| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. ஸரணக³மனியத்தே²ரஅபதா³னவண்ணனா
3. Saraṇagamaniyattheraapadānavaṇṇanā
உபி⁴ன்னங் தே³வராஜூனந்த்யாதி³கங் ஆயஸ்மதோ ஸரணக³மனியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ உப்பன்னுப்பன்னப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரே ப⁴க³வதி உப்பன்னே அயங் ஹிமவந்தே தே³வராஜா ஹுத்வா நிப்³ப³த்தி, தஸ்மிங் அபரேன யக்க²தே³வரஞ்ஞா ஸத்³தி⁴ங் ஸங்கா³மத்தா²ய உபட்டி²தே த்³வே அனேகயக்க²ஸஹஸ்ஸபரிவாரா ப²லகாவுதா⁴தி³ஹத்தா² ஸங்கா³மத்தா²ய ஸமுபப்³யூள்ஹா அஹேஸுங். ததா³ பது³முத்தரோ ப⁴க³வா தேஸு ஸத்தேஸு காருஞ்ஞங் உப்பாதெ³த்வா ஆகாஸேன தத்த² க³ந்த்வா ஸபரிவாரானங் த்³வின்னங் தே³வராஜூனங் த⁴ம்மங் தே³ஸேஸி. ததா³ தே ஸப்³பே³ ப²லகாவுதா⁴னி ச²ட்³டெ³த்வா ப⁴க³வந்தங் கா³ரவப³ஹுமானேன வந்தி³த்வா ஸரணமக³மங்ஸு. தேஸங் அயங் பட²மங் ஸரணமக³மாஸி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴மன்வாய ஸத்த²ரி பஸன்னோ பப்³ப³ஜித்வா நசிரஸ்ஸேவ அரஹா அஹோஸி.
Ubhinnaṃdevarājūnantyādikaṃ āyasmato saraṇagamaniyattherassa apadānaṃ. Ayampi purimabuddhesu katādhikāro uppannuppannabhave vivaṭṭūpanissayāni puññāni upacinanto padumuttare bhagavati uppanne ayaṃ himavante devarājā hutvā nibbatti, tasmiṃ aparena yakkhadevaraññā saddhiṃ saṅgāmatthāya upaṭṭhite dve anekayakkhasahassaparivārā phalakāvudhādihatthā saṅgāmatthāya samupabyūḷhā ahesuṃ. Tadā padumuttaro bhagavā tesu sattesu kāruññaṃ uppādetvā ākāsena tattha gantvā saparivārānaṃ dvinnaṃ devarājūnaṃ dhammaṃ desesi. Tadā te sabbe phalakāvudhāni chaḍḍetvā bhagavantaṃ gāravabahumānena vanditvā saraṇamagamaṃsu. Tesaṃ ayaṃ paṭhamaṃ saraṇamagamāsi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
20. ஸோ அபரபா⁴கே³ புப்³ப³குஸலங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ உபி⁴ன்னங் தே³வராஜூனந்திஆதி³மாஹ. தத்த² ஸுசிலோமக²ரலோமஆளவககும்பீ⁴ரகுவேராத³யோ விய நாமகொ³த்தேன அபாகடா த்³வே யக்க²ராஜானோ அஞ்ஞாபதே³ஸேன த³ஸ்ஸெந்தோ ‘‘உபி⁴ன்னங் தே³வராஜூன’’ந்திஆதி³மாஹ. ஸங்கா³மோ ஸமுபட்டி²தோதி ஸங் ஸுட்டு² கா³மோ கலஹத்தா²ய உபக³மனந்தி ஸங்கா³மோ, ஸோ ஸங்கா³மோ ஸங் ஸுட்டு² உபட்டி²தோ, ஏகட்டா²னே உபக³ந்த்வா டி²தோதி அத்தோ². அஹோஸி ஸமுபப்³யூள்ஹோதி ஸங் ஸுட்டு² உபஸமீபே ராஸிபூ⁴தோதி அத்தோ².
20. So aparabhāge pubbakusalaṃ saritvā somanassajāto pubbacaritāpadānaṃ pakāsento ubhinnaṃ devarājūnantiādimāha. Tattha sucilomakharalomaāḷavakakumbhīrakuverādayo viya nāmagottena apākaṭā dve yakkharājāno aññāpadesena dassento ‘‘ubhinnaṃ devarājūna’’ntiādimāha. Saṅgāmo samupaṭṭhitoti saṃ suṭṭhu gāmo kalahatthāya upagamananti saṅgāmo, so saṅgāmo saṃ suṭṭhu upaṭṭhito, ekaṭṭhāne upagantvā ṭhitoti attho. Ahosi samupabyūḷhoti saṃ suṭṭhu upasamīpe rāsibhūtoti attho.
21. ஸங்வேஜேஸி மஹாஜனந்தி தேஸங் ராஸிபூ⁴தானங் யக்கா²னங் ஆகாஸே நிஸின்னோ ப⁴க³வா சதுஸச்சத⁴ம்மதே³ஸனாய ஸங் ஸுட்டு² வேஜேஸி, ஆதீ³னவத³ஸ்ஸனேன க³ண்ஹாபேஸி விஞ்ஞாபேஸி போ³தே⁴ஸீதி அத்தோ². ஸேஸங் ஸப்³ப³த்த² உத்தானமேவாதி.
21.Saṃvejesi mahājananti tesaṃ rāsibhūtānaṃ yakkhānaṃ ākāse nisinno bhagavā catusaccadhammadesanāya saṃ suṭṭhu vejesi, ādīnavadassanena gaṇhāpesi viññāpesi bodhesīti attho. Sesaṃ sabbattha uttānamevāti.
ஸரணக³மனியத்தே²ரஅபதா³னவண்ணனா ஸமத்தா.
Saraṇagamaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. ஸரணக³மனியத்தே²ரஅபதா³னங் • 3. Saraṇagamaniyattheraapadānaṃ
