཔཱཀཏྟཱ ཨཕལོ། ལོཀུཏྟརསྶ པན ནེཝཏྠི བྷེདོ། བྷཝནྟརེཔི ཧི ཨརིཡསཱཝཀོ ཨཉྙཾ སཏྠཱརཾ ན ཨུདྡིསཏཱིཏི། ཨེཝཾ སརཎགམནསྶ སཾཀིལེསོ ཙ བྷེདོ ཙ ཝེདིཏབྦོ།
Tattha ca lokiyasaraṇagamanaṃ tīsu vatthūsu aññāṇasaṃsayamicchāñāṇādīhi saṃkilissati, na mahājutikaṃ, na ujjalaṃ aparisuddhaṃ apariyodātaṃ hoti, na mahāvipphāraṃ anuḷāraṃ. Ettha ca aññāṇaṃ nāma vatthuttayassa guṇānaṃ ajānanaṃ tattha sammoho. ‘‘Buddho nu kho, na nu kho’’tiādinā vicikicchā saṃsayo. Micchāñāṇaṃ nāma tassa guṇānaṃ aguṇabhāvaparikappanena viparītaggāhoti veditabbaṃ. Lokuttarassa pana saraṇagamanassa natthi saṃkileso. Lokiyassa ca saraṇagamanassa duvidho bhedo sāvajjo anavajjo ca. Tattha sāvajjo aññasatthārādīsu attaniyyātanādīhi hoti, so aniṭṭhaphalo. Anavajjo pana kālakiriyāya hoti. Lokiyañhi saraṇagamanaṃ sikkhāpadasamādānaṃ viya aggahitakālaparicchedakaṃ jīvitapariyantameva hoti, tasmā tassa khandhabhedena bhedo, so avipākattā aphalo. Lokuttarassa pana nevatthi bhedo. Bhavantarepi hi ariyasāvako aññaṃ satthāraṃ na uddisatīti. Evaṃ saraṇagamanassa saṃkileso ca bhedo ca veditabbo.
ཀསྨཱ པནེཏྠ ཝོདཱནཾ ན གཧིཏཾ, ནནུ ཝོདཱནཝིབྷཱཝནཱཔི ཏཏྠ ཀོསལླཱཡ ཧོཏཱིཏི? སཙྩམེཏཾ, ཏཾ པན སཾཀིལེསགྒཧཎེན ཨཏྠཏོ དཱིཔིཏཾ ཧོཏཱིཏི ན གཧིཏཾ། ཡཱནི ཧི ཏེསཾ སཾཀིལེསཀཱརཎཱནི ཨཉྙཱཎཱདཱིནི , ཏེསཾ སབྦེན སབྦཾ ཨནུཔྤཱདནེན ཨུཔྤནྣཱནཉྩ པཧཱནེན ཝོདཱནཾ ཧོཏཱིཏི། ཨེཝམེཏྠ ‘‘སརཎཾ སརཎགམན’’ནྟིཨཱདཱིནཾ པཔཉྩོ ཝེདིཏབྦོ། ཨིམསྶ པན ཡཐཱཝུཏྟཔཔཉྩསྶ ཨིདྷ ཨཝཙནེ ཀཱརཎཾ དསྶེནྟོ ཨཱཧ ‘‘སོ པན ཨིདྷ ཝུཙྩམཱནོ’’ཏིཨཱདི། ཏཏྠ སརཎཝཎྞནཏོཏི སཱམཉྙཕལསུཏྟེ ཝུཏྟསརཎཝཎྞནཏོ།
Kasmā panettha vodānaṃ na gahitaṃ, nanu vodānavibhāvanāpi tattha kosallāya hotīti? Saccametaṃ, taṃ pana saṃkilesaggahaṇena atthato dīpitaṃ hotīti na gahitaṃ. Yāni hi tesaṃ saṃkilesakāraṇāni aññāṇādīni , tesaṃ sabbena sabbaṃ anuppādanena uppannānañca pahānena vodānaṃ hotīti. Evamettha ‘‘saraṇaṃ saraṇagamana’’ntiādīnaṃ papañco veditabbo. Imassa pana yathāvuttapapañcassa idha avacane kāraṇaṃ dassento āha ‘‘so pana idha vuccamāno’’tiādi. Tattha saraṇavaṇṇanatoti sāmaññaphalasutte vuttasaraṇavaṇṇanato.
སརཎགམནསཾཀིལེསབྷེདཀཐཱ ནིཊྛིཏཱ།
Saraṇagamanasaṃkilesabhedakathā niṭṭhitā.
